Sin-o ang Maluwas sa Adlaw ni Jehova?

“Nagaabot ang adlaw nga nagadabdab subong sang hurno.”​—⁠MALAQUIAS 4:1.

1. Paano ginalaragway ni Malaquias ang paglaglag sa sining malauton nga sistema sang mga butang?

SI manalagna Malaquias gin-inspirar sang Dios sa pagrekord sa mga tagna tuhoy sa makahalawhaw nga mga hitabo sa malapit gid nga palaabuton. Ang tanan nga tawo sa duta maapektuhan sining mga hitabo. Ang Malaquias 4:1 nagatagna: “  ‘Yari karon! nagaabot ang adlaw nga nagadabdab subong sang hurno, kag ang tanan nga matinaastaason kag ang tanan nga nagahimo sing malaut mangin subong sang dagami. Kag ang adlaw nga magaabot magalamon gid sa ila,’ siling ni Jehova sang mga kasuldadusan, ‘amo kon ngaa wala sing mabilin sa ila nga gamot ukon sanga.’ ” Daw ano ka bug-os ang paglaglag sa sining malauton nga sistema sang mga butang? Mangin subong ini sa isa ka kahoy nga ang mga gamot ginlaglag amo nga indi na ini liwat manubo.

2. Paano ginalaragway sang pila ka kasulatan ang adlaw ni Jehova?

² Mahimo ka mamangkot, ‘Ano ang “adlaw” nga ginatagna ni manalagna Malaquias?’ Pareho ini sa ginasiling sang Isaias 13:9: “Yari karon! Ang adlaw ni Jehova nagaabot, mapintas nga may kasingkal kag nagadabdab nga kaakig, agod himuon ang duta nga isa ka butang nga katingalahan, kag agod laglagon ang mga makasasala sang duta gikan sa sini.” Ginalaragway ini sang Sofonias 1:15: “Ina nga adlaw isa ka adlaw sang kasingkal, isa ka adlaw sang kasisit-an kag sang kalisang, isa ka adlaw sang bagyo kag sang pagkahapay, isa ka adlaw sang kadulom kag sang kaguom, isa ka adlaw sang mga gal-um kag sang madamol nga kaguom.”

“Ang Dakung Kapipit-an”

3. Ano ang “adlaw ni Jehova”?

³ Sa daku nga katumanan sang tagna ni Malaquias, ang “adlaw ni Jehova” amo ang panag-on sang tion nga may matabo nga “dakung kapipit-an.” Si Jesus nagtagna: “Nian may dakung kapipit-an, nga ang subong sini wala pa mahanabo kutob sa ginsuguran sang kalibutan tubtob karon, wala, kag indi na gid mahanabo.” (Mateo 24:21) Hunahunaa ang kasisit-an nga natabo  na sa kalibutan, ilabi na sugod sang 1914. (Mateo 24:7-12) Aba, kapin sa 50 milyones ka kabuhi ang nakutol sang Bug-os Kalibutan nga Inaway II lamang! Apang, ini nga kasisit-an wala pa sa kamalingking kon ipaanggid sa mga kalamidad nga matabo sa “dakung kapipit-an.” Ini nga hitabo, kasubong sa adlaw ni Jehova, matapos sa Armagedon, nga magatakop sa katapusan nga mga adlaw sining malauton nga sistema.​—⁠2 Timoteo 3:1-5, 13; Bugna 7:14; 16:​14, 16.

4. Kon matapos ang adlaw ni Jehova, ano ang mahanabo?

⁴ Pagkatapos sinang adlaw ni Jehova, ang kalibutan ni Satanas kag ang iya mga sumalakdag pagalaglagon. Ang una nga laglagon amo ang tanan nga butig nga relihion. Nian hukman ni Jehova ang mga sistema ni Satanas sa ekonomiya kag politika. (Bugna 17:12-14; 19:​17, 18) Si Ezequiel nagatagna: “Ihaboy nila sa mga dalan ang ila pilak, kag ang ila bulawan mangin dulumtan nga butang. Ang ila pilak kag ang ila bulawan indi makaluwas sa ila sa adlaw sang kasingkal ni Jehova.” (Ezequiel 7:19) Tuhoy sa sinang adlaw ang Sofonias 1:14 nagasiling: “Ang dakung adlaw ni Jehova malapit na. Malapit na ini, kag nagadalidali ini sing tama.” Bangod sang ginasiling sang Biblia tuhoy sa adlaw ni Jehova, dapat kita mangin determinado sa pagpanghikot nahisanto sa matarong nga mga ginapatuman sang Dios.

5. Ano ang naeksperiensiahan sang mga nagakahadlok sa ngalan ni Jehova?

⁵ Sa tapos matagna ang himuon sang adlaw ni Jehova sa kalibutan ni Satanas, ang Malaquias 4:2 nagarekord kay Jehova nga nagasiling: “Sa inyo nga nahadlok sa akon ngalan ang adlaw sang pagkamatarong magasilak gid, nga may pag-ayo sa mga pakpak sini; kag magaguwa kamo kag magalumpat sa duta nga subong sang pinatambok nga mga tinday nga baka.” “Ang adlaw sang pagkamatarong” amo si Jesucristo. Sia ang espirituwal nga “kapawa sang kalibutan.” (Juan 8:12) Si Jesus nagasilak nga may pagpang-ayo, una ang espirituwal nga pagpang-ayo, nga naeksperiensiahan naton karon, kag nian ang bug-os nga pisikal nga pagpang-ayo sa bag-ong kalibutan. Subong ginasiling ni Jehova, ang ginpang-ayo ‘magaguwa kag magalumpat sa duta subong sang pinatambok nga mga tinday nga baka’ nga nakunyag kag nalipay makaguwa sa toril.

6. Anong selebrasyon sa kadalag-an ang buylugan sang mga alagad ni Jehova?

⁶ Kamusta naman ang mga wala nagasapak sa mga ginapatuman ni Jehova? Ang Malaquias 4:3 nagasiling: “ ‘Tapakon ninyo [mga alagad sang Dios] ang mga malauton, kay sila mangin subong sang yab-ok sa inyo mga dapadapa sa adlaw nga maghulag ako,’ siling ni Jehova sang mga kasuldadusan.” Ang tawhanon nga mga sumilimba sang Dios indi magapakigbahin sa paglaglag sa kalibutan ni Satanas. Sa baylo, malaragwayon nila nga ‘tapakon ang mga malauton’ paagi sa pagbuylog sa selebrasyon sa kadalag-an pagkatapos sang adlaw ni Jehova. Ang paglaglag sa mga kasuldadusan ni Paraon sa Dagat nga Mapula ginsundan sang isa ka daku nga selebrasyon. (Exodo 15:1-21) Sundan man sang isa ka selebrasyon sa kadalag-an ang paglaglag kay Satanas kag sa iya kalibutan sa dakung kapipit-an. Ang matutom nga mga makalampuwas sa adlaw ni Jehova magasinggit: “Magkalipay kita kag magkasadya sa iya pagluwas.” (Isaias 25:9) Daw ano nga kalipay kon ang pagkasoberano ni Jehova mabindikar kag ang duta matinluan agod puy-an sing malinong!

Ginailog sang Cristiandad ang Israel

7, 8. Ilaragway ang espirituwal nga kahimtangan sang Israel sang panahon ni Malaquias.

⁷ Ang mga nagaalagad kay Jehova kahamut-an niya, samtang ang wala nagaalagad sa iya indi niya pagkahamut-an. Kaangay ini sang ginsulat ni Malaquias ang iya tulun-an. Sang 537 B.⁠C.⁠E., ang nagkalabilin sang Israel ginpasag-uli sa tapos sang 70 ka tuig nga pagkabihag sa Babilonia. Apang, sang masunod nga siglo, ang ginpasag-uli nga pungsod nahulog sa apostasya kag kalautan. Wala ginpadunggan sang kalabanan nga mga tawo ang ngalan ni Jehova; ginlapas nila ang iya matarong nga mga kasuguan; gindagtaan ang iya templo paagi sa pagdala sing bulag, piang, kag masakiton nga mga sapat para ihalad; kag ginbulagan ang mga asawa sang ila pagkapamatan-on.

⁸ Gani, ginsilingan sila ni Jehova: “Magapalapit ako sa inyo sa paghukom, kag mangin saksi ako nga madagmit batok sa mga diwatahan, kag batok sa mga makihilahion, kag batok sa mga nagapanumpa sing binutig, kag batok sa mga nagadinaya sa suhol sa ginasuhulan nga mamumugon,  sa balo nga babayi kag sa bata nga lalaki nga ilo sa amay, kag sa mga nagatabog sa dumuluong nga pumuluyo, samtang wala sila nagakahadlok sa akon, . . . kay ako si Jehova; wala ako nagabag-o.” (Malaquias 3:​5, 6) Apang, ginpalab-ot ni Jehova ang imbitasyon kay bisan sin-o nga magatalikod sa ila malain nga mga dalanon: “Magbalik kamo sa akon, kag magabalik ako sa inyo.”​—⁠Malaquias 3:7.

9. Paano una nga natuman ang mga tagna ni Malaquias?

⁹ Ining mga pulong natuman man sang unang siglo C.⁠E. Isa ka nagkalabilin sang mga Judiyo ang nag-alagad kay Jehova kag nangin bahin sang isa ka bag-ong “pungsod” sang hinaplas-sang-espiritu nga mga Cristiano, nga naglakip sa mga Gentil. Apang ginsikway si Jesus sang kalabanan nga kinaugali nga Israel. Busa si Jesus nagsiling sa pungsod sang Israel: “Yari karon! Ang inyo balay ginapabay-an sa inyo.” (Mateo 23:38; 1 Corinto 16:22) Sang 70 C.⁠E., suno sa gintagna sang Malaquias 4:​1, “ang adlaw nga nagadabdab subong sang hurno” nag-abot sa undanon nga Israel. Ang Jerusalem kag ang templo sini ginlaglag, kag suno sa report kapin sa isa ka milyon ka tawo ang napatay bangod sang gutom, pag-agaway sing gahom, kag pagsalakay sang Romanong mga kasuldadusan. Apang, nakalikaw sa kapipit-an ang mga nagaalagad kay Jehova.​—⁠Marcos 13:14-20.

10. Sa anong paagi ginailog sang katawhan sa kabilugan kag sang mga klero ang unang-siglo nga Israel?

¹⁰ Gin-ilog sang katawhan, kag ilabi na sang Cristiandad, ang unang-siglo nga pungsod sang Israel. Ginapili sang mga lider kag sang katawhan sa kabilugan sa Cristiandad ang ila relihioso nga mga kredo sangsa mga kamatuoran tuhoy sa Dios nga gintudlo ni Jesus. Ang mga klero amo ilabi na ang salaon. Wala nila ginagamit ang ngalan ni Jehova, ginadula pa gani ini sa ila mga bersion sang Biblia. Wala nila ginapadunggan si Jehova paagi sa ila mga panudlo nga wala nahisanto sa Kasulatan, subong sang paganong mga doktrina sang walay katapusan nga pag-antos sa kalayuhon nga impierno, Trinidad, kag pagkadimamalatyon sang kalag kag ebolusyon. Busa ginakuha nila kay Jehova ang pagdayaw nga nagakabagay sa iya, subong sa ginhimo sang mga saserdote sang panahon ni Malaquias.

11. Paano ginapakita sang mga relihion sang kalibutan kon sin-o gid ang ila ginaalagad?

¹¹ Sang 1914, sang nagsugod ang katapusan nga mga adlaw, ginpakita sang mga relihion sining kalibutan, nga ginapangunahan sang mga nagapangangkon nga mga Cristiano, kon sin-o gid ang ila ginaalagad. Sa duha ka inaway sa bug-os nga kalibutan, ginpalig-on nila ang ila mga miembro sa pagkadto sa inaway tungod sa pungsudnon nga mga hulusayon, bisan pa nagkahulugan ini sang pagpatay sa ila masigkarelihion. Maathag nga  ginapakilala sang Pulong sang Dios ang mga nagatuman kay Jehova kag ang mga wala nagatuman sa iya: “Ang mga anak sang Dios kag ang mga anak sang Yawa makilala sa sining katunayan: Ang tagsa-tagsa nga wala nagahimo sing pagkamatarong wala maghalin sa Dios, amo man sia nga wala nagahigugma sang iya utod. Kay amo ini ang mensahe nga nabatian ninyo kutob sa ginsuguran, nga dapat kita maghigugmaanay; indi kaangay ni Cain, nga naghalin sa isa nga malauton kag nagpatay sang iya utod.”​—⁠1 Juan 3:10-12.

Pagtuman sa Tagna

12, 13. Ano nga mga tagna ang ginatuman sang mga alagad sang Dios sa tion naton?

¹² Pagkatapos sang Bug-os Kalibutan nga Inaway I sang 1918, nakita sang mga alagad ni Jehova nga ginpakamalaut sang Dios ang Cristiandad kag ang tanan iban pa nga butig nga relihion. Sugod sadto, ginpanawagan sa mga matarong sing tagipusuon: “Guwa ka sa iya, katawhan ko, kon indi ninyo luyag makaambit sa iya mga sala, kag kon indi ninyo luyag makabaton sing bahin sa iya mga kalalat-an. Kay ang iya mga sala nagtangkas na tubtob sa langit, kag ang Dios nagdumdom sang iya mga buhat sang inhustisya.” (Bugna 18:​4, 5) Ang mga luyag mag-alagad kay Jehova ginsugdan nga matinluan sa mga panudlo sang butig nga relihion kag nagsugod sila sa pagbantala sang maayong balita tuhoy sa natukod na nga Ginharian sa bug-os nga kalibutan, ang hilikuton nga dapat matapos sa wala pa ang katapusan sining malauton nga sistema sang mga butang.​—⁠Mateo 24:14.

¹³ Ini agod matuman ang tagna sa Malaquias 4:​5, diin si Jehova nagsiling: “Yari karon! Ipadala ko sa inyo si Elias nga manalagna sa wala pa mag-abot ang daku kag makakulugmat nga adlaw ni Jehova.” Ini nga tagna una nga natuman sa ginhimo ni Juan Bautista, nga naglandong kay Elias. Ginhimo ni Juan ang hilikuton nga kaangay sang ginhimo ni Elias sang ginbawtismuhan niya ang mga Judiyo nga naghinulsol sa ila mga sala batok sa Kasuguan nga katipan. Sing labi pa ka importante, si Juan amo ang mensahero sang Mesias. Apang, ang ginhimo ni Juan una lamang nga katumanan sang tagna ni Malaquias. Ginpakita ni Jesus, samtang ginapakilala si Juan subong ikaduhang Elias, nga may palaabuton pa nga hilikuton nga kaangay sang ginhimo ni “Elias.”​—⁠Mateo 17:​11, 12.

14. Anong importante nga hilikuton ang dapat himuon antes matapos ining sistema?

1⁴ Ginpakita sang tagna ni Malaquias nga ining daku nga hilikuton nga kaangay sang ginahimo ni Elias pagahimuon antes sang “daku kag makakulugmat nga adlaw ni Jehova.” Ini nga adlaw magahinakop sa madasig nagahilapit nga dakung adlaw sang Dios nga Labing Gamhanan, sa Armagedon. Nagakahulugan ini nga ang katapusan sining sistema sang mga butang kag ang pamuno sang Isa ka Libo ka Tuig nga Paggahom sang langitnon nga Ginharian sang Dios sa idalom sang ginpalingkod na sa trono nga si Jesucristo unahan sang hilikuton nga katumbas sa ginhimo ni Elias. Suno gid sa tagna, antes laglagon ni Jehova ining malauton nga sistema, ang modernong-adlaw nga Elias nga klase, nga ginasuportahan sang minilyon ka masigka-Cristiano nga may paglaum sa duta, mapagsik nga nagahimo sang hilikuton nga pagpasag-uli sa matuod nga pagsimba, ginapakataas ang ngalan ni Jehova, kag ginatudlo ang mga kamatuoran sang Biblia sa mga tulad-karnero.

Ginapakamaayo ni Jehova ang Iya mga Alagad

15. Paano ginadumdom ni Jehova ang iya mga alagad?

¹⁵ Ginapakamaayo ni Jehova ang mga nagaalagad sa iya. Ang Malaquias 3:16 nagasiling: “Sa sina nga tion ang mga nagakahadlok kay Jehova nagsinilingay, ang kada isa sa iya kaupod, kag si Jehova padayon nga nagtalupangod kag nagpamati. Kag isa ka tulun-an sang handumanan ang ginsulat sa atubangan niya para sa mga nagakahadlok kay Jehova kag para sa mga nagapainuino sa iya ngalan.” Halin kay Abel padayon, ginasulat sang Dios sa tulun-an, kon sa aton pa, ang mga ngalan sang mga dumdumon nga may paglaum nga kabuhi nga walay katapusan. Para sa ila, si Jehova nagasiling: “Dalha ninyo ang bug-os nga ikapulo sa tambubo, agod may pagkaon sa akon balay; kag tilawi ako, palihug, sa sini nga butang . . . kon indi ko pagbuksan sa inyo ang mga talambuan sang langit kag iula sa inyo ang pagpakamaayo tubtob nga wala na sing kakulang.”​—⁠Malaquias 3:10.

16, 17. Paano ginpakamaayo ni Jehova ang iya katawhan kag ang ila hilikuton?

 ¹⁶ Ginpakamaayo gid ni Jehova ang mga nagaalagad sa iya. Paano? Paagi sa dugang nga paghangop sa iya mga katuyuan. (Hulubaton 4:18; Daniel 12:10) Ang isa pa, paagi sa makadalayaw nga pagkamabungahon sang ila hilikuton nga pagbantala. Madamong bunayag sing tagipusuon ang nagbuylog sa ila sa matuod nga pagsimba, kag ini sila ang nagahuman sa “isa ka dakung kadam-an . . . gikan sa tanan nga pungsod kag tribo kag katawhan kag hambal, . . . kag nagasinggit sila sa mabaskog nga tingog, nga nagasiling: ‘Ang kaluwasan utang namon sa amon Dios, nga nagalingkod sa trono, kag sa Kordero.’ ” (Bugna 7:​9, 10) Ining dakung kadam-an nangin dayag sa makatilingala nga paagi, kag ang aktibo nga nagaalagad kay Jehova nagadamo karon sing kapin sa anom ka milyon sa kapin sa 93,000 ka kongregasyon sa bug-os nga duta!

¹⁷ Makita man ang pagpakamaayo ni Jehova sa bagay nga ang mga Saksi ni Jehova nagabalhag sang napanagtag sing labing lapnag nga mga publikasyon pasad sa Biblia sa bug-os nga maragtas. Sa karon, 90 milyones ka kopya sang Lalantawan kag Magmata! nga mga magasin ang ginabalhag kada bulan, Ang Lalantawan sa 144 ka hambal, ang Magmata! sa 87 ka hambal. Ang libro nga ginagamit sa pagtuon sa Biblia nga Ang Kamatuoran nga Nagadul-ong sa Kabuhi nga Dayon, nga ginbalhag sang 1968, ginpanagtag sa kadamuon nga kapin sa 107 milyones ka kopya sa 117 ka hambal. Ang Mahimu Ka Mabuhi sing Dayon sa Paraiso sa Duta, nga ginpaguwa sang 1982, nakalab-ot sa kapin sa 81 milyones ka kopya sa 131 ka hambal. Ang libro nga Ang Ihibalo nga Nagadul-ong sa Kabuhi nga Walay Katapusan, nga ginpaguwa sang 1995, naimprinta sa karon sa kapin sa 85 milyones ka kopya sa 154 ka hambal. Ang brosyur nga Ano ang Ginapatuman Sang Dios sa Aton?, nga ginbalhag sang 1996, napanagtag karon sa kadamuon nga 150 milyones ka kopya sa 244 ka hambal.

18. Ngaa nagaagom kita sing espirituwal nga kahamungayaan walay sapayan sang pagpamatok?

¹⁸ Ining espirituwal nga kahamungayaan naagom walay sapayan sang pinakamapintas kag  pinakamadugay nga pagpamatok gikan sa kalibutan ni Satanas. Ginapakita sini ang kamatuoran sang Isaias 54:17: “ ‘Bisan ano nga hinganiban nga himuon batok sa imo indi magamadinalag-on, kag bisan ano nga dila nga magatindog batok sa imo sa paghukom pakamalauton mo. Ini amo ang palanublion sang mga alagad ni Jehova, kag ang ila pagkamatarong gikan sa akon,’ siling ni Jehova.” Daw ano ka makalulugpay nga mahibaluan sang mga alagad ni Jehova nga ang Malaquias 3:17 may daku nga katumanan sa ila: “ ‘Sila pat-od nga mangin akon,’ siling ni Jehova sang mga kasuldadusan, ‘sa adlaw nga magapatubas ako sing isa ka pinasahi nga propiedad.’ ”

Malipayon nga Nagaalagad kay Jehova

19. Paano ang mga nagaalagad kay Jehova tuhay sa mga wala nagaalagad sa iya?

¹⁹ Ang kinatuhayan sang matutom nga mga alagad ni Jehova kag sang mga yara sa kalibutan ni Satanas labi nga nagaathag sa paglipas sang tion. Ang Malaquias 3:18 nagtagna: “Pat-od gid nga makita ninyo ang kinatuhayan sa ulot sang isa nga matarong kag sang isa nga malauton, sa ulot sang isa nga nagaalagad sa Dios kag sang isa nga wala nagaalagad sa iya.” Ang isa sa madamo nga kinatuhayan amo nga ang mga nagaalagad kay Jehova nagahimo sini nga may daku nga kalipay. Ang isa ka rason para sa sini amo ang ila dalayawon nga paglaum. Nagasalig sila sing bug-os kay Jehova sang nagsiling sia: “Yari karon nagatuga ako sing bag-ong mga langit kag bag-ong duta; kag ang nagligad nga mga butang indi na pagdumdumon, ni mag-utwas pa ini sa tagipusuon. Apang magkasadya kamo, kag magkalipay sing dayon sa akon ginatuga.”​—⁠Isaias 65:​17, 18; Salmo 37:​10, 11, 29; Bugna 21:​4, 5.

20. Ngaa malipayon kita nga katawhan?

²⁰ Nagapati kita sa saad ni Jehova nga ang iya mainunungon nga katawhan maluwas sa iya dakung adlaw kag pasudlon sa bag-ong kalibutan. (Sofonias 2:⁠3; Bugna 7:​13, 14) Kag samtang mapatay ang iban antes sini bangod sang katigulangon, balatian, ukon aksidente, si Jehova nagasaad nga banhawon niya sila nga may paglaum nga kabuhi nga walay katapusan. (Juan 5:​28, 29; Tito 1:2) Gani walay sapayan nga kita tanan may mga problema kag mga kabudlayan, samtang nagahilapit kita sa sining adlaw ni Jehova, may rason gid kita nga mangin ang pinakamalipayon nga mga tawo sa duta.

Paano Mo Sabton?

• Ano ang “adlaw ni Jehova”?

• Paano ginailog sang mga relihion sang kalibutan ang dumaan nga Israel?

• Anong mga tagna ang ginatuman sang mga alagad ni Jehova?

• Paano ginpakamaayo ni Jehova ang iya katawhan?

[Mga Pamangkot sa Pagtinuon]

[Retrato sa pahina 21]

Ang unang-siglo nga Jerusalem ‘ginsunog subong sang hurno’

[Mga retrato sa pahina 23]

Ginaamanan ni Jehova ang mga nagaalagad sa iya

[Mga retrato sa pahina 24]

Bangod sang ila dalayawon nga paglaum, ang mga alagad ni Jehova malipayon gid