Indi Magpadaya

ANG pagpangdaya madugay na gid nga nagluntad. Ang isa sa una nga mga hitabo sa narekord nga maragtas isa ka pagpangdaya. Amo ini sang gindaya ni Satanas si Eva sa hardin sang Eden.​—⁠Genesis 3:13; 1 Timoteo 2:14.

Bisan pa nangin lapnag sa duta sugod sadto ang pagpangdaya, mas labi na gid ini sa karon. Ginatagna ang mahanabo sa karon, ang Biblia nagpaandam: “Ang malaut nga mga tawo kag mga impostor magalain kag magalain pa, nga nagapatalang kag ginapatalang.”​—⁠2 Timoteo 3:13.

Ang mga tawo ginadaya sa lainlain nga rason. Ang mga tawo nga nagapanonto nagadaya sa mga biktima agod makuha ang ila kuwarta. Ang pila ka politiko nagadaya sa ila mga sakop agod makapabilin sila sa gahom sa ano man nga bili. Ginadaya pa gani sang mga tawo ang ila kaugalingon. Sa baylo nga atubangon ang masakit nga kamatuoran, ginakumbinsi nila ang ila kaugalingon nga indi makahalalit ang paghimo sang makatalagam nga mga buhat, subong sang pagpanigarilyo, pag-abuso sa droga, ukon seksuwal nga imoralidad.

May pagpangdaya man sa relihioso nga mga butang. Ang relihioso nga mga lider sang panahon ni Jesus nagdaya sa mga tawo. Tuhoy sa sining mga manugdaya, si Jesus nagsiling: “Bulag sila nga mga manugtuytoy. Kon amo, kon ang tawo nga bulag magtuytoy sa tawo nga bulag, lunsay sila mahulog sa buho.” (Mateo 15:14) Dugang pa, ginadaya sang mga tawo ang ila kaugalingon sa relihioso nga mga butang. Ang Hulubaton 14:12 nagasiling: “May dalanon nga matarong sa tawo, apang ang katapusan sini mga dalanon sang kamatayon.”

Subong sang panahon ni Jesus, madamo sa karon ang nadaya sa relihioso nga mga butang kag indi ini katingalahan! Si apostol Pablo nagsiling nga “ginbulag [ni Satanas] . . . ang painuino sang mga di-matinuuhon, agod nga ang kapawa sang mahimayaon nga maayong balita tuhoy kay Cristo, nga larawan sang Dios, indi magsilak.”​—⁠2 Corinto 4:4.

Kon nadaya kita sang manugtonto, madulaan kita sing kuwarta. Kon ginadaya kita sang isa ka politiko, mahimo madula naton ang pila sang aton kahilwayan. Apang kon si Satanas ang nagadaya sa aton amo nga ginsikway naton ang kamatuoran tuhoy kay Jesucristo, indi naton matigayon ang kabuhi nga walay katapusan! Gani indi magpadaya. Binagbinaga sing makatarunganon ang di-maduhaduhaan nga ginahalinan sang relihioso nga kamatuoran, ang Biblia. Daku gid ang aton madula kon indi naton ini paghimuon.​—⁠Juan 17:3.