Magpabilin nga Nagamata, Magpadayon sing Maisugon!

Report Sa Pinasahi nga mga Miting

SIN-O gid ang makapanghiwala nga nagakabuhi na kita karon sa “makahalanguyos nga mga tion nga mabudlay pakigbagayan”? Subong mga Saksi ni Jehova, indi kita luwas sa mga pag-ipit sa pagkabuhi sa “katapusan nga mga adlaw.” (2 Timoteo 3:​1-5) Apang nahibaluan naton nga nagakinahanglan sing bulig ang mga tawo. Wala nila mahangpan ang kahulugan sang mga hitabo sa kalibutan. Kinahanglan nila ang paglipay kag paglaum. Ano ang aton panguna nga katungdanan sa pagbulig sa aton mga isigkatawo?

Ginhatag sang Dios sa aton ang katungdanan nga ipaambit ang maayong balita sang ginpasad nga Ginharian sang Dios. (Mateo 24:14) Dapat mahibaluan sang mga tawo nga ining langitnon nga Ginharian amo lamang ang paglaum sang katawhan. Apang, indi pirme maayo ang pagbaton sa aton mensahe. Sa iban nga mga lugar ginadumilian ang aton hilikuton kag ginahingabot ang aton mga kauturan. Apang, wala kita nagapangampo. Nagasalig sing bug-os kay Jehova, determinado kita nga magpabilin nga nagamata kag nagapadayon sing maisugon, nga nagabantala sang maayong balita sing padayon.—Binuhatan 5:42.

Hayag inang malig-on nga determinasyon sa pinasahi nga mga miting nga ginhiwat sang Oktubre 2001. Sang Sabado, Oktubre 6, ang tuigan nga miting sang Watch Tower Bible and Tract Society of Pennsylvania ginhiwat sa Jersey City, New Jersey, Assembly Hall of Jehovah’s Witnesses sa Estados Unidos. * Sang masunod nga adlaw, ginhiwat ang dugang nga mga miting sa apat ka lokasyon, tatlo sa Estados Unidos kag isa sa Canada. *

Sa iya nagabukas nga pamulongpulong sa tuigan nga miting, ginpatuhuyan sang tsirman, nga si Samuel F. Herd, katapo sang Nagadumala nga Hubon sang mga Saksi ni Jehova, ang Salmo 92:1, 4 kag nagsiling: “Luyag naton ipakita nga mapinasalamaton kita.” Sa pagkamatuod, ginhatag ang mga rason sa pagpasalamat sa lima ka report halin sa bug-os nga kalibutan.

Mga Report Halin sa Nagkalainlain nga Duog

Si Utod Alfred Kwakye nagreport tuhoy sa pag-uswag sang pagbantala nga hilikuton sa Ghana, kilala anay subong Gold Coast. Gindumilian anay sa sina nga pungsod ang aton hilikuton sa madamo  nga tuig. Nagapamangkot ang mga tawo: “Ngaa gindumilian kamo? Ano ang ginhimo ninyo?” Nagbukas ini sang mga kahigayunan nga makapanaksi, paathag ni Utod Kwakye. Sang 1991 sang ginkuha ang pagdumili, may 34,421 ka Saksi ni Jehova sa Ghana. Sang Agosto 2001, 68,152 ang kabug-usan—98 porsiento nga pag-uswag. May mga plano sa karon sa pagpatindog sang isa ka Assembly Hall nga makapalingkod sing 10,000 ka tawo. Maathag nga ginahimuslan gid sang aton espirituwal nga mga kauturan sa Ghana ang ila relihioso nga kahilwayan.

Walay sapayan sang kagamo sa politika, ang aton mga kauturan sa Ireland aktibo nga nagpakigbahin sa ministeryo, kag gintahod sila bangod sang ila pagkawalay nadampigan. Sa Ireland, may 115 ka kongregasyon sa 6 ka sirkito, siling sang coordinator sang Komite sang Sanga nga si Peter Andrews. Ginsugid ni Utod Andrews ang eksperiensia ni Liam, isa ka dies-anyos nga bata nga lalaki nga maisugon nga nagapanaksi sa eskwelahan. Nakapahamtang si Liam sing Ang Akon Libro Sang mga Sugilanon sa Biblia, nga ginbalhag sang mga Saksi ni Jehova, sa iya 25 ka kaklase kag sa iya maestra. Luyag ni Liam magpabawtismo, apang may nagsiling sa iya nga bata pa sia katama. Si Liam nagsabat: “Indi ang akon edad kundi ang akon gugma kay Jehova ang dapat mangin talaksan. Ipakita sang akon pagpabawtismo kon daw ano ka daku sang gugma ko sa iya.” Tulumuron ni Liam nga mangin misyonero.

Sang 1968 may 5,400 ka manugbantala sang maayong balita sa Venezuela. Apang karon may kapin sa 88,000, siling ni Stefan Johansson, coordinator sang Komite sang Sanga. Kag may posibilidad sa dugang pa nga pag-uswag bangod kapin sa 296,000 ang nagtambong sa Memoryal sang 2001. Sang Disiembre 1999, ang mabunok nga mga pag-ulan ginbangdan sang pagdalhay sang lunang nga nagpatay sa ginbulubanta nga 50,000 ka tawo, lakip sang pila ka Saksi. Ang isa ka Kingdom Hall nasudlan sing lunang halos tubtob sa kisame. Sang may nagpanugda nga biyaan na lang ang tinukod, nagsabat ang mga kauturan: “Indi! Amo ini ang amon Kingdom Hall, kag indi namon luyag nga biyaan ini karon.” Nagpangabudlay sila sa sini, ginkuha ang tonelada nga lunang, bato, kag iban pa nga sagbot. Ginkay-o ang tinukod, kag ang mga kauturan nagsiling nga mas matahom ini karon kon ipaanggid sang wala pa mag-abot ang kalamidad!

May 87 ka lenguahe kag dialekto nga ginagamit sa Pilipinas, siling ni Utod Denton Hopkinson, coordinator sang Komite sang Sanga. Sang nagligad nga tuig sang pag-alagad, ang kompleto nga New World Translation of the Holy Scriptures ginpaguwa sa tatlo ka panguna nga lenguahe sa pungsod—ang Cebuano, Iloko, kag Tagalog. Ginsugid ni Utod Hopkinson ang eksperiensia sang isa ka  nuebe anyos nga bata nga lalaki nga nakabasa sang libro nga Maayong Balita—Sa Pagpahalipay sa Imo, nga ginbalhag sang mga Saksi ni Jehova. Nagtigayon sia sing iban pa nga mga publikasyon halin sa sanga talatapan, kag ginbasa man niya ini, apang ginpamatukan sia sang iya pamilya. Pila ka tuig sang ulihi sang nagaeskwela sia sa pagkadoktor, nakig-angot sia sa sanga talatapan kag nagpangabay sing pagtuon sa Biblia. Nabawtismuhan sia sang 1996 kag nagsulod sa gilayon sa bug-os tion nga ministeryo. Nagaalagad sia karon kaupod sang iya asawa sa sanga talatapan.

‘Ang Puerto Rico nagapadala sing madamong Saksi sa luwas,’ paathag sang coordinator sang Komite sang Sanga nga si Ronald Parkin. May mga 25,000 ka manugbantala sa isla, kag amo gihapon ang kadamuon sa pila na ka tuig. Ngaa? Kay man, ginabulubanta nga “nagapadala” ang Puerto Rico sing mga 1,000 ka manugbantala kada tuig sa Estados Unidos, madamo sa ila ang nagasaylo bangod sang pangabuhi. Ginsugid ni Utod Parkin ang isa ka talalupangdon nga desisyon sang korte tuhoy kay Luis, isa ka 17-anyos nga Saksi nga may leukemia. Bangod wala magpatughong sing dugo si Luis, gindala sa korte ang iya kaso. Luyag sang huwes nga masugilanon sia sing personal, gani ginduaw niya si Luis sa ospital. Ginpamangkot sia ni Luis: “Ngaa kon makahimo ako sing grabe nga krimen, hukman ninyo ako subong isa ka adulto, apang kon luyag ko tumanon ang Dios, ginakabig ninyo ako nga menor-de-edad?” Kumbinsido ang huwes nga si Luis isa ka hamtong nga menor-de-edad kag makadesisyon sa iya kaugalingon.

Pagkatapos sang mga report halin sa malayo nga mga pungsod, gin-interbyu ni Harold Corkern, sang Komite sang Sanga sa Estados Unidos, ang apat ka madugay na nga alagad ni Jehova. Naghinguyang si Arthur Bonno sing 51 ka tuig sa bug-os tion nga pag-alagad kag nagaalagad sia karon sa Komite sang Sanga sa Ecuador. Naghinguyang si Angelo Catanzaro sing 59 ka tuig sa bug-os tion nga pag-alagad, ang daku nga bahin sini subong nagalakbay nga manugtatap. Si Richard Abrahamson naggradwar sa Gilead School sang 1953, kag may pribilehiyo sia nga dumalahan ang hilikuton sa Denmark sa sulod sang 26 ka tuig antes magbalik sa Brooklyn Bethel. Sa katapusan, nalipay ang tanan nga mabatian ang 96-anyos nga si Carey W. Barber. Ginbawtismuhan sang 1921, naghinguyang si Utod Barber sing 78 ka tuig sa bug-os tion nga ministeryo kag nangin katapo sang Nagadumala nga Hubon kutob sang 1978.

Makapapagsik nga mga Pamulongpulong

Ang tuigan nga miting naglakip sang isa ka serye sang makapahunahuna nga mga pamulongpulong. Ginbinagbinag ni Utod Robert W. Wallen ang tema nga “Isa ka Katawhan Para sa Iya Ngalan.” Katawhan kita para sa ngalan sang Dios, kag makita kita sa kapin sa 230 ka kadutaan. Ginhatagan kita ni Jehova “sing palaabuton kag sing paglaum.” (Jeremias 29:11) Dapat kita magpadayon sa pagpalapnag sang Ginharian sang Dios, ginapaambit ang matahom nga mensahe sang paglipay kag paglugpay. (Isaias 61:⁠1) “Kabay nga sa adlaw-adlaw,” hinakop ni Utod Wallen, “padayon kita nga nagakabuhi suno sa ngalan nga gintawag sa aton, mga Saksi ni Jehova.”—Isaias 43:10.

Ang katapusan nga bahin sang programa isa ka simposium sang tatlo ka katapo sang Nagadumala nga Hubon. Gintig-uluhan ini nga “Karon Na ang Tion nga Magpabilin nga Nagamata, Magtindog nga Malig-on, kag Magpakabakod.”—1 Corinto 16:13.

Una, ginbinagbinag ni Utod Stephen Lett ang topiko nga “Magpabilin nga Nagamata sa Sining Ulihi nga Takna.” Ang pisikal nga pagtulog isa ka dulot, paathag ni Utod Lett. Nagapapagsik ini sa aton. Apang, ang espirituwal nga pagtulog indi gid maayo. (1 Tesalonica 5:⁠6) Paano, kon amo, kita makapabilin nga nagamata sa espirituwal? Ginbalay ni Utod Lett ang tatlo ka espirituwal nga “pildoras”: (1) Mangin masako sa hilikuton sang Ginuo. (1 Corinto 15:58) (2) Mangin mahunahunaon sa imo espirituwal nga kinahanglanon. (Mateo 5:⁠3) (3) Maghulag sa pasad-Biblia nga laygay agod makapanghikot sing maalamon.—Hulubaton 13:20.

Ginhatag ni Utod Theodore Jaracz ang makapapagsik nga pamulongpulong nga natig-uluhan “Magtindog Sing Malig-on sa Idalom Sang Pagtilaw.” Ginapatuhuyan ang Bugna 3:10, namangkot si Utod Jaracz: “Ano ining ‘takna sang pagtilaw’?” Ini nga pagtilaw nagaabot “sa adlaw sang Ginuo,” ang panahon nga nagakabuhi kita karon. (Bugna 1:10) May kahilabtanan ang pagtilaw sa panguna nga hulusayon—pabor bala kita sa ginpasad nga Ginharian sang Dios ukon sa malauton nga sistema sang mga butang ni Satanas? Samtang wala  pa matapos ini nga takna sang pagtilaw, magaatubang gid kita sang mga pagtilaw ukon mga kabudlayan. Magapabilin bala kita nga matutom kay Jehova kag sa iya organisasyon? ‘Dapat naton ipakita ini nga katutom subong mga indibiduwal,’ siling ni Utod Jaracz.

Sa katapusan, ginbinagbinag ni Utod John E. Barr ang tema nga “Magpakabakod Subong Espirituwal nga Tawo.” Ginapatuhuyan ang Lucas 13:23-25, ginsiling niya nga dapat kita manikasog sa “pagsulod sa makitid nga ganhaan.” Madamo ang napaslawan bangod wala sila mag-ukod sa pagpakabakod. Agod mangin hamtong nga mga Cristiano, dapat naton tun-an nga iaplikar ang mga prinsipio sang Biblia sa tanan nga bahin sang aton kabuhi. Si Utod Barr nagpalig-on: “Pat-od ko nga magaugyon kamo nga karon na ang tion agod (1) unahon gid si Jehova; (2) magpakabakod; kag (3) magpanikasog sa paghimo sang kabubut-on ni Jehova. Sa sining paagi makasulod kita sa makitid nga ganhaan nga nagadul-ong sa makalilipay kag walay katapusan nga kabuhi.”

Samtang nagahingapos ang tuigan nga miting, may isa ka pamangkot nga wala pa masabat: Ano ang teksto para sa tuig 2002? Ginsabat ini nga pamangkot sang masunod nga adlaw.

Dugang nga Miting

May paghawathawat gid sang Domingo sang aga sang nagsugod ang programa sa dugang nga miting. Ginsugdan ini paagi sa sumaryo sang tulun-an sa Lalantawan sa amo nga semana, kag ginsundan ini sang malip-ot nga presentasyon sang pila ka talalupangdon nga punto sang tuigan nga miting. Masunod, nalipay ang tanan nga mabatian ang pamulongpulong pasad sa teksto para sa tuig 2002: “Kari sa akon, . . . kag paumpawan ko kamo.” (Mateo 11:28) Ang pamulongpulong napasad sa tulun-an nga mga artikulo nga ginbalhag sa Disiembre 15, 2001, nga guwa sang Ang Lalantawan.

Pagkatapos sini, ang iban nga nangin mga delegado sa espesyal nga “Mga Manunudlo Sang Pulong Sang Dios” nga mga Kombension sa Pransia kag Italya sang Agosto 2001 nagpaambit sang ila mga impresyon. * Sa ulihi, subong talalupangdon nga bahin sang programa sa amo nga adlaw, duha ka katapusan nga pamulongpulong ang ginhatag sang nagduaw nga mga humalambal halin sa Brooklyn Bethel.

Ang nahauna natig-uluhan sing “Maisugon nga Nagasalig kay Jehova sa Sining Mabudlay nga mga Tion.” Ginbinagbinag sang humalambal ang masunod nga pangunang mga punto: (1) Dapat gid magsalig sing maisugon kay Jehova ang katawhan sang Dios. Madamong halimbawa sa Biblia sang mga tawo nga nagpakita sing kaisog kag pagtuo walay sapayan sang pagpamatok. (Hebreo 11:⁠1–12:⁠3) (2) Nagahatag si Jehova sing malig-on nga mga rason agod magsalig kita sa iya sing bug-os. Ginapasalig sang iya mga binuhatan kag sang iya Pulong nga nagaulikid sia sa iya mga alagad kag indi gid niya sila pagkalimtan. (Hebreo 6:10) (3) Kinahanglanon gid karon ang kaisog kag pagsalig. ‘Sentro kita sang pagdumot,’ subong sang gintagna ni Jesus. (Mateo 24:⁠9) Agod makabatas, dapat kita magsandig sa Pulong sang Dios, magsalig nga yari sa aton ang iya espiritu, kag mangin maisog agod padayon nga makabantala sang maayong balita. (4) Ginapakita sang mga halimbawa nga nagaatubang kita karon sing pagpamatok. Natandog gid ang tanan samtang ginasaysay sang humalambal kon ano ang ginabatas sang aton mga kauturan sa Armenia, Pransia, Georgia, Kazakhstan, Rusya, kag sa Turkmenistan. Sa pagkamatuod, karon na ang tion agod ipakita ang kaisog kag ang pagsalig kay Jehova!

Ginbinagbinag sang katapusan nga humalambal ang tema nga “Nahiusa nga Nagapadayon Upod sa Organisasyon ni Jehova.” Gintuptupan sa pamulongpulong ang pila ka sibu-sa-tion nga mga punto. (1) Talalupangdon gid ang pag-uswag sang katawhan ni Jehova. Nagakuha sang atension sang publiko ang aton hilikuton nga pagbantala kag ang aton mga kombension. (2) Ginpasad ni Jehova  ang isa ka organisasyon nga nahiusa. Sang 29 C.E., ginhaplasan si Jesus sang balaan nga espiritu sa katuyuan nga tipunon “ang tanan nga butang”—ang mga may langitnon nga paglaum subong man ang mga may dutan-on nga paglaum⁠—​sa nahiusa nga pamilya sang Dios. (Efeso 1:8-10) (3) Talalupangdon nga ginapakita sang mga kombension ang aton internasyonal nga paghiusa. Nangin hayag gid ini sa pinasahi nga mga kombension nga ginhiwat sa Pransia kag Italya sang nagligad nga Agosto. (4) Ginbaton ang isa ka makapapagsik nga resolusyon sa Pransia kag Italya. Ginsambit sang humalambal ang pila ka bahin sang makapapagsik nga resolusyon. Ang bug-os nga kaundan sang resolusyon makita sa ubos.

Sa konklusion sang katapusan nga pamulongpulong, ginbasa sang nagduaw nga humalambal ang isa ka makatalandog nga pahibalo nga ginhanda sang Nagadumala nga Hubon. Nagasiling ini, sing bahin: “Karon na ang tion agod magpabilin nga nagamata kag nagabantay, nga ginahantop ang lakat sang mga hitabo sa kalibutan. . . . Luyag namon ipaalinton sa inyo ang mahigugmaon nga kabalaka sang Nagadumala nga Hubon sa inyo kag sa tanan nga katawhan sang Dios. Kabay nga pakamaayuhon niya kamo sing bugana sa paghimo ninyo sang iya kabubut-on sing bug-os kalag.” Determinado ang katawhan ni Jehova bisan diin nga magpabilin nga nagamata sa sining mabudlay nga mga tion kag magpadayon sing maisugon upod sa nahiusa nga organisasyon ni Jehova.

[Mga nota]

[Kahon/Mga retrato sa pahina 29-31]

Resolusyon

Sang Agosto 2001, ginhiwat ang pinasahi nga “Mga Manunudlo Sang Pulong Sang Dios” nga mga Kombension sa Pransia kag Italya. Sa sini nga mga kombension ginpresentar ang isa ka makapapagsik nga resolusyon. Ang masunod amo ang kaundan sini nga resolusyon.

“SUBONG MGA SAKSI NI JEHOVA, kita tanan nga nagtipon sa sining ‘Mga Manunudlo Sang Pulong Sang Dios’ nga Kombension gintudluan paagi sa panudlo nga mapuslanon gid. Maathag nga ginpakilala ang ginhalinan sini nga panudlo. Ini nga panudlo wala maghalin sa tawo. Naghalin ini sa Isa nga ginlaragway ni manalagna Isaias sang una subong ang aton ‘Dakung Instruktor.’ (Isaias 30:20) Talupangda ang pahanumdom ni Jehova nga nasulat sa Isaias 48:17: ‘Ako, si Jehova, amo ang imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga dapat mo laktan.’ Paano niya ini ginahimo? Una amo ang paagi sa pinakamadamo sing badbad kag pinakalapnag nga libro sa kalibutan, ang Biblia, diin maathag kita nga ginasilingan: ‘Ang bug-os nga Kasulatan inspirado sang Dios kag mapuslanon.’—2 Timoteo 3:16.

“Sa karon, kinahanglanon gid sang katawhan ining mapuslanon nga panudlo. Ngaa masiling ini? Sa pagbinagbinag sang nagabag-o kag makalilibog nga danyag sini nga kalibutan, ano ang ginbaton sang nagahunahuna nga mga tawo? Amo ini: Bisan pa minilyon ang gintudluan sang mga sistema sa edukasyon sang kalibutan, makasulubo gid nga wala sing matuod nga mga prinsipio kag indi mapatuhay ang husto kag sala. (Isaias 5:20, 21) May kakulang sing ihibalo sa Biblia kag sa kaundan sini. Bisan pa bangod sang teknolohiya may madamo nga impormasyon paagi sa paggamit sing mga kompyuter, diin na ang mga sabat sa importante nga mga pamangkot subong sang, Ano ang katuyuan sang kabuhi? Paano naton mahangpan ang mga nagakahanabo sa aton panahon? May malig-on bala nga paglaum sa palaabuton? Magaluntad pa ayhan ang paghidait kag kalig-unan? Isa pa, sa mga librarya may madamo nga mga reperensia nga nagatuptop sang halos tanan nga topiko tuhoy sa mga hilikuton sang tawo. Sa gihapon, ginasulit sang mga tawo ang nagligad nga mga sayop. Nagalala ang krimen. Nagabalik ang mga balatian nga abi anay nadula na, samtang ang iban naman, subong sang AIDS, makahaladlok nga nagalapta. Nagakabungkag ang  mga pamilya sa makapakibot nga kadamuon. Ginaguba sang polusyon ang palibot. Ginabutang sa katalagman sang terorismo kag sang mga hinganiban sa tingob nga pagpamatay ang paghidait kag kalig-unan. Nagadamo pa gid ang mga problema nga wala sing solusyon. Ano ang aton nagakaigo nga katungdanan sa pagbulig sa aton isigkatawo sa sining mabudlay nga mga tion? May panudlo bala nga nagapaathag sang kabangdanan sang nadangatan sang katawhan kag wala lamang nagatudlo sang paagi padulong sa mas maayo nga kabuhi karon kundi nagahatag man sing masaligan kag pat-od nga paglaum sa palaabuton?

“Ang aton Makasulatanhon nga komisyon amo ang ‘maglakat kag maghimo sing mga disipulo sa mga tawo sa tanan nga kapungsuran, nagatudlo sa ila nga tumanon ang tanan nga butang nga ginsugo ni Cristo.’ (Mateo 28:19, 20) Ginsugo ini ni Jesucristo pagkatapos nga napatay sia kag ginbanhaw, sang nabaton niya ang tanan nga awtoridad sa langit kag sa duta. Nagalabaw ini sa tanan nga hilikuton sang mga tawo. Sa pagtamod sang Dios, dapat unahon ang aton komisyon, nga nasentro sa espirituwal nga mga kinahanglanon sang mga ginagutom sa pagkamatarong. May malig-on kita nga mga rason sa Kasulatan sa pagtuman sini nga komisyon sing serioso.

“Dapat unahon ini nga hilikuton sa aton kabuhi. Upod ang pagpakamaayo kag bulig sang Dios, himuon ini nga hilikuton, walay sapayan sang madamong nagatublag nga mga impluwensia, balagbag, kag pagpamatok halin sa mga relihion kag sa politika, nga gintuyo sa pag-upang sang pag-uswag sining bug-os kalibutan nga programa sa pagtudlo. Nagasalig kita kag nagatuo nga ining hilikuton padayon nga magauswag kag matapos gid. Ngaa makapat-od gid kita? Bangod ginpangako ni Ginuong Jesucristo nga mangin kaupod naton sia sa aton hatag-Dios nga ministeryo tubtob sa konklusion sining sistema sang mga butang.

“Nagahilapit na sa katapusan ang nalisdan nga katawhan. Dapat matapos ang aton karon komisyon antes mag-abot ang katapusan. Gani, kita, subong mga Saksi ni Jehova, nagapahayag nga:

“Una: Subong dedikado nga mga ministro, determinado kita nga unahon sa aton kabuhi ang mga intereses sang Ginharian kag padayon nga mag-uswag sa espirituwal. Agod mahimo ini, nagapangamuyo kita nahisanto sa mga pulong sang Salmo 143:10: ‘Tudlui ako sa paghimo sang imo kabubut-on, kay ikaw amo ang akon Dios.’ Dapat kita mangin mapisan nga mga estudyante, ginapanikasugan nga basahon ang Biblia adlaw-adlaw, personal nga nagatuon kag nagapanalawsaw. Agod madayag sa tanan nga tawo ang aton pag-uswag, magapanikasog gid kita sa paghanda kag sa pagbenepisyo sing bug-os sa teokratikong edukasyon nga matigayon sa mga miting sa kongregasyon, sa sirkito nga mga asambleya, kag sa distrito, nasyonal, kag internasyonal nga mga kombension.—1 Timoteo 4:15; Hebreo 10:23-25.

“Ikaduha: Agod matudluan sang Dios, magakaon lamang kita sa iya latok kag mahalungon nga tumanon ang paandam sang Biblia tuhoy sa makapatalang nga mga panudlo sang mga demonyo. (1 Corinto 10:21; 1 Timoteo 4:⁠1) Likawan naton ilabi na ang makahalalit nga mga butang, lakip ang relihioso nga mga kabutigan, walay pulos nga pagpangatarungan, makahuluya nga seksuwal nga mga buhat, ang salot sang pornograpiya, malain nga kalingawan, kag ang tanan nga butang nga indi ‘suno sa makapapagros nga panudlo.’ (Roma 1:26, 27; 1 Corinto 3:20; 1 Timoteo 6:⁠3; 2 Timoteo 1:13) Sa pagpadungog sa ‘dulot nga mga lalaki,’ nga kalipikado sa pagtudlo sang maayo, tahuron gid naton ang ila mga panikasog kag bug-os tagipusuon nga magkooperar sa ila sa pagsakdag sa matinlo kag matarong nga mga talaksan sa moral kag espirituwal sang Pulong sang Dios.—Efeso 4:7, 8, 11, 12; 1 Tesalonica 5:12, 13; Tito 1:9.

“Ikatlo: Subong Cristianong mga ginikanan, bug-os tagipusuon naton nga panikasugan ang pagtudlo sa aton kabataan indi lamang sa hambal kundi sa halimbawa man. Panguna naton nga ginakabalak-an nga mabuligan sila halin sa ila pagkalapsag nga ‘mahibaluan ang balaan nga mga kasulatan agod mangin maalam para sa kaluwasan.’ (2 Timoteo 3:15) Dumdumon gid naton pirme nga ang pagpadaku naton sa ila sa disiplina kag sa nagatadlong nga panghunahuna ni Jehova amo ang magahatag sa ila sang pinakamaayo nga kahigayunan nga maeksperiensiahan ang saad sang Dios nga ‘magamaayo sila kag magakabuhi sing malawig sa duta.’—Efeso 6:1-4.

“Ikap-at: Kon nagaatubang sing mga kabalaka kag mabudlay nga mga problema, una sa tanan,  ‘ipahibalo naton sa Dios ang aton mga pangabay,’ nagasalig nga “ang paghidait sang Dios nga nagalabaw sa tanan nga panghunahuna” sang tawo magaamlig sa aton. (Filipos 4:6, 7) Bangod napaidalom kita sa gota ni Cristo, makakita kita sing kaumpawan. Bangod nakahibalo kita nga nagaulikid ang Dios sa aton, indi kita magapangalag-ag sa paghaboy sang aton mga kabalaka sa iya.—Mateo 11:28-30; 1 Pedro 5:6, 7.

“Ikalima: Bilang pagpasalamat kay Jehova tungod sang pribilehiyo nga mangin mga manunudlo sang iya Pulong, dugangan pa naton ang aton pagpanikasog sa ‘paggamit sing matadlong sang iya pulong sang kamatuoran’ kag sa ‘pagtuman sing bug-os sang aton ministeryo.’ (2 Timoteo 2:15; 4:⁠5) Bangod nakahibalo gid kita kon ano ang nadalahig, handum gid naton nga makita ang mga takus kag palambuon ang ginsab-ug nga binhi. Dugang pa, pauswagon naton ang aton pagpanudlo paagi sa epektibo nga pagdumala sing dugang pa nga mga pagtuon sa Biblia sa puluy-an. Bangod sini nagapahisuno pa gid kita sa kabubut-on sang Dios nga ‘tanan nga sahi sang tawo maluwas kag makadangat sa sibu nga ihibalo sang kamatuoran.’—1 Timoteo 2:3, 4.

“Ikan-om: Sa sulod sang nagligad nga siglo kag sa karon nga siglo, naeksperiensiahan sang mga Saksi ni Jehova sa madamong kadutaan ang nanuhaytuhay nga dagway sang pagpamatok kag paghingabot. Apang nangin kaupod naton si Jehova. (Roma 8:31) Ang iya wala nagasayop nga Pulong nagapasalig sa aton nga indi magmadinalag-on ang ‘bisan ano nga hinganiban nga himuon batok sa aton’ agod pauntaton, pahinayon, ukon padulugon ang aton pagbantala sang Ginharian kag pagpanudlo nga hilikuton. (Isaias 54:17) Sa maayo man ukon sa magamo nga panahon, indi kita magauntat sa paghambal sang kamatuoran. Determinado kita nga mangin madagmit sa pagtuman sa aton komisyon nga pagbantala kag pagpanudlo. (2 Timoteo 4:1, 2) Tuyo naton nga ipaambit sing bug-os kon posible ang maayong balita sang Ginharian sang Dios sa mga tawo sa tanan nga kapungsuran. Sa amo, padayon sila nga may kahigayunan nga matun-an ang tuhoy sa pagtigayon sing walay katapusan nga kabuhi sa matarong nga bag-ong kalibutan. Subong isa ka nahiusa nga hubon sang mga manunudlo sang Pulong sang Dios, determinado kita nga padayon nga sundon ang halimbawa sang Dakung Manunudlo, si Jesucristo, kag ipakita ang iya diosnon nga mga kinaiya. Tanan ini himuon naton sa kadungganan kag kadayawan sang aton Dakung Instruktor kag Manughatag-Kabuhi, si Jehova nga Dios.

“Ang tanan nga nagtambong sa sini nga kombension nga nagabaton sa sini nga resolusyon, magsiling palihug sing HUO!”

Sang ginhambal ang katapusan nga dinalan sang resolusyon sa 160,000 nga nagtipon sa tatlo ka kombension sa Pransia kag sa 289,000 sa siam ka lugar sa Italya, ginsinggit ang nagadaguhob nga “Huo” sa madamong lenguahe nga ginrepresentar sang mga delegado.