Ano Gid ang Impierno?

ANO man nga laragway ang ginapahanumdom sa imo sang tinaga nga impierno, madamo nga tawo ang nagahunahuna sa impierno subong isa ka duog sang silot sa sala. Tuhoy sa sala kag sa epekto sini, ang Biblia nagasiling: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag busa ang kamatayon naglapnag sa tanan nga tawo bangod sila tanan nakasala.” (Roma 5:12) Ang Kasulatan nagasiling man: “Ang bayad nga ginabayad sa sala amo ang kamatayon.” (Roma 6:23) Sanglit ang silot sa sala amo ang kamatayon, ang panguna nga pamangkot agod mahibaluan ang matuod nga kahulugan sang impierno amo: Ano ang nagakatabo sa aton kon mapatay kita?

Ang isa ka sahi sang kabuhi, sa pila ka porma sini, padayon bala nga nagakabuhi sa tapos sang kamatayon? Ano ang impierno, kag ano nga sahi sang mga tawo ang nagakadto didto? May yara bala paglaum ang mga nagakadto sa impierno? Ang Biblia nagahatag sing matuod kag makaalayaw nga mga sabat sa sining mga pamangkot.

Kabuhi sa Tapos sang Kamatayon?

May butang bala sa sulod naton, kaangay sang kalag ukon espiritu, nga padayon nga nagakabuhi kon mapatay ang lawas? Binagbinaga kon paano ang unang tawo, nga si Adan, nakatigayon sing kabuhi. Ang Biblia nagasiling: “Si Jehova nga Dios nagporma sang tawo gikan sa yab-ok sang duta kag naghuyop sa iya ilong sing ginhawa sang kabuhi.” (Genesis 2:7) Bisan pa nga ang ginhawa nagsustiner sang iya kabuhi, ang pagbutang sing “ginhawa sang kabuhi” sa iya mga ilong wala lamang magkahulugan sang paghuyop sing hangin pasulod sa iya mga baga. Nagkahulugan ini nga ginbutangan sang Dios ang wala kabuhi nga lawas ni Adan sing kirab sang kabuhi​—⁠ang “puwersa sang kabuhi,” nga aktibo sa tanan nga tinuga sa duta. (Genesis 6:17; 7:22) Ginatawag sang Biblia ining puwersa sang kabuhi subong “espiritu.” (Santiago 2:26) Ini nga espiritu sarang mapaanggid sa koryente nga nagapaandar sang makina ukon kasangkapan kag nagabulig agod mahimo ang katuyuan sini. Subong nga ang koryente wala gid nagaangkon sang mga bahin sang kasangkapan nga ginapaandar sini, ang puwersa sang kabuhi wala nagakuha sang bisan ano nga mga kinaiya sang mga tinuga nga ginahatagan sini sing kabuhi. Wala ini sing personalidad kag wala sing ikasarang sa paghunahuna.

Ano ang matabo sa espiritu kon ang isa ka tawo mapatay? Ang Salmo 146:4 nagasiling: “Ang iya espiritu nagaguwa, nagabalik sia sa iya duta; sa amo nga adlaw nagakawala ang iya mga hunahuna.” Kon ang isa ka tawo mapatay, ang iya indi persona nga espiritu wala na nagaluntad sa iban nga lugar subong isa ka espiritu nga tinuga. “Nagabalik [ini] sa matuod nga Dios nga naghatag sini.” (Manugwali 12:7) Nagakahulugan ini nga ang bisan ano nga paglaum para sa palaabuton nga kabuhi sini nga tawo nasandig karon sing bug-os sa Dios.

Ang dumaan nga Griegong mga pilosopo nga sanday Socrates kag Plato nagpati anay nga ang kalag sa sulod sang isa ka tawo padayon nga  nagakabuhi kag wala gid nagakapatay. Ano ang ginatudlo sang Biblia tuhoy sa kalag? Si Adan “nangin buhi nga kalag,” siling sang Genesis 2:7. Wala sia makabaton sing kalag; sia amo ang kalag​—⁠ang bug-os nga persona. Ang Kasulatan nagasiling nga ang kalag nagapanghikot, nagahandum sing pagkaon, ginakidnap, indi makatulog, kag iban pa. (Levitico 23:30; Deuteronomio 12:20; 24:⁠7; Salmo 119:28) Huo, ang tawo mismo isa ka kalag. Kon ang tawo mapatay, ini nga kalag nagakapatay.​—⁠Ezequiel 18:4.

Ano, kon amo, ang kahimtangan sang patay? Sang ginpamatbatan si Adan, si Jehova nagsiling: “Yab-ok ka kag sa yab-ok magabalik ka.” (Genesis 3:19) Diin si Adan antes sia ginporma sang Dios gikan sa yab-ok sang duta kag ginhatagan sing kabuhi? Ti, wala sia nagaluntad! Sang napatay sia, si Adan nagbalik sa sinang kahimtangan sang bug-os nga indi pagluntad. Ang kahimtangan sang patay ginapaathag sa Manugwali 9:​5, 10, diin aton mabasa: “Ang mga patay wala sing nahibaluan . . . Sa lulubngan, nga kadtuan mo, walay buluhaton ukon pagplano ukon ihibalo ukon kaalam.” (New International Version) Suno sa Kasulatan, ang kamatayon amo ang kahimtangan sang indi pagluntad. Ang mga patay wala sing nahibaluan, wala sing mga balatyagon, wala sing hunahuna.

Walay Katapusan nga Pag-antos Ukon Kinaandan Lamang nga Lulubngan?

Sanglit ang mga patay wala nagaluntad nga may hinalung-ong, ang impierno indi mahimo nga isa ka kalayuhon nga duog sang pag-antos diin ang mga malauton nagaantos sa tapos mapatay. Ano, kon amo, ang impierno? Ang pag-usisa sa natabo kay Jesus sa tapos sia napatay magabulig nga masabat ang pamangkot. Ang manunulat sang Biblia nga si Lucas nagasaysay: “Ni [si Jesus] ginpabay-an sa Hades [impierno, King James Version] ni ang iya unod nakakita sing kaduluntan.”⁠ * (Binuhatan 2:31) Diin ang impierno nga ginkadtuan ni Jesus? Si apostol Pablo nagsulat: “Ginpaalinton ko sa inyo . . . nga si Cristo napatay tungod sa aton mga sala suno sa Kasulatan; kag nga ginlubong sia, huo, ginbanhaw sia sa ikatlong adlaw suno sa Kasulatan.” (1 Corinto 15:​3, 4) Gani si Jesus nagkadto sa impierno, sa lulubngan, apang wala sia ginpabay-an didto, kay ginbanhaw sia.

Binagbinaga man ang halimbawa sang matarong nga tawo, nga si Job, nga nag-antos sing daku. Bangod sang handum nga malikawan ang pag-antos, nakitluoy sia: “Sin-o ang magahatag sini sa akon, nga kabay nga amligan mo ako sa impierno [Sheol], kag taguon ako tubtob magligad ang imo kaakig?”⁠ * (Job 14:​13, Douay Version) Indi gid makatarunganon nga hunahunaon nga handumon ni Job nga magkadto sa isa ka mainit kaayo nga duog para maamligan! Para kay Job, ang “impierno” amo gid ang lulubngan, diin matapos na ang iya pag-antos. Kon amo, ang impierno sa Biblia amo ang kinaandan nga lulubngan sang katawhan diin ang maayo subong man ang malain nga mga tawo nagakadto.

Kalayuhon nga Impierno​—⁠Nagahalunhon?

Mahimo bala nga ang kalayo sang impierno  nagasimbulo sa nagahalunhon, ukon bug-os, nga kalaglagan? Sa pagpatuhay sang kalayo sa Hades, ukon impierno, ang Kasulatan nagasiling: “Ang kamatayon kag Hades gintagbong sa linaw nga kalayo.” Ang “linaw” nga ginsambit diri simbuliko lamang, kay ang kamatayon kag impierno (Hades) nga ginhaboy sa sini indi literal nga masunog. “Ining [linaw nga kalayo] nagakahulugan sing ikaduha nga kamatayon”​—⁠ang kamatayon nga gikan sa sini wala na sing paglaum nga mabuhi pa liwat.​—⁠Bugna 20:14.

Ang linaw nga kalayo may kaanggid nga kahulugan sa “kalayuhon nga Gehenna [kalayo sa impierno, King James Version]” nga ginsambit ni Jesus. (Mateo 5:22; Marcos 9:​47, 48) Ang Gehenna mabasa sing 12 ka beses sa Cristianong Griegong Kasulatan, kag nagapatuhoy ini sa nalupyakan sang Hinnom, sa guwa sang mga pader sang Jerusalem. Sang si Jesus yari sa duta, ining nalupyakan gingamit subong basurahan, “diin ang bangkay sang mga kriminal, kag ang patay nga lawas sang mga sapat, kag ang tanan pa nga sahi sang higko ginahaboy.” (Smith’s Dictionary of the Bible) Ang kalayo padayon nga nagadabdab paagi sa pagbutang sing asupre agod masunog ang basura. Gingamit ni Jesus ining nalupyakan subong isa ka nagakaigo nga simbulo sang walay katapusan nga kalaglagan.

Subong sang Gehenna, ang linaw nga kalayo nagasimbulo sa dayon nga kalaglagan. Ang kamatayon kag Hades “gintagbong” sa sini sa kahulugan nga madula na ini kon ang katawhan mahilway gikan sa sala kag sa pagpakamalaut sang kamatayon. Ang hungod kag di-mahinulsulon nga mga makasasala may “bahin” man sa sining linaw. (Bugna 21:8) Sila man laglagon sing dayon. Sa pihak nga bahin, ang mga sa handumanan sang Dios nga yara sa impierno​—⁠ang kinaandan nga lulubngan sang katawhan​—⁠may makalilipay nga palaabuton.

Ang Impierno Ginhaw-asan!

Ang Bugna 20:13 nagasiling: “Ginhatag sang dagat ang mga patay nga yara sa iya, kag ginhatag sang kamatayon kag Hades ang mga patay nga yara sa ila.” Huo, ang impierno sa Biblia pagahaw-asan. Subong sang ginsaad ni Jesus, “ang oras magaabot nga ang tanan nga yara sa handumanan nga mga lulubngan makabati sang tingog [ni Jesus] kag magaguwa.” (Juan 5:​28, 29) Bisan pa wala na karon nagaluntad, ang minilyon nga mga patay nga yara sa handumanan ni Jehova nga Dios pagabanhawon, ukon buhion liwat, sa napasag-uli nga dutan-on nga paraiso.​—⁠Lucas 23:43; Binuhatan 24:15.

Sa bag-ong kalibutan sang Dios, ang ginbanhaw nga mga tawo nga nagasunod sang iya matarong nga mga kasuguan indi na liwat mapatay pa. (Isaias 25:8) “Pahiran [ni Jehova] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa.” Sa katunayan, “ang nahaunang mga butang nagtaliwan.” (Bugna 21:4) Isa gid ka pagpakamaayo ang nagahulat para sa mga yara sa impierno​—⁠“sa handumanan nga mga lulubngan”! Ini nga pagpakamaayo isa gid ka rason agod magkuha kita sing dugang pa nga ihibalo tuhoy kay Jehova nga Dios kag sa iya Anak, si Jesucristo.​—⁠Juan 17:3.

[Mga nota]

[Retrato sa pahina 5]

Si Job nangamuyo nga amligan sia sa impierno

[Retrato sa pahina 6]

Kalayuhon nga Gehenna​—⁠simbulo sang dayon nga kalaglagan

[Retrato sa pahina 7]

‘Ang mga yara sa handumanan nga mga lulubngan magaguwa’