Magpakita sing Mahigugmaon nga Kaayo sa mga Nagakinahanglan

“Ipakita sa isa kag isa ang mahigugmaon nga kaayo.”​—⁠ZACARIAS 7:9.

1, 2. (a) Ngaa dapat naton ipakita ang mahigugmaon nga kaayo? (b) Ano nga mga pamangkot ang aton binagbinagon?

GINALAYGAYAN kita sang Pulong ni Jehova nga Dios nga higugmaon ang “mahigugmaon nga kaayo.” (Miqueas 6:​8, footnote) Nagahatag man ini sa aton sang mga rason kon ngaa dapat naton ini himuon. Ang isa sini amo, “ang tawo nga may mahigugmaon nga kaayo nagabuhat sing maayo sa iya kalag.” (Hulubaton 11:17) Matuod gid ini! Ang pagpakita sing mahigugmaon nga kaayo, ukon mainunungon nga gugma, nagapalambo sing mainit kag nagadugay nga suod nga kaangtanan sa iban. Bilang resulta, matigayon naton ang mainunungon nga mga abyan​—⁠isa ka hamili gid nga padya!​—⁠Hulubaton 18:24.

² Dugang pa, ang Kasulatan nagasugid sa aton: “Sia nga nagatinguha sang pagkamatarong kag mahigugmaon nga kaayo makasapo sing kabuhi.” (Hulubaton 21:21) Huo, bangod sang pagtinguha naton sa mahigugmaon nga kaayo, higugmaon kita sang Dios kag hatagan niya kita sing kahigayunan nga maagom ang mga pagpakamaayo sa palaabuton, pati na ang kabuhi nga walay katapusan. Apang, paano naton mapakita ang mahigugmaon nga kaayo? Kay sin-o naton ini ipakita? Kag  ang mahigugmaon nga kaayo bala tuhay sa kinaandan nga tawhanon nga kaayo ukon sa kaayo sa kabilugan?

Tawhanon nga Kaayo kag Mahigugmaon nga Kaayo

3. Paano ang mahigugmaon nga kaayo tuhay sa tawhanon nga kaayo?

³ Ang kinaandan nga tawhanon nga kaayo kag ang mahigugmaon nga kaayo magkatuhay sa madamo nga paagi. Halimbawa, ang mga nagapakita sing tawhanon nga kaayo masami nga nagahimo sini nga wala sing tudok kag personal nga kaangtanan, ukon relasyon, sa mga tawo nga ginatratar nila sing mainayuhon. Apang, kon magpakita kita sing mahigugmaon nga kaayo sa isa ka tawo, may suod nga kaangtanan kita sa iya. Sa Biblia, ang pagpakita sing mahigugmaon nga kaayo sa ulot sang mga tawo mahimo mapasad sa nagaluntad na nga mga kaangtanan. (Genesis 20:13; 2 Samuel 3:⁠8; 16:17) Ukon mahimo ini mapasad sa mga relasyon nga resulta sang nagligad nga mga buhat sang kaayo. (Josue 2:​1, 12-​14; 1 Samuel 15:⁠6; 2 Samuel 10:​1, 2) Sa pag-ilustrar sini nga kinatuhayan, ipaanggid naton ang duha ka halimbawa sa Biblia, ang isa amo ang tawhanon nga kaayo kag ang isa pa amo ang mahigugmaon nga kaayo nga ginpakita sa ulot sang mga tawo.

4, 5. Paano ginailustrar sang duha ka halimbawa sa Biblia nga ginsambit diri ang kinatuhayan sa ulot sang tawhanon nga kaayo kag mahigugmaon nga kaayo?

⁴ Ang isa ka halimbawa sang tawhanon nga kaayo amo ang may kaangtanan sa isa ka grupo sang mga tawo nga nalunod sa barko, lakip na si apostol Pablo. Ginsampay sila sa isla sang Malta. (Binuhatan 27:⁠37⁠–​​28:1) Bisan pa ang mga taga-Malta wala sing obligasyon sa nasampay nga mga tawo ukon may relasyon na sa ila, gin-abiabi sang mga tagaisla ang mga dumuluong, kag nagpakita sa ila sing “tumalagsahon nga tawhanon nga kaayo.” (Binuhatan 28:​2, 7) Ang ila pagkamaabiabihon mainayuhon, apang kinaandan lang ini kag ginapakita sa mga dumuluong. Gani, isa yadto ka tawhanon nga kaayo.

⁵ Sa pagpaanggid, binagbinaga ang pagkamaabiabihon nga ginpakita ni Hari David kay Mefiboset, ang anak nga lalaki sang iya abyan nga si Jonatan. Ginsilingan ni David si Mefiboset: “Ikaw mismo pirme magakaon sing tinapay sa akon lamesa.” Nagapaathag kon ngaa naghimo sia sini nga kahimusan, si David nagsiling sa iya: “Sa pagkamatuod magapakita ako sing mahigugmaon nga kaayo sa imo tungod kay Jonatan nga imo amay.” (2 Samuel 9:​6, 7, 13) Ang dalayon nga pagkamaabiabihon ni David nagakaigo gid nga matawag nga isa ka pagpakita sing mahigugmaon nga kaayo, indi lamang tawhanon nga kaayo, kay pamatuod ini sang iya katutom sa nagaluntad na nga kaangtanan. (1 Samuel 18:⁠3; 20:​15, 42) Ang mga alagad sang Dios nagapakita man karon sing tawhanon nga kaayo sa katawhan sa kabilugan. Apang, ginapakita nila ang dalayon nga mahigugmaon nga kaayo, ukon mainunungon nga gugma, sa mga tawo nga may pareho sa ila nga nahamut-an sang Dios nga kaangtanan.​—⁠Mateo 5:45; Galacia 6:10.

6. Ano nga mga kinaiya sang mahigugmaon nga kaayo nga ginpakita sa ulot sang mga tawo ang talalupangdon gid sa Pulong sang Dios?

⁶ Agod mahibaluan ang pila pa ka kinaiya sang mahigugmaon nga kaayo, binagbinagon naton sing malip-ot ang tatlo ka kasaysayan sa Biblia nga nagapakita sini nga kinaiya. Gikan sa sini talupangdon naton nga ang mahigugmaon nga kaayo sang mga tawo (1) ginapakita paagi sa espesipiko nga mga buhat, (2) ginapakita sing kinabubut-on, kag (3) ginapakita ilabi na sa mga nagakinahanglan. Dugang pa, ginailustrar sini nga mga kasaysayan kon paano naton mahimo ipakita ang mahigugmaon nga kaayo karon.

Ang Isa ka Amay Nagpakita sing Mahigugmaon nga Kaayo

7. Ano ang ginsugid sang alagad ni Abraham kanday Betuel kag Laban, kag ano ang ginkabalak-an sang alagad?

⁷ Ang Genesis 24:28-67 nagasaysay sang nabilin nga bahin sang sugilanon tuhoy sa alagad ni Abraham, nga ginsambit sa nagligad nga artikulo. Sa tapos makita si Rebeca, gin-agda sia sa puluy-an sang amay ni Rebeca, si Betuel. (Bersikulo 28-32) Detalyado nga ginsugid sang alagad didto ang iya pagpangita sing palangasaw-on para sa anak ni Abraham. (Bersikulo 33-47) Ginpadaku niya nga ginkabig niya nga isa ka tanda gikan kay Jehova ang iya pila ka kadalag-an, “nga nagtuytoy sa akon sa matuod nga dalan sa pagkuha sa anak nga babayi sang utod sang akon agalon para sa iya anak nga lalaki.” (Bersikulo 48) Naglaum gid ang alagad nga ang iya hanuot nga pagsaysay sa hitabo magakumbinsi kay Betuel kag sa iya anak nga si  Laban nga ginapakamaayo ni Jehova ini nga misyon. Sang ulihi, ang alagad nagsiling: “Kon kamo sa pagkamatuod nagapakita sing mahigugmaon nga kaayo kag pagkamasaligan sa akon agalon, sugiri ako; apang kon indi, sugiri ako, agod nga magliso ako sa tuo ukon sa wala.”​—⁠Bersikulo 49.

8. Ano ang reaksion ni Betuel sa mga butang may kaangtanan kay Rebeca?

⁸ Nagpakita na sing mahigugmaon nga kaayo si Jehova kay Abraham. (Genesis 24:​12, 14, 27) Himuon man bala ini ni Betuel paagi sa pagtugot kay Rebeca nga mag-upod sa alagad ni Abraham? Ang mahigugmaon nga kaayo bala sang tawo madugang sa mahigugmaon nga kaayo sang Dios agod matuman sing bug-os ang katuyuan sini? Ukon ang malawig nga paglakbay bala sang alagad mangin wala sing pulos? Makalulugpay gid para sa alagad ni Abraham nga mabatian sanday Laban kag Betuel nga nagsiling: “Gikan kay Jehova ini nga butang.” (Bersikulo 50) Nahibaluan nila nga kabubut-on ni Jehova ining mga butang kag gilayon nga ginbaton ang iya desisyon. Masunod, ginpahayag ni Betuel ang iya mahigugmaon nga kaayo paagi sa pagsiling: “Yari si Rebeca sa atubangan mo. Kuhaa sia kag maglakat, kag mangin asawa sia sa anak sang imo agalon, subong sa ginsiling ni Jehova.” (Bersikulo 51) Kinabubut-on nga nag-upod si Rebeca sa alagad ni Abraham, kag nangin pinalangga sia nga asawa ni Isaac.​—⁠Bersikulo 49, 52-58, 67.

Mahigugmaon nga Kaayo nga Ginpakita sang Isa ka Anak

9, 10. (a) Ano ang ginpangabay ni Jacob sa iya anak nga si Jose nga himuon para sa iya? (b) Paano nagpakita si Jose sing mahigugmaon nga kaayo sa iya amay?

⁹ Ang apo ni Abraham nga si Jacob nakabaton man sing mahigugmaon nga kaayo. Suno sa ginasaysay sang Genesis kapitulo 47, nagapuyo sadto si Jacob sa Egipto, kag ‘malapit na ang adlaw nga sia mapatay.’ (Bersikulo 27-29) Nabalaka sia bangod mapatay sia sa guwa sang duta nga ginsaad sang Dios kay Abraham. (Genesis 15:18; 35:​10, 12; 49:29-​32) Apang, indi luyag ni Jacob nga ilubong sia sa Egipto, gani naghimo sia sing kahimusan nga dalhon ang iya bangkay sa duta sang Canaan. Sin-o ang yara sa poder nga makapat-od nga matuman ang iya luyag kundi ang iya anak nga si Jose?

¹⁰ Ang rekord nagasugid: “Gani gintawag [ni Jacob] ang iya anak nga si Jose kag nagsiling sa iya: ‘Kon nakapahamuot ako karon sa imo itululok, . . . magpakita ka sing mahigugmaon nga kaayo kag pagkamasaligan sa akon. (Palihug, indi ako pag-ilubong sa Egipto.) Kag magahigda ako upod sa akon mga amay, kag dalhon mo ako paguwa sa Egipto kag ilubong ako sa ila lulubngan.’ ” (Genesis 47:​29, 30) Nanaad si Jose nga tumanon ini nga pangabay, kag wala madugayi pagkatapos sadto napatay si Jacob. Gindala ni Jose kag sang iban pa nga mga anak ni Jacob ang iya bangkay “sa duta sang Canaan kag ginlubong sia sa lungib sa latagon sang Macpela, ang latagon nga ginbakal ni Abraham.” (Genesis 50:​5-8, 12-​14) Sa amo, nagpakita si Jose sing mahigugmaon nga kaayo sa iya amay.

Mahigugmaon nga Kaayo Gikan sa Umagad nga Babayi

11, 12. (a) Paano nagpakita si Rut sing mahigugmaon nga kaayo kay Noemi? (b) Sa anong paagi nga ang “naulihi nga higayon” sang mahigugmaon nga kaayo ni Rut labi pa sangsa “nahauna”?

¹¹ Ang tulun-an nga Rut nagasaysay kon paano ang balo nga si Noemi nakabaton sing mahigugmaon nga kaayo gikan sa iya Moabita nga umagad nga si Rut, nga isa man ka balo. Sang namat-od si Noemi nga magbalik sa Betlehem sa Juda, nagpakita si Rut sing mahigugmaon nga kaayo kag determinasyon, nga nagasiling: “Kon diin ka makadto magakadto ako, kag kon diin ka magpaligad sang gab-i magapaligad ako sang gab-i. Ang imo katawhan mangin akon katawhan, kag ang imo Dios akon Dios.” (Rut 1:16) Ginpakita sang ulihi ni Rut ang iya mahigugmaon nga kaayo sang ginpahibalo niya ang iya kahanda nga pamanahon ang may edad na nga paryente ni Noemi nga si Boaz.⁠ * (Deuteronomio 25:​5, 6; Rut 3:​6-9) Ginsilingan niya si Rut: “Ginpakita mo ang imo mahigugmaon nga kaayo sing labi pa sa ulihi nga higayon sangsa nahauna nga higayon, sa indi pagsunod sa mga pamatan-on nga lalaki, imol man ukon manggaranon.”​—⁠Rut 3:10.

¹² Ang “nahauna nga higayon” sang mahigugmaon nga kaayo ni Rut amo ang tion nga nagbiya sia sa iya katawhan kag nag-upod kay Noemi. (Rut  1:14; 2:11) Bisan yadto nga buhat nalabawan sang “naulihi nga higayon” sang mahigugmaon nga kaayo​—⁠ang kahanda ni Rut nga pamanahon si Boaz. Makabun-ag na karon si Rut sing isa ka manunubli para kay Noemi, nga tigulang na agod makabata. Natabo ang kasal, kag sang nagbun-ag sang ulihi si Rut, ang mga babayi sa Betlehem nagsiling: “Isa ka anak nga lalaki ang natawo kay Noemi.” (Rut 4:​14, 17) Si Rut “isa ka maayo gid nga babayi,” amo nga ginpadyaan sia ni Jehova sing dalayawon nga pribilehiyo nga mangin katigulangan ni Jesucristo.​—⁠Rut 2:12; 3:11; 4:18-22; Mateo 1:​1, 5, 6.

Ginpakita Paagi sa mga Buhat

13. Paano ginpakita nanday Betuel, Jose, kag Rut ang ila mahigugmaon nga kaayo?

¹³ Natalupangdan mo bala kon paano ginpakita nanday Betuel, Jose, kag Rut ang ila mahigugmaon nga kaayo? Ginhimo nila ini indi lamang paagi sa mainayuhon nga mga pulong kundi paagi sa espesipiko nga mga buhat. Wala lamang magsiling si Betuel, “Yari si Rebeca” kundi sa pagkamatuod “ginpalakat [niya] si Rebeca.” (Genesis 24:​51, 59) Wala lamang magsiling si Jose, “ako mismo ang magahimo bilang pagtuman sa imo pulong” kundi ginhimo nila sang iya mga utod kay Jacob ang “suno gid sa ginsugo niya sa ila.” (Genesis 47:30; 50:​12, 13) Wala lamang magsiling si Rut, “Kon diin ka makadto magakadto ako” kundi ginbiyaan niya ang iya katawhan kag nag-upod kay Noemi, amo nga “sila nga duha nagpadayon sa paglakat tubtob nag-abot sila sa Betlehem.” (Rut 1:​16, 19) Sa Juda, nanghikot liwat si Rut “suno sa tanan nga ginsugo sa iya sang iya ugangan nga babayi.” (Rut 3:6) Huo, ang mahigugmaon nga kaayo ni Rut, kaangay sang iban, ginpakita paagi sa mga buhat.

14. (a) Paano ang mga alagad sang Dios karon nagapakita sing mahigugmaon nga kaayo paagi sa mga buhat? (b) Anong mga buhat sang mahigugmaon nga kaayo sa tunga sang mga Cristiano sa inyo lugar ang nahibaluan mo?

¹⁴ Makalilipay makita kon paano ang mga alagad sang Dios karon padayon nga nagapakita sing mahigugmaon nga kaayo paagi sa mga buhat. Halimbawa, hunahunaa ang mga nagahatag sing padayon nga emosyonal nga suporta sa mga maluya, napung-awan, ukon nalisdan nga mga masigkatumuluo. (Hulubaton 12:25) Ukon binagbinaga ang madamo nga Saksi ni Jehova nga matutom nga nagasugat sa mga tigulang pakadto sa Kingdom Hall agod makatambong sa semanal nga mga miting sang kongregasyon. Si Anna, 82 anyos kag may arthritis, nagapabutyag sang balatyagon sang madamo nga iban pa sang magsiling sia: “Ang pagsugat sa akon pakadto sa mga miting isa ka pagpakamaayo gikan kay Jehova. Ginapasalamatan ko gid sia sing tinagipusuon tungod sa paghatag sa akon sining mahigugmaon nga mga kauturan.” Nagapakigbahin ka bala sa sining mga buhat sa inyo kongregasyon? (1 Juan 3:​17, 18) Kon ginahimo mo ini, makasalig ka nga ang imo mahigugmaon nga kaayo ginaapresyar gid.

Ginapakita sing Kinabubut-on

15. Anong kinaiya sang mahigugmaon nga kaayo ang dugang nga ginpadaku sang tatlo ka kasaysayan sa Biblia nga ginbinagbinag naton?

¹⁵ Ginapakita man sang mga kasaysayan sang Biblia nga ginbinagbinag naton nga ang mahigugmaon nga kaayo ginapakita sing kinabubut-on, indi ginapilit. Kinabubut-on nga nagkooperar si Betuel sa alagad ni Abraham, kag amo man si Rebeca. (Genesis 24:​51, 58) Ginpakita ni Jose ang iya mahigugmaon nga kaayo nga wala gin-aha sang iban. (Genesis 50:​4, 5) Si Rut ‘nagpamilit nga  mag-upod kay Noemi.’ (Rut 1:18) Sang nanugda si Noemi nga magpalapit si Rut kay Boaz, ginpahulag sang mahigugmaon nga kaayo ang Moabita sa pagsiling: “Ang tanan nga ginasiling mo sa akon himuon ko.”​—⁠Rut 3:1-5.

16, 17. Ngaa talalupangdon gid ang mahigugmaon nga kaayo nanday Betuel, Jose, kag Rut, kag ano ang nagpahulag sa ila nga ipakita ini nga kinaiya?

¹⁶ Ang mahigugmaon nga kaayo nga ginapakita nanday Betuel, Jose, kag Rut talalupangdon gid bangod indi sila mapilit nanday Abraham, Jacob, kag Noemi. Kay man, wala sing legal nga obligasyon si Betuel nga mapahilayo sa iya anak nga babayi. Mahapos lang kuntani niya ginsilingan ang alagad ni Abraham: ‘Indi ko luyag mapahilayo ang akon mapisan nga anak nga babayi.’ (Genesis 24:18-20) Hilway man si Jose nga mamat-od kon bala tumanon ang pangabay sang iya amay ukon indi, kay patay na si Jacob kag indi na niya sia mapilit nga tumanon ang iya pulong. Ginpakita mismo ni Noemi nga hilway si Rut nga magpabilin sa Moab. (Rut 1:8) Hilway man si Rut nga pamanahon ang isa sang “mga pamatan-on nga lalaki” sa baylo sang may edad na nga si Boaz.

¹⁷ Kinabubut-on nga nagpakita sing mahigugmaon nga kaayo sanday Betuel, Jose, kag Rut; ginpahulag sila sang ila tagipusuon. Nabatyagan nila ang moral nga obligasyon nga ipakita ini nga kinaiya sa mga tawo nga may kaangtanan sila, subong nga nagbatyag sang ulihi si Hari David nga obligado sia nga ipakita ini kay Mefiboset.

18. (a) Upod ang ano nga panimuot ang Cristianong mga gulang ‘nagabantay sa panong’? (b) Paano ginpabutyag sang isa ka gulang ang iya balatyagon tuhoy sa pagbulig sa mga masigkatumuluo?

¹⁸ Ang mahigugmaon nga kaayo isa gihapon ka tanda sang katawhan sang Dios, pati na sang mga lalaki nga nagabantay sa panong sang Dios. (Salmo 110:⁠3; 1 Tesalonica 5:12) Ginabatyag sining mga gulang, ukon mga manugtatap, ang responsabilidad nga indi pagpaslawon ang pagsalig nga ginhatag sa ila bangod sang ila pagkatinangduan. (Binuhatan 20:28) Walay sapayan sini, ang ila pagbantay nga hilikuton kag ang iban pa nga mga buhat sang mahigugmaon nga kaayo tungod sa kongregasyon ginahimo, “indi sa pilit, kundi sing kinabubut-on.” (1 Pedro 5:2) Ginabantayan sang mga gulang ang panong bangod responsabilidad nila ini kag luyag nila ini himuon. Ginapakita nila ang mahigugmaon nga kaayo sa mga karnero ni Cristo bangod dapat kag luyag nila himuon ini. (Juan 21:15-17) “Nalipay gid ako magduaw sa mga puluy-an sang kauturan ukon magtelepono sa ila agod ipakita nga ginadumdom ko sila,” siling sang isa ka Cristianong gulang. “Ang pagbulig sa mga kauturan isa ka tuburan sang daku nga kalipay kag kaayawan sa akon!” Ang mainulikdon nga mga gulang bisan diin tinagipusuon nga nagaugyon sa sini.

Magpakita sing Mahigugmaon nga Kaayo sa mga Nagakinahanglan

19. Anong katunayan tuhoy sa mahigugmaon nga kaayo ang ginapadaku sang mga kasaysayan sa Biblia nga ginbinagbinag sa sining artikulo?

¹⁹ Ginapadaku man sang mga kasaysayan sa Biblia nga ginbinagbinag naton ang katunayan nga ang mahigugmaon nga kaayo dapat ipakita sa mga may pagkinahanglan nga indi nila mismo mapun-an. Agod mapadayon ang linya sang iya kaliwat, kinahanglan ni Abraham ang kooperasyon ni Betuel. Agod madala ang iya bangkay sa Canaan, kinahanglan ni Jacob ang bulig ni Jose. Kag agod makabun-ag sing manunubli, kinahanglan ni Noemi ang bulig ni Rut. Indi mapun-an nanday Abraham, Jacob, ukon Noemi yadtong mga kinahanglanon nga wala sing bulig. Sa karon man, ang mahigugmaon nga kaayo dapat ipakita ilabi na sa mga nagakinahanglan. (Hulubaton 19:17) Dapat naton ilugon ang patriarka nga si Job, nga nagtalupangod sa ‘nasit-an nga nagapangayo sing bulig, kag sa bata nga lalaki nga ilo sa amay kag si bisan sin-o nga wala sing kabulig’ kag ‘sa isa nga buot na mapatay.’ ‘Ginpahalipay [man ni Job] ang tagipusuon sang balo’ kag nangin ‘mga mata sia  para sa bulag kag mga tiil para sa mga piang.’​​—⁠Job 29:12-​15.

20, 21. Sin-o ang nagakinahanglan nga pakitaan naton sing mahigugmaon nga kaayo, kag ano dapat ang determinado nga himuon sang tagsa-tagsa sa aton?

²⁰ Ang matuod, may yara ‘mga nasit-an nga nagapangayo sing bulig’ sa tagsa ka Cristianong kongregasyon. Mahimo nga bangod ini sang kasubo, pagluya sing buot, pagbatyag nga di-takus, kaugot sa iban, malubha nga balatian, ukon pagkapatay sang isa nga hinigugma. Ano man ang kabangdanan, ining tanan nga pinalangga may mga pagkinahanglan nga sarang kag dapat pun-an sang aton kinabubut-on kag dalayon nga mga buhat sang mahigugmaon nga kaayo.​​—⁠1 Tesalonica 5:⁠14.

²¹ Gani, padayon naton nga ilugon si Jehova nga Dios, nga “bugana sa mahigugmaon nga kaayo.” (Exodo 34:⁠6; Efeso 5:1) Mahimo naton ini paagi sa kinabubut-on nga paghimo sing espesipiko nga buhat, ilabi na para sa mga nagakinahanglan. Kag mapadunggan gid naton si Jehova kag maeksperiensiahan ang daku nga kalipay samtang ‘nagapakita kita sing mahigugmaon nga kaayo sa isa kag isa.’​—⁠Zacarias 7:9.

[Nota]

Paano Mo Sabton?

• Paano ang mahigugmaon nga kaayo tuhay sa tawhanon nga kaayo?

• Paano ginpakita nanday Betuel, Jose, kag Rut ang mahigugmaon nga kaayo?

• Upod ang ano nga panimuot dapat naton ipakita ang mahigugmaon nga kaayo?

• Sin-o ang nagakinahanglan nga pakitaan naton sing mahigugmaon nga kaayo?

[Mga Pamangkot sa Pagtinuon]

[Retrato sa pahina 18]

Paano si Betuel nagpakita sing mahigugmaon nga kaayo?

[Retrato sa pahina 21]

Ang mainunungon nga gugma ni Rut isa ka pagpakamaayo kay Noemi

[Mga retrato sa pahina 23]

Ang tawhanon nga mahigugmaon nga kaayo ginapakita sing kinabubut-on, ginapakita paagi sa paghimo sing espesipiko nga buhat, kag ginapakita sa mga nagakinahanglan