Report sang mga Manugbantala sang Ginharian

Pagsapo sang Kamatuoran sa Wala Ginapaabot nga Lugar

KABUBUT-ON sang Dios nga “ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Timoteo 2:​3, 4) Amo sini kon ngaa ang mga Saksi ni Jehova nag-imprinta kag nagpanagtag sing minilyon ka kopya sang Biblia kag mga bulig sa pagtuon sang Biblia. Kon kaisa, nakabulig ining mga publikasyon sa bunayag sing tagipusuon nga mga tawo nga mahibal-an ang kamatuoran sa wala gid ginapaabot nga mga paagi. May kaangtanan sa sini, ang mga manugbantala sang Ginharian sa Freetown, Sierra Leone, nagreport sang masunod nga eksperiensia.

Ikaduha si Osman nga anak nga lalaki sa isa ka pamilya nga may siam ka kabataan. Bangod nagdaku sa isa ka relihioso nga panimalay, regular sia nga nagasimba upod sa iya amay. Apang, naligban gid si Osman sa gintudlo sang iya relihion tuhoy sa impierno. Indi niya mahangpan kon paano mahimo sang isa ka maluluy-on nga Dios nga paantuson ang malaut nga mga tawo paagi sa pagsunog sa ila sa kalayo. Ang tanan nga pagpaathag agod mahangpan ni Osman ang doktrina sang kalayuhon nga impierno wala gid maghatag sa iya sing kalinong sa hunahuna.

Isa ka adlaw, sang 20 anyos si Osman, may nakita sia nga isa ka asul nga libro nga medyo natabunan sang mga sagbot sa isa ka basurahan. Bangod palabasa sia sing libro, ginkuha niya ini, gintinluan, kag natalupangdan niya ang tig-ulo​​—⁠Ang Kamatuoran nga Nagadul-ong sa Kabuhi nga Dayon.⁠ *

‘Ano ini nga kamatuoran?’ pamangkot ni Osman. Napukaw ang iya pagkamausisaon, gindala niya ang libro pagpauli kag ginbasa niya ini gilayon kag natapos. Nalipay gid sia sang matun-an niya nga may ngalan gali ang Dios​​—⁠Jehova! (Sal. 83:18) Natun-an man ni Osman nga ang superyor nga kinaiya sang Dios amo ang gugma kag ang ideya nga ginapaantos niya ang mga tawo sa isa ka kalayuhon nga duog makangilil-ad gid sa Iya. (Jeremias 32:35; 1 Juan 4:8) Sa katapusan, nabasa ni Osman nga paluntaron ni Jehova sa dili madugay ang isa ka paraiso sa duta diin ang mga tawo mabuhi sing walay katapusan. (Salmo 37:29; Bugna 21:​3, 4) Daw ano ka makalilipay nga kamatuoran gikan sa isa ka maluluy-on kag mahigugmaon nga Dios! Tinagipusuon nga ginpasalamatan ni Osman si Jehova sa pagtugot sa iya nga makita ang kamatuoran sa wala gid ginapaabot nga lugar.

Mga pila ka adlaw ang nagligad, sa bulig sang pila ka abyan, natultulan ni Osman ang Kingdom Hall sang mga Saksi ni Jehova kag nagtambong sia sa miting sa una nga kahigayunan. Ginpangabay niya didto ang isa ka Saksi nga tun-an sia sing Biblia. Walay sapayan sang daku nga pagpamatok sang iya pamilya, nagpadayon si Osman sa pag-uswag sa espirituwal kag nabawtismuhan. (Mateo 10:36) Nagaalagad sia karon subong isa ka gulang sa kongregasyon. Daw ano ka makatilingala nga ini tanan nagresulta gikan sa pagsapo sing isa ka publikasyon sang Biblia sa isa ka basurahan!

[Nota]