Paghimaya sa Dios sa Kabukiran sang Pilipinas

Kon ginahunahuna mo ang Pilipinas nga isa ka pulo nga pungsod, husto ka. Apang isa man ini ka pungsod nga may mataas nga mga kabukiran. Para sa mga Saksi ni Jehova, ang pagbantala sa mga siudad kag kapatagan daw mahapos kag may maayo nga mga resulta. Apang, tuhay sa mga rehiyon sa kabukiran.

ANG matahom nga kabukiran sang pungsod tuhay gid sa balasbalason nga mga baybayon, sa mga koralesan, sa nagapangisda nga mga minuro, kag sa masako nga mga banwa sang kapatagan sang pulo. Ang pagbantala sing “maayong balita” sang Ginharian sang Dios sa kabukiran mabudlay man.​—⁠Mateo 24:14.

Ang Kapuluan sang Pilipinas nahamtang sa isa ka duog diin ang duha ka tectonic plate nagasantikanay. Ang paglupyak sang duta sa sini nga duog nagresulta sa pulupil-ason nga kabukiran sa mas dalagku nga mga pulo. Ang kapin sa 7,100 ka pulo sang Pilipinas nahamtang sa nakatundan nga arko sang Ring of Fire sa Pasipiko. Gani, may yara ini madamo nga bulkan, nga ginatunaan man sang pagporma sang mabukid nga mga palibot. Ining kudol-kudol nga duta nagpaligwin sa mga tagabukid. Mabudlay ini kadtuan bangod diutay lang nga dalan ang mahimo maagihan sang salakyan.

Walay sapayan sining mga balagbag, nakita sang mga Saksi ni Jehova ang kinahanglanon nga kadtuan ang “tanan nga sahi sang tawo.” (1 Timoteo 2:4) Busa, ang mga Saksi sa Pilipinas nagpangabudlay nahisanto sa espiritu sang Isaias 42:⁠11, 12: “Maghugyaw sa kalipay ang mga pumuluyo sang igang. Gikan sa putukputukan sang kabukiran magsinggit sing mabaskog ang mga tawo. Maghatag sila sing himaya kay Jehova, kag sa kapuluan magpahayag sila sang iya kadayawan.”

Ang pagpanikasog gid nga mapanaksihan ang mga tagabukid nagsugod sang nagligad nga kapin sa 50 ka tuig. Pagkatapos sang Bug-os Kalibutan nga Inaway II, ang mga misyonero nagbulig agod masugdan ang hilikuton. Madamong tumandok nga pumuluyo ang nagbaton sang kamatuoran sang Biblia kag nagbulig man sila nga mapalapnag ining kamatuoran sa mga minuro sa kabukiran. May maayo ini nga mga resulta. Halimbawa, sa Cordillera Central nga kabukiran sa  naaminhan nga Luzon, may yara kapin sa 6,000 ka manugbantala sing maayong balita. Ang kalabanan sa ila tumandok nga mga pumuluyo, nga nagalakip sa mga Ibaloi, Ifugao, kag Kalinga.

Apang, may mga lugar gihapon sa kabukiran nga mabudlay kadtuan. Ang mga pumuluyo didto wala ginkalimtan. Paano nakadtuan ang iban sa ila, kag ano ang resulta?

Ginabuslan sang Matuod nga Pagtuo ang Tradisyon

Sa naaminhan nga pulo sang Luzon, ang kabukiran sang probinsia sang Abra ginapuy-an sang mga Tinggian. Ini nga ngalan mahimo naghalin sa dumaan nga Malay nga tinaga nga tinggi, nga nagakahulugan “bukid.” Nagakaigo gid ini! Itneg man ang tawag sang mga tawo sa ila kaugalingon kag sa ila hambal. Nagatuo sila sa dios nga si Kabunian, kag ang adlaw-adlaw nga pagkabuhi naimpluwensiahan gid sang mga disparatis. Halimbawa, kon ang isa ka tawo nga manuglakat na mangatsi, malain ini nga patimaan. Dapat anay sia magpaligad sing pila ka oras agod madula ang malain nga epekto.

Sang 1572, nag-abot ang mga Katsila nga dala ang Katolisismo, apang wala nila gintudluan sing matuod nga Cristianismo ang mga Tinggian. Ang mga nangin Katoliko nagtuo gihapon kay Kabunian kag ginpadayon ang ila tumandok nga mga kustombre. Naglab-ot sa ila ang sibu nga ihibalo sa Biblia sang katuigan 1930 sang ginpalapnag sang mga Saksi ni Jehova ang mensahe sang Ginharian sa sining mga kabukiran. Madamong sinsero nga mga Tinggian ang nagsugod sa paghimaya kay Jehova “gikan sa putukputukan sang kabukiran.”

Halimbawa, si Lingbaoan respetado anay nga pangulo sang tribo sa sini nga lugar. Nagapakigbahin sia sa kultura sang mga Tinggian. “Matutom ko nga ginsunod ang mga tradisyon sang mga Tinggian. Kon ang isa ka tawo mapatay, nagasaot kami pagkatapos sang lubong, kag ginapatunog namon ang mga gong. Nagahalad man kami sing mga sapat. Nagatuo kami kay Kabunian, kag indi ko kilala ang Dios sang Biblia.”  Ginhimo niya ini walay sapayan sang katunayan nga sia isa ka Katoliko sa ngalan lamang.

Ang mga ministro sang mga Saksi ni Jehova nagkari sa pagbantala sa sining lugar. Nasugilanon nila si Lingbaoan kag ginpalig-on sia nga basahon ang Biblia. Naghinumdom sia: “Nakumbinse ako sang Biblia nga si Jehova amo ang matuod nga Dios.” Nian nagtuon sia sa Biblia upod sa isa ka Saksi, kag nagdesisyon si Lingbaoan nga mag-alagad sa matuod nga Dios. Gintalikdan niya ang iya nagligad nga mga dalanon, pati na ang iya posisyon subong pangulo sang tribo, nga ginkaakig sang lokal nga pari kag sang mga kaupdanan anay ni Lingbaoan. Apang, determinado si Lingbaoan nga sundon ang mga kamatuoran nga nasapwan niya sa Biblia. Karon isa na sia ka gulang sa kongregasyon.

Pito ka Adlaw kag Anom ka Gab-i

Bisan pa nga ang pila ka lugar sa Abra tayuyon na nga makabati sing maayong balita, ang iban nga mga lugar naligwin kag talagsa lang ginapanaksihan. Sining karon lang, ang isa sini nga mga lugar ginpanikasugan nga kadtuan. Isa ka grupo sang 35 ka Saksi ang naglakbay agod magbantala sa wala matangdo nga teritoryo sa Tineg, Abra, isa ka lugar nga wala maduaw sa sulod sang 27 ka tuig.

Ining paglakbay sa pagbantala ginlakat lamang, sa sulod sang pito ka adlaw. Handurawa nga nagatabok ka sa nagabitay nga mga taytay kag madalom nga mga suba kag nagapanglakaton sing inoras sa mga bukid samtang ginabitbit mo ang imo mga dala​—⁠agod ibantala ang maayong balita sa mga tawo nga talagsa lang makabati sini! Sa sulod sang anom ka gab-i nga pagpanglakaton, nagtulog sila sing apat ka gab-i sa wayang.

Bisan pa ang maisog nga mga Saksi nga nakigbahin sa sining paglakbay nagbalon sing pagkaon, kulang ini para sa bug-os nga paglakbay. Apang, indi ini problema kay nalipay ang mga tawo nga bayluhan sing pagkaon ang mga publikasyon pasad sa Biblia. Madamo nga patubas sa uma, isda, kag karne sang usa ang nabaton sang mga Saksi. Bisan pa may pila ka di-kasulhayan, ang grupo nagsiling: “Ining mga sakripisyo nabalusan sang daku gid nga kalipay nga naeksperiensiahan namon.”

Sa sulod sang pito ka adlaw, ining mga ministro nagpanaksi sa napulo ka minuro, kag nakapahamtang sila sing 60 ka libro, 186 ka magasin, 50 ka brosyur, kag madamong tract. Ginpasundayag nila ang pagtuon sa Biblia sa 74 ka grupo sang mga tawo. Sa pangabay sang lokal nga mga opisyales kag sang pila ka prominente nga pumuluyo sa banwa sang Tineg, isa ka miting sang kongregasyon ang ginhiwat kag 78 ang nagtambong. Ang kalabanan nga nagtambong mga manunudlo kag mga pulis. Ginalauman nga madamo pa nga mga Tinggian ang magabuylog sa ‘pagsinggit’ kag sa pagdayaw kay Jehova gikan sa putukputukan sang mga bukid.

Maayo Pa sa Bulawan

Nahamtang sa malayo nga nabagatnan nga bahin sang Pilipinas amo ang pila ka pulo diin nakakita anay sing bulawan ang mga Katsila. Diri naghalin ang ngalan nga Mindoro, ang pinalip-ot sang Kinatsila nga mina de oro, ukon “minahan sang bulawan.” Apang, may maayo pa sa bulawan nga nakita karon sa sining mga pulo​—⁠ang mga tawo nga luyag mag-alagad sa matuod nga Dios, si Jehova.

Mga 125,000 ka tumandok nga mga tawo nga ginatawag mga Mangyan ang nagapuyo sa nabaw-ing kag nasuok nga kagulangan sang Mindoro. Simple lang ang ila kabuhi, sa masami sing silahanon lamang, kag may kaugalingon sila nga hambal. Ang kalabanan sa ila mga animist kag  nagasimba sa madamo nga dios, kag nagapati sila sa lainlain nga espiritu sa kinaugali.

Kon kaisa, kon maubusan na sila sing pagkaon ukon iban pa nga mga suplay, ang indibiduwal nga mga Mangyan nagadulhog sa baybayon nga mga lugar agod mangita sing obra. Amo ini ang natabo kay Pailing, nga naghalin sa isa ka grupo sang mga Mangyan nga ginatawag Batangan. Nagdaku sia upod sa iya katribo sa mga kagulangan sa bukid, kag nagapati sia anay sa mga ginapatihan kag mga kustombre sang mga Batangan. Kinaandan na nga nagabahag lang sila. Agod masigurado ang maayo nga patubas, kinabatasan sang mga Batangan nga magpatay sing manok, ginapatulo ang dugo sa tubig samtang nagapangadi sila.

Wala na ginahimo ni Pailing ini nga mga tradisyon. Ngaa? Sang nagdulhog sia sa ubos nga kapatagan, nagtrabaho sia upod sa mga pamilya sang mga Saksi ni Jehova. Ginhimuslan sang isa sining mga pamilya nga sugiran si Pailing sang kamatuoran sa Biblia. Namati sia kag gin-apresyar niya ang iya natun-an tuhoy sa katuyuan ni Jehova para sa tawo kag sa duta. Ginpaeskwela nila sia sa elementarya, kag nagtuon man sia sa Biblia. Nabawtismuhan si Pailing subong isa sang mga Saksi ni Jehova sa edad nga 24. Sa edad nga 30, second year sia sa hayskul, kag ang iya teritoryo nga ginbantalaan amo ang eskwelahan. Rolando (isa ka ngalan sa ubos nga kapatagan) na ang tawag nila sa iya.

Kon makilala mo si Rolando, makita mo ang isa ka maayo mamiste kag palayuhum nga ministro nga nagaalagad subong bug-os tion nga manugbantala kag ministeryal nga alagad sa isa sang mga kongregasyon sa Mindoro. Sining karon lang, nagpauli si Rolando sa kabukiran, indi agod buylugan ang mga Batangan sa ila mga tradisyon, kundi agod ipaambit sa ila ang nagahatag-kabuhi nga mga kamatuoran gikan sa Biblia.

Nalangkag Makatigayon sing Kingdom Hall

Ang probinsia sang Bukidnon​—⁠nagakahulugan “Mga Tagabukid” sa Cebuano​—⁠nahamtang sa nabagatnan nga pulo sang Mindanao. Isa ini ka duog sang mga kabukiran, mga nalupyakan, mga kasubaan, kag mataas nga mga kapatagan. Ang mauyahon nga duta ginatamnan sang pinya, mais, kape, humay, kag saging. Nagapuyo didto ang tribo sang Talaandig kag Higaonon. Dapat man sila makatuon tuhoy kay Jehova. Sining karon lang, ini nga higayon nabuksan sa makawiwili gid nga paagi malapit sa banwa sang Talakag.

Ang mga Saksi nga nagtaklad sa bukid mainit nga gin-abiabi bisan pa mabugnaw didto ang klima. Ang mga tumandok nagapati sa labing gamhanan nga Dios, ang Amay, apang indi nila kilala ang iya ngalan. Sanglit yara sila pirme sa kagulangan, amo pa lang ini ang una nga tion nga nasugilanon nila ang mga Saksi ni Jehova. Ginpakilala sa ila ang ngalan sang Dios, subong man ang iya makalilipay nga katuyuan may kaangtanan sa Ginharian. Ang mga tawo nalipay gid, gani ginpamat-od nga himuon ang dugang pa nga pagduaw sa ila minuro.

Sumunod ang pila ka pagduaw. Subong resulta, ang mga tumandok nagtanyag sing isa ka lugar nga patindugan sing “balay” sang mga Saksi ni Jehova. Malipayon ini nga ginbaton sang mga Saksi. Nahamtang ini sa putukputukan sang pinakamataas nga pukatod, nga kitaon sa dalan. Ang ginpatindog nga tinukod human sa kahoy, kawayan, kag lukay sang buri. Ang proyekto nahuman sa sulod sang tatlo ka bulan kag napulo ka adlaw. Ang karatula nga “Kingdom Hall of Jehovah’s Witnesses” kitaon gid sa atubangan sang tinukod. Hunahunaa lamang, isa ka Kingdom Hall nga ginpatindog antes pa matukod ang isa ka kongregasyon!

Sugod sadto, nagsaylo didto ang isa ka gulang sang kongregasyon kag bug-os tion nga ministro kag ang isa man ka ministeryal nga alagad. Upod sa mga Saksi sa kaingod nga mga duog, nangabudlay sila agod matukod ang isa ka kongregasyon. Natuman ini sang Agosto sang 1998. Ining Kingdom Hall ginagamit karon sang isa ka diutay nga kongregasyon, nga nagabulig sa mga tagabukid nga makatuon sa mga kamatuoran sang Biblia.

Sa pagkamatuod, tumalagsahon nga ginagamit ni Jehova ang iya nakahanda nga mga alagad sa Pilipinas agod ipalapnag ang kamatuoran sang Ginharian bisan sa mabudlay kadtuan nga mga kabukiran. Madumduman naton ang Isaias 52:​7, nga nagasiling: “Daw ano katahom sa mga bukid ang mga tiil sang isa nga nagadala sing maayong balita.”

[Mga Mapa sa pahina 11]

(Para sa aktual ng pormat, tan-awa ang publikasyon)

ABRA

MINDORO

BUKIDNON

[Credit Line]

Globe: Mountain High Maps® Copyright © 1997 Digital Wisdom, Inc.

[Mga retrato sa pahina 10]

Ang pagbantala sa kabukiran nagalakip sang inoras nga pagpanglakaton sa kudol-kudol nga duta

[Mga retrato sa pahina 10]

Bawtismo sa isa ka sapa sa bukid