Ginaapresyar Mo Bala ang Gugma sang Dios?

GINLARAGWAY anay ni Job ang di-himpit nga kahimtangan sang mga tawo sa sining mga pulong: “Ang tawo, nga natawo sa babayi, malip-ot sing kabuhi kag puno sing kagamo. Kaangay sang bulak nagabuskad sia kag ginakutol, kag nagapalagyo sia subong sang landong kag wala nagapadayon sa pagluntad.” (Job 14:​1, 2) Ang kabuhi, subong sang naeksperiensiahan sadto ni Job, puno sing kasakit kag kasubo. Nabatyagan mo na bala ini?

Apang, walay sapayan sang tanan nga kabudlayan kag problema nga mahimo naton maeksperiensiahan, may yara mabakod nga paglaum, isa nga napasad sa kaawa kag gugma sang Dios. Una sa tanan, ginhatag sang aton maluluy-on nga langitnon nga Amay ang halad nga gawad agod tubson ang katawhan gikan sa ila makasasala nga kahimtangan. Suno sa Juan 3:​16, 17, si Jesucristo nagsiling: “Ginhigugma gid sang Dios ang kalibutan [sang katawhan] sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi malaglag kundi may kabuhi nga walay katapusan. Kay ginpadala sang Dios ang iya Anak [si Jesus] sa kalibutan, indi agod hukman niya ang kalibutan, kundi agod ang kalibutan maluwas paagi sa iya.”

Binagbinaga man ang kaayo sang Dios sa aton bilang di-himpit nga mga tawo. Si apostol Pablo nagsiling: “Ginhimo niya gikan sa isa ka tawo ang tagsa ka pungsod sang mga tawo, sa pagpuyo sa bug-os nga nawong sang duta, kag gintalana niya ang natangdo nga mga panag-on kag ang mga dulunan sang puluy-an sang mga tawo, agod pangitaon nila ang Dios, kon makapkapan nila sia kag makita gid sia, bisan pa, sa kamatuoran, indi sia malayo sa tagsatagsa sa aton.” (Binuhatan 17:​26, 27) Hunahunaa ini! Bisan pa di-himpit kita nga mga tawo, mahimo gihapon kita makatigayon sing personal nga kaangtanan sa aton mahigugmaon nga Manunuga, si Jehova nga Dios.

Kon amo, maatubang naton sing masinaligon ang palaabuton, nakahibalo nga ang Dios nagaulikid sa aton kag mahigugmaon nga nagaatipan sa aton dayon nga kaayuhan. (1 Pedro 5:⁠7; 2 Pedro 3:13) Gani, may mabakod gid kita nga rason nga hibaluon ang dugang pa tuhoy sa aton mahigugmaon nga Dios paagi sa pagtuon sa iya Pulong, ang Biblia.