Mga Pamangkot Gikan sa mga Bumalasa

Kinahanglan gid bala ipasalop sa tubig ang isa ka tawo nga luyag magpabawtismo apang may malubha nga kasablagan ukon indi gid maayo ang panglawas, nga sa amo mabudlay sia itum-oy?

Ang tinaga nga “pagbawtismo” isa ka badbad sang Griegong berbo nga baʹpto, buot silingon “pagtusmog.” (Juan 13:26) Sa Biblia, ang “pagbawtismo” pareho lang sa “pagtum-oy.” Tuhoy sa pagbawtismo ni Felipe sa Etiopianhon nga eunuko, ang The Emphasised Bible, ni Rotherham, nagasiling: “Naglusong sila nga duha sa tubig, si Felipe kag ang eunuko,​​—⁠kag gintum-oy niya sia.” (Binuhatan 8:38) Busa, ang ginabawtismuhan nga tawo ginapasalop gid sa tubig.​​—⁠Mateo 3:​16; Marcos 1:⁠10.

Ginsugo ni Jesus ang iya mga disipulo: “Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila.” (Mateo 28:​19, 20) Gani, ang mga Saksi ni Jehova nagabawtismo sa mga swimming pool, linaw, suba, ukon sa iban pa nga duog diin may nagakaigo nga tubig agod mapasalop ang isa. Sanglit ang pagbawtismo paagi sa pagpasalop ginapatuman sang Kasulatan, wala sing awtoridad ang mga tawo nga hatagan sing eksepsion ang bisan sin-o sa bawtismo. Busa, dapat gid bawtismuhan ang isa ka tawo bisan pa kinahanglan maghimo sing di-kinaandan nga mga tikang bangod sang iya kahimtangan. Halimbawa, ang pagbawtismo sa dalagku nga mga bathtub nakabulig sa mga tigulang na ukon sa mga may di-maayo nga panglawas. Ang tubig sarang mainit, nian, mahinayhinay kag maamat-amat butang sa tubig ang balawtismuhan kag, kon makapasibu na sia sa sini, mahimo na ang pagbawtismo.

Bisan pa ang mga tawo nga may daku nga kasablagan nabawtismuhan. Halimbawa, ang mga tawo nga may tracheotomy kag, subong resulta, may permanente nga buho sa puwak, ukon yadtong nagakinahanglan sang respirator natum-oy man. Sa pagkamatuod, kinahanglan gid ang maayo nga paghanda para sa sini nga mga bawtismo. Mas maalamon kon presente ang isa ka rehistrado nga nars ukon ang isa ka doktor kon mahimo. Apang, kon ginahimo ang pinasahi nga pagtatap ukon paghalong, sa halos bisan ano pa nga kahimtangan, ang tanan puwede mabawtismuhan. Busa, dapat gamiton ang tanan nga makatarunganon nga paagi agod bawtismuhan ang isa ka tawo sa tubig kon luyag gid niya kag handa sia nga atubangon ang mga katalagman nga nadalahig.