Mga Pamangkot Gikan sa mga Bumalasa

Kon naghikog ang isa ka tawo, puwede bala sia diskursuhan sa lubong sang isa ka Cristianong ministro?

Ang tagsa ka Cristianong ministro amo ang magadesisyon kon bala magadiskurso sia, nga matinlo ang konsiensia sa atubangan sang Dios, sa lubong sang isa nga mahimo nga naghikog. Kon nagahimo sing desisyon, dapat niya binagbinagon ang masunod nga mga pamangkot: Paano ginatamod ni Jehova ang paghikog? Hungod gid bala niya nga ginpatay ang iya kaugalingon? Bangod bala sang balatian sa hunahuna ukon sa emosyon amo nga naghikog sia? Paano ginatamod sang lokal nga komunidad ang paghikog?

Subong mga Cristiano, interesado kita sa pagtamod ni Jehova tuhoy sa paghikog. Para kay Jehova ang kabuhi sang tawo hamili kag sagrado. (Genesis 9:⁠5; Salmo 36:⁠9) Ang hungod nga pagpatay sa kaugalingon wala ginakahamut-an sang Dios. (Exodo 20:13; 1 Juan 3:15) Bangod sini, indi bala dapat diskursuhan ang lubong sang isa nga naghikog?

Binagbinaga ang natabo kay Hari Saul sang Israel. Sang nakita niya nga mapatay gid sia sa iya katapusan nga pagpakig-away sa mga Filistinhon, sa baylo nga ang iya kaaway ang maghalit sa iya, “ginkuha ni Saul ang espada kag ginhap-an ini.” Sang nakit-an sang mga Filistinhon ang iya bangkay, ginlansang nila ini sa pader sang siudad sang Bet-san. Sang nabatian sang mga pumuluyo sang Jabes-gilead ang ginhimo sang mga Filistinhon, ginkuha nila ang bangkay kag ginsunog ini. Nian ginkuha nila ang iya mga tul-an kag ginlubong ini. Nagpuasa pa gani sila sing pito ka adlaw, nga isa ka tradisyunal nga ritwal sang mga Israelinhon sa paglalaw. (1 Samuel 31:​4, 8-13; Genesis 50:10) Sang nahibaluan sang hinaplas ni Jehova, nga si David, ang ginhimo sang mga pumuluyo sang Jabes-gilead, nagsiling sia: “Pakamaayuhon kamo ni Jehova, bangod nagpakita kamo sining mahigugmaon nga kaayo sa inyo ginuo, kay Saul, bangod ginlubong ninyo sia. Kag karon kabay nga magpakita si Jehova sing mahigugmaon nga kaayo kag katutom sa inyo.” (2 Samuel 2:​5, 6) Wala ginapakita sang Biblia nga ginpakamalaut ang mga pumuluyo sang Jabes-gilead bangod sang ila ginhimo nga makabig nga isa ka ritwal sa paglubong kay Hari Saul. Ipaanggid ini sa mga wala ginlubong bangod sang ila paghimo sing sala. (Jeremias 25:​32, 33) Mahimo binagbinagon sang isa ka Cristianong ministro ang kasaysayan tuhoy kay Saul sa pagdesisyon kon bala magadiskurso sia sa lubong sang isa nga naghikog.

Mahimo man binagbinagon sang ministro ang katuyuan sang diskurso sa lubong. Indi kaangay sang mga tawo nga nagapati sa pagkadimamalatyon sang kalag, wala nagadiskurso sa lubong ang mga Saksi ni Jehova nga nagasiling nga ang napatay nagsaylo sa lain nga kalibutan. Sa baylo nga para sa patay, ang panguna nga katuyuan sang pagdiskurso sa lubong amo ang paglugpay sa mga namatyan kag sa pagpanaksi sa mga nagtambong tuhoy sa kahimtangan sang patay. (Manugwali 9:​5, 10; 2 Corinto 1:​3-5) Ang isa pa ka importante nga rason sa pagdiskurso sa lubong amo ang pagbulig sa tanan nga nagatambong nga pamalandungan ang kalip-uton sang kabuhi. (Manugwali 7:⁠2) Matigayon bala ini nga mga katuyuan paagi sa pagdiskurso sa lubong sang naghikog?

Matuod, mahimo magbatyag ang iban nga ginhungod sang naghikog nga patyon ang iya kaugalingon, nga nakahibalo gid nga nagpakasala sia kay Jehova. Apang posible gid bala nga mapamatud-an pirme ini nga balatyagon? Mahimo ayhan nga hinali lang ini nga natabo? Ang iban nga nagtilaw sa paghikog nagbag-o sang ila hunahuna kag wala ini gindayon. Indi na mahinulsulan sang isa nga napatay ang iya ginhimo.

Importante man nga binagbinagon nga ang mga balatian sa hunahuna kag emosyon nadalahig sa madamo nga paghikog. Matawag gid sila nga mga biktima sang paghikog. Suno sa pila ka estadistika,  90 porsiento sang mga naghikog ang may problema sa hunahuna, sa emosyon, ukon sa pagkagiyan. Patawaron ayhan ni Jehova ang pagpatay sa kaugalingon sang mga tawo nga may amo sini nga kahimtangan sa hunahuna? Indi kita ang nagapat-od kon bala ang napatay nakahimo sing di-mapatawad nga sala sa atubangan ni Jehova. Mahimo binagbinagon sang isa ka Cristianong ministro ang mga kahimtangan kag ang medikal nga rekord sang napatay samtang nagapamat-od kon bala magadiskurso sia sa lubong sang naghikog.

May isa pa ka butang nga dapat binagbinagon: Paano ginatamod sang mga tawo sa komunidad ang paghikog kag ang iya pagkapatay? Dapat gid ini binagbinagon sang mga gulang, nga interesado sa reputasyon sang lokal nga kongregasyon sang mga Saksi ni Jehova. Depende sa kinaandan nga panimuot sa paghikog sa amo nga lugar, kag ilabi na sa sini nga kaso sang paghikog, mahimo mamat-od ang mga gulang nga indi pag-aprobahan ini nga diskurso sa lubong sa publiko ukon ang paghatag sini sa Kingdom Hall.

Apang, kon ginpangabay ang isa ka Cristianong ministro nga dumalahan ang lubong nga ginhimos sang iban, mahimo niya ini batunon subong iya personal nga desisyon nga wala nagatiglawas sa kongregasyon. Kon amo sini ang iya desisyon, dapat sia maghalong nga indi sia maghambal nga daw pat-od sia kon bala posible ang pagkabanhaw. Ang paglaum sa palaabuton sang mga patay nagadepende kay Jehova, kag wala sang makasiling kon bala banhawon ang napatay ukon indi. Mahimo magkonsentrar ang ministro sa mga kamatuoran sang Biblia tuhoy sa kamatayon kag sa paglugpay sa mga namatyan.