“Naglugdang Sila”

“Ang nagaalimbukad nga mga tubig nagtabon sa ila; naglugdang sila sa kaidadalman subong sang bato.”

PAAGI sa sining mga pulong, ginsaulog ni Moises kag sang mga Israelinhon sa ambahanon ang ila kahilwayan paagi sa Dagat nga Mapula kag ang paglaglag sa ila nagalagas nga Egiptohanon nga mga kaaway​​—⁠si Paraon kag ang iya mga hangaway.​​—⁠Exodo 15:​4, 5.

Mahapos lang mahangpan sang isa nga nakasaksi sining makahalawhaw nga hitabo ang leksion. Wala gid sing isa nga madinalag-on nga maghangkat ukon magpamatok sa awtoridad ni Jehova ang mabuhi. Apang, mga pila lamang ka bulan pagkatapos sadto, ang kilala nga mga Israelinhon​​—⁠sanday Kora, Datan, Abiram, kag ang 250 ka sumalakdag nila​​—⁠dayag nga naghangkat sang hatag-Dios nga awtoridad nanday Moises kag Aaron.​​—⁠Numeros 16:​1-3.

Sa panuytoy ni Jehova, ginpaandaman ni Moises ang mga Israelinhon nga magpalayo sa mga kayangkayang sang mga rebelde. Sanday Datan kag Abiram, upod ang mga katapo sang ila mga panimalay, wala gid nagbag-o sang ila panimuot. Nian ginpahayag ni Moises nga sa Iya paagi, ipakita ni Jehova sa katawhan nga ining mga lalaki “wala nagtahod kay Jehova.” Kag sa sina nga punto, ginpihak ni Jehova ang duta nga ila ginatindugan. “Gani nahulog sila, kag ang tanan nga ila, nga buhi sa Sheol, kag gintabunan sila sang duta.” Ano ang natabo kay Kora kag sa iban pa nga rebelde? “Nagguwa ang kalayo gikan kay Jehova kag naghalunhon sa duha ka gatos kag kalim-an ka lalaki nga naghalad sing incienso.”​​—⁠Numeros 16:23-​35; 26:10.

Si Paraon kag ang iya mga hangaway, subong man yadtong mga rebelde sa kahanayakan, napatay bangod wala nila ginkilala ang awtoridad ni Jehova kag ang iya interes may kaangtanan sa mga hilikuton sang iya katawhan. Busa, hilingagawon gid nga ang tanan nga pagaamligan ni Jehova sa sining makahalanguyos nga mga inadlaw magtuon kag magtuman kay Jehova subong ang “Labing Mataas” kag ang “Labing Gamhanan.” Sa paghimo sini, mapasalig gid sila sining mga pulong ni Jehova: “Ang isa ka libo mapukan sa imo luyo kag napulo ka libo sa imo tuo nga kamot; indi ini magpalapit sa imo. Tulukon mo lamang sang imo mga mata kag makita mo ang balos sa mga malauton. Kay nagsiling ka: ‘Si Jehova ang akon dalangpan,’ ginhimo mo ang Labing Mataas nga imo puluy-an.”​​—⁠Salmo 91:​1, 7-9.