Mga Pamangkot Gikan sa mga Bumalasa

Nahibaluan bala ni Abel nga kinahanglan ang isa ka halad nga sapat agod pahamut-an ang Dios?

Tuman kalip-ot ang rekord sang Biblia tuhoy sa paghalad nanday Cain kag Abel. Sa Genesis 4:3-5, aton mabasa: “Sa pagligad sang pila ka tion nahanabo nga si Cain nagdala gikan sa bunga sang duta subong halad kay Jehova. Apang tuhoy kay Abel, nagdala man sia sang mga panganay sang iya panong, kag sang sapay nila. Samtang gintan-aw ni Jehova nga may kahamuot si Abel kag ang iya halad, wala niya gintan-aw nga may bisan ano nga kahamuot si Cain kag ang iya halad.”

Wala sing ginsambit sa Biblia nga antes sini nga hitabo naghatag si Jehova sing bisan ano nga espesipiko nga impormasyon tuhoy sa mga halad ukon kon ano nga sahi sang mga halad ang ginakahamut-an niya. Busa, maathag nga sanday Cain kag Abel lamang ang nagpili sang ila mga inughalad. Wala sila ginpasulod sa Paraiso nga ginpuy-an anay sang ila mga ginikanan; nabatyagan nila ang mga epekto sang sala; kag nahamulag sila sa Dios. Bangod yara sila sa makasasala kag makaluluoy nga kahimtangan, mahimo nga nagbatyag gid sila nga kinahanglan nila ang bulig sang Dios. Mahimo nga kinabubut-on ang ila paghalad sa Dios agod matigayon ang Iya kahamuot.

Subong resulta, ginkahamut-an sang Dios ang halad ni Abel apang ang kay Cain wala. Ngaa? Bangod bala kay nagakaigo nga mga butang ang ginhalad ni Abel kag ang kay Cain indi? Indi naton mapat-od kon may labot sa sini ang sahi sang halad, bangod wala sila ginsilingan kon ano ang kalahamut-an kag kon ano ang indi. Apang, posible nga kalahamut-an ini tanan. Sa kasuguan nga ginhatag sang ulihi ni Jehova sa pungsod sang Israel, ang kalahamut-an nga mga halad wala lamang nagalakip sa mga sapat ukon mga bahin sang mga sapat kundi sang ginsanlag man nga mga uyas, mga linaylay nga sebada, mapino nga harina, linuto nga mga pagkaon, kag alak. (Levitico 6:​19-​23; 7:​11-​13; 23:10-​13) Maathag nga indi lamang ang mga butang nga ginhalad nanday Cain kag Abel ang kabangdanan kon ngaa ginbaton sang Dios ang iya sang isa kag ginsikway ang isa pa.​—⁠Ipaanggid ang Isaias 1:​11; Amos 5:⁠22.

Kapin sa apat ka libo ka tuig sang ulihi, si apostol Pablo nagsiling: “Bangod sa pagtuo si Abel nagdulot sa Dios sing halad nga daku pa ang bili sangsa kay Cain, nga paagi sini nga pagtuo nagpanaksi sia nga matarong sia, nga ang Dios nagpanaksi may kaangtanan sa iya mga dulot.” (Hebreo 11:4) Busa, bangod sang pagtuo ni Abel nga ginkilala sia nga matarong sang Dios. Apang pagtuo sa ano? Pagtuo tuhoy sa saad ni Jehova nga magaaman sia sing Binhi, nga ‘magadugmok sa ulo sang man-ug’ kag magapasag-uli sang paghidait kag kahimpitan nga natigayon anay sang katawhan. Gikan sa pinamulong nga ang Binhi ‘magadugmok sang tikod,’ mahimo nangatarungan si Abel nga kinahanglanon ang isa ka halad nga nagalakip sa pagpatulo sang dugo. (Genesis 3:15) Walay sapayan, ang katunayan nagapamatuod nga ang pagtuo ni Abel amo ang naghimo sang iya “halad nga mas labaw kay Cain.”

Sing kaanggid, ginsikway si Cain, indi bangod indi nagakaigo ang iya halad, kundi bangod kulang sia sing pagtuo, subong sang ginpakita sang iya mga buhat. Maathag nga ginpatalupangod ini ni Jehova kay Cain: “Kon nagahimo ka sing maayo, indi ka bala pagbayawon?” (Genesis 4:7) Wala ginsikway sang Dios si Cain bangod wala niya nahamut-an ang halad sini. Kundi sa baylo, “bangod ang iya kaugalingon nga mga binuhatan malaut”​—⁠ginpakita paagi sa kaimon, dumot, kag sang ulihi pagpatay​—⁠nga ginsikway sang Dios si Cain.​—⁠1 Juan 3:⁠12.