Dapat Naton Makilala ang Dios

WALA ka bala nakunyag kon makakita ka sang mabituon nga kagab-ihon? Indi bala nga makabibihag ang humot sang nagkalainlain nga mga bulak? Wala ka bala malipay sa pagpamati sa huni sang mga pispis kag sa kulas sang mga dahon kon magdupoydupoy ang hangin? Kag daw ano katahom sang dalagku nga mga balyena kag sang iban nga mga tinuga nga nagapuyo sa dagat! Yara man ang mga tawo nga may konsiensia kag isa ka masibod gid nga utok. Paano mo ipaathag ang pagluntad sining tanan makatilingala nga mga butang sa palibot naton?

Nagapati ang pila nga tanan ini nagluntad nga wala sing ginhalinan. Apang kon matuod ini, ngaa nagapati ang mga tawo sa Dios? Ngaa ang indi hungod nga kombinasyon sang nagkalainlain nga mga kemikal nakapatubas sing mga tinuga nga may espirituwal nga kinahanglanon?

“Nakapanggamot gid sing madalom ang relihion sa tawo kag masapwan ini sa tanan nga kahimtangan sang pangabuhi kag tinun-an.” Ini nga pinamulong nagtingob sang pagpanalawsaw nga ginpresentar ni Propesor Alister Hardy sa iya libro nga The Spiritual Nature of Man. Ang mga eksperimento sa utok sining karon lang nagpahulag sa mga sientipiko sa utok nga magpanugda nga ang mga tawo ginprograma sa genetiko nga may ikasarang sa pagsunod sang relihion. Ang libro nga natig-uluhan Is God the Only Reality? nagsiling: “Ang pagpangita sing kahulugan sang kabuhi paagi sa relihion . . . amo ang kinaandan nga ginahimo sa tagsa ka kultura kag tagsa ka dag-on halin pa sang pagsugod sang mga tawo.”

Binagbinaga kon ano ang ginsiling sang isa ka edukado nga tawo mga 2,000 ka tuig ang nagligad. Sia nagsulat: “Ang tagsa ka balay may nagtukod, apang sia nga nagtukod sing tanan nga butang amo ang Dios.” (Hebreo 3:4) Sa pagkamatuod, ang una nga bersikulo sang Biblia nagasiling: “Sa ginsuguran gintuga sang Dios ang mga langit kag ang duta.”​—⁠Genesis 1:1.

Apang, sin-o ang Dios? Lainlain ang sabat sang mga tawo sa sini. Sang ginpamangkot kon sin-o ang Dios, ang Hapones nga pamatan-on nga si Yoshi nagsabat: “Indi ako sigurado. Budhista ako, kag indi importante sa akon nga makilala ang Dios.” Apang, ginbaton ni Yoshi nga bisan si Buddha ginsimba mismo subong dios sang madamo. Si Nick, isa ka negosyante nga sesentahon, nagapati sa Dios kag naghunahuna sa iya subong isa ka gamhanan gid nga puwersa. Sang ginpamangkot kon ano ang iya nahibaluan sa Dios, si Nick nagsabat sa tapos makaduhungan: “Mabudlay gid ina nga pamangkot. Ang masiling ko lang amo nga may Dios. Nagaluntad sia.”

 Ang pila ka tawo “nagasimba kag nagaalagad sa gintuga sang Dios sa baylo nga sa Manunuga mismo.” (Roma 1:​25, Today’s English Version) Minilyon ang nagasimba sa patay nga mga katigulangan, nagapati nga ang Dios indi mapakig-angutan. Sa relihion sang Hindu, madamo sing dios kag diosa. Ang nanuhaytuhay nga mga dios, subong nanday Zeus kag Hermes, ginasimba sang panahon sang mga apostoles ni Jesucristo. (Binuhatan 14:​11, 12) Madamo nga relihion sa Cristiandad ang nagatudlo nga ang Dios isa ka Trinidad, nga nagalakip sang Dios Amay, Dios Anak, kag Dios Espiritu Santo.

Sa pagkamatuod, “madamo sing ‘dios’ kag madamo sing ‘ginuo,’ ” siling sang Biblia. Apang, nagdugang ini: “Sa aton may isa ka Dios ang Amay, diin ang tanan nga butang naggikan.” (1 Corinto 8:​5, 6) Huo, may isa lamang ka matuod nga Dios. Apang sin-o sia? Ano ang iya mga kinaiya? Importante nga mahibaluan naton ang mga sabat sa sining mga pamangkot. Si Jesus mismo nangamuyo sa sining Isa: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) May rason sa pagpati nga ang aton dayon nga kaayuhan nasandig sa paghibalo sang kamatuoran tuhoy sa Dios.

[Retrato sa pahina 3]

Paano sila nagluntad?

[Credit Line]

Whale: Courtesy of Tourism Queensland

 [Picture Credit Line sa pahina 2]

COVER: Index Stock Photography © 2002