Mga Pamangkot Gikan sa mga Bumalasa

Sa anong mga kahimtangan nga ang Cristianong babayi dapat magtakdong sa ulo bangod sang espirituwal nga mga rason?

“Ang tagsa ka babayi nga nagapangamuyo ukon nagapanagna nga wala sing takdong ang iya ulo nagapakahuya sa iya ulo,” sulat ni apostol Pablo. Ngaa? Bangod sang prinsipio sang Biblia tuhoy sa pagkaulo: ‘Ang ulo sang babayi amo ang lalaki.’ Ang pagpangamuyo ukon pagwali sa Cristianong kongregasyon katungdanan sang isa ka lalaki. Busa, kon ginatungdan sang Cristianong babayi ang mga butang may kaangtanan sa pagsimba nga kinaandan na nga dapat himuon sang iya bana ukon sang isa ka bawtismado nga lalaki, dapat sia magtakdong sa ulo.​—⁠1 Corinto 11:3-10.

Sa pag-asawahay mahimo mag-utwas ang mga kahimtangan nga ang Cristianong babayi dapat magtakdong sa ulo. Halimbawa, kon ang pamilya nagatipon agod magtuon sa Biblia ukon agod magkaon, sa masami ang bana amo ang nagapanguna sa pagtudlo sa ila kag sa pagrepresentar sa ila sa pangamuyo sa Dios. Apang, kon sia di-tumuluo ining responsabilidad pagatungdan sang iya asawa. Busa, kon nagapangamuyo sing matunog para sa iya kaugalingon kag sa iban ukon kon nagadumala sing pagtuon sa Biblia sa iya mga kabataan sa presensia sang iya bana, nagakaigo nga ang Cristianong utod nga babayi magtakdong sa ulo. Kon wala ang iya bana, indi na kinahanglan nga magtakdong sa ulo ang asawa, sanglit awtorisado sia sang Dios nga tudluan ang iya kabataan.​—⁠Hulubaton 1:⁠8; 6:⁠20.

Apang, ano naman kon ang lamharon nga anak nga lalaki sa pamilya isa ka dedikado kag bawtismado nga alagad ni Jehova nga Dios? Sanglit ang anak nga lalaki  katapo sang Cristianong kongregasyon, dapat sia magbaton sing instruksion halin sa lalaki nga mga katapo sini. (1 Timoteo 2:12) Kon ang iya amay isa ka tumuluo, ang anak nga lalaki dapat tudluan niya. Apang, kon wala ang amay, nian ang iloy dapat magtakdong sa ulo kon nagadumala sia sing pagtuon sa Biblia sa iya lamharon nga anak nga lalaki kag iban pa nga mga anak. Sia ang magadesisyon kon bala pangabayon niya ang bawtismado nga anak nga lalaki nga magpangamuyo sa sini nga pagtuon ukon sa tigkalaon. Mahimo batyagon niya nga wala pa sing nagakaigo nga ikasarang ang iya anak kag gani mamat-od nga sia na ang manguna sa pagpangamuyo. Kon sia ang magapangamuyo sa sini nga mga kahimtangan, dapat sia magtakdong sa ulo.

Samtang nagapakigbahin sa pila ka hilikuton sa kongregasyon, mahimo nga kinahanglan magtakdong sa ulo ang Cristianong mga babayi. Halimbawa, sa mga miting sa tungatunga sang semana para sa pag-alagad sa latagon mahimo nga Cristianong mga utod nga babayi lamang ang presente, kag wala sing bawtismado nga mga lalaki. Mahimo may iban pa nga higayon nga wala sing presente nga bawtismado nga mga lalaki sa miting sa kongregasyon. Kon tungdan sang isa ka utod nga babayi ang mga katungdanan nga masami ginahimo sang utod nga lalaki sa miting nga kahimusan sang kongregasyon ukon sa miting para sa pag-alagad sa latagon, dapat sia magtakdong sa ulo.

Ang Cristianong mga babayi bala dapat magtakdong sa ulo kon nagabadbad sing oral ukon paagi sa sign language sang mga diskurso sa Biblia ukon kon nagabasa sing dayag sang mga parapo gikan sa mga balasahon nga bulig sa pagtuon sa Biblia nga ginagamit sa miting sang kongregasyon? Indi. Ang mga kauturan nga babayi nga nagahimo sini wala nagadumala ukon nagapanudlo. Sing kaanggid, indi na kinahanglan nga magtakdong sa ulo ang mga utod nga babayi nga nagapakigbahin sa mga pasundayag, nagasaysay sing mga eksperiensia, ukon nagahatag sing mga bahin sang estudyante sa Teokratikong Eskwelahan Para sa Ministeryo.

Bisan pa ang pagpanudlo sa sulod sang kongregasyon dapat himuon sang bawtismado nga mga lalaki, ang mga lalaki kag mga babayi may salabton sa pagbantala kag pagpanudlo sa guwa sang kongregasyon. (Mateo 24:14; 28:​19, 20) Gani, kon ang isa ka Cristianong babayi nagapakighambal sa mga tagaguwa tuhoy sa Pulong sang Dios sa presensia sang lalaki nga Saksi ni Jehova, indi na niya kinahanglan nga magtakdong sa ulo.

Apang, ang kahimtangan tuhay kon ang isa ka regular kag naiskedyul nga pagtuon sa Biblia ginahiwat sa isa ka puluy-an kag yara ang isa ka dedikado kag bawtismado nga lalaki. Isa ini ka kahimusan nga sesyon sang pagpanudlo nga ginadumalahan mismo sang nagadumala sa pagtuon. Sa sini nga mga kahimtangan, ang pagtuon nangin bahin sang kongregasyon. Kon ini nga pagtuon ginadumalahan sang isa ka bawtismado nga babayi nga Saksi kag may bawtismado nga lalaki nga Saksi, nagakaigo nga magtakdong sia sa ulo. Apang, ang dedikado nga utod nga lalaki amo dapat ang mangamuyo. Indi dapat magpangamuyo ang utod nga babayi sa presensia sang dedikado nga utod nga lalaki magluwas kon may daku nga rason, subong kon indi makahambal ang utod nga lalaki.

Ang Cristianong utod nga babayi mahimo updan kon kaisa sang isa ka di-bawtismado nga lalaki nga manugbantala sang Ginharian sa isa ka pagtuon sa Biblia. Kon luyag niya, mahimo niya pangabayon ang di-bawtismado nga manugbantala nga dumalahan ang pagtuon. Apang, sanglit indi niya marepresentar sing nagakaigo ang bawtismado nga utod nga babayi sa pangamuyo kay Jehova, nagakaigo nga ang utod nga babayi ang mangamuyo sa tion sang pagtuon. Kon sia ang nagadumala sang pagtuon kag nagapangamuyo, dapat magtakdong sa ulo ang utod nga babayi. Bisan indi pa bawtismado ang lalaki nga manugbantala, ginakabig sia sang mga tagaguwa subong katapo sang kongregasyon bangod sang iya pagbantala nga hilikuton.

“Ang babayi dapat may tanda sang awtoridad sa iya ulo bangod sang mga anghel,” sulat ni apostol Pablo. Huo, ang Cristianong mga utod nga babayi may pinasahi nga kahigayunan nga mangin maayo nga mga halimbawa sa minilyon ka anghel nga matutom nga nagapasakop sing padayon kay Jehova. Nagakaigo gid nga ang diosnon nga mga babayi nagahatag sing nagakaigo nga konsiderasyon sa pagtakdong sa ulo kon ginakinahanglan ini sang kahimtangan!

[Mga retrato sa pahina 26]

Ang takdong sa ulo isa ka tanda sang pagtahod sa pagkaulo