Ngaa Dapat Magpabawtismo?

“Lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila.”—MATEO 28:19.

1, 2. (a) Sa anong mga kahimtangan ginhimo ang iban nga mga pagbunyag? (b) Anong mga pamangkot ang ginapautwas tuhoy sa bunyag ukon bawtismo?

PAKUSOG nga ginbunyagan sang Prankista nga si Hari Carlomagno ang nalutos nga mga Saxon sang 775-77 C.E. “Ginkumbertir niya sila sing pakusog sa ginatawag nga Cristianismo,” sulat sang istoryador nga si John Lord. Subong man, sa tapos mapangasawa ang Griegong Ortodokso nga prinsesa sang 987 C.E., namat-od ang Ruso nga manuggahom nga si Vladimir I nga ang iya mga sakop dapat mangin “mga Cristiano.” Ginmando niya ang tingob nga pagbunyag sa iya katawhan—nagapahog nga ang mga indi magpabunyag patyon!

² Ini bala nga mga pagbunyag nagakaigo? May kabilinggan gid bala ini? Mahimo bala magpabunyag ukon magpabawtismo ang bisan sin-o lang?

Bawtismo​—Paano?

3, 4. Ngaa ang pagwisik ukon pagbubo sing tubig sa ulo indi nagakaigo sa Cristianong bawtismo?

³ Sang pakusog nga ginpabunyagan nanday Carlomagno kag Vladimir I ang mga tawo, ang ginhimo sining mga manuggahom wala nahisanto sa Pulong sang Dios. Ang matuod, wala sing pulos kon ang mga pagbawtismo pagwisik lamang, pagbubo sing tubig sa ulo, ukon pagtum-oy pa gani sa mga indibiduwal nga wala gintudluan sa kamatuoran sang Kasulatan.

⁴ Binagbinaga anay ang natabo sang nagkadto si Jesus nga taga-Nazaret kay Juan Bautista sang 29 C.E. Ginbawtismuhan ni Juan ang mga tawo sa Suba Jordan. Boluntaryo sila nga nagkadto sa iya agod magpabawtismo. Ginpatindog lang bala niya sila sa Jordan samtang ginabubuan niya ang ila mga ulo sing diutay nga tubig gikan sa suba ukon ginawisikan sila sini? Ano ang natabo sang ginbawtismuhan ni Juan si Jesus? Si Mateo nagreport nga sa tapos mabawtismuhan “gilayon nga nagbutwa si Jesus sa tubig.” (Mateo 3:16) Kon amo, nalapawan sia sing tubig, kay gintum-oy sia sa Suba Jordan. Subong man, ang debotado nga Etiopianhon nga eunuco ginbawtismuhan “sa tubig.” Ining tubig kinahanglanon bangod ang pagbawtismo  kay Jesus kag sa iya mga disipulo naglakip sang bug-os nga pagtum-oy.—Binuhatan 8:36.

5. Paano ginbawtismuhan sang unang mga Cristiano ang mga tawo?

⁵ Ang Griegong mga tinaga nga ginbadbad nga “pagbawtismo,” “bawtismo,” kag iban pa, nagapatuhoy sa pagtum-oy, pagtugmaw, ukon pagtugdang sa tubig. Ang Smith’s Bible Dictionary nagsiling: “Ang bawtismo nagakaigo kag literal nga nagakahulugan sing pagtum-oy.” Busa ginapatalupangod sang iban nga mga badbad sang Biblia “si Juan nga Manugtum-oy” kag “si Juan nga manugtugmaw.” (Mateo 3:1, Rotherham; Diaglott interlinear) Ang Augustus Neander’s History of the Christian Religion and Church, During the Three First Centuries nagsiling: “Ang bawtismo ginahimo anay paagi sa pagtum-oy.” Ang kilala nga Pranses nga sinulatan nga Larousse du XX^e Siècle (Paris, 1928) nagkomento: “Ang nahaunang mga Cristiano ginbawtismuhan paagi sa pagtum-oy kon diin may tubig.” Kag ang New Catholic Encyclopedia nagsiling: “Ang Bawtismo sa unang Simbahan maathag nga paagi sa pagtum-oy.” (1967, Tomo II, pahina 56) Gani sa karon, ang pagpabawtismo subong isa sang mga Saksi ni Jehova isa ka boluntaryo nga tikang nga nagakinahanglan sing bug-os nga pagtum-oy sa tubig.

Isa ka Bag-ong Rason Agod Magpabawtismo

6, 7. (a) Para sa ano nga katuyuan nagbawtismo si Juan? (b) Ano ang bag-o sa bawtismo nga ginhimo sang mga sumulunod ni Jesus?

⁶ Magkatuhay sing katuyuan ang mga bawtismo nga ginhimo ni Juan sa mga bawtismo nga ginhimo sang mga sumulunod ni Jesus. (Juan 4:1, 2) Si Juan nagbawtismo sa mga tawo subong dayag nga simbulo sang paghinulsol nila sa ila mga sala batok sa Kasuguan. * (Lucas 3:3) Apang may bag-o nga butang sa bawtismo nga ginhimo sang mga sumulunod ni Jesus. Sang Pentecostes 33 C.E., si apostol Pedro naglaygay sa iya mga tagpalamati: “Hinulsol kamo, kag magpabawtismo ang tagsatagsa sa inyo sa ngalan ni Jesucristo para sa kapatawaran sang inyo mga sala.” (Binuhatan 2:37-41) Bisan pa nagpamulong sia sa mga Judiyo kag sa mga proselita, wala nagsiling si Pedro nga ang bawtismo simbulo sang paghinulsol sa mga sala batok sa Kasuguan; wala man niya ginpahangop nga ang bawtismo sa ngalan ni Jesus nagalaragway sang pagdula sa mga sala.—Binuhatan 2:10.

⁷ Sa sadto nga hitabo, gingamit ni Pedro ang nahauna sa “mga yabi sang ginharian.” Sa ano nga katuyuan? Agod ipahayag sa iya mga tagpalamati ang ihibalo tuhoy sa kahigayunan nila nga makasulod sa Ginharian sang langit. (Mateo 16:19) Sanglit ginsikway sang mga Judiyo si Jesus subong Mesias, ang paghinulsol kag pagtuo sa iya isa ka bag-o kag importante gid nga butang sa pagpangayo kag sa pagbaton sing kapatawaran sa Dios. Makahatag sila sing dayag nga pamatuod sa sini nga pagtuo paagi sa pagpatugmaw sa tubig sa ngalan ni Jesucristo. Sa sining paagi masimbuluhan nila ang ila personal nga dedikasyon sa Dios paagi kay Cristo. Ang tanan nga luyag magpahamuot sa Dios dapat man magpakita sing kaanggid nga pagtuo, magdedikar sang ila kaugalingon kay Jehova nga Dios, kag maghimo sing Cristianong pagpabawtismo bilang simbulo sang bug-os nga dedikasyon sa Labing Mataas nga Dios.

Kinahanglan ang Sibu nga Ihibalo

8. Ngaa indi tanan kalipikado sa Cristianong bawtismo?

⁸ Indi tanan kalipikado sa Cristianong bawtismo. Si Jesus nagsugo sa iya mga sumulunod: “Lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo.” (Mateo 28:19, 20) Antes bawtismuhan, ang mga tawo dapat ‘tudluan sa pagtuman sa tanan nga butang nga ginsugo ni Jesus sa iya mga disipulo.’ Gani, ang pakusog nga pagbawtismo sa mga tawo nga kulang sing pagtuo pasad sa sibu nga ihibalo sang Pulong sang Dios walay pulos kag supak sa sugo nga ginhatag ni Jesus sa iya matuod nga mga sumulunod.—Hebreo 11:6.

9. Ano ang kahulugan sang pagpabawtismo “sa ngalan sang Amay”?

⁹ Ano ang kahulugan sang pagpabawtismo “sa ngalan sang Amay”? Nagakahulugan ini nga ginakilala sang kandidato sa bawtismo ang palangakuan kag awtoridad sang aton langitnon nga Amay.  Sa amo, si Jehova nga Dios ginakilala subong ang aton Manunuga, “ang Labing Mataas sa bug-os nga duta,” kag ang Soberano sa Bug-os nga Uniberso.—Salmo 83:18; Isaias 40:28; Binuhatan 4:​24.

10. Ano ang kahulugan sang pagpabawtismo ‘sa ngalan sang Anak’?

¹⁰ Ang pagpabawtismo ‘sa ngalan sang Anak’ nagakahulugan sang pagkilala sa palangakuan kag awtoridad ni Jesus subong bugtong nga Anak sang Dios. (1 Juan 4:9) Ang mga kalipikado para sa bawtismo nagabaton kay Jesus subong isa nga paagi sa iya ang Dios nagaaman sing “gawad nga kabaylo sang madamo.” (Mateo 20:28; 1 Timoteo 2:5, 6) Dapat man batunon sang mga kandidato sa bawtismo ang “mataas nga posisyon” nga ginhatag sang Dios sa iya Anak.—Filipos 2:8-11; Bugna 19:16.

11. Ano ang kahulugan sang pagpabawtismo ‘sa ngalan sang balaan nga espiritu’?

¹¹ Ano ang kahulugan sang pagpabawtismo ‘sa ngalan sang balaan nga espiritu’? Nagapahangop ini nga ginakilala sang mga kandidato sa bawtismo nga ang balaan nga espiritu amo ang aktibo nga kusog ni Jehova, kag ginagamit ini sa nagkalainlain nga paagi nahisanto sa iya katuyuan. (Genesis 1:2; 2 Samuel 23:​1, 2; 2 Pedro 1:​21) Ginakilala sang mga kalipikado para sa bawtismo nga ginabuligan sila sang balaan nga espiritu nga mahangpan ang “madalom nga mga butang sang Dios,” mabantala ang Ginharian, kag mapadayag ang mga bunga sang espiritu nga “gugma, kalipay, paghidait, pagkamainantuson, pagkalulo, pagkaayo, pagtuo, pagkakalmado, pagpugong sa kaugalingon.”—1 Corinto 2:10; Galacia 5:22, 23; Joel 2:28, 29.

Importansia sang Paghinulsol kag Pagkanakumbertir

12. Paano ang Cristianong bawtismo naangot sa paghinulsol?

¹² Magluwas sa walay sala nga tawo nga si Jesus, ang bawtismo isa ka aprobado-sang-Dios nga simbulo nga naangot sa paghinulsol. Kon maghinulsol kita, ginahinulsulan naton ang aton ginhimo ukon wala ginhimo. Ang unang-siglo nga mga Judiyo nga luyag magpahamuot sa Dios dapat maghinulsol sa ila mga sala batok kay Cristo. (Binuhatan 3:11-19) Ginhinulsulan sang pila ka Gentil nga mga tumuluo sa Corinto ang pagpakighilawas, idolatriya, pagpangawat, kag iban pa nga mabug-at nga mga sala. Bangod naghinulsol sila, “ginhugasan [sila] sing matinlo” sa dugo ni Jesus; “ginpakabalaan,” ukon ginpain, para sa pag-alagad sa Dios; kag ‘ginpahayag nga matarong’ sa ngalan ni Cristo kag sa espiritu sang Dios. (1 Corinto 6:9-11) Ang paghinulsol isa ka importante gid nga tikang agod matigayon ang maayong konsiensia kag ang hatag-Dios nga kaumpawan gikan sa pagbatyag nga nakonsiensia bangod sa nahimo nga sala.—1 Pedro 3:21.

13. Bahin sa bawtismo, ano ang nalakip sa pagkanakumbertir?

¹³ Antes bawtismuhan subong mga Saksi ni Jehova, dapat anay nga makumbertir kita. Ang pagkanakumbertir isa ka boluntaryo nga buhat nga ginahimo sing kinabubut-on sang isa nga nagdesisyon sing bug-os tagipusuon nga magsunod kay Cristo Jesus. Ginatalikdan sining mga indibiduwal ang ila anay sayop nga dalanon kag nagapamat-od nga himuon kon ano ang husto sa itululok sang Dios. Sa Kasulatan, ang Hebreo kag Griego nga mga berbo nga nagapatuhoy sa pagkanakumbertir nagakahulugan sang pagtalikod, pagliso. Ini nga buhat nagakahulugan sang pagliso sa Dios gikan sa sayop nga dalanon. (1 Hari 8:33, 34) Ang pagkanakumbertir nagakinahanglan sang “mga buhat nga nagakabagay sa paghinulsol.” (Binuhatan 26:20) Nagakinahanglan ini nga biyaan naton ang butig nga pagsimba, magpanghikot nahisanto sa mga sugo sang Dios, kag maghatag sing eksklusibo nga debosyon kay Jehova. (Deuteronomio 30:2, 8-10; 1 Samuel 7:3) Ang pagkanakumbertir nagaresulta sa mga pagbag-o sa aton panghunahuna, mga tulumuron, kag personalidad. (Ezequiel 18:31) ‘Nagaliso’ kita samtang ang di-diosnon nga mga kinaiya ginabuslan sang bag-ong personalidad.—Binuhatan 3:19; Efeso 4:20-24; Colosas 3:5-14.

Importante Gid ang Bug-os Tagipusuon nga Dedikasyon

14. Ano ang kahulugan sang dedikasyon sang mga sumulunod ni Jesus?

¹⁴ Ang mga sumulunod ni Jesus dapat anay magdedikar sing bug-os tagipusuon sa Dios antes sila bawtismuhan. Ang dedikasyon nagakahulugan sang pagpain para sa isa ka sagrado nga katuyuan. Ini nga tikang tuman ka importante amo nga dapat naton ipabutyag kay Jehova paagi sa pangamuyo ang aton desisyon nga hatagan sia sing eksklusibo nga debosyon sing dayon. (Deuteronomio  5:9) Sa pagkamatuod, ang aton dedikasyon indi para sa isa ka hilikuton ukon sa isa ka tawo kundi sa Dios.

15. Ngaa ang mga kandidato sa bawtismo nagapatugmaw?

¹⁵ Kon ginadedikar naton ang aton kaugalingon sa Dios paagi kay Cristo, ginapabutyag naton ang determinasyon nga gamiton naton ang aton kabuhi sa paghimo sa kabubut-on sang Dios suno sa Kasulatan. Bilang simbulo sina nga dedikasyon, ang mga kandidato sa bawtismo nagapatugmaw sa tubig, subong nga si Jesus ginbawtismuhan sa Suba Jordan bilang simbulo sang pagpresentar niya sang iya kaugalingon sa Dios. (Mateo 3:13) Talalupangdon nga si Jesus nangamuyo sadtong tuman ka importante nga okasyon.—Lucas 3:21, 22.

16. Paano naton mapakita sing nagakaigo ang aton kalipay kon ang mga tawo nagapabawtismo?

¹⁶ Ang bawtismo ni Jesus isa ka serioso apang makalilipay nga okasyon. Amo man ang Cristianong bawtismo karon. Kon makita naton ang mga tawo nga nagasimbulo sang ila dedikasyon sa Dios, mapakita naton ang aton kalipay paagi sa matinahuron nga pagpalakpak kag mainit nga komendasyon. Apang ang paghugyaw, pagpanihol, kag kaanggid nga mga buhat ginalikawan bangod sang pagkasagrado sining ekspresyon sang pagtuo. Ginapakita naton ang aton kalipay sa talahuron nga paagi.

17, 18. Ano ang nagabulig agod mapat-od kon bala ang mga indibiduwal kalipikado sa pagpabawtismo?

¹⁷ Indi kaangay sang mga nagawisik sa mga lapsag ukon pakusog nga nagabawtismo sa mga tawo nga wala sing ihibalo sa Biblia, ang mga Saksi ni Jehova wala gid nagapilit kay bisan sin-o nga magpabawtismo. Sa katunayan, wala nila ginabawtismuhan ang mga tawo nga wala sing espirituwal nga mga kalipikasyon. Antes pa gani ang isa mangin di-bawtismado nga manugbantala sing maayong balita, ginapat-od sang Cristianong mga gulang nga nahangpan niya ang sadsaran nga mga panudlo sang Biblia, nagakabuhi nahisanto sa sini, kag nagasabat sing huo sa pamangkot, “Luyag mo gid bala mangin isa sang mga Saksi ni Jehova?”

¹⁸ Sa masami, kon ang mga indibiduwal nagapakigbahin sing mapuslanon sa hilikuton nga pagbantala sing Ginharian kag nagapabutyag sing handum nga magpabawtismo, ang Cristianong mga gulang nagapakighambal sa ila agod pat-uron nga sila mga tumuluo nga nagdedikar kay Jehova kag nasunod nila ang mga ginapatuman sang Dios para sa pagpabawtismo. (Binuhatan 4:4; 18:8) Ang ila sabat sa kapin sa 100 ka pamangkot tuhoy sa mga panudlo sang Biblia nagabulig sa mga gulang nga mahibaluan kon bala nasunod nila ang mga ginapatuman sang Kasulatan agod matugmawan. Ang iban indi kalipikado, gani wala sila ginbawtismuhan subong Cristiano.

May Nagapugong Bala sa Imo?

19. Suno sa Juan 6:44, sin-o ang mangin mga masigkamanunubli ni Jesus?

¹⁹ Ang madamong pakusog nga ginbawtismuhan mahimo ginsilingan nga magakadto sila sa langit pagkapatay nila. Apang tuhoy sa mga nagasunod sang iya tikang, si Jesus nagsiling: “Wala sing tawo nga makakari sa akon luwas kon buyukon sia sang Amay, nga nagpadala sa akon.” (Juan 6:44) Ginbuyok ni Jehova kay Cristo ang 144,000 nga mangin mga masigkamanunubli ni Jesus sa langitnon nga Ginharian. Ang pakusog nga pagbawtismo wala gid magpakabalaan kay bisan sin-o para sa sinang mahimayaon nga duog sa kahimusan sang Dios.​—Roma 8:​14-​17; 2 Tesalonica 2:​13; Bugna 14:1.

20. Ano ang makabulig sa iban nga wala pa magpabawtismo?

²⁰ Ilabi na sugod sang tunga-tunga sang katuigan 1930, ang kadam-an nga nagalaum nga makalampuwas sa “dakung kapipit-an” kag magkabuhi sa duta sing dayon nagbuylog sa “iban nga mga karnero” ni Jesus. (Bugna 7:9, 14; Juan 10:16) Nangin kalipikado sila sa bawtismo bangod ginpahisanto nila ang ila kabuhi sa Pulong sang Dios kag nagahigugma sa iya sa ‘ila bug-os nga tagipusuon, kalag, kusog, kag hunahuna.’ (Lucas  10:25-28) Bisan pa nakahibalo ang iban nga mga tawo nga ang mga Saksi ni Jehova ‘nagasimba sa Dios sa espiritu kag kamatuoran,’ wala pa nila mailog ang halimbawa ni Jesus kag wala pa sila makahatag sing dayag nga pamatuod sang ila matuod nga gugma kag eksklusibo nga debosyon kay Jehova paagi sa pagpabawtismo. (Juan 4:​23, 24; Deuteronomio 4:​24; Marcos 1:​9-​11) Ang hanuot kag espesipiko nga pangamuyo may kaangtanan sa sining importante nga tikang mahimo nga amo gid ang kinahanglan agod mapahulag sila kag maisog nga sundon sing bug-os ang Pulong sang Dios, kag magdedikar sing bug-os kay Jehova nga Dios kag magpabawtismo.

21, 22. Bangod sa anong mga rason nga nagapangalag-ag ang iban sa pagdedikar kag sa pagpabawtismo?

²¹ Ang iban nagapangalag-ag sa pagdedikar kag sa pagpabawtismo bangod nawili gid sila sa mga hilikuton sang kalibutan ukon sa paghingamo sing manggad amo nga diutay lamang ang ila tion para sa espirituwal nga mga butang. (Mateo 13:22; 1 Juan 2:15-17) Malipay gid sila kon bag-uhon nila ang ila mga pagtamod kag tulumuron! Ang pagpalapit kay Jehova magapamanggad sa ila sa espirituwal, magabulig sa ila nga mapahaganhagan ang kabalaka, kag magahatag sa ila sing kalinungan kag kaayawan bangod sang paghimo sa kabubut-on sang Dios.​—Salmo 16:11; 40:8; Hulubaton 10:22; Filipos 4:​6, 7.

²² Ang iban nagasiling nga ginahigugma nila si Jehova apang wala sila nagdedikar kag nagpabawtismo agod wala sila sing salabton sa Dios. Apang ang tagsatagsa sa aton dapat manabat sa Dios. May salabton kita sang mabatian naton ang pulong ni Jehova. (Ezequiel 33:7-9; Roma 14:12) Subong ‘pinili nga katawhan,’ ang mga Israelinhon sang una natawo sa isa ka pungsod nga nadedikar kay Jehova, kag sa amo katungdanan nila nga alagaran sia sing matutom nahisanto sa iya kasuguan. (Deuteronomio 7:6, 11) Wala sing isa karon ang natawo sa amo sini nga pungsod, apang kon nakabaton kita sing sibu nga panudlo sa Kasulatan, dapat kita magpanghikot nahisuno sa sini nga may pagtuo.

23, 24. Ano nga mga pagpangalag-ag ang indi dapat magpugong sa mga indibiduwal sa pagpabawtismo?

²³ Ang iban nagapangalag-ag sa pagpabawtismo bangod kulang sila sing bastante nga ihibalo. Apang, kita tanan madamo sing dapat tun-an bangod “indi gid matukiban sang katawhan ang binuhatan nga ginhimo sang matuod nga Dios kutob sa ginsuguran tubtob sa katapusan.” (Manugwali 3:11) Binagbinaga ang Etiopianhon nga  eunuco. Subong isa ka proselita, may ihibalo sia sa Kasulatan, apang indi niya masabat ang tanan nga pamangkot tuhoy sa mga katuyuan sang Dios. Apang, sa tapos mahibaluan ang kahimusan ni Jehova para sa kaluwasan paagi sa halad nga gawad ni Jesus, ang eunuco gilayon nga nagpabawtismo sa tubig.—Binuhatan 8:26-38.

²⁴ Ang iban nagapangalag-ag sa pagdedikar sa Dios bangod nahadlok sila nga mapaslawan. Siling sang 17-anyos nga si Monique: “Nagapangalag-ag ako sa pagpabawtismo basi indi ako makapanghikot nahisanto sa akon dedikasyon.” Apang, kon nagasalig kita kay Jehova upod ang aton bug-os nga tagipusuon, ‘tadlungon niya ang aton banas.’ Buligan niya kita nga ‘padayon nga maglakat sa kamatuoran’ subong matutom kag dedikado niya nga mga alagad.—Hulubaton 3:5, 6; 3 Juan 4.

25. Ano nga pamangkot ang nagakaigo nga binagbinagon?

²⁵ Bangod sang bug-os nga pagsalig kay Jehova kag sang tinagipusuon nga gugma sa iya, linibo ang napahulag nga magdedikar kag magpabawtismo kada tuig. Kag pat-od gid nga ang tanan nga dedikado nga mga alagad sang Dios luyag nga mangin matutom sa iya. Apang, nagakabuhi kita sa makahalanguyos nga mga tion, kag nagaatubang kita sing nanuhaytuhay nga mga pagtilaw sa pagtuo. (2 Timoteo 3:1-5) Ano ang himuon naton agod magkabuhi nahisanto sa aton dedikasyon kay Jehova? Binagbinagon ini sa masunod nga artikulo.

[Nota]

Madumduman Mo Bala?

• Paano ginahimo ang Cristianong bawtismo?

• Ano nga ihibalo ang kinahanglan agod ang isa mabawtismuhan?

• Anong mga tikang ang nagadul-ong sa pagpabawtismo sang matuod nga mga Cristiano?

• Ngaa nagapangalag-ag ang iban sa pagpabawtismo, apang paano sila mabuligan?

[Mga Pamangkot sa Pagtinuon]

[Mga retrato sa pahina 14]

Nahibaluan mo bala ang kahulugan sang pagpabawtismo ‘sa ngalan sang Amay, sang Anak, kag sang balaan nga espiritu’?