Ang Talalupangdon nga Pag-uswag Nagakinahanglan sing Madasig nga Pagpasangkad
“Kari sa Akon, . . . kag Paumpawan Ko Kamo”
Ang Talalupangdon nga Pag-uswag Nagakinahanglan sing Madasig nga Pagpasangkad
“KARI sa akon, . . . kag paumpawan ko kamo,” siling ni Jesucristo. (Mateo 11:28) Daw ano ka makapabaskog nga imbitasyon gikan sa Ulo sang Cristianong kongregasyon! (Efeso 5:23) Kon binagbinagon naton sing maayo ining mga pulong, maapresyar gid naton ang isa ka importante nga tuburan sang paumpaw—ang pagpakig-upod sa aton espirituwal nga mga kauturan sa Cristianong mga miting. Pat-od nga magaugyon kita sa salmista nga nag-amba: “Daw ano kaayo kag daw ano katahom sang mag-ulutod nga magpuyo sing tingob sa paghiliusa!”—Salmo 133:1.
Sa pagkamatuod, ang mga kaupod naton sa sini nga mga pagtinipon sa pagsimba amo ang labing maayo, kag ang espirituwal nga palibot maayo kag maalikaya. Gani, matuod gid ang ginsiling sang isa ka Cristianong dalagita: “Bug-os nga adlaw ako sa eskwelahan, kag nagapaluya ini sa akon. Apang ang mga miting kaangay sang mga tuburan sa desierto, diin ginapaumpawan ako agod makapadayon naman sa masunod nga adlaw.” Ang isa ka dalagita sa Nigeria nagsiling: “Nasapwan ko nga ang mangin suod sa mga nagahigugma kay Jehova nakabulig sa akon nga magpabilin nga suod sa iya.”
Ang lokal nga Kingdom Hall sang mga Saksi ni Jehova amo ang nangin sentro sang matuod nga pagsimba sa komunidad. Sa kalabanan nga mga duog, ang mga miting ginahiwat sa Kingdom Hall sing di-magkubos makaduha sa isa ka semana, kag ang mga estudyante sa Biblia ginapalig-on nga magtambong gid kon posible agod makabenepisyo gikan sa makapalig-on nga pagpakig-upod didto.—Hebreo 10:24, 25.
Isa ka Hilingagawon nga Kinahanglanon
Apang talalupangdon nga indi tanan nga mga Saksi ni Jehova ang may nagakaigo nga Kingdom Hall. Ang talalupangdon nga pagdamo sang mga manugbantala sang Ginharian sa bug-os nga kalibutan nagpautwas sing isa ka hilingagawon nga kinahanglanon. Linibo ka Kingdom Hall ang ginakinahanglan gihapon, ilabi na sa imol nga mga pungsod.—Isaias 54:2; 60:22.
Sa pag-ilustrar: May napulo lamang ka Kingdom Hall sa 290 ka kongregasyon sa kapital sang Democratic Republic of Congo. Ini nga pungsod nagakinahanglan gid sing madamo nga Kingdom Hall. Ang kalabanan nga mga kongregasyon sa Angola nagatipon sa wayang bangod diutay lamang ang Kingdom Hall. Amo man sini ang kahimtangan sa iban nga mga pungsod.
Busa, sugod sang 1999, isa ka organisado nga panikasog ang ginhimo agod buligan ang pagtukod sang Kingdom Hall sa mga duog nga kulang sa pinansial. Agod maatipanan sa sining mga duog ang mga proyekto sa pagpatindog, nagboluntaryo sa pagbulig ang eksperiensiado nga mga Saksi. Sang ining mga panikasog gin-updan sang handa nga espiritu kag sang lokal nga mga boluntaryo, makapalig-on gid ang resulta. Sa amo man nga tion, nakabenepisyo pa ang lokal nga mga Saksi sa paghanas sa ila. Ini tanan ginhimo agod matatapan ang palatindugon nga mga Kingdom Hall sa tagsa nila ka pungsod.
Busa gin-aman ang praktikal nga bulig agod mangin mapasibusibuon ang pagtukod sang mga Kingdom Hall nga nagagamit sang lokal nga mga pamaagi kag mga materyales. Ang tuyo amo nga indi lamang matatapan ang daku nga kakulang sang mga Kingdom Hall kundi makahimo man sing mga programa sa pagmentinar sini suno sa lokal nga kahimtangan.—2 Corinto 8:14, 15.
Makapalig-on nga mga Hitabo
Ano ang resulta sining mga panikasog sa paghimo sing mga tinukod para sa pagsimba? Sang temprano nga bahin sang 2001, isa ka report sa Malawi ang nagsiling: “Dalayawon gid ang nahimo sa sini nga pungsod. Sa masunod nga duha ka bulan, makapatindog naman kami sing dugang nga mga Kingdom Hall.” (Retrato 1 kag 2) Nakapatindog naman sing pila ka kasarangan nga Kingdom Hall ang mga boluntaryo sa Togo sining nagligad lang nga mga bulan. (Retrato 3) Bangod sang maayo nga trabaho sang makugi nga mga boluntaryo, nakapatindog man sing maayo nga mga Kingdom Hall sa Mexico, Brazil, kag sa iban pa nga mga duog.
Natalupangdan sang mga kongregasyon nga kon tukuron ang isa ka Kingdom Hall, narealisar sang mga pumuluyo nga magapabilin ang mga Saksi ni Jehova. Madamo ang daw nagapangalag-ag nga makig-upod sa mga Saksi kon wala pa sila sing maayo nga duog sa pagsimba. Ang Nafisi Congregation sa
Malawi nagreport: “Bangod may maayo na kami nga Kingdom Hall, nangin maayo ini nga panaksi. Busa, mahapos na nga makasugod sing mga pagtuon sa Biblia.”Ang mga katapo sang Krake Congregation sa Benin nag-antos sadto sing grabe nga pagyaoyao sang mapigaw pa ang ila Kingdom Hall kon ipaanggid sa pila ka mga simbahan. (Retrato 4) Sa karon ang kongregasyon may matahom kag bag-o nga Kingdom Hall nga nagarepresentar sa matuod nga pagsimba sa isa ka maugdang apang dungganon nga paagi. (Retrato 5) Ini nga kongregasyon may 34 ka manugbantala sang Ginharian nga may promedyo nga tumalambong nga 73 sa mga miting kon Domingo, apang 651 ang nagtambong sa dedikasyon sang Kingdom Hall. Kalabanan sa ila mga taga-banwa nga nahamuot sang makita nila nga sarang makapatindog
ang mga Saksi sing isa ka tinukod sa malip-ot lamang nga tion. Nagabinagbinag sang nagligad nga mga hinimuan tuhoy sa sini, ang sanga sang Zimbabwe nagsulat: “Sa sulod sang isa ka bulan nga ginatukod ang bag-o nga Kingdom Hall, masami nga nagadoble ang kadamuon sang tumalambong.”—Retrato 6 kag 7.Wala sing duhaduha nga ang madamong bag-o nga mga Kingdom Hall nakaaman sing duog sang espirituwal nga paumpaw sa dedikado nga mga Cristiano kag mga interesado. “Nalipay gid kami,” siling sang isa ka Saksi sa Ukraine pagkatapos nga nagamit sang ila kongregasyon ang ila bag-o nga Kingdom Hall. “Nakita gid namon kon paano ginabuligan ni Jehova ang iya katawhan.”
[Kahon/Mga retrato sa pahina 10, 11]
Ginaapresyar ang Maalwan nga Suporta
Nalipay gid ang mga Saksi ni Jehova bangod sang madasig nga pag-uswag sa pagtatap sang daku nga kinahanglanon para sa bag-o nga mga Kingdom Hall sa bug-os nga globo. Ang padayon nga pagdamo sang mga sumilimba ni Jehova sa pila ka pungsod nagakinahanglan nga magtukod sing madamong bag-o nga mga Kingdom Hall sa ulihi. Ti, sa promedyo, 32 ka bag-o nga kongregasyon ang ginatukod kada semana sang 2001 nga tuig sang pag-alagad! Ini nga mga kongregasyon nagakinahanglan sing matipunan kag masimbahan.
Mahimo may mamangkot, ‘Paano naton magastuhan ini nga mga proyekto kaangay sang pagtukod sang bag-o nga mga Kingdom Hall, ilabi na sa mga pungsod diin ang mga kauturan imol?’ Ang sabat nagalakip sang suporta sang Dios kag kaalwan sang tawo.
Subong sang iya saad, ginbubo ni Jehova ang iya balaan nga espiritu sa iya mga alagad, amo kon ngaa sila ‘naghimo sing maayo, nangin manggaranon sa maayong mga buhat, nangin maalwan, handa sa pagpaambit.’ (1 Timoteo 6:18) Ginapahulag sang espiritu sang Dios ang mga Saksi ni Jehova nga sakdagon ang hilikuton sang pagbantala sang Ginharian sa bisan ano nga paagi—nagahugod sang ila tion, enerhiya, kusog, kag iban nga pagkabutang sa Cristianong hilikuton.
Ang espiritu sang kaalwan amo ang nagapahulag sa mga Saksi kag sa iban pa nga nagasakdag sang pagpasangkad kag pagtukod nga hilikuton sa pinansial nga paagi. Dugang pa sa pagbulig sa regular nga galastuhan sang lokal nga kongregasyon, nagaamot sila sa hilikuton sang pagtukod sa iban nga bahin sang duta.
Sa tagsa ka kongregasyon, may mga kahon nga nasulatan sing “Contributions for the Worldwide Work—Matthew 24:14.” Ginahulog diri sang mga indibiduwal ang ila boluntaryo nga mga amot kon luyag nila. (2 Hari 12:9) Ginaapresyar ang tanan nga amot, daku man ini ukon diutay. (Marcos 12:42-44) Ini nga mga pundo ginagamit sa nagkalainlain nga paagi suno sa kinahanglanon, lakip ang pagpatindog sang mga Kingdom Hall. Ini nga mga pundo wala ginagamit sa pagbayad sa may suweldo nga mga manedyer bangod wala sini ang mga Saksi ni Jehova.
Nagamit gid bala sing husto ining mga amot sa bug-os kalibutan nga hilikuton? Huo. Ang sanga sang Liberia—isa ka pungsod nga ginhapay sang inaway sibil—nagreport nga ang kalabanan sang mga Saksi didto wala sing trabaho kag may problema gid sa pinansial. Paano makatigayon ang katawhan ni Jehova sa sini nga pungsod sing nagakaigo nga mga duog sang pagsimba? “Ang maalwan nga mga amot sang mga kauturan sa iban nga mga duog amo ang pagagamiton sa pagsakdag sang hilikuton,” siling sang sanga talatapan. “Daw ano ka maalamon kag mahigugmaon nga kahimusan!”
Ang lokal nga mga kauturan nagaamot man, walay sapayan nga pigado sila. Ang pungsod sang Sierra Leone sa Aprika nagreport: “Ginasakdag sang mga kauturan diri ang hilikuton kag nalipay sila sa pagpangabudlay kag pag-amot sa pinansial suno sa ila masarangan agod sakdagon ang pagtukod sang mga Kingdom Hall.”
Labaw sa tanan, ining mga panikasog sa pagtukod nagadala sing kadayawan kay Jehova. Ang mga kauturan sa Liberia mapagsik nga nagsiling: “Ang pagtukod sang nagakaigo nga mga duog sang pagsimba sa bug-os nga pungsod magapakita sa mga tawo nga ang matuod nga pagsimba magapadayon kag ini magahatag sing kadungganan kag magapuni sang daku nga ngalan sang aton Dios.”