Mga Pamangkot Gikan sa mga Bumalasa

May negatibo bala nga epekto ang pagkadihimpit sang ulay nga si Maria sa pagpanamkon niya kay Jesus?

Nahanungod sa “pagkabun-ag ni Jesus,” ang inspirado nga rekord nagasiling: “Sang tion nga ang iya iloy nga si Maria ginpangako nga ipakasal kay Jose, natukiban sia nga nagamabdos paagi sa balaan nga espiritu sa wala pa sila maghiusa.” (Mateo 1:18) Sa pagkamatuod, may daku gid nga bahin ang balaan nga espiritu sang Dios sa pagmabdos ni Maria.

Apang, kamusta naman si Maria? May bahin bala ang iya egg cell (itlog) sa iya pagmabdos? Bangod sang mga saad sang Dios kanday Abraham, Isaac, Jacob, Juda, kag Hari David⁠​—⁠​mga katigulangan ni Maria​—⁠ang mabun-ag nga bata matuod gid nila nga kaliwat. (Genesis 22:18; 26:24; 28:10-14; 49:10; 2 Samuel 7:16) Kay kon indi, paano ang bata nga ibun-ag ni Maria mangin ang may kinamatarong nga manunubli sini nga mga saad sang Dios? Dapat nga anak gid sia ni Maria.​—⁠Lucas 3:23-34.

Ang anghel ni Jehova nagpakita sa ulay nga si Maria, nga nagasiling: “Indi ka mahadlok, Maria, kay ginkahamut-an ka sang Dios; kag, yari karon! magapanamkon ka sa imo taguangkan kag magaanak sing isa ka anak nga lalaki, kag tawgon mo ang iya ngalan nga Jesus.” (Lucas 1:​30, 31) Sa tion sang pagpanamkon, nagakapertilisar ang itlog. Ginpahanabo ni Jehova nga Dios nga mangin pertilisado ang itlog sa taguangkan ni Maria, ginhimo ini paagi sa pagsaylo sang kabuhi sang iya bugtong nga Anak halin sa espiritu nga duog pakadto sa duta.​—⁠Galacia 4:4.

Puwede bala mangin himpit kag wala sing sala sa lawas ang bata nga ginpanamkon sa sini nga paagi sang isa ka di-himpit nga babayi? Paano nagapanghikot ang kasuguan sang pagpanubli kon maghiusa ang himpit kag di-himpit? Dumduma nga gingamit ang balaan nga espiritu sa pagliton sa himpit nga puwersa sang kabuhi sang anak sang Dios kag ginbangdan sang pagpanamkon. Nagdula ini sang pagkadihimpit sa itlog ni Maria, sa amo nagpatubas ini sang genetiko nga sulundan nga himpit halin sa umpisa.

Sa ano man nga paagi, mapat-od naton nga ang pagpanghikot sadto sang balaan nga espiritu sang Dios naggarantiya sang kadalag-an sang katuyuan sang Dios. Nagpaathag si anghel Gabriel kay Maria: “Ang balaan nga espiritu magakara sa imo, kag ang gahom sang Labing Mataas magalandong sa imo. Bangod man sina nga rason ang ibun-ag tawgon nga balaan, Anak sang Dios.” (Lucas 1:35) Huo, ang balaan nga espiritu sang Dios, kon sa aton pa, nangin isa ka maamligon nga taming agod wala sing pagkadihimpit ukon makahalit nga impluwensia ang makadagta sa nagatubo nga sibudbod kutob sa pagpanamkon.

Maathag nga ang himpit tawhanon nga kabuhi ni Jesus naghalin sa iya langitnon nga Amay, indi sa bisan kay sin-o nga tawo. “Gin-amanan [sia ni Jehova] sing lawas,” kag si Jesus​—⁠kutob sa pagpanamkon sa iya padayon⁠​—⁠​“wala [gid] sing dagta, napain gikan sa mga makasasala.”​—⁠Hebreo 7:26; 10:5.

[Retrato sa pahina 19]

“Magapanamkon ka sa imo taguangkan kag magaanak sing isa ka anak nga lalaki”