Ginaisip Mo Bala ang Bili?

GINTANYAGAN ni Jesucristo ang iya mga disipulo sing kabuhi nga walay katapusan, apang ginlaygayan man niya sila nga isipon ang bili kon ang isa mangin Cristiano. Gin-ilustrar niya ang punto paagi sa pagpamangkot: “Sin-o sa inyo nga nagahandum sa pagtukod sing torre ang wala anay nagalingkod kag nagabulubanta sang kabilihanan [ukon, nagaisip sang bili], agod mahibaluan kon bala may bastante sia nga inugpahuman sa sini?” (Lucas 14:28) Ano nga bili ang ginpatuhuyan ni Jesus?

Ang tanan nga Cristiano ginatilawan​​—⁠ang pila sini mabug-at. (Salmo 34:19; Mateo 10:36) Busa, kinahanglan nga mangin handa kita sa hunahuna kag sa espirituwal agod indi kita makibot kon makasumalang kita sing mga paghingabot ukon sing iban pa nga mga problema. Dapat nabanabana na naton ining mga hangkat subong bahin sang bili kon ang isa mangin disipulo ni Cristo, nakahibalo nga ang padya​​—⁠kaluwasan gikan sa sala kag kamatayon​​—⁠mas daku pa sangsa bisan ano nga butang nga mahatag sa aton sining presente nga sistema. Huo, wala sing butang nga ginatugot ang Dios​​—⁠bisan kamatayon​​—⁠ang permanente nga makahalit sa aton kon padayon naton sia nga alagaron.​​—⁠2 Corinto 4:​16-​18; Filipos 3:⁠8.

Paano mangin amo sina kabakod ang aton pagtuo? Ang aton pagtuo labi nga nagabakod kada maghimo kita sing husto nga desisyon, manindugan sa Cristianong prinsipio, ukon magpanghikot nahisuno sa kabubut-on sang Dios​​—⁠ilabi na kon ginaipit kita sa paghimo sing tuhay nga butang. Kon ginapakamaayo kita ni Jehova bangod sang aton matutom nga dalanon, ang aton pagtuo nagabakod kag nagadalom. Sa sining paagi, ginailog naton ang halimbawa ni Jesus, sang iya mga disipulo, kag sang tanan nga matutom nga lalaki kag babayi nga sa nagkalainlain nga tion sang maragtas ‘nag-isip sing bili’ sang pag-alagad sa Dios sing husto.​​—⁠Marcos 1:​16-​20; Hebreo 11:​4, 7, 17, 24, 25, 32-​38.