Mga Pamangkot Gikan sa mga Bumalasa

Maalamon bala para sa isa ka matuod nga Cristiano nga magtambong sa lubong ukon kasal sa simbahan?

Ang pagpakigbahin naton sa bisan ano nga porma sang butig nga relihion wala nagapahamuot kay Jehova kag dapat ini likawan. (2 Corinto 6:14-17; Bugna 18:⁠4) Ang lubong nga ginahiwat sa simbahan isa ka relihioso nga serbisyo nga mahimo may sermon nga nagasakdag sang wala nagahisuno sa Kasulatan nga mga ideya subong sang pagkadimamalatyon sang kalag kag langitnon nga padya para sa tanan nga maayo nga mga tawo. Mahimo man ini maglakip sang mga buhat subong sang pagpangurus kag pagbuylog sa pangadi sang pari ukon ministro. Ang mga pangadi kag iban pa relihioso nga mga buhat nga supak sa panudlo sang Biblia mahimo nga bahin man sang relihioso nga seremonya sa kasal nga ginahiwat sa simbahan ukon sa iban pa nga lugar. Bangod kaupod sang grupo diin ang tanan nagapakigbahin sa isa ka butig nga relihioso nga buhat, mahimo mabudlayan ang isa ka Cristiano nga batuan ang pag-ipit nga magbuylog. Indi gid maalamon nga magpadayag sa sini nga pag-ipit!

Kamusta kon nagabatyag ang isa ka Cristiano nga obligado sa pagtambong sa lubong ukon sa kasal nga hiwaton sa simbahan? Halimbawa, mahimo hagaron sang di-tumuluo nga bana ang iya Cristianong asawa nga updan sia sa sini nga okasyon. Mahimo bala niya updan ang iya bana subong mahipos nga tumalan-aw? Bilang pagtahod sa luyag sang iya bana, mahimo mamat-od ang asawa nga updan ang iya bana, kag determinado nga indi makigbahin sa bisan anong relihioso nga seremonya. Sa pihak nga bahin, mahimo nga mamat-od sia nga indi mag-upod, nagahunahuna nga indi niya masarangan ang emosyonal nga pag-ipit sang mga kahimtangan, nga ayhan magresulta nga ikompromiso niya ang diosnon nga mga prinsipio. Sia ang dapat magdesisyon. Luyag gid niya nga indi matublag, kag may matinlo nga konsiensia.​—⁠1 Timoteo 1:19.

Ano man ang kahimtangan, mas maayo nga ipaathag niya sa iya bana nga bangod sang iya konsiensia indi sia makapakigbahin sa bisan anong relihioso nga seremonya ukon makabuylog sa pag-amba ukon makaduko sang iya ulo kon mangadi. Pasad sa iya pagpaathag, mahimo magdesisyon ang bana nga ang pagtambong sang iya asawa mahimo magapautwas sang di-maayo nga sitwasyon para sa iya. Mahimo sia mamat-od nga sia na lang ang magtambong bangod sang iya gugma sa iya asawa, pagtahod sa iya pagtuluuhan, ukon handum nga malikawan ang bisan ano nga kahuy-anan. Apang kon magpamilit sia nga mag-upod ang iya asawa, mahimo sia mag-upod subong tumalan-aw lamang.

Dapat man naton binagbinagon ang posible nga epekto sang pagtambong naton sa isa ka simbahan sa aton mga masigkatumuluo. Makatublag bala ini sa konsiensia sang iban? Mahimo bala ini magpaluya sang pagpakigbato nila nga likawan ang idolatriya? ‘Pat-ura ninyo ang mas importante nga mga butang,’ laygay ni apostol Pablo, “agod mangin wala kamo sing kasawayan kag indi masandad ang iban tubtob sa adlaw ni Cristo.”​—⁠Filipos 1:10.

Kon ang ilubong ukon ang kaslon isa ka suod nga paryente, mahimo nga may dugang pa nga pag-ipit sang pamilya. Ano man ang kahimtangan, dapat timbangon sing maayo sang isa ka Cristiano ang tanan nga butang nga nadalahig. Sa pila ka kahimtangan mahimo sia magdesisyon nga wala sing problema nga magautwas bangod sang pagtambong sa lubong ukon sa kasal sa simbahan subong isa ka tumalan-aw. Apang, paagi sa pagtambong, mahimo nga ang halit sa iya konsiensia ukon sa konsiensia sang iban labaw sangsa posible nga mga benepisyo sang pagtambong. Ano man ang kahimtangan, dapat pat-uron sang Cristiano nga ang iya desisyon indi magaupang sa paghupot niya sing maayo nga konsiensia sa atubangan sang Dios kag sang mga tawo.