Madumduman Mo Bala?

Nalipay ka bala sa pagbasa sa ulihi nga mga guwa sang Ang Lalantawan? Ti, tan-awa kon masabat mo ang masunod nga mga pamangkot:

• Anong personal nga programa pasad sa Sermon sa Bukid ang magamit mo agod mapahaganhagan ang kahuol?

Kada adlaw, mahimo mo basahon ang isa sang sadsaran nga mga panudlo ni Jesus sa sini nga sermon ukon sa iban pa nga bahin sang mga Ebanghelyo. Paagi sa pagpamalandong sa sini nga panudlo kag sa pagtinguha nga iaplikar ini, madugangan gid ang imo kalipay kag mabuhinan ang imo kahuol.​—⁠12/15, pahina 12-14.

• Ano ang tatlo ka maayong rason kon ngaa dapat hanason sang mga gulang sa kongregasyon ang mga ministeryal nga alagad sa pagpas-an sa dugang pa nga mga katungdanan?

Bangod sang pagdamo sang mga Saksi ni Jehova, kinahanglan ang dugang pa masaligan nga mga lalaki agod buligan ang bag-ong mga bawtismado nga mag-uswag. Ang katigulangon ukon balatian nagalimite sa mahimo karon sang dugay na nga mga gulang. Kag ang iban sang sangkol nga mga gulang may mga katungdanan indi lamang sa ila kongregasyon, gani indi na subong ka daku sang una ang ila mahimo karon sa ila kongregasyon.​—⁠1/1, pahina 29.

• Paano nagasalig ang mga tawo sa mga dios nga indi tunay?

Madamo ang nagasimba sa mga dios sang ila relihion, apang mga dios ini nga walay kabuhi nga indi makaluwas kaangay ni Baal sang panahon ni Elias. (1 Hari 18:​26, 29; Salmo 135:15-17) Ang iban nagahangad sa mga artista ukon mga humalampang, nga indi makahatag sing tunay nga paglaum sa palaabuton. Sa kabaliskaran, nagaluntad gid si Jehova kag nagatuman sang iya mga katuyuan.​—⁠1/15, pahina 3-5.

• Ano ang matun-an naton gikan sa reaksion ni Cain sa paandam sang Dios?

Ginhatagan kita sang Dios sing kahilwayan sa pagbuot, kag makapili kita nga himuon ang husto sa baylo nga maglikaw sa paghimo sang maayo, nga amo ang ginhimo ni Cain. Ginapakita man sang kasaysayan sang Biblia nga ginapakamalaut ni Jehova ang mga di-mahinulsulon.​—⁠1/15, pahina 22-3.

• Ngaa importante gid karon ang katinlo?

Bangod sang nagabag-o nga mga estilo sang pagkabuhi, diutay na lang nga tion ang ginagamit sang madamo nga tawo sa pagtinlo sang ila puluy-an kon ipaanggid sang una. Ang di-matinlo nga tubig kag pagkaon makahalit sa kapagros. Dugang pa sa pisikal nga katinlo, ginapadaku man sang Biblia ang espirituwal, moral, kag mental nga katinlo.​—⁠2/1, pahina 3-6.

• Tuhoy sa mga saksi antes sang panahon sang mga Cristiano, si Pablo nagsiling nga “indi sila mahimpit nga nahamulag sa aton.” Ngaa? (Hebreo 11:40)

Sa tion sang nagapakari nga Milenyo, si Cristo kag ang iya hinaplas nga mga utod sa langit, nga nagaalagad subong mga hari kag mga saserdote, magahatag sang mga benepisyo sang gawad sa mga pagabanhawon. Sa amo ining mga matutom subong sadtong ginsambit sa Hebreo kapitulo 11 “mahimpit.”​—⁠2/1, pahina 23.

• Ano ang punto ni Pablo sang ginsilingan niya ang mga Hebreo: “Wala pa kamo makapakigsumpong tubtob sa dugo”? (Hebreo 12:4)

Ang buot niya silingon amo ang pagpakigsumpong tubtob sa kamatayon. May mga halimbawa sa maragtas sang mga nagmatutom tubtob sa kamatayon. Bisan pa ang mga Hebreo nga ginsulatan ni Pablo wala pa matilawan tubtob sa sina nga punto, dapat sila mag-uswag sa pagkahamtong, nagapabakod sang ila pagtuo agod mabatas ang bisan ano man nga mag-abot.​—⁠2/15, pahina 29.

• Ngaa mas maayo nga likawan ang pagsiling nga ang kaluoy ni Jehova nagapahaganhagan sang iya katarungan?

Sa pila ka lenguahe, ang “nagapahaganhagan” mahimo magkahulugan sing nagapamag-an ukon nagapugong. Si Jehova isa ka Dios sang katarungan kag kaluoy, kag sa pagpakita niya sini nga mga kinaiya, ining duha nagapanghikot nga nagahisantuanay. (Exodo 34:​6, 7; Deuteronomio 32:⁠4; Salmo 116:⁠5; 145:⁠9) Ang katarungan ni Jehova indi kinahanglan pamag-anon ukon pahaganhaganon sang kaluoy.​—⁠3/1, pahina 30.

• Nagakaigo bala para sa isa ka Cristiano nga ipaembalsamar ang iya napatay nga hinigugma?

Ang embalsamasyon isa ka paagi sa pagpreserbar sa isa ka bangkay. Ang iban sang mga tawo sang una naghimo sini tungod sa relihioso nga mga rason. Dapat indi amo sini sa matuod nga mga sumilimba. (Manugwali 9:⁠5; Binuhatan 24:15) Ang embalsamasyon isa lamang ka pag-awat sa di-malikawan nga butang, ang pagbalik sang lawas sa yab-ok. (Genesis 3:19) Apang indi magkabalaka kon ginapatuman sang kasuguan ang embalsamasyon, ukon luyag ini sang iban nga katapo sang pamilya, ukon kinahanglan ini bangod ang iban magalakbay pa sing malayo para sa lubong.​—⁠3/15, pahina 29-31.

• Ano nga mga halimbawa sa Biblia ang nagatudlo sa aton nga ginaabiabi sang Dios ang mga tawo sa tanan nga kapungsuran?

Ginpadala ni Jehova si manalagna Jonas agod paandaman ang mga taga-Ninive, kag ginpalig-on sang Dios si Jonas nga batunon ang ila paghinulsol. Paagi sa pulong kag halimbawa, ginpalig-on ni Jesus ang pagpakita sing gugma sa mga Samaritano. Sanday apostol Pedro kag apostol Pablo may bahin sa pagdala sing maayong balita sa mga di-Judiyo. Gikan sa sini nga mga halimbawa, mahangpan naton nga dapat buligan ang mga tawo nga lainlain sing ginhalinan.​—⁠4/1, pahina 21-4.