Indi Pa Tigulang Para Magtuon

NATAWO si Kseniya sang 1897. May 3 sia ka anak nga babayi, isa ka anak nga lalaki, 15 ka apo, kag 25 ka apo sa tuhod. Bug-os kabuhi nga ginsunod niya ang gintudlo sang iya mga ginikanan. Bisan pa isa sia ka refugee sa Moscow halin sa may inaway nga Abkhaz Republic, nga nahamtang sa ulot sang Black Sea kag Caucasus, kontento na sia sa iya kabuhi, ilabi na sa iya namat-an nga relihion.

Sang 1993, nangin Saksi ni Jehova ang anak nga babayi ni Kseniya nga si Meri. Ginsugiran ni Meri si Kseniya tuhoy kay Jehova nga Dios kag sa Biblia, apang indi niya luyag mamati. Pirme niya ginasiling sa iya anak, “Tigulang na ako para magtuon sing bag-o nga butang.”

Walay sapayan sini, padayon sia nga ginsugiran tuhoy sa Biblia ni Meri nga iya anak; ni Londa nga asawa sang iya apo; kag nanday Nana kag Zaza nga iya mga apo sa tuhod, nga tanan nangin mga Saksi ni Jehova. Isa ka gab-i sang 1999, ginbasahan nila si Kseniya sing isa ka kasulatan nga nagtandog sang iya tagipusuon. Ini amo ang makatalandog nga mga pulong ni Jesus sa matutom nga mga apostoles sang ginpasad niya ang Panihapon sang Ginuo. (Lucas 22:19, 20) Sa edad nga 102, namat-od si Kseniya sadto nga gab-i nga magtuon sa Biblia.

“Pagkatapos magkabuhi sing 102 ka tuig,” siling ni Kseniya, “nahangpan ko sang ulihi ang kahulugan sang kabuhi. Nahangpan ko karon nga wala na sing mas maayo pa sangsa alagdon ang aton dalayawon kag mahigugmaon nga Dios, si Jehova. Mapagsik pa ako kag mapagros. Makabasa ako nga wala nagapangantipara kag aktibo nga nagapakig-angot sa akon pamilya.”

Sang Nobiembre 5, 2000, nabawtismuhan si Kseniya. Sia nagsiling: “Karon ginahatag ko ang akon kabuhi kay Jehova agod alagaron sia sing mahigugmaon. Nagapahamtang ako sing mga magasin kag tract samtang nagapungko sa paradahan sang bus malapit sa akon puluy-an. Pirme ako ginaduaw sang akon mga paryente, kag malipayon ko nga ginapaambit sa ila ang kamatuoran tuhoy kay Jehova.”

Ginakalangkagan ni Kseniya ang adlaw nga ang ‘iya unod mangin linghod pa sangsa pagkapamatan-on, kag magabalik sia sa mga adlaw sang iya batan-on nga kapagsik.’ (Job 33:25) Kon ang isa nga gatuson ka tuig na ang edad wala nagabatyag nga tigulang na para magtuon sang kahulugan sang kabuhi halin sa Biblia, kamusta ka naman?