Ginadumtan ni Jehova ang Pagkamaluibon

‘Indi magluib sa isa kag isa.’​—⁠MALAQUIAS 2:10.

1. Ano ang ginapatuman sang Dios sa aton agod mabaton naton ang kabuhi nga walay katapusan?

LUYAG mo bala ang kabuhi nga walay katapusan? Kon nagapati ka sa sining paglaum suno sa ginsaad sa Biblia, ayhan magasiling ka, ‘Siempre.’ Apang kon luyag mo nga hatagan ka sang Dios sing kabuhi nga walay katapusan sa iya bag-ong kalibutan, dapat mo sundon ang iya mga ginapatuman. (Manugwali 12:13; Juan 17:3) Di-makatarunganon bala paabuton nga himuon ini sang di-himpit nga mga tawo? Indi, kay si Jehova makapalig-on nga nagsiling: “Nahamuot ako sa mahigugmaon nga kaayo, kag indi sa halad; kag sa ihibalo sang Dios sa baylo sang bug-os nga mga halad-nga-sinunog.” (Oseas 6:6) Gani mahimo masunod bisan sang masinalaypon nga mga tawo ang mga ginapatuman sang Dios.

2. Paano ginluiban si Jehova sang madamo nga Israelinhon?

² Apang, indi tanan luyag nga himuon ang kabubut-on ni Jehova. Ginpakita ni Oseas nga bisan ang madamo nga Israelinhon indi luyag nga himuon ini. Subong isa ka pungsod, nakigkatipan sila nga sundon ang mga kasuguan sang Dios. (Exodo 24:1-8) Apang, wala madugay ‘ginlalis nila ang katipan’ paagi sa paglapas sa iya mga kasuguan. Gani, si Jehova nagsiling nga ‘ginluiban’ sia sang mga Israelinhon. (Oseas 6:7) Kag amo man ang madamo nga tawo sugod sadto. Apang ginadumtan ni Jehova ang pagkamaluibon, ginapakita man ini sa iya ukon sa mga nagahigugma kag nagaalagad sa iya.

3. Ano ang binagbinagon sa sining pagtuon?

³ Si Oseas indi lamang ang manalagna nga nagpadaku sang pagtamod sang Dios sa pagluib, ang pagtamod nga dapat naton tigayunon kon luyag naton magkabuhi sing malipayon. Sa nauna nga artikulo, gin-usisa naton ang daku nga bahin sang matagnaon nga mensahe ni Malaquias, sugod sa nahauna nga kapitulo sang iya tulun-an. Binagbinagon naton karon ang ikaduha nga kapitulo sini nga tulun-an kag tan-awon kon paano dugang nga ginapatalupangod ang pagtamod sang Dios tuhoy sa pagkamaluibon. Bisan pa ginbinagbinag ni Malaquias ang kahimtangan sang katawhan sang Dios mga dekada sa tapos nga nagpauli sila gikan sa pagkabihag sa Babilonia, ining ikaduha nga kapitulo may daku gid nga kahulugan para sa aton karon.

Salabdungon nga mga Saserdote

4. Anong paandam ang ginhatag ni Jehova sa mga saserdote?

⁴ Ang kapitulo 2 nagabukas paagi sa pagpakamalaut ni Jehova sa Judiyong mga saserdote bangod sang pagtalikod sa iya matarong nga mga dalanon. Kon indi nila pagsundon ang iya laygay kag tadlungon ang ila mga dalanon, may malain gid nga matabo sa ila. Talupangda ang nahaunang duha ka bersikulo: “ ‘Para sa inyo ini nga sugo, O mga saserdote. Kon indi kamo magpamati, kag kon indi ninyo paghuptan ini sa tagipusuon sa paghimaya sa akon ngalan,’ siling ni Jehova sang mga kasuldadusan, ‘pat-od nga magapadala man ako sa inyo sing pagpakamalaut, kag pakamalauton ko ang inyo mga pagpakamaayo.’ ” Kon gintudluan sang mga saserdote ang katawhan sang mga kasuguan sang Dios kag ginsunod ini, kuntani ginpakamaayo sila. Apang bangod wala nila ginsapak ang kabubut-on sang Dios, magaabot sa baylo ang sumpa kag pagpakamalaut. Bisan ang ginbungat nga mga pagpakamaayo sang mga saserdote mangin pagpakamalaut.

5, 6. (a) Ngaa ang mga saserdote ilabi na nga salabdungon? (b) Paano ginpakita ni Jehova ang pagtamay sa mga saserdote?

⁵ Ngaa ang mga saserdote amo ilabi na ang salabdungon? Maathag ini nga ginasugid sang bersikulo 7: “Ang mga bibig sang isa ka saserdote  amo ang dapat maghupot sing ihibalo, kag ang kasuguan amo ang dapat pangitaon sang katawhan gikan sa iya baba; kay sia ang mensahero ni Jehova sang mga kasuldadusan.” Kapin sa isa ka libo ka tuig antes sini, ang kasuguan sang Dios nga ginhatag sa Israel paagi kay Moises nagsiling nga katungdanan sang mga saserdote nga “tudluan ang mga anak sang Israel sang tanan nga palatukuran nga ginpamulong ni Jehova.” (Levitico 10:11) Makapasubo nga sang ulihi, ang manunulat sang 2 Cronica 15:3 nagreport: “Madamo ang adlaw nga ang Israel wala sing matuod nga Dios kag wala sing saserdote nga nagatudlo kag wala sing Kasuguan.”

⁶ Sang panahon ni Malaquias, sang ikalima nga siglo B.⁠C.⁠E., ang kahimtangan sang mga saserdote amo gihapon. Wala nila gintudlo ang Kasuguan sang Dios sa mga tawo. Gani dapat manabat ining mga saserdote. Talupangda ang matigdas nga mga pulong ni Jehova batok sa ila. Ang Malaquias 2:3 nagasiling: “Hamlasan ko sing ipot ang inyo mga nawong, sing ipot sang inyo mga piesta.” Daw ano kasakit nga hambal! Ang ipot sang ginahalad nga mga sapat dapat kuntani dalhon sa guwa sang kampo kag sunugon. (Levitico 16:27) Apang sang ginsilingan sila ni Jehova nga ihamlas ang ipot sa ila mga nawong, maathag ini nga nagapakita sang pagtamay kag pagsikway niya sa ila mga halad kag sa mga nagahalad sini.

7. Ngaa naakig si Jehova sa mga manunudlo sang Kasuguan?

⁷ Mga siglo antes sang panahon ni Malaquias, ginpaatipan ni Jehova sa mga Levinhon ang tabernakulo kag sang ulihi ang templo kag ang sagrado nga ministeryo. Mga manunudlo sila sa pungsod sang Israel. Ang pagtuman nila sa ila katungdanan magakahulugan sing kabuhi kag paghidait para sa ila kag sa pungsod. (Numeros 3:5-8) Apang, nadula sang mga Levinhon ang ila una nga kahadlok sa Dios. Sa amo, si Jehova nagsiling sa ila: ‘Naglipas kamo sa dalanon. Ginpasandad ninyo ang madamo sa kasuguan. Ginguba ninyo ang katipan ni Levi. Wala ninyo ginatuman ang akon mga dalanon.’ (Malaquias 2:​8, 9) Bangod sang indi nila pagtudlo sa kamatuoran kag indi maayo nga halimbawa, ginpatalang sang mga saserdote ang madamong Israelinhon, gani makatarunganon nga maakig si Jehova sa ila.

Pagsunod sa mga Talaksan sang Dios

8. Tuman gid bala ang magpaabot nga tumanon sang mga tawo ang mga talaksan sang Dios? Ipaathag.

⁸ Indi naton paghunahunaon nga ang mga saserdote pakitaan sing kahanuklog kag ginpatawad kuntani bangod mga tawo lamang sila nga di-himpit kag indi mapaabot nga makasunod sa mga talaksan sang Dios. Ang matuod amo nga sarang matuman sang mga tawo ang mga kasuguan sang Dios, kay wala nagapaabot si Jehova sang indi nila mahimo. Mahimo nga gintuman anay sang pila ka saserdote ang mga talaksan sang Dios, kag may yara isa nga naghimo gid sini sang ulihi​—⁠si Jesus, ang dakung “mataas nga saserdote.” (Hebreo 3:1) Amo gid sini ang masiling tuhoy sa iya: “Ang kasuguan sang kamatuoran yara sa iya baba, kag wala sing pagkadimatarong nga masapwan sa iya mga bibig. Naglakat sia upod sa akon sa paghidait kag sa pagkatadlong, kag madamo ang ginpaliso niya gikan sa kasaypanan.”​—⁠Malaquias 2:6.

9. Sin-o ang matutom nga nagsugid sang kamatuoran sa panahon naton?

 ⁹ Sa kapin na sa isa ka siglo, ang hinaplas nga mga utod ni Cristo, ang mga may langitnon nga paglaum, nag-alagad man subong “isa ka balaan nga pagkasaserdote, agod magdulot sing espirituwal nga mga halad nga kalahamut-an sa Dios.” (1 Pedro 2:5) Nanguna sila sa pagsugid sing kamatuoran sang Biblia sa iban. Kay natun-an mo ang mga kamatuoran nga ginatudlo nila, wala mo bala maeksperiensiahi nga ang kasuguan mismo sang kamatuoran naggikan sa ila baba? Nabuligan nila ang madamo nga talikdan ang relihiosong kasaypanan, amo nga minilyon na karon sa bug-os nga kalibutan ang nakatuon sang mga kamatuoran sang Biblia kag may paglaum nga kabuhi nga walay katapusan. Pribilehiyo man nila nga itudlo ang kasuguan sang kamatuoran sa minilyon pa nga iban.​—⁠Juan 10:16; Bugna 7:9.

Rason sa Pagpangandam

10. Ngaa may rason kita nga magpangandam?

¹⁰ Apang, may rason kita sa pagpangandam. Mahimo indi naton mahangpan ang maathag nga leksion sa Malaquias 2:1-9. Alisto bala kita, amo nga wala sing pagkadimatarong nga makita sa aton mga bibig? Halimbawa, masaligan gid bala sang aton pamilya ang aton ginahambal? Masaligan man bala ini sang aton espirituwal nga mga kauturan sa kongregasyon? Mahapos palambuon ang batasan nga maayo maghuluhambal nga nagagamit sing pinili nga mga tinaga nga indi sayop apang makapatalang. Ukon mahimo pasobrahan ukon ihinago sang isa ang mga detalye sa transaksion sa negosyo. Indi bala ini makita ni Jehova? Kag kon sundon naton ini nga mga buhat, batunon bala niya ang mga halad sang pagdayaw sang aton mga bibig?

11. Sin-o ilabi na ang dapat magpangandam?

¹¹ Para sa may pribilehiyo nga magtudlo sang Pulong sang Dios sa mga kongregasyon karon, ang Malaquias 2:7 dapat mangin isa ka paandam. Ini nagasiling nga ang ila mga bibig “dapat maghupot sing ihibalo, kag ang kasuguan amo ang dapat pangitaon sang katawhan” gikan sa ila mga baba. Ining mga manunudlo may mabug-at nga responsabilidad, kay ginapakita sang Santiago 3:1 nga “magabaton [sila] sing mas mabug-at nga paghukom.” Bisan pa dapat sila magtudlo sing mapagsik, ang ila panudlo dapat nga napasad gid sa nasulat nga Pulong sang Dios kag sa instruksion gikan sa organisasyon ni Jehova. Sa sining paagi mangin “sangkol [sila] sa pagtudlo sa iban.” Busa, ginlaygayan sila: “Himua ang imo bug-os nga masarangan nga ipakita ang imo kaugalingon nga nahamut-an sang Dios, manugpangabudlay nga wala sing dapat ikahuya, nga nagagamit sing matadlong sang pulong sang kamatuoran.”​—⁠2 Timoteo 2:​2, 15.

12. Ano nga paghalong ang dapat himuon sang mga nagatudlo?

1² Kon indi kita maghalong, mahimo kita masulay nga laktan sing personal nga ideya ukon opinyon ang aton panudlo. Makatalagam ini ilabi na para sa isa ka tawo nga may huyog sa pagsalig sa iya mga konklusion bisan pa supak ini sa ginatudlo sang organisasyon ni Jehova. Apang ginapakita sang Malaquias kapitulo 2 nga dapat naton paabuton sa mga manunudlo sang kongregasyon nga sundon nila ang ihibalo gikan sa Dios kag indi ang personal nga mga ideya, nga makapasandad sa mga karnero. Si Jesus nagsiling: “Ang bisan sin-o nga nagapasandad sa isa sining mga magamay nga nagatuo sa akon, maayo pa sa iya nga bitayan sa liog sing daku nga bato sang galingan kag lunuron sia sa kadadalman sang malapad nga kalalawran.”​—⁠Mateo 18:6.

 Pagminyo sa Di-tumuluo

13, 14. Ano ang isa ka maluibon nga buhat nga ginpatalupangod ni Malaquias?

¹³ Halin sa bersikulo 10 padayon, ginapadaku sing labi pa ka direkta sang Malaquias kapitulo 2 ang pagluib. Ginapatalupangod ni Malaquias ang duha ka maghiliangot nga paggawi nga sa sini sulit-sulit niya nga ginagamit ang ‘pagluib.’ Una, talupangda nga ginasugdan ni Malaquias ang iya laygay sa sining mga pamangkot: “Indi bala kita tanan isa lamang sing amay? Indi bala isa lamang ka Dios ang nagtuga sa aton? Ngaa bala nagaluibay kita sa isa kag isa, sa pagpasipala sa katipan sang aton mga katigulangan?” Nian ginadugang sang bersikulo 11 nga ang maluibon nga paggawi sang Israel katumbas sa pagpasipala sa “pagkabalaan ni Jehova.” Ano ang ila ginhimo nga serioso gid? Ginapatalupangod sini nga bersikulo ang isa sang sayop nga mga buhat: “Ginpanag-iyahan [nila] ang anak nga babayi sang dios nga dumuluong subong palangasaw-on.”

¹⁴ Kon sa aton pa, ang pila ka Israelinhon, nga bahin sang isa ka pungsod nga gindedikar kay Jehova, nagminyo sa mga wala nagasimba sa iya. Ginabuligan kita sang konteksto nga mahangpan kon ngaa serioso gid ini. Ang bersikulo 10 nagasiling nga isa lamang ang ila amay. Wala ini nagapatuhoy kay Jacob (nga ginhingadlan liwat Israel) ukon kay Abraham ukon bisan kay Adan. Ginapakita sang Malaquias 1:6 nga si Jehova amo ang ‘isa ka amay.’ Ang pungsod sang Israel may yara kaangtanan kay Jehova, kag kaupod sa katipan nga ginhimo upod sa ila katigulangan. Ang isa sang mga kasuguan sa sini nga katipan amo: “Dili ka makig-alyansa sa pagminyo sa ila. Dili ka maghatag sang imo anak nga babayi sa iya anak nga lalaki, kag dili ka magkuha sang iya anak nga babayi para sa imo anak nga lalaki.”​—⁠Deuteronomio 7:3.

15. (a) Paano mahimo pakamatarungon sang iban ang pagminyo sa di-tumuluo? (b) Paano ginpabutyag ni Jehova ang iya kaugalingon bahin sa pagminyo?

¹⁵ Ang pila karon mahimo mangatarungan: ‘Ang lalaki (ukon babayi) nga naluyagan ko mabuot gid. Mahimo nga batunon niya sa ulihi ang matuod nga pagsimba.’ Ginapamatud-an sini nga panghunahuna ang inspirado nga paandam: “Ang tagipusuon malimbungon labaw sa tanan nga butang kag makatalagam.” (Jeremias 17:9) Ang pagtamod sang Dios sa pagminyo sa di-tumuluo ginapabutyag sa Malaquias 2:12: “Papason ni Jehova ang tagsa-tagsa nga nagahimo sini.” Busa, ginalaygayan ang mga Cristiano nga magminyo “lamang sa Ginuo.” (1 Corinto 7:39) Sa idalom sang Cristianong kahimusan, ang tumuluo wala ‘ginapapas’ bangod sang pagminyo sa isa ka di-tumuluo. Apang, kon ang di-tumuluo magpabilin nga di-tumuluo, ano ang matabo sa iya kon laglagon sa dili madugay sang Dios ining sistema?​—⁠Salmo 37:​37, 38.

Indi Maayo nga Pagtratar sa Tiayon

16, 17. Anong maluibon nga paggawi ang ginhimo sang iban?

¹⁶ Nian ginabinagbinag ni Malaquias ang ikaduha nga pagluib: ang indi maayo nga pagtratar sa tiayon, ilabi na ang di-makatarunganon nga pagdiborsio. Ang bersikulo 14 sang kapitulo 2 nagasiling: “Si Jehova mismo nangin saksi sa tunga mo kag sang asawa sang imo pagkapamatan-on, nga imo ginluiban, bisan pa paris mo sia kag asawa sang imo katipan.” Bangod sang pagpakig-angot sing maluibon sa ila mga asawa, ‘gintabunan sing mga luha’ sang Judiyong mga bana ang halaran ni Jehova. (Malaquias 2:13) Nagdiborsio ining mga lalaki sa indi suno-sa-kasuguan nga mga rason, di-husto nga ginbiyaan ang ila mga asawa sang ila pagkapamatan-on, ayhan agod makapangasawa sing mas batan-on ukon pagano nga mga babayi. Kag gintugutan ini sang malaut nga mga saserdote! Apang ang Malaquias 2:16 nagasiling: “ ‘Ginadumtan niya ang pagdiborsio,’ siling ni Jehova nga Dios sang Israel.” Sang ulihi, ginpakita ni Jesus nga ang imoralidad amo lamang ang rason para sa diborsio nga nagahilway  sa walay sala nga tiayon sa pagminyo liwat.​—⁠Mateo 19:9.

¹⁷ Pamalandungi ang mga pulong ni Malaquias, kag tan-awa kon paano sini ginaganyat ang tagipusuon kag ang pagbatyag sing sadsaran nga kaayo. Ginapatuhuyan niya ang ‘imo paris kag asawa sang imo katipan.’ Ang kada lalaki nga nadalahig nagminyo sa masigkatumuluo, sa isa ka Israelinhon nga babayi, ginpili sia subong isa ka pinalangga nga kaupod kag paris tubtob nagakabuhi sila. Bisan bata pa sila nag-asawahay, ang pagligad sang tion kag pagtigulang wala nagapawalay pulos sa katipan nga ila ginhimo, nga amo, ang kontrata sa kasal.

18. Sa anong paagi ang laygay ni Malaquias bahin sa pagluib naaplikar karon?

¹⁸ Ang laygay bahin sa sini nga butang naaplikar man karon. Makapasubo nga ginlapas sang iban ang panuytoy sang Dios nga magminyo lamang sa Ginuo. Kag makapasubo man nga gin-untatan sang iban ang pagtinguha nga huptan nga mabakod ang ila pag-asawahay. Sa baylo, nagahimo sila sing mga balibad kag nagalakat sa dalanon nga ginadumtan sang Dios paagi sa pagdiborsio nga supak sa Kasulatan agod makaminyo sing lain. Sa paghimo sini, ‘ginpalapyo nila si Jehova.’ Sang panahon anay ni Malaquias, ang mga wala nagatuman sang laygay sang Dios makahason pa gani nga nagbatyag nga si Jehova indi makatarunganon sa iya mga pagtamod. Daw nagsiling sila: “Diin ang Dios sang katarungan?” Tiko gid nga panghunahuna! Kabay nga indi kita mahulog sa sining siod.​—⁠Malaquias 2:17.

19. Paano mabaton sang mga bana kag mga asawa ang espiritu sang Dios?

¹⁹ Sa positibo nga bahin, ginapakita ni Malaquias nga ang iban nga mga bana indi maluibon sa ila mga asawa. ‘Yara sa ila ang nabilin sa balaan nga espiritu sang Dios.’ (Bersikulo 15) Sing makalilipay, madamo karon sing amo sini nga mga  lalaki sa organisasyon sang Dios nga ‘nagahatag sing dungog sa ila mga asawa.’ (1 Pedro 3:7) Wala nila ginasakit ang ila mga asawa sa pisikal ukon sa hambal, wala ginapilit ang malaw-ay nga mga buhat sa sekso, kag wala ginapakahuy-an ang ila mga asawa paagi sa pagpakiat sa iban nga mga babayi ukon paagi sa pagtan-aw sing pornograpiya. Ginpakamaayo man ang organisasyon ni Jehova sing madamong matutom nga Cristianong mga asawa nga mainunungon sa Dios kag sa iya mga kasuguan. Nahibaluan nila kon ano ang ginadumtan sang Dios, kag nagahunahuna sila kag nagapanghikot sing nahisuno. Padayon nga iluga sila, nga ‘ginatuman ang Dios subong manuggahom’ kag ginapakamaayo sang iya balaan nga espiritu.​—⁠Binuhatan 5:29.

20. Ano nga tion ang nagahilapit para sa tanan nga katawhan?

²⁰ Sa dili madugay, hukman ni Jehova ining bug-os nga kalibutan. Dapat manabat sa iya ang kada indibiduwal sa iya ginapatihan kag ginabuhat. “Ang tagsa-tagsa sa aton magahatag sing husay para sa iya kaugalingon sa Dios.” (Roma 14:12) Gani ang makawiwili nga pamangkot sa sini nga punto amo: Sin-o ang maluwas sa adlaw ni Jehova? Ini nga tema binagbinagon sang ikatlo kag katapusan nga artikulo sining mga serye.

Mapaathag Mo Bala?

• Tungod sa anong sadsaran nga rason nga ginpakamalaut ni Jehova ang mga saserdote sa Israel?

• Ngaa ang mga talaksan sang Dios indi tuman kataas para sundon sang mga tawo?

• Ngaa dapat kita maghalong sa aton panudlo karon?

• Anong duha ka buhat ang ilabi na nga ginapakamalaut ni Jehova?

[Mga Pamangkot sa Pagtinuon]

[Retrato sa pahina 15]

Sang panahon ni Malaquias ang mga saserdote ginpakamalaut bangod sang indi pagsunod sa mga dalanon ni Jehova

[Retrato sa pahina 16]

Dapat kita maghalong nga ginatudlo naton ang mga dalanon ni Jehova, nga wala ginapasanyog ang personal nga mga ideya

[Mga retrato sa pahina 18]

Ginpakamalaut ni Jehova ang mga Israelinhon nga nagdiborsio sang ila mga asawa sa diutay nga mga rason kag nangasawa sing mga pagano

[Retrato sa pahina 18]

Ginapadunggan karon sang mga Cristiano ang ila katipan sa pag-asawahay