Ang Tion nga Maalamon ang Magpalagyo

ANG kalibutan sa karon masami kilala sa pagpaisog-isog kag pagkamaawayon ukon sa mga pagsulay. Ang tawo nga nagapalagyo sa sitwasyon ginakabig nga mapigaw ukon talawan. Mahimo pa gani sia hikayan.

Apang, ginasambit sang Biblia nga may mga tion nga ang pagpalagyo isa ka maalamon kag maisugon nga tikang. Sa pagpamatuod sini, antes niya ginpadala ang iya mga disipulo sa ministeryo, si Jesucristo nagsiling sa ila: “Kon maghingabot sila sa inyo sa isa ka siudad, magpalagyo kamo sa iban.” (Mateo 10:23) Huo, dapat palagyuhan sang mga disipulo ni Jesus ang ila mga manughingabot. Indi sila dapat maghimo sang isa ka krusada, nga nagapangumbertir sa iban paagi sa kusog. Ang ila dala isa ka mensahe sang paghidait. (Mateo 10:11-​14; Binuhatan 10:34-​37) Sa baylo nga mangakig, dapat magpalagyo ang mga Cristiano, magpalayo sa nagapainit sa ila. Sa sining paagi, mahuptan nila ang maayo nga konsiensia subong man ang ila hamili nga kaangtanan kay Jehova.​ ​—⁠2 Corinto 4:​1, 2.

Ang isa ka indi maayo nga halimbawa makita sa tulun-an sang Hulubaton sa Biblia. Nagasugid ini sa aton tuhoy sa isa ka pamatan-on nga lalaki nga, sa baylo nga magpalagyo sa pagsulay, nagkadto sa pampam “kaangay sang toro nga nagapakadto sa ihawan.” Ano ang resulta? Kalaglagan bangod sa pagpadala sa sulay nga nagdalahig sang iya mismo kabuhi.​​—⁠Hulubaton 7:​5-8, 21-​23.

Ano abi kon makaatubang ikaw sing pagsulay sa paghimo sing seksuwal nga imoralidad ukon sa iban pa nga posible nga katalagman? Suno sa Pulong sang Dios, ang pinakamaayo nga himuon amo ang pagpalagyo, ang paghalin sa sitwasyon sa gilayon.​​—⁠Hulubaton 4:​14, 15; 1 Corinto 6:​18; 2 Timoteo 2:⁠22.