Ano ang Imo Pagtamod sa Kamatayon?

ANG kamatayon nagahulat sa aton samtang ginahimo naton ang aton adlaw-adlaw nga mga hilikuton, bisan daw ano man kita kapagros ukon kamanggaranon. Mahimo ini mahanabo sa aton sa masunod nga pagtabok naton sa dalan ukon pagtulog. Ang mga trahedya subong sang pagsalakay sang mga terorista sang Septiembre 11, 2001, sa New York City kag Washington, D.C., nagaparealisar sa aton sa katunayan nga ang “katapusan nga kaaway,” ang kamatayon, nagatipon sang mga biktima sini gikan sa tanan nga sahi sang kabuhi kag gikan sa tanan nga edad, kon kaisa nagapatay sang linibo sa sulod sang pila lamang ka minuto.​—⁠1 Corinto 15:26.

Ang mga tawo daw interesado sa kamatayon bisan pa makasiligni. Mas mabakal ang mga pamantalaan kag mas madamo ang nagatan-aw sa telebisyon kon may balita tuhoy sa kamatayon, ilabi na ang kamatayon sang madamo nga tawo sa makakulugmat nga mga hitabo. Ang mga tawo daw wala ginatak-an sa sini, kon bala kamatayon ini bangod sang inaway, kinaugali nga kalamidad, krimen, ukon balatian. Ini nga interes sa kamatayon makalilibog gid nga ginapabutyag sa daku nga pagpakita sing emosyon kon may mapatay nga kilala nga mga tawo kag mga personalidad.

Ini nga mga reaksion indi mapanghiwala. Ang mga tawo padayon nga interesado sa kamatayon​—⁠sa kamatayon sang iban. Apang, kon sila mismo ang nagaatubang sing kamatayon, ginalikawan nila nga hunahunaon ini. Ang aton mismo kamatayon isa ka butang nga indi luyag hunahunaon sang kalabanan sa aton.

Naligban sa Kamatayon?

Indi pirme makalilipay nga hunahunaon ang aton kamatayon kag mangin amo gid sini pirme. Ngaa? Bangod gintanom sang Dios sa aton ang hanuot nga handum nga magkabuhi sing dayon. “Ginbutang man niya ang pagkawalay katubtuban sa ila tagipusuon,” siling sang Manugwali 3:⁠11, suno sa Anchor Bible. Busa, ang pagkadimalikawan sang kamatayon nagresulta sa nagabangig nga mga balatyagon sa sulod sang mga tawo. Agod malandas ini kag mapaayawan ang kinaugali nga handum nga padayon nga magkabuhi, ang mga tawo nag-imbento sang tanan nga sahi sang mga pagpati, halin sa doktrina sang pagkadimamalatyon sang kalag pakadto sa pagpati sa reinkarnasyon.

Walay sapayan sini, ang kamatayon makatulublag kag makahaladlok, kag ang kahadlok sa kamatayon nagaluntad bisan diin. Busa, indi kita dapat makibot kon ang tawhanon nga katilingban sa kabilugan mahadlok sa sini. Una, ginapakita sang kamatayon nga walay pulos gid ang kabuhi nga nahugod sa paghingamo sa manggad kag gahom.

Ginhamulag sang Kamatayon?

Sang nagligad, ang tawo nga nagamasakit kag malapit na mapatay ukon napilasan sing grabe masami nga ginatugutan nga mapatay sa naandan  kag naluyagan nga kahimtangan sa iya puluy-an. Amo sini anay ang masami nga nagakatabo sang panahon sang Biblia, kag amo man sini gihapon sa pila ka kultura. (Genesis 49:​1, 2, 33) Sa sining mga hitabo, ang pamilya nagatipon, kag ang mga kabataan ginalakip sa paghambalanay. Nagapabatyag ini sa tagsa ka katapo sang pamilya nga wala sia nagapangalisod sing isahanon kag nagahatag ini sing lugpay nga ang tanan may responsabilidad kag ang tanan nagalalaw.

Tuhay gid ini sa nagakatabo sa isa ka katilingban diin ang paghambalanay tuhoy sa kamatayon ginadumilian, ginakabig ini nga makahaladlok, kag sa sini ang mga kabataan wala ginalakip sa paghaumhaum nga basi “tuman gid” ini para sa ila. Ang mapatay karon tuhay sa madamo nga paagi, kag sa masami mas masubo ini. Bisan pa luyag sang kalabanan nga mapatay sa puluy-an, nga ginaatipan sing malinong kag sing mahigugmaon sang pamilya, ang mapintas nga kamatuoran para sa madamo amo nga napatay sila sa ospital, nga sa masami nagaisahanon kag nagaantos sing kasakit, nga naangot sa makahaladlok nga modernong mga kasangkapan. Sa pihak nga bahin, ang minilyon napatay nga wala gani makilal-i​​—⁠ang mga biktima sang pagpapas sa rasa, gutom, AIDS, inaway sibil, ukon sobra nga kaimulon.

Isa ka Topiko nga Dapat Pamalandungan

Wala nagapamatok ang Biblia sa pagbinagbinag sa kamatayon. Sa katunayan, ang Manugwali 7:2 nagasiling sa aton: “Maayo pa ang pagkadto sa balay sang paglalaw sangsa pagkadto sa balay sang bangkete, bangod amo ina ang katapusan sang tanan nga tawo.” Kon nagaatubang sa katunayan sang kamatayon, mahimo naton kalimtan ang aton kinaandan nga mga hilikuton kag magkonsentrar sa kalip-uton sang kabuhi. Makabulig ini sa aton nga magkabuhi sing mas may katuyuan sa baylo nga magkabuhi nga ginapasapayanan ukon ginauyangan lamang ini.

Ano ang imo pagtamod sa kamatayon? Nausisa mo na bala ang imo mga ginabatyag, ginapatihan, ginalauman, kag ginakahadlukan tuhoy sa katapusan sang imo kabuhi?

Subong sang kinaugali sang kabuhi, ang kinaugali sang kamatayon indi mapaathag kag indi mahangpan sang tawo. Ang isa lamang nga masaligan naton nga makapaathag sini nga butang amo ang aton Manunuga. Sia amo ang “tuburan sang kabuhi,” kag yara sa iya ang “dalanon paguwa gikan sa kamatayon.” (Salmo 36:⁠9; 68:20) Bisan pa daw makapakibot, ang pag-usisa sa pila ka popular nga mga pagpati tuhoy sa kamatayon paagi sa pagbinagbinag sa Pulong sang Dios mangin makalulugpay kag makapalig-on. Ipakita sini nga ang kamatayon indi ang katapusan sang tanan nga butang.

[Blurb sa pahina 4]

Ang posibilidad nga mapatay nagabulig sa aton nga magkabuhi sing mas may kabilinggan