Yoga​—Ehersisyo Lamang Bala Ukon May Kapin Pa sa Sini?

ANG niwangon kag mapagros nga panglawason amo ang ginakabalak-an sang mga tawo karon. Bangod sini, madamo ang nagadangop sa mga gymnasium kag mga organisasyon para sa ikaayong lawas. Bangod man sini, linibo ka tawo sa Nakatundan ang nagahimo sang yoga sang Nasidlangan.

Ang mga tawo nga ginahul-an, ginapung-awan, kag nalugaw-an nagayoga man agod malugpayan kag para sa mga solusyon. Ang interes sa mga relihion sa Sidlangan kag sa ila mistiko nga mga buhat naglapnag sa Katundan ilabi na kutob sang katuigan 1960, ang dekada sang mga hippie kag mga flower child. Ang transcendental meditation (isa ka teknik sang pagpamalandong nga may orasyon agod paluntaron ang kalinong, pagkamapahituon, kag pagkaespirituwal), nga isa ka aspekto sang yoga, ginpabantog sang mga artista sa pelikula kag mga musikero sa rock. Bangod sang nagadugang nga interes sa yoga, mahimo kita mamangkot: ‘Ang yoga bala isa lamang ka ehersisyo nga magahatag sa nagahimo sini sang isa ka mapagros kag niwangon nga lawas, kag sang kalinong sa hunahuna? Sarang bala mahimo ang yoga nga wala sing bisan anong kaangtanan sa relihion? Ang yoga bala nagakaigo para sa mga Cristiano?’

Ang Ginhalinan sang Yoga

Ang ginhalinan sang tinaga nga “yoga” may yara kaangtanan sa Ingles nga tinaga nga “yoke.” Mahimo ini magkahulugan sang pag-angot ukon pagpakiggota ukon pagpaidalom sa isa ka gota, pagrenda ukon pagkontrol. Para sa isa ka Hindu, ang yoga isa ka teknik ukon disiplina nga nagadul-ong sa paghiusa sa labaw-sa-kinaugali nga puwersa ukon espiritu nga tinuga. Ginalaragway ini subong “pagpakiggota sang tanan nga kusog sang lawas, hunahuna kag kalag sa Dios.”

Daw ano ka dugay masumay sa maragtas ang yoga? Ang laragway sang mga tawo nga nagapungko sa nanuhaytuhay nga posisyon sa yoga makita sa mga istampa nga masapwan sa Indus Valley, sa Pakistan karon. Ang sibilisasyon sang Indus Valley ginpetsahan sang mga arkeologo sa ulot sang ikatlo kag ikaduha nga milenyo B.⁠C.⁠E., malapit kaayo sa panag-on sang kultura sang Mesopotamia. Ang  mga artifact gikan sa sining duha ka duog nagalaragway sa isa ka tawo, nga nagarepresentar sa isa ka dios, nga ginkoronahan sang mga sungay sang sapat kag ginapalibutan sang mga sapat, nga nagapahanumdom kay Nimrod, ang “gamhanan nga mangangayam.” (Genesis 10:​8, 9) Ginapangangkon sang mga Hindu nga ang mga laragway nga nagapungko sa mga posisyon sa yoga mga imahen sang dios nga si Siva, ang ginuo sang mga sapat kag ginuo sang yoga, nga masami ginasimba paagi sa lingam, isa ka simbulo sang kinatawo sang lalaki. Sa amo, ginatawag sang libro nga Hindu World ang yoga nga “isa ka sistema sang pagsulundan sang asetiko nga mga buhat, nga panguna nga nagsugod sang antes-Aryan, nga nagaunod sang mga relikya sang madamong dinumaan nga ideya kag kinabatasan.”

Ang mga pamaagi sang yoga una nga ginpaalinton paagi sa paghambal. Nian ginsulat ini sing detalyado sang mangin-alamon nga Indian nga yogi (tawo nga nagayoga) nga si Patañjali subong ang Yoga Sutra, nga amo gihapon ang sadsaran nga libro sang instruksion sa yoga. Suno kay Patañjali, ang yoga “isa ka sistematiko nga panikasog agod malab-ot ang kahimpitan, paagi sa pagkontrol sa nagkalainlain nga elemento sang tawhanon nga kinaugali, sa lawas kag sa hunahuna.” Halin sa umpisa sini tubtob karon, ang yoga nangin importante nga bahin sang mga relihion sa Sidlangan, ilabi na karon sa Hinduismo, Jainismo, kag Budhismo. Ginapatihan sang pila ka nagayoga nga magabulig ini sa ila nga malab-ot ang moksha, ukon kahilwayan, paagi sa paghiusa sa isa ka espiritu nga makakadto bisan diin.

Gani sa liwat mamangkot kita: ‘Ang yoga bala sarang mahimo subong ehersisyo lamang agod matigayon ang isa ka mapagros nga lawas kag relaks nga hunahuna, nga wala nagadalahig sa relihion?’ Bangod sang ginhalinan sini, ang sabat dapat indi.

Diin Ka Dalhon sang Yoga?

Ang tulumuron sang yoga subong isa ka disiplina amo ang pagdul-ong sa isa ka tawo sa espirituwal nga eksperiensia sang “pagpakiggota” ukon paghiusa sa labaw-sa-tawo nga espiritu. Apang ano ini nga espiritu?

Sa Hindu World, ang awtor nga si Benjamin Walker nagasiling tuhoy sa yoga: “Mahimo nga isa ini anay ka sistema sang madyik nga mga rituwal, kag ang yoga nagadalahig gihapon sang okultismo kag binabaylan.” Ginabaton sang Hindu nga mga pilosopo nga ang pagyoga makahatag sing labaw-sa-kinaugali nga gahom, bisan pa masami nila ginapangangkon nga indi amo sini ang panguna nga tulumuron sang yoga. Halimbawa, sa libro nga Indian Philosophy, ang Presidente anay sang India nga si Dr. S. Radhakrishnan, nagasiling tuhoy sa yogi nga “ang pagkontrol sa lawas paagi sa postura nagaresulta sa indi pagbatyag sang tuman nga init ukon tugnaw. . . . Ang yogi makakita kag makabati sa malayo . . . Ang pagliton sang panghunahuna halin sa isa ka indibiduwal pakadto sa isa pa nga wala sing kinaandan nga mekanismo sa pagkomunikar posible. . . . Mahimo sang yogi nga indi sia makita.”

Ang talalupangdon nga halimbawa sang yogi nga nagahigda sa mga lansang ukon nagalakat sa baga mahimo nga daw isa ka paglimbong para sa pila ka tawo kag isa ka lahog para sa iban. Apang kinaandan ini nga nagakatabo sa India, subong sang pagtindog sa isa lamang ka tiil samtang inoras nga nagatulok sa adlaw kag sang pagkontrol sa ginhawa amo nga mahimo ilubong ang isa ka tawo sa balas sa malawig nga tion. Sang Hunyo 1995, ginreport sang The Times of India nga ang isa ka tatlo-kag-tunga-ka-tuig nga bata nga babayi nagahigda nga ginaorasyunan samtang ang isa ka awto nga nagabug-at sing kapin sa 750 ka kilo ginpalatay sa iya tiyan. Natingala gid ang mga tumalan-aw nga sang nagbugtaw ang bata wala gid sia maano. Nagsiling pa ang report: “Isa gid yadto ka gahom sang yoga.”

Wala sing duhaduha nga wala gid sing normal nga tawo ang makahimo sini. Busa, dapat mamangkot ang isa ka Cristiano: Ano ang ginapakita sining mga buhat? Naghalin bala ini kay Jehova nga Dios, “ang Labing Mataas sa bug-os nga duta,” ukon may iban pa bala ini nga ginahalinan? (Salmo 83:18) Maathag ang ginasiling sang Biblia tuhoy sa sini. Sang ang mga Israelinhon buot na magsulod sa Ginsaad nga Duta, nga ginapuy-an sang mga Canaanhon, ginsugo ni Jehova ang mga anak ni Israel paagi kay Moises: “Dili ka magtuon sa paghimo suno sa makangilil-ad nga mga butang sang mga pungsod.” Anong “makangilil-ad nga mga butang”? Si Moises nagpaandam batok kay ‘bisan sin-o nga nagagamit sing pagpamakot, nagahimo sing madyik ukon kay bisan sin-o nga nagapangita sing tanda ukon manugbabaylan.’ (Deuteronomio 18:​9, 10) Ining mga butang makangilil-ad  sa Dios bangod mga buhat ini sang mga demonyo kag sang makasasala nga unod.​—⁠Galacia 5:19-21.

Indi Para sa mga Cristiano

Ano man ang isiling sang mga instruktor sa kapagros nga supak sa sini, ang yoga indi lamang isa ka pisikal nga ehersisyo. Ginasaysay sang libro nga Hindu Manners, Customs and Ceremonies ang eksperiensia sang duha ka bag-uhan sa yoga nga ginaubayan sang isa ka guru. Ang isa ginkutlo nga nagasiling: “Ginhimo ko ang labaw-sa-tawhanon nga panikasog agod punggan ang akon pagginhawa sing malawig tubtob posible, kag nagginhawa lamang kon daw malipong na ako. . . . Sang isa ka adlaw, sa udtong-adlaw, pagdumdom ko nakakita ako sang isa ka masanag nga bulan, nga daw nagahulag kag nagahabyoghabyog. Isa pa ka bes ginhanduraw ko ang akon kaugalingon nga ginlikupan sang kadulom sa kaudtuhon. Ang akon direktor . . . nalipay gid sang ginsambit ko sa iya ining mga palanan-awon. . . . Indi na madugayan, pasalig niya sa akon, kag maeksperiensiahan ko ang kapin pa ka makatilingala nga mga resulta sang akon penitensia.” Ang isa pa ka tawo nagsugid: “Ginsugo niya ako nga magtangla sa kalangitan kada adlaw nga wala nagapamisok ukon wala nagabag-o sang akon posisyon. . . . Kon kaisa pagdumdom ko nakakita ako sang mga igpat sang kalayo sa kahanginan; kag kon kaisa daw nakakita ako sang nagakalayo nga bilog nga butang kag mga bulalakaw. Nalipay gid ang akon manunudlo sa kadalag-an sang akon mga panikasog.”

Ang di-kinaandan nga mga talan-awon amo gid ang ginakabig sang mga guru nga nagakaigo nga mga resulta nga magadul-ong sa matuod nga tulumuron sang yoga. Huo, ang tulumuron gid sang yoga amo ang moksha, nga ginpaathag subong amo ang paghiusa sa pila ka indi-tawo kag daku nga espiritu nga tinuga. Ginalaragway ini subong “ang (hungod) nga pagpauntat sa natural nga pagpanghikot sang hunahuna.” Maathag nga supak ini sa tulumuron nga ginpahamtang para sa mga Cristiano, nga ginlaygayan: “Ipresentar ninyo ang inyo mga lawas nga isa ka halad nga buhi, balaan, kalahamut-an sa Dios, isa ka sagrado nga pag-alagad lakip ang inyo ikasarang sa pagpangatarungan. Kag indi na kamo magpadihon suno sa sining sistema sang mga butang, kundi magbalhin kamo paagi sa pagbag-o sang inyo painuino, agod nga mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.”​—⁠Roma 12:​1, 2.

Ang pagpili sa pisikal nga ehersisyo nga himuon isa ka personal nga desisyon. Apang, indi dapat pagtugutan sang mga Cristiano ang bisan anong butang​—⁠paghanas man ini sa lawas, pagkaon, pag-inom, pagpanapot, kalingawan, ukon iban pa nga butang​—⁠nga maghalit sang ila kaangtanan kay Jehova nga Dios. (1 Corinto 10:31) Para sa mga nagaehersisyo lamang agod mangin mapagros, madamo sing paagi nga sarang mahimo nga wala nagadalahig sang pagpadayag sa mga katalagman sang espiritismo kag okultismo. Paagi sa paglikaw sa mga buhat kag mga pagpati nga nanggamot sa butig nga relihion, kabay nga maglaum kita sa pagpakamaayo sang Dios nga isa ka matarong nga bag-ong sistema sang mga butang diin maagom naton ang himpit nga kapagros sa lawas kag hunahuna sa walay katubtuban.​—⁠2 Pedro 3:​13; Bugna 21:​3, 4.

[Mga retrato sa pahina 22]

Madamo ang nagahimo sang makapapagros nga aktibidades nga wala nagadalahig sang pagpadayag sa espiritismo