Ang Himaya ni Jehova Nagasilak sa Iya Katawhan

“Si Jehova mangin imo dayon nga kapawa.”​—⁠ISAIAS 60:20.

1. Paano ginapakamaayo ni Jehova ang iya matutom nga katawhan?

“SI Jehova nahamuot sa iya katawhan. Ginapatahom niya ang mga mahagop sing kaluwasan.” (Salmo 149:4) Amo ini ang ginsiling sang salmista sang una, kag ginapamatud-an sang maragtas nga matuod ang iya ginsiling. Kon ang katawhan ni Jehova matutom, ginaatipan niya sila, ginapakamaayo sila, kag ginaamligan sila. Sang una, ginhatagan niya sila sing kadalag-an batok sa ila mga kaaway. Sa karon, ginabuligan niya sila nga mangin mabakod sa espirituwal kag ginapasalig nga luwason sila pasad sa halad ni Jesus. (Roma 5:9) Ginahimo niya ini bangod matahom sila sa iya mga mata.

2. Bisan pa ginapamatukan, sa ano nagasalig ang katawhan sang Dios?

² Sa pagkamatuod, sa kalibutan nga naligom sa dulom, ang mga ‘nagakabuhi nga may diosnon nga debosyon’ pamatukan. (2 Timoteo 3:12) Walay sapayan sini, makita ni Jehova ang mga nagapamatok, kag ginapaandaman niya sila: “Ang bisan ano nga pungsod kag bisan ano nga ginharian nga indi mag-alagad sa imo malaglag; kag pat-od nga mahapay ang mga pungsod.” (Isaias 60:12) Sa karon, ang pagpamatok may nanuhaytuhay nga porma. Sa iban nga kadutaan, ginatinguhaan sang mga nagapamatok nga limitehan ukon dumilian ang pagsimba sang hanuot nga mga Cristiano kay Jehova. Sa iban pa nga kadutaan, ginasakit sang mga panatiko ang mga sumilimba ni Jehova kag ginasunog ang ila pagkabutang. Apang, dumduma nga ginpat-od na ni Jehova kon ano ang madangatan sang bisan ano nga pagpamatok sa katumanan sang iya kabubut-on. Ang mga kaaway mapaslawan. Ang mga nagapakig-away batok sa Sion, subong ginarepresentar sang iya mga anak sa duta, indi magmadinalag-on. Indi bala ini isa ka makalilipay nga pasalig gikan sa aton dungganon nga Dios, si Jehova?

Ginpakamaayo Labaw sa Ginapaabot

3. Paano ang katahom kag pagkamabungahon sang mga sumilimba ni Jehova ginailustrar?

³ Ang kamatuoran amo nga sa katapusan nga mga adlaw sining sistema sang mga butang, ginapakamaayo ni Jehova ang iya katawhan labaw sa ila mga ginapaabot. Progresibo nga ginpatahom niya ilabi na ang iya duog sang pagsimba kag ang mga nagadala sang iya ngalan. Suno sa tagna ni Isaias, nagsiling sia sa Sion: “Sa imo magaabot ang himaya gid sang Lebanon, ang kahoy nga enebro, ang kahoy nga fresno kag ang sipre sing dungan, agod patahumon ang duog sang akon santuaryo; kag himayaon ko ang duog mismo sang akon mga tiil.” (Isaiah 60:13) Ang mga bukid nga natabunan sang madabong nga kagulangan isa ka matahom nga talan-awon. Gani ang madabong nga kakahuyan nagakaigo nga simbulo  sang katahom kag pagkamabungahon sang mga sumilimba ni Jehova.​​—⁠Isaias 41;19; 55:13.

4. Ano ang “santuaryo” kag ang ‘duog sang tiil ni Jehova,’ kag paano ini ginpatahom?

⁴ Ano ang “santuaryo” kag ang ‘duog sang mga tiil ni Jehova’ nga ginsambit sa Isaias 60:13? Ining mga termino nagapatuhoy sa mga luwang sang daku nga espirituwal nga templo ni Jehova, nga amo ang kahimusan sa pagpalapit kay Jehova sa pagsimba paagi kay Jesucristo. (Hebreo 8:​1-5; 9:​2-​10, 23) Ginpahayag ni Jehova ang iya katuyuan nga himayaon ining espirituwal nga templo paagi sa pagtipon sang katawhan gikan sa tanan nga pungsod agod magkari kag magsimba didto. (Hageo 2:7) Antes sini, nakita mismo ni Isaias ang kadam-an gikan sa tanan nga pungsod nga nagadugok sa ginpakataas nga bukid sang pagsimba kay Jehova. (Isaias 2:​1-4) Ginatos ka tuig sang ulihi, nakita ni apostol Juan sa palanan-awon “ang isa ka dakung kadam-an nga wala sing tawo nga makaisip, gikan sa tanan nga pungsod kag tribo kag katawhan kag hambal.” Nagatindog sila “sa atubangan sang trono sang Dios . . . , nagahimo sa iya sing sagrado nga pag-alagad sa adlaw kag gab-i sa iya templo.” (Bugna 7:​9, 15) Samtang ining mga tagna nagakatuman sa aton adlaw, nakita mismo naton ang pagpatahom sa balay ni Jehova.

5. Anong daku nga pag-uswag ang maeksperiensiahan sang mga anak sang Sion?

⁵ Isa gid ini ka daku nga pag-uswag para sa Sion! Si Jehova nagsiling: “Sa baylo nga ikaw mangin isa nga ginbayaan sing bug-os kag gindumtan, nga wala ginaagihan ni bisan sin-o, himuon ko pa ikaw nga isa ka butang nga ipabugal tubtob sa tion nga walay latid, isa ka hulugyawan sa nagasunod nga mga kaliwatan.” (Isaias 60:15) Sang matapos ang una nga bug-os kalibutan nga inaway, nakaeksperiensia matuod ang “Israel sang Dios” sing isa ka panag-on sang kahapayan. (Galacia 6:16) Ginbatyag niya matuod nga “ginbayaan [sia] sing bug-os,” kay wala mahantop sang iya mga anak sa duta ang kabubut-on sang Dios para sa ila. Nian, sang 1919, ginpapagsik liwat ni Jehova ang iya hinaplas nga mga alagad, kag sugod sadto ginpatahom niya sila paagi sa dalayawon nga kabuganaan sa espirituwal. Isa pa, indi bala makalilipay ang saad sa sining bersikulo? Tamdon ni Jehova ang Sion subong “isa ka butang nga ipabugal.” Huo, ipabugal sang mga anak sang Sion kag ni Jehova mismo ang Sion. Mangin “isa [sia] ka hulugyawan,” isa ka rason nga ikalipay sing daku. Kag indi ini sa malip-ot lamang nga tion. Ang kalahamut-an nga kahimtangan sang Sion, subong ginarepresentar sang iya dutan-on nga mga anak, magalawig sa “nagasunod nga kaliwatan.” Indi ini magauntat.

6. Paano ginagamit sang matuod nga mga Cristiano ang mga manggad gikan sa mga pungsod?

⁶ Pamatii, karon, ang isa pa ka saad sang Dios. Nagahambal sa Sion, si Jehova nagsiling: “Susuhon gid nimo ang gatas sang mga pungsod, kag  magasuso ka sa suso sang mga hari; kag pat-od nga makilala mo nga ako, si Jehova, ang imo Manluluwas, kag ang Gamhanan sang Jacob amo ang imo Manunubos.” (Isaias 60:16) Paano ‘ginsuso [sang Sion] ang gatas sang mga pungsod’ kag ‘ang suso sang mga hari’? Sa kahulugan nga ginagamit sang hinaplas nga mga Cristiano kag sang kaupod nila nga “iban nga mga karnero” ang hamili nga manggad sang mga pungsod agod pauswagon ang putli nga pagsimba. (Juan 10:16) Bangod sang boluntaryo nga mga amot, ang hilikuton nga pagbantala kag pagtudlo ginahimo sa bug-os nga kalibutan. Bangod sang maalamon nga paggamit sa modernong teknolohiya, ang mga Biblia kag mga literatura sa Biblia ginaimprinta sa ginatos ka lenguahe. Sa karon, mas madamo ang sarang makatigayon sang kamatuoran sang Biblia. Ang mga banwahanon sang madamong pungsod nagatuon nga si Jehova, nga nagtubos sang iya hinaplas nga mga alagad gikan sa espirituwal nga pagkabihag, amo gid ang Manluluwas.

Pag-uswag sang Organisasyon

7. Anong talalupangdon nga pag-uswag ang naeksperiensiahan sang mga anak sang Sion?

⁷ Ginpatahom ni Jehova ang iya katawhan sa isa pa ka paagi. Ginpakamaayo niya sila paagi sa napauswag nga organisasyon. Aton mabasa sa Isaias 60:17: “Sa baylo sang saway magadala ako sing bulawan, kag sa baylo sang salsalon magadala ako sing pilak, kag sa baylo sang kahoy, saway, kag sa baylo sang mga bato, salsalon; kag itangdo ko ang paghidait subong imo mga manugdumala kag ang pagkamatarong subong imo mga manughatag sing buluhaton.” Ang pagtal-us sing bulawan sa saway isa ka pag-uswag, kag amo man ang masiling sa iban nga mga materyales nga nasambit. Nahisanto sa sini, ang Israel sang Dios nakaeksperiensia sing mga pag-uswag sa organisasyon sa katapusan nga mga adlaw. Binagbinaga ang pila ka halimbawa.

8-10. Ilaragway ang pila ka pag-uswag sa organisasyon nga natabo sugod sang 1919.

⁸ Antes sang 1919, ang mga kongregasyon sang katawhan sang Dios ginadumalahan sang mga gulang kag mga deakono nga ginapili sang mga katapo sang kongregasyon. Sugod sadto nga tuig, “ang matutom kag mainandamon nga ulipon” nagtangdo sing service director ukon direktor sang pag-alagad sa tagsa ka kongregasyon agod magdumala sa pag-alagad sa latagon. (Mateo 24:45-​47) Apang, ini nga kahimusan indi nangin epektibo sa madamo nga kongregasyon bangod wala ginsuportahan sang pila ka ginpili nga mga gulang ang hilikuton nga pag-ebanghelyo. Gani, sang 1932, ginhatagan sing instruksion ang mga kongregasyon nga untaton ang pagpili sing mga gulang kag mga deakono. Sa baylo, dapat sila magpili sing service committee ukon komite sang  pag-alagad nga amo ang magaalagad upod sa direktor sang pag-alagad. Daw subong yadto sang “saway” sa baylo sang “kahoy”​—⁠isa ka daku nga pag-uswag!

⁹ Sang 1938, ang mga kongregasyon sa bug-os nga kalibutan namat-od nga sundon ang ginpauswag nga kahimusan, isa nga mas nahisanto sa Kasulatan. Ang pagdumala sa kongregasyon gintulin sa company servant ukon alagad sang kompanya kag sa iban nga mga alagad, ang tanan gintangdo sa idalom sang pagdumala sang matutom kag mainandamon nga ulipon. Wala na sing piniliay! Sa sining paagi, ang tanan nga alagad sa kongregasyon ginatangdo sa teokratiko nga paagi. Daw subong yadto sang “salsalon” sa baylo sang “mga bato” ukon “bulawan” sa baylo sang “saway.”

¹⁰ Sugod sadto, nagpadayon ang pag-uswag. Halimbawa, nahangpan sang 1972 nga ang pagdumala sa kongregasyon paagi sa nagabinuligay nga hubon sang mga gulang nga gintangdo sa teokratiko nga paagi, nga wala sing isa ka gulang nga may awtoridad sa ibabaw sang iban nga mga gulang, mas kaanggid sa kon paano anay gindumalahan ang unang-siglo nga Cristianong mga kongregasyon. Dugang pa, sang nagligad nga mga duha ka tuig, may isa pa ka pag-uswag nga ginhimo. Gin-islan ang mga direktor sang pila ka legal nga korporasyon, agod nga makakonsentrar sing labi pa ang Nagadumala nga Hubon sa espirituwal nga mga intereses sang katawhan sang Dios sa baylo nga matublag sang legal nga mga alatipanon sa adlaw-adlaw.

11. Sin-o ang sa likod sang mga pagbag-o sa organisasyon sa tunga sang katawhan ni Jehova, kag ano ang resulta sining mga pagbag-o?

¹¹ Sin-o ang sa likod sining progresibo nga mga pagbag-o? Wala sing liwan kundi si Jehova nga Dios. Sia amo ang nagsiling: “Magadala ako sing bulawan.” Kag sia man ang padayon nga nagsiling: “Itangdo ko ang paghidait subong imo mga manugdumala kag ang pagkamatarong subong imo mga manughatag sing buluhaton.” Huo, si Jehova amo ang may salabton sa pagdumala sa iya katawhan. Ang gintagna nga pag-uswag sa organisasyon isa pa ka paagi nga ginapatahom ni Jehova ang iya katawhan. Kag subong resulta sini, ginpakamaayo ang mga Saksi ni Jehova sa madamo nga paagi. Sa Isaias 60:​18, aton mabasa: “Indi na mabatian sa imo duta ang kasingki, ang pag-ati ukon ang kagulub-an sa imo mga dulunan. Kag pat-od nga tawgon mo ang imo mga pader nga Kaluwasan kag ang imo mga gawang nga Kadayawan.” Katahom gid sini! Apang paano ini natuman?

12. Paano nangibabaw ang paghidait sa matuod nga mga Cristiano?

¹² Ang matuod nga mga Cristiano hanuot nga nagasalig kay Jehova para sa instruksion kag panuytoy, kag ang resulta amo ang gintagna ni Isaias: “Ang tanan mo nga anak mangin mga tawo nga gintudluan ni Jehova, kag ang paghidait sang imo mga anak mangin bugana.” (Isaias 54:13) Dugang pa, ang espiritu ni Jehova nagapanghikot sa iya katawhan, kag ang isa ka bahin sang bunga sining espiritu amo ang paghidait. (Galacia 5:​22, 23) Ang pagkamahidaiton sang katawhan ni Jehova nagahimo sa ila nga isa ka makapabugnaw nga tuburan sang kaumpawan sa isa ka masingki nga kalibutan. Ang ila mahidaiton nga kahimtangan, pasad sa gugma sang matuod nga mga Cristiano sa isa kag isa, isa ka halimbawa sang kon ano ang mangin pagkabuhi sa bag-ong kalibutan. (Juan 15:17; Colosas 3:14) Pat-od gid nga ang kada isa sa aton nalipay nga maagom kag makaamot  sa sini nga paghidait, nga nagahatag sing kadayawan kag kadungganan sa aton Dios kag isa ka daku nga bahin sang aton espirituwal nga paraiso!​—⁠Isaias 11:9.

Ang Kapawa ni Jehova Padayon nga Magasilak

13. Ngaa makapat-od kita nga ang kapawa ni Jehova indi magauntat sa pagsilak sa iya katawhan?

¹³ Padayon bala nga magasilak ang kapawa ni Jehova sa iya katawhan? Huo! Sa Isaias 60:​19, 20, aton mabasa: “Ang adlaw indi na mangin kapawa sa imo sa adlaw, kag ang bulan indi na magahatag sa imo sing kasanag. Kag si Jehova mangin imo dayon nga kapawa, kag ang imo Dios nga imo katahom. Ang imo adlaw indi na magtunod, ni ang imo bulan magadulom; kay si Jehova mangin imo dayon nga kapawa, kag ang imo mga adlaw sang paglalaw matapos na.” Sang ang “paglalaw” sang espirituwal nga mga tinapok natapos sang 1919, ang kapawa ni Jehova nagsilak sa ila. Pagligad sang kapin sa 80 ka tuig, ginakahamut-an gihapon sila ni Jehova samtang ang iya kapawa padayon nga nagasilak. Kag indi ini magauntat. Bahin sa iya mga sumilimba, ang aton Dios indi “magtunod” kaangay sang adlaw ukon ‘magdulom’ kaangay sang bulan. Sa baylo, magasilak sia sa ila sa walay katubtuban. Isa gid ini ka dalayawon nga pasalig para sa aton samtang nagakabuhi kita sa katapusan nga mga adlaw sining madulom nga kalibutan!

14, 15. (a) Sa anong paagi ang tanan nga katawhan sang Dios “matarong”? (b) Bahin sa Isaias 60:​21, anong importante nga katumanan ang ginapaabot sang iban nga mga karnero?

¹⁴ Pamatii ninyo karon ang isa pa ka saad ni Jehova tuhoy sa dutan-on nga tiglawas sang Sion, ang Israel sang Dios. Ang Isaias 60:21 nagasiling: “Tuhoy sa imo katawhan, sila tanan mangin matarong; tubtob sa tion nga walay latid magapanag-iya sila sang duta, ang salingsing sang akon tinanom, ang binuhatan sang akon mga kamot, agod patahumon ako.” Sang 1919 sang ang hinaplas nga mga Cristiano ginpasag-uli liwat sa pagpanghikot, isa sila ka tumalagsahon nga grupo sang mga tawo. Sa makasasala gid nga kalibutan, “ginpahayag sila nga matarong” pasad sa ila di-mationg nga pagtuo sa halad nga gawad ni Cristo Jesus. (Roma 3:24; 5:1) Nian, kaangay sang mga Israelinhon nga ginhilway gikan sa pagkabihag sa Babilonia, ginpanag-iyahan nila ang espirituwal nga “duta,” isa ka espirituwal nga duta, ukon isa ka duog sang hilikuton, diin magaagom sila sing espirituwal nga paraiso. (Isaias 66:8) Ang tulad-paraiso nga katahom sini nga duta indi gid maglubad bangod, indi kaangay sang dumaan nga Israel, ang Israel sang Dios subong isa ka pungsod indi gid magluib. Ang ila pagtuo, ang ila pagbatas, kag ang ila kakugi indi gid magauntat  sa pagdala sing kadungganan sa ngalan sang Dios.

¹⁵ Ang tanan nga katapo sining espirituwal nga pungsod nangin bahin sang bag-ong katipan. Ang kasuguan ni Jehova nasulat sa ila tagipusuon, kag ginpatawad ni Jehova ang ila mga sala pasad sa halad nga gawad ni Jesus. (Jeremias 31:31-34) Ginapahayag niya sila nga matarong subong “mga anak” kag nagapakig-angot sia sa ila subong nga daw himpit sila. (Roma 8:​15, 16, 29, 30) Ang mga sala sang kaupod nila nga iban nga mga karnero ginpatawad man pasad sa halad ni Jesus kag, kaangay ni Abraham, ginpahayag sila nga matarong subong mga abyan sang Dios paagi sa pagtuo. “Ginlabhan nila ang ila mga panapton nga malaba kag ginpaputi ini sa dugo sang Kordero.” Kag ining iban nga mga karnero nga mga kaupod nagapaabot sang isa pa ka tumalagsahon nga pagpakamaayo. Sa tapos makalampuwas sa “dakung kapipit-an” ukon sa tapos mabanhaw, makita nila ang literal nga katumanan sang ginasiling sang Isaias 60:21 kon ang bug-os nga duta mangin paraiso. (Bugna 7:14; Roma 4:1-3) Sa sina nga tion, “ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait.”​—⁠Salmo 37:​11, 29.

Ang Pag-uswag Nagapadayon

16. Ano ang tumalagsahon nga ginsaad ni Jehova, kag paano ini natuman?

¹⁶ Sa katapusan nga bersikulo sang Isaias 60, mabasa naton ang katapusan nga saad ni Jehova sa sining kapitulo. Nagsiling sia sa Sion: “Ang diutay mangin isa ka libo, kag ang magamay mangin isa ka gamhanan nga pungsod. Ako, si Jehova, magapadali sini sa iya kaugalingon nga tion.” (Isaias 60:22) Sa aton adlaw, gintuman ni Jehova ang iya saad. Sang ginpasag-uli ang hinaplas nga mga Cristiano sa pagpanghikot sang 1919, “diutay” lamang sila. Nagdugang ang ila kadamuon samtang ginapasulod ang dugang pa nga espirituwal nga mga Israelinhon. Kag nian nagsugod sa pagpanong sa ila ang amat-amat nagadamo nga iban nga mga karnero. Ang mahidaiton nga kahimtangan sang katawhan sang Dios, ang espirituwal nga paraiso nga nagaluntad sa ila “duta,” nagganyat sa madamo gid nga bunayag sing tagipusuon amo kon ngaa ang “magamay” nangin isa gid ka “gamhanan nga pungsod.” Sa karon ining “pungsod” nga ginahuman sang Israel sang Dios kag sang kapin sa anom ka milyon ka dedikado nga “mga dumuluong,” mas madamo sing pumuluyo kon ipaanggid sa madamo independiente nga mga estado sang kalibutan. (Isaias 60:10) Ang tanan nga banwahanon sini nagapakigbahin sa pagpabanaag sa kapawa ni Jehova, kag nagahimo ini sa ila tanan nga matahom sa iya mga mata.

17. Paano ka naapektuhan sining pagbinagbinag sa Isaias kapitulo 60?

¹⁷ Sa pagkamatuod, makapabakod sang pagtuo ang pagbinagbinag sa talalupangdon nga mga punto sang Isaias kapitulo 60. Makalugpay nga makita nga nahibaluan na sing una ni Jehova nga ang iya katawhan matapok sa espirituwal kag nian mapasag-uli. Natingala kita nga nakita na sing una ni Jehova ang daku nga pagdamo sang matuod nga mga sumilimba sa aton adlaw. Isa pa, makalugpay gid tandaan nga si Jehova indi magabiya sa aton! Daw ano ka mahigugmaon ang pasalig nga ang mga gawang sang “siudad” pirme bukas agod abiabihon ang “husto nga napahamtang para sa kabuhi nga walay katapusan”! (Binuhatan 13:48) Si Jehova padayon nga magasilak sa iya katawhan. Ang Sion padayon nga mangin bugal samtang ginapasilak sang iya mga anak ang ila kapawa sing mas masanag pa. (Mateo 5:16) Pat-od gid nga mas determinado kita karon nga magpabilin nga malapit sa Israel sang Dios kag pakabahandion ang aton pribilehiyo nga ipabanaag ang kapawa ni Jehova!

Mapaathag Mo Bala?

• Bahin sa pagpamatok, sa ano kita makasalig?

• Paano ‘ginsuso [sang mga anak sang Sion] ang gatas sang mga pungsod’?

• Sa anong paagi ‘gindala [ni Jehova] ang saway sa baylo sang kahoy’?

• Anong duha ka kinaiya ang ginpadaku sa Isaias 60:​17, 21?

• Paano ang “diutay” nangin “gamhanan nga pungsod”?

[Mga Pamangkot sa Pagtinuon]

[Kahon/Mga retrato sa pahina 18]

ANG TAGNA NI ISAIAS​—Kapawa Para sa Tanan nga Tawo

Ang kaundan nga materyal sining mga artikulo ginpresentar sa isa ka diskurso sa tion sang 2001/02 nga “Mga Manunudlo Sang Pulong Sang Dios” nga Distrito nga mga Kombension. Pagkatapos sang pamulongpulong, ginpaguwa sang humalambal sa madamong lugar ang bag-o nga publikasyon nga natig-uluhan Ang Tagna ni Isaias​—⁠Kapawa Para sa Tanan nga Tawo, Tomo Dos. Sang isa pa ka tuig, Ang Tagna ni Isaias​—⁠Kapawa Para sa Tanan nga Tawo, Tomo Uno ginpaguwa. Paagi sa pagpaguwa sa sining bag-o nga publikasyon, matigayon na karon ang suno-sa-tion nga paathag sa halos tanan nga bersikulo sa tulun-an sang Isaias. Ining mga tomo daku gid nga bulig sa pagpadalom sang aton paghangop kag apresasyon sa nagapalig-on sing pagtuo nga matagnaon nga tulun-an sang Isaias.

[Mga retrato sa pahina 15]

Sa atubang sang masingki nga pagpamatok, ‘ginapatahom ni Jehova ang iya katawhan paagi sa kaluwasan’

[Mga retrato sa pahina 16]

Ginagamit sang katawhan sang Dios ang bilidhon nga mga manggad gikan sa mga pungsod sa pagpauswag sang putli nga pagsimba

[Retrato sa pahina 17]

Ginpakamaayo ni Jehova ang iya katawhan paagi sa pag-uswag kag paghidait sang organisasyon