Manug-abot Na ang Paumpaw sa Tiggulutom!

‘ANO nga sahi sang tiggulutom?’ mahimo ipamangkot mo. Tiggulutom sa espirituwal nga pagkaon! Gintagna sang isa ka dumaan nga Hebreong manalagna ini nga tiggulutom: “ ‘Yari karon! Magaabot ang mga adlaw,’ siling sang Soberanong Ginuong Jehova, ‘kag magapadala ako sing tiggulutom sa duta, isa ka tiggulutom, indi sa tinapay, kag sing kauhaw, indi sa tubig, kundi sa pagpamati sa mga pulong ni Jehova.’ ” (Amos 8:11) Agod mapaumpawan ang espirituwal nga tiggulutom, ang 48 ka katapo sang ika-112 nga klase sang Watchtower Bible School of Gilead, nga nahamtang sa Patterson, New York, magakadto sa 19 ka pungsod sa 5 ka kontinente kag mga isla sang kadagatan.

Makadto sila nga nasangkapan, indi sang literal nga karne kag uyas, kundi sang ihibalo, eksperiensia, kag paghanas. Sa sulod sang lima ka bulan nakigbahin sila sa maid-id nga pagtuon sa Biblia nga gindesinyo sa pagpabakod sang ila pagtuo para sa pag-alagad subong mga misyonero sa iban nga mga pungsod. Sang Marso 9, 2002, nalipay sa pagpamati ang 5,554 nga nagtambong sa programa sang gradwasyon.

Si Stephen Lett, nga nagaalagad subong katapo sang Nagadumala nga Hubon sang mga Saksi ni Jehova, mapagsik nga nagbukas sa programa. Espesyal niya nga gin-abiabi ang madamo nga bisita halin sa lainlain nga bahin sang kalibutan. Nian gin-aplikar niya ang mga pulong ni Jesus, “Kamo ang kapawa sang kalibutan” sa hilikuton sang palaabuton nga mga misyonero. (Mateo 5:14) Ginpaathag niya: ‘Sa inyo asaynment “iwagan” ninyo ang nanuhaytuhay nga mga bahin sang makatilingala nga mga binuhatan ni Jehova, agod buligan ang mga tawo nga bunayag sing tagipusuon nga makita ang katahom ni Jehova kag sang iya mga katuyuan.’ Ginpalig-on ni Utod Lett ang mga misyonero nga gamiton ang kapawa sang Pulong sang Dios sa pagbuyagyag sang kadulom sang butig nga mga doktrina kag sa pagtuytoy sa mga nagapangita sing kamatuoran.

Ang Nagakaigo nga Panimuot Kinahanglanon sa Kadalag-an

Pagkatapos sang nagabukas nga pamulongpulong sang tsirman, ginsugdan ni Baltasar Perla, katapo sang Komite sang Sanga sa Estados Unidos, ang serye sang mga pamulongpulong nga gintuyo sa pagbulig sa mga gradwado nga mangin madinalag-on nga mga misyonero. Ginbinagbinag niya ang tema nga “Mangin Maisog kag Mabakod kag Manghikot.” (1 Cronica 28:20) Nakabaton si Hari Solomon sang dumaan nga Israel sing mabudlay nga asaynment nga himuon ang isa ka butang nga wala pa niya anay mahimo​—⁠ang pagpatindog sing templo sa Jerusalem. Nanghikot si Solomon, kag sa bulig ni Jehova nahuman ang templo. Ginaaplikar ang punto sa klase, si Utod Perla nagsiling: ‘Nakabaton kamo sing bag-ong asaynment, nga mangin misyonero, kag dapat kamo mangin maisog kag mabakod.’ Nalugpayan gid ang mga estudyante sa pasalig nga indi sila pagbiyaan ni Jehova samtang nagapabilin sila nga suod sa iya. Ginpapagsik ni Utod Perla ang mga tagpalamati paagi sa paghinakop: ‘Daku ang mahimo ninyo subong mga misyonero. Mga misyonero ang nagdala sang kamatuoran sa amon pamilya!’

 “Magsalig kay Jehova Para sa Kadalag-an” amo ang tema sang pamulongpulong ni Samuel Herd, isa pa ka katapo sang Nagadumala nga Hubon. Sugdan sang mga estudyante ang hilikuton bilang mga misyonero, kag ang ila kadalag-an nasandig gid sa ila kaangtanan kay Jehova. Ginlaygayan sila ni Utod Herd: ‘Nakatipon kamo sing daku nga ihibalo sa Biblia paagi sa inyo pagtuon sa Gilead. Malipayon kamo nga nagbaton. Apang karon, agod magmadinalag-on gid, dapat ninyo sugdan ang paghatag sang inyo natun-an.’ (Binuhatan 20:35) May madamo nga kahigayunan ang mga misyonero nga mahimo ini samtang ‘ginaula ang ila kaugalingon’ para sa iban.​—⁠Filipos 2:17.

Ano ang nagapamilinbilin nga mga laygay sang mga instruktor sa mga estudyante? Ginpasad ni Mark Noumair ang iya tema sa Rut 3:​18, “Magpahimunong Tubtob nga Mahibaluan Ninyo ang Maabutan Sang Butang.” Ginagamit ang halimbawa nanday Noemi kag Rut, ginpalig-on sang humalambal ang mga gradwado nga magsalig sing bug-os sa mga kahimusan sang organisasyon sang Dios sa duta kag magtahod sa teokratikong awtoridad. Nagatandog sa tagipusuon sang mga estudyante, si Utod Noumair nagsiling: ‘Mahimo nga may mga tion nga indi ninyo mahangpan kon ngaa ginhimo ang isa ka desisyon nga nagaapektar sa inyo ukon magbatyag kamo nga dapat himuon  ang isa ka butang sa tuhay nga paagi. Ano ang himuon ninyo? Magatindog bala kamo kag himuon ini mismo ukon “magapahimunong” bala kamo, nga nagasalig sa panuytoy sang Dios nga, sa ulihi, pahanabuon lamang niya ang maayo?’ (Roma 8:28) Ang laygay nga ‘magkonsentrar sa pagpauswag sang intereses sang Ginharian, nga nagatan-aw sa ginahimo sang organisasyon ni Jehova sa baylo nga sa mga tawo,’ magabulig gid sa mga misyonero sa ila asaynment sa luwas.

Ginhatag ni Wallace Liverance, nga isa anay ka misyonero kag nagaalagad karon subong instruktor sa Gilead, ang katapusan nga diskurso sa una nga serye sang mga pamulongpulong. Ang tema sang iya pamulongpulong amo ang “Magpadayon sa Pagkonsentrar, Magpadayon sa Pag-alagad sa Dios.” Ginpaathag niya nga nahantop ni manalagna Daniel sang nakita niya nga napukan ang Babilonia kag gikan sa gintagna ni Jeremias nga malapit na hilwayon ang mga Israelinhon gikan sa pagkabihag. (Jeremias 25:11; Daniel 9:⁠2) Alisto si Daniel sa orasan ni Jehova, kag nagbulig ini sa iya nga padayon nga magkonsentrar sa katumanan sang katuyuan sang Dios. Sa kabaliskaran, ang mga Israelinhon sang panahon ni Hageo nagsiling: “Ang tion wala pa mag-abot.” (Hageo 1:⁠2) Nagkonsentrar sila, indi sa panahon nga nagakabuhi sila, kundi sa ila kasulhayan kag pagpaayaw sa kaugalingon, kag ginbiyaan nila ang hilikuton nga amo ang rason kon ngaa ginhilway sila sa Babilonia, ang pagtukod liwat sang templo. Naghinakop si Utod Liverance: “Gani magpadayon sa pagkonsentrar paagi sa pagdumdom pirme sang katuyuan ni Jehova.”

Ang instruktor sa Gilead nga si Lawrence Bowen nangin moderator sa isa ka bahin nga may tema “Ginapakamaayo ni Jehova ang mga Nagagamit Sang Buhi nga Pulong.” (Hebreo 4:12) Ginbinagbinag sa sini nga bahin ang mga eksperiensia sang klase sa latagon, nga nagapadaku kon paano ginapakamaayo ni Jehova ang mga nagagamit sang Biblia kon nagabantala kag nagapanudlo. Ginpatalupangod sang moderator nga si Jesucristo nagpahamtang sing maayo nga halimbawa para sa tanan nga ministro sang Dios: ‘Masiling ni Jesus sing maminatud-on nga ang iya gintudlo wala maghalin sa iya kaugalingon, kundi ginpamulong niya ang Pulong sang Dios.’ Nakilala sang mga tawo nga bunayag sing tagipusuon ang kamatuoran kag naghikot sing positibo suno sa sini. (Juan 7:​16, 17) Matuod man ini sa karon.

Ang Paghanas sa Gilead Nagasangkap sa Isa Para sa Tagsa ka Maayong Buhat

Masunod, gin-interbyu sang madugay na nga mga katapo sang pamilya Bethel nga sanday Richard Abrahamson kag Patrick LaFranca ang anom ka gradwado sang Gilead nga nagaalagad karon sa lainlain nga porma sang espesyal nga bug-os tion nga pag-alagad. Napalig-on ang mga gradwado sang ika-112 nga klase nga mabatian nga pagligad sang mga tinuig ining anom, ano man ang ila asaynment karon, padayon nga nagagamit sang paghanas nga nabaton nila sa Gilead may kaangtanan sa pagtuon sa Biblia, mga proyekto sa pagpanalawsaw, kag sa pagpakig-angot sa mga tawo.

Ginhatag ni Theodore Jaracz, nga katapo sang Nagadumala nga Hubon, ang panguna nga diskurso sa programa. Gintig-uluhan ini nga “Ano ang Mahimo Sang Pagbatas sa Pagdumot ni Satanas.” Sa sulod sang nagligad nga lima ka bulan, nagpuyo ang mga estudyante sa isa ka mainabyanon kag teokratiko nga palibot. Apang, subong sang ginpadaku sa ila pagtuon, nagakabuhi kita sa kalibutan sang kaaway. Ginasalakay ang katawhan ni Jehova sa bug-os nga kalibutan. (Mateo 24:⁠9) Ginagamit ang pila ka kasaysayan sa Biblia, ginpatalupangod ni Utod Jaracz nga ‘ginapuntariya gid kita sang Yawa. Dapat naton pabakuron ang aton kaangtanan kay Jehova kag mangin malig-on sa pag-atubang sa mga pagtilaw.’ (Job 1:⁠8; Daniel 6:⁠4; Juan 15:20; Bugna 12:​12, 17) Naghinakop si Utod Jaracz nga walay sapayan sang padayon nga pagdumot sa katawhan sang Dios, ‘wala sing hinganiban nga himuon batok sa aton, subong sang ginasiling sang Isaias 54:​17, ang magamadinalag-on. Pat-uron ni Jehova nga maluwas kita sa iya tion kag paagi.’

“Nasangkapan sing bug-os,” ang mga gradwado sang ika-112 nga klase sang Gilead walay duhaduha nga daku ang mahimo sa pagpaumpaw sa espirituwal nga tiggulutom sa mga kadutaan kon diin sila magaalagad. (2 Timoteo 3:​16, 17) Ginakalangkagan naton ang mga report kon paano nila gindala ang makapaumpaw nga mensahe sa mga tawo sa sining kadutaan.

[Kahon sa pahina 23]

ESTADISTIKA SANG KLASE

Kadamuon san mga pungsod nga gintiglawas: 6

Kadamuon sang mga pungsod nga ginpadalhan: 19

Kadamuon sang mga estudyante: 48

Promedyo nga edad: 33.2

Promedyo nga tuig sa kamatuoran: 15.7

Promedyo nga tuig sa bug-os tion nga ministeryo: 12.2

[Retrato sa pahina 24]

Ika-112 nga Naggradwar nga Klase Sang Watchtower Bible School of Gilead

Sa listahan sa ubos, ang mga idas nanumeruhan halin sa atubangan pa likod, kag ang mga ngalan ginalista halin sa wala pa tuo sa tagsa ka idas.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.