Wala sing Pili ang mga Kasablagan sa Lawas

SI Christian, nga nagapuyo sa isa ka pungsod sa Aprika, gindala sang mga soldado nga nagpilit sa iya nga magsoldado, apang nangindi sia bangod sang iya nahanas sang Biblia nga konsiensia. Nian gindala sia sang mga soldado sa kampo militar diin, sa tapos sia ginbakol sa sulod sang apat ka adlaw, gintiro sia sang isa sa ila sa batiis. Nakapaospital si Christian, apang dapat utdon ang iya batiis. Sa isa pa ka pungsod sa Aprika, bisan ang diutay nga kabataan ginpang-utdan sing batiis ukon butkon sang armado nga mga rebelde. Kag halin sa Cambodia pakadto sa Balkan nga mga rehiyon, halin sa Afghanistan pakadto sa Angola, walay pili nga nangin inutil ang mga bata kag tigulang bangod sang nalubong nga mga bomba.

Nahalitan man ang iban bangod sang mga aksidente kag balatian, subong sang diabetes. Bisan ang mga hilo sa palibot makapainutil. Halimbawa, sa tululupad nga mga kasilingan sa isa ka siudad sa Sidlangan nga Europa, pila ka bata ang natawo nga kumpol ang isa ka naubos nga butkon. May diutay lang nga unod sa ila siko. Napamatud-an nga bangod ini sang genetiko nga halit nga tuga sang kemikal nga polusyon. Di-maisip pa nga mga tawo ang kompleto sing butkon kag batiis apang mga inutil bangod naparalisar sila ukon bangod sang iban pa nga balatian. Sa pagkamatuod, wala sing pili ang mga kasablagan sa lawas.

Ano man ang kabangdanan, makapaluya gid ang mga kasablagan sa lawas. Nakumpol ang nawala nga batiis ni Junior sa edad nga 20. Nagsiling sia sang ulihi: “Madamo ako sing problema sa emosyon. Pirme ako nagahibi bangod wala na ang isa ko ka batiis. Indi ako makahibalo kon ano ang himuon. Naligban ako.” Apang sang ulihi, nagbag-o gid ang panimuot ni Junior. Nagtuon sia sa Biblia kag natun-an niya ang mga butang nga wala lamang nagbulig sa iya nga malandas ang iya kasablagan kundi naghatag man sa iya sing matahom nga paglaum sa isa ka makalilipay nga palaabuton diri mismo sa duta. Kon may kasablagan ka sa lawas, luyag mo man bala ina nga paglaum?

Kon luyag mo, palihug basaha ang masunod nga artikulo. Ginapanugda namon nga basahon mo ang mga kasulatan sa imo mismo Biblia agod mapamatud-an mo gid kon ano ang ginatigana sang Manunuga para sa mga nagatuon tuhoy sa iya katuyuan kag nagakabuhi nahisanto sa sini.