Pangitaa ang Dios Paagi sa Imo Tagipusuon kag Hunahuna

Ginapalig-on sang matuod nga Cristianismo ang paggamit sang tagipusuon kag hunahuna sa pagtukod sang pagtuo nga nagapahamuot sa Dios.

SA KATUNAYAN, ang tagtukod sang Cristianismo, nga si Jesucristo, nagtudlo nga dapat naton higugmaon ang Dios paagi sa aton ‘bug-os nga hunahuna,’ ukon kinaalam, dugang sa aton ‘bug-os nga tagipusuon’ kag ‘bug-os nga kalag.’ (Mateo 22:37) Huo, ang aton ikasarang sa paghunahuna dapat may importante gid nga papel sa aton pagsimba.

Sang gin-agda ang iya mga tagpalamati sa pagbinagbinag sang iya pagpanudlo, si Jesus masami nagsiling: “Ano sa banta mo?” (Mateo 17:25; 18:12; 21:28; 22:42) Sa kaanggid man nga paagi, nagsulat si apostol Pedro sa iya mga masigkatumuluo agod ‘mapukaw ang ila matin-aw nga ikasarang sa paghunahuna.’ (2 Pedro 3:⁠1) Ang pinakamadamo sing nalakbay nga misyonero sang una, si apostol Pablo, naglaygay sa mga Cristiano nga gamiton nila ang ila “ikasarang sa pagpangatarungan” kag “agod nga mapamatud-an [nila sa ila] kaugalingon ang maayo kag kalahamut-an kag himpit nga kabubut-on sang Dios.” (Roma 12:​1, 2) Paagi lamang sa sining maid-id kag mahalungon nga pag-usisa sa ila pagtuluuhan nga makatukod ang mga Cristiano sang pagtuo nga kalahamut-an sa Dios nga makabulig sa ila sa paglandas sa mga pagtilaw nga nagaabot sa kabuhi.​—Hebreo 11:​1, 6.

Agod mabuligan ang iban sa pagtukod sini nga pagtuo, ang una nga Cristianong mga ebanghelisador “nagpangatarungan sa ila gikan sa Kasulatan, nagapaathag kag nagapamatuod paagi sa mga reperensia” sang mga butang nga gintudlo. (Binuhatan 17:​1-3) Ining makatarunganon nga pamaagi nagresulta sa maayo nga pagbaton sang bunayag-sing-tagipusuon nga mga tawo. Halimbawa, madamo nga tawo sa Berea, isa ka siudad sang Macedonia, ‘ang nagbaton sa pulong sang Dios nga may daku gid nga kalangkag sing hunahuna, nga ginausisa sing maayo ang Kasulatan adlaw-adlaw kon bala matuod gid nga mga butang’ ang  ginpaathag ni Pablo kag sang iya mga kaupod. (Binuhatan 17:​11) Duha ka butang ang talalupangdon sa sini nga teksto. Una, ang mga taga-Berea nalangkag sa pagpamati sa Pulong sang Dios; ikaduha, wala nila ginhaumhaum nga husto na ang ila nabatian, kundi gin-usisa nila anay ini sa Kasulatan. Ang Cristianong misyonero nga si Lucas matinahuron nga nagdayaw sa mga taga-Berea bangod sini, gintawag sila nga mga “dungganon sing panghunahuna.” Ginapakita mo man bala ining pagkadungganon sing panghunahuna sa imo pamaagi sa espirituwal nga mga butang?

Nagabuligay ang Hunahuna kag Tagipusuon

Subong sang ginsambit kaina, ang matuod nga pagsimba nagalakip sang hunahuna kag tagipusuon. (Marcos 12:​30) Binagbinaga ang ilustrasyon sa nahauna nga artikulo tuhoy sa isa ka ginsuhulan nga pintor nga naggamit sing indi amo nga mga kolor sa pagpintura sa isa ka balay. Kon namati lang sia kuntani sing maayo sa mga instruksion sang tag-iya, mahimo nga bug-os tagipusuon gid ang iya pagtrabaho kag makasalig sia nga mahamuot gid ang tag-iya sa iya trabaho. Amo man ini sa aton pagsimba.

“Ang matuod nga mga sumilimba,” siling ni Jesus, “magasimba sa Amay sa espiritu kag kamatuoran.” (Juan 4:​23) Busa, si apostol Pablo nagsulat: “Amo man ina kon ngaa . . . wala kami mag-untat sa pagpangamuyo tungod sa inyo kag sa pagpangabay nga mapun-an kamo sang sibu nga ihibalo sang iya kabubut-on nga may bug-os nga kaalam kag espirituwal nga paghangop, agod nga maglakat sing takus kay Jehova sa tuyo nga pahamut-an sia sing bug-os.” (Colosas 1:​9, 10) Inang “sibu nga ihibalo” nagabulig sa sinsero nga mga indibiduwal nga magsimba sing bug-os tagipusuon nga may bug-os nga pagsalig bangod ‘nakilala nila ang ila ginasimba.’​—Juan 4:​22.

Bangod sini nga mga rason, ang mga Saksi ni Jehova wala nagabawtismo sa mga lapsag ukon sa bag-o lang nangin interesado nga mga tawo nga wala pa nakatuon sing maayo sa Kasulatan. Ginsugo ni Jesus ang iya mga sumulunod: “Maghimo sing mga disipulo sa mga tawo sa tanan nga kapungsuran, . . . nagatudlo sa ila nga tumanon ang tanan nga butang nga ginsugo ko sa inyo.” (Mateo 28:​19, 20) Sa tapos lamang makatigayon sing sibu nga ihibalo sang Dios nga ang sinsero nga mga estudyante sang Biblia makahimo sing desisyon pasad sa sini may kaangtanan sa pagsimba. Nagatinguha ka bala nga makatigayon sining sibu nga ihibalo?

Paghangop sa Pangamuyo sang Ginuo

Agod makita ang kinatuhayan sang pagtigayon sang sibu nga ihibalo sa Biblia kag sang limitado lamang nga ihibalo sa sini, binagbinagon naton ang kinaandan nga ginatawag nga Amay Namon, ukon ang Pangamuyo sang Ginuo, nga narekord sa Mateo 6:​9-​13.

Minilyon ang regular nga nagasambit sining modelo nga pangamuyo ni Jesus sa simbahan. Apang pila bala ang natudluan sang kahulugan sini, ilabi na ang nahauna nga bahin sang pangamuyo nga nagadalahig sang ngalan kag Ginharian sang Dios? Importante kaayo ining mga tema amo nga gin-una ini ni Jesus sa pangamuyo.

Nagaumpisa ini: “Amay namon nga yara sa mga langit, pakabalaanon ang imo ngalan.” Talupangda nga ginsiling ni Jesus nga mangamuyo para pakabalaanon ang ngalan sang Dios. Para sa madamo nga tawo, nagabangon ini sing di-magkubos duha ka pamangkot. Una, ano ang ngalan sang Dios? Kag ikaduha, ngaa kinahanglan ini pakabalaanon?

Ang sabat sa una nga pamangkot masapwan sing kapin sa 7,000 ka beses sa Biblia sa orihinal sini nga lenguahe. Ang isa yara sa Salmo 83:18: “Agod makilala sang katawhan nga ikaw, nga ang ngalan si Jehova, ikaw lamang ang Labing Mataas sa bug-os nga duta.” May kaangtanan sa ngalan sang Dios, nga Jehova, ang Exodo 3:​15 nagasiling: “Amo ini ang akon ngalan tubtob sa tion nga walay latid, kag amo ini ang akon handumanan sa lainlain nga mga kaliwatan.” * Apang ngaa ang ngalan sang Dios, nga amo ang pinakamaayo nga halimbawa sang pagkaputli kag pagkabalaan, kinahanglan pa pakabalaanon? Bangod ginpakahuy-an kag ginpasipalahan ini kutob pa sang ginsuguran sang maragtas sang tawo.

 Sa Eden, ginsilingan sang Dios sanday Adan kag Eva nga mapatay sila kon magkaon sila sang gindumilian nga bunga. (Genesis 2:​17) Matinamayon nga ginsumpakil ni Satanas ang Dios, nga nagsiling kay Eva: “Indi gid kamo mapatay.” Busa, gin-akusahan ni Satanas ang Dios nga nagbinutig. Apang wala sia magdulog didto. Gindugangan pa gid niya ang pagpakahuya sa ngalan sang Dios, nagsiling kay Eva nga may ginadingot nga hamili nga ihibalo ang Dios kay Eva. “Kay nakahibalo ang Dios nga sa adlaw nga magkaon kamo gikan [sa kahoy tuhoy sa pagkilala sang maayo kag malain] magamuklat ang inyo mga mata kag mangin kaangay kamo sang Dios, nga nakakilala sang maayo kag malain.” Daw ano nga pasipala!​—Genesis 3:​4, 5.

Paagi sa pagkaon sang gindumilian nga bunga, nagdampig sanday Adan kag Eva kay Satanas. Ang kalabanan nga tawo sugod sadto, hungod man ukon indi, nagdugang sa sining orihinal nga pagpakahuya paagi sa pagsikway sa matarong nga mga talaksan sang Dios. (1 Juan 5:​19) Ginapasipalahan gihapon sang mga tawo ang Dios paagi sa pagbasol sa iya bangod sang ila pag-antos​—bisan pa mahimo nga resulta ini sang ila malaut nga mga dalanon. “Ang kabuangan mismo sang tawo amo ang nagaguba sang iya kabuhi, kag nian nagadumot sia sa Ginuo,” siling sang Hulubaton 19:⁠3. (The New English Bible) Nahangpan mo na bala kon ngaa si Jesus, nga nagahigugma gid sa iya Amay, nangamuyo nga ang Iya ngalan pakabalaanon?

“Magkari ang Imo Ginharian”

Pagkatapos mangamuyo nga pakabalaanon ang ngalan sang Dios, si Jesus nagsiling: “Magkari ang imo ginharian. Paghimuon ang imo kabubut-on, kon paano sa langit, subong man sa duta.” (Mateo 6:​10) Tuhoy sini nga dinalan, mahimo kita mamangkot: ‘Ano ang Ginharian sang Dios? Kag ano ang kaangtanan sang pagkari sini sa katumanan sang kabubut-on sang Dios sa duta?’

Sa Biblia, ang tinaga nga “ginharian” kinaandan nga nagakahulugan nga “pagginahom sang isa ka hari.” Makatarunganon, nian, nga ang Ginharian sang Dios nagapatuhoy sa isa ka pagginahom, ukon panguluhan, sang Dios, paagi sa isa ka hari nga iya ginpili. Ining Hari walay liwan kundi ang ginbanhaw nga si Jesucristo​—ang “Hari sang mga hari kag Ginuo sang mga ginuo.” (Bugna 19:16; Daniel 7:​13, 14) Tuhoy sa Mesianikong Ginharian sang Dios sa mga kamot ni Jesucristo, ang manalagna nga si Daniel nagsulat: “Sa mga adlaw sadto nga mga hari [ang tawhanon nga mga panguluhan nga nagagahom karon] ang Dios sang langit magapatindog sing ginharian nga indi gid malaglag. Kag ang ginharian mismo indi iliton sa iban nga katawhan. Dugmukon sini kag papason ini tanan nga ginharian, kag magapadayon ini tubtob sa walay katubtuban,” buot silingon, sing dayon.​—Daniel 2:​44.

Huo, ang Ginharian sang Dios amo ang magagahom sa bug-os nga duta, magadula sa sini sang tanan nga kalautan kag magagahom “tubtob sa walay katubtuban,” buot silingon, sing dayon. Sa sining paagi, ang Ginharian sang Dios amo ang gamiton ni Jehova sa pagpakabalaan sang iya ngalan, tinluan ini sa tanan nga pagpakahuya ni Satanas kag sang malaut nga mga tawo.​—Ezequiel 36:23.

Kaangay sang tanan nga panguluhan, ang Ginharian sang Dios may mga sakop man. Sin-o sila? Ang Biblia nagasabat: “Ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait.” (Salmo 37:​11) Sing kaanggid, si Jesus nagsiling: “Malipayon ang mga malulo, kay sila magapanubli sang duta.” Sa pagkamatuod, ini sila may sibu nga ihibalo tuhoy sa Dios, nga amo ang kinahanglanon para sa kabuhi.​—Mateo 5:5; Juan 17:​3.

Mahanduraw mo bala ang bug-os nga duta nga mapuno sang mga mahagop, malulo nga mga tawo nga nagahigugma gid sa Dios kag sa isa kag isa? (1 Juan 4:​7, 8) Amo ini ang ginpangamuyo ni Jesus sang nagsiling sia: “Magkari ang imo ginharian. Paghimuon ang imo kabubut-on, kon paano sa langit, subong man sa duta.” Nahangpan mo na bala kon ngaa gintudluan ni Jesus ang iya mga sumulunod nga mangamuyo sa sini nga paagi? Sing kapin ka importante, nakita mo na bala kon paano ang katumanan sining pangamuyo makaapektar mismo sa imo?

Minilyon sa Karon ang Nagpangatarungan Gikan sa Kasulatan

Gintagna ni Jesus ang isa ka tugob-globo nga kampanya sang espirituwal nga edukasyon nga magabantala sang nagapakari nga Ginharian sang Dios. Nagsiling sia: “Ining maayong balita sang  ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan” sining presente nga kalibutan, ukon sistema.​—Mateo 24:​14.

Sa bug-os nga kalibutan, mga anom ka milyon ka Saksi ni Jehova ang nagapaambit sining maayong balita sa ila mga isigkatawo. Ginaagda ka nila nga magtuon pa tuhoy sa Dios kag sa iya Ginharian paagi sa ‘pag-usisa sing maayo sang Kasulatan,’ nga nagagamit sang imo ikasarang sa pagpangatarungan. Sa paghimo sini, mapabakod mo ang imo pagtuo kag magapahalipay sa imo sa paglaum sang kabuhi sa isa ka paraiso nga duta, nga sa ulihi “matugob sang ihibalo ni Jehova subong sang tubig nga nagatabon sa dagat.”​—Isaias 11:​6-9.

[Nota]

 [Kahon/Retrato sa pahina 8]

ILUGA ANG DAKUNG MANUNUDLO

Masami nga nagatudlo si Jesus paagi sa pagpatalupangod sa espesipiko nga mga topiko sa Biblia. Halimbawa, pagkatapos sang iya pagkabanhaw ginpaathag niya ang iya papel sa katuyuan sang Dios sa duha ka disipulo nga naligban tuhoy sa iya kamatayon. Ang Lucas 24:27 nagasiling: “Umpisa kay Moises kag sa tanan nga Manalagna ginpaathag niya sa ila ang mga butang may kahilabtanan sa iya kaugalingon sa tanan nga Kasulatan.”

Talupangda nga ginpili ni Jesus ang isa ka espesipiko nga tema​—ang “iya kaugalingon,” ang Mesias​—kag nagkutlo sia gikan “sa tanan nga Kasulatan” sa iya paghinun-anon. Daw subong bala nga gintipon ni Jesus ang nagakaigo nga mga teksto sa Biblia kaangay sang mga bahin sang isa ka puzzle, nga nagbulig sa iya mga disipulo nga makita ang maathag nga sulundan sang espirituwal nga kamatuoran. (2 Timoteo 1:​13) Bilang resulta, wala lamang sila nasanagan kundi napahulag gid. Ang kasaysayan nagasugid sa aton: “Nagsiling sila sa isa kag isa: ‘Wala bala nagadabdab ang aton mga tagipusuon sang nakigsugilanon sia sa aton sa dalan, samtang ginabuksan niya sing bug-os ang Kasulatan sa aton?’ ”​—Lucas 24:​32.

Ang mga Saksi ni Jehova nagapanikasog sa pag-ilog sa mga pamaagi ni Jesus sa ila ministeryo. Ang ila panguna nga mga bulig sa pagtuon amo ang brosyur nga Ano ang Ginapatuman Sang Dios sa Aton? kag ang libro nga Ang Ihibalo nga Nagadul-ong sa Kabuhi nga Walay Katapusan. Ginapatuhuyan sini ang madamong makapainteres nga mga topiko sa Biblia, kaangay sang: “Sin-o ang Dios?,” “Ngaa Ginatugutan Sang Dios ang Pag-antos?,” “Paano Mo Masapwan ang Matuod nga Relihion?,” “Karon Na Ang Katapusan nga mga Adlaw!,” kag “Pagtukod Sing Pamilya nga Nagapadungog sa Dios.” Ang kada leksion nagaunod sang madamo nga kasulatan.

Ginaabiabi ka nga kontakon ang mga Saksi ni Jehova sa inyo komunidad ukon magsulat sa direksion sa pahina 2 sining magasin para sa isa ka libre nga pagtuon sa Biblia sa puluy-an sa sini nga mga tema kag sa iban pa.

[Retrato]

Lab-uta ang tagipusuon sang imo estudyante paagi sa pagpatalupangod sa espesipiko nga mga topiko sa Biblia

[Mga retrato sa pahina 7]

Nahangpan mo bala ang kahulugan sang modelo nga pangamuyo ni Jesus?

“Amay namon nga yara sa mga langit, pakabalaanon ang imo ngalan . . .”

“Magkari ang imo [Mesianikong] ginharian . . .”

“Paghimuon ang imo kabubut-on, kon paano sa langit, subong man sa duta”