“Ikaw Isa ka Maayo Gid nga Babayi”

Ginhambal ining pinamulong sang pagdayaw sa isa ka lamharon nga Moabita. Sia ang balo nga si Rut, ang umagad sang isa ka Israelinhon nga babayi, si Noemi. Nagkabuhi anay sa Israel mga 3,000 ka tuig sang una, sang panahon nga nagagahom ang mga hukom, nakilal-an si Rut tungod sang iya maayo gid nga kinaiya. (Rut 3:11) Paano niya natigayon ini nga reputasyon? Sin-o ang makabenepisyo sa iya halimbawa?

Bangod indi sia isa ka babayi nga nagkaon sang “kalan-on sang katamad,” nagpangabudlay si Rut sing malawig nga inoras kag sing mapisan subong manugpanaghaw sa mga kaumhan, kag bangod sini nga kapisan nga gindayaw sia. Bisan sang gintanyagan sia nga pahaganhaganon ang iya trabaho, nagpadayon sia sa pagpangabudlay, kag ginhimo niya ang kapin pa sangsa ginpaabot sa iya. Sing talalupangdon gid, nagakabagay sa iya ang paglaragway sang Biblia sa isa ka dalayawon, sangkol, kag mapisan nga asawa.​—⁠Hulubaton 31:10-31; Rut 2:​7, 15-17.

Ang espirituwal nga mga kinaiya ni Rut​—⁠ang iya mapainubuson, masinakripisyuhon nga panimuot kag ang iya mainunungon nga gugma⁠​—⁠​amo ang panguna nga mga rason kon ngaa may maayo sia nga reputasyon. Nagbiya sa iya mga ginikanan kag sa iya dutang natawhan, nga halos wala na sing paglaum nga matigayon ang kalig-unan sang pag-asawahay, gin-unungan niya si Noemi. Subong man, ginpabutyag ni Rut ang handum nga alagdon si Jehova, ang Dios sang iya ugangan. Sa pagpatalupangod sang iya balor, ang kasaysayan sang Biblia nagasiling nga sia “labi pa [kay Noemi] sa pito ka anak nga lalaki.”​—⁠Rut 1:​16, 17; 2:​11, 12; 4:15.

Bisan pa gindayaw sang mga kaupod ni Rut ang iya rekord sang maayo gid nga kinaiya, mas talalupangdon ang maayo nga pagtamod sang Dios sa iya mga kinaiya kag ang pagpadya niya kay Rut sing pribilehiyo nga mangin isa ka katigulangan ni Jesucristo. (Mateo 1:⁠5; 1 Pedro 3:⁠4) Isa gid ka maayo nga halimbawa si Rut indi lamang sa Cristianong mga babayi kundi sa tanan nga nagapangangkon nga nagasimba kay Jehova!