Madumduman Mo Bala?

Nalipay ka bala sa pagbasa sa ulihi nga mga guwa sang Ang Lalantawan? Ti, tan-awa kon masabat mo ang masunod nga mga pamangkot:

• Ano ang kahanuklog, kag ngaa dapat ini palambuon sang mga Cristiano?

Amo ini ang ikasarang sa pagbutang sang kaugalingon sa lugar sang iban, kaangay sang pagbatyag naton sang kasakit sang iban sa aton tagipusuon. Ginalaygayan ang mga Cristiano nga magpakita sing ‘patugsiling, utudnon nga gugma, kag kaawa.’ (1 Pedro 3:8) Si Jehova nagpakita sang halimbawa sang kahanuklog agod sundon naton. (Salmo 103:14; Zacarias 2:8) Mapauswag naton ang aton pagkasensitibo sa sining bahin paagi sa pagpamati, pagpanilag, kag paggamit sing imahinasyon.​​—⁠4/15, pahina 24-26.

• Agod matigayon ang matuod nga kalipay, ngaa dapat anay mauna ang espirituwal nga pagpang-ayo antes sang katapusan nga solusyon sa pisikal nga mga kasablagan?

Madamo nga tawo nga mapagros sa pisikal ang indi malipayon, nadaug sang mga problema. Sa pihak nga bahin, madamo nga Cristiano karon nga may pisikal nga kasablagan ang malipayon gid nga nagaalagad kay Jehova. Yadtong nagabenepisyo sa espirituwal nga pagpang-ayo amo ang may kahigayunan nga makaeksperiensia sang pagkadula sang pisikal nga mga kasablagan sa bag-ong kalibutan.​​—⁠5/1, pahina 6-7.

• Ngaa ginpaanggid sang Hebreo 12:16 si Esau sa isa ka makihilawason?

Ginapakita sang kasaysayan sa Biblia nga si Esau may panghunahuna nga nasentro sa gilayon nga padya kag wala nagapabalor sa sagrado nga mga butang. Kon tugutan sang isa sa karon nga magpalambo sini nga sahi sang panghunahuna, mahimo ini magdul-ong sa mabug-at nga sala, subong sang pagpakighilawas.​​—⁠5/1, pahina 10-11.

• Sin-o si Tertullian, kag sa ano sia nakilal-an?

Isa sia ka manunulat kag teologo nga nagkabuhi sang ikaduha kag ikatlo nga siglo C.⁠E. Nakilal-an sia nga madamo sing sinulatan sa pagdepensa sa nagapangangkon nga Cristianismo. Sa iya pagdepensa, ginpakilala niya ang mga ideya kag mga pilosopiya nga nangin pundasyon sang tiko nga mga doktrina, subong sang Trinidad.​​—⁠5/15, pahina 29-31.

• Ngaa indi ang genetics ang may bug-os nga salabton sa balatian, paggawi, kag kamatayon sang tawo?

Naghinakop ang mga sientipiko nga yara sa aton mga gene ang ginatunaan sang nagkalainlain nga balatian sang tawo, kag nagapati ang iban nga ang aton paggawi mahibaluan sa aton mga gene. Apang, ginapakita sang Biblia kon diin naghalin ang tawo, lakip kon paano ginhalitan sang sala kag di-kahimpitan ang katawhan. Samtang mahimo nga may papel ang mga gene sa pagdihon sang mga kinaiya, ang aton di-kahimpitan kag ang aton palibot panguna man nga mga impluwensia.​​—⁠6/1, pahina 9-11.

• Paano ang pidaso nga papiro nga nakit-an sa Oxyrhynchus, Egipto, naghatag sing kasanagan tuhoy sa paggamit sang ngalan sang Dios?

Ining pidaso sang Job 42:​11, 12 nga gikan sa Griegong Septuagint nagaunod sing Tetragrammaton (ang apat ka Hebreong letra sang ngalan sang Dios). Dugang ini nga ebidensia nga ang ngalan sang Dios sa Hebreo makita sa Septuagint, nga masami ginakutlo sang mga manunulat sang Cristianong Griegong Kasulatan.​​—⁠6/1, pahina 30.

• Ang masingki kag makamamatay nga mga palaguwaon sang mga gladiador sa Romanong Emperyo ginpaanggid sa anong moderno nga mga isport?

Ang isa ka eksibit sining karon lang sa Colosseum sa Roma, Italya, nagpanugda sang moderno nga mga kaanggid sini paagi sa paglakip sang mga bahin sang video sang pag-away sang toro kag matador, propesyonal nga boksing, pagpalumba sang awto kag motorsiklo, kag pag-ilinaway sang mga tumalan-aw sa iban pa nga modernong isport nga mga palaguwaon. Gindumdom gid sang unang mga Cristiano nga ginadumtan ni Jehova ang kasingki ukon ang masingki nga mga tawo, kag dapat amo man ang mga Cristiano sa karon. (Salmo 11:5)​​—⁠6/15, pahina 29.

• Samtang nagapanikasog kita nga mangin epektibo nga mga manunudlo, ano ang matun-an naton sa halimbawa ni Esdras?

Ginpadaku sa Esdras 7:​10 ang apat ka butang nga ginhimo ni Esdras, nga sarang naton mapanikasugan nga ilugon. Nagasiling ini: “[1] Ginhanda ni Esdras ang iya tagipusuon [2] sa pag-usisa sang kasuguan ni Jehova kag [3] sa paghimo sini kag [4] sa pagtudlo sa Israel sing pagsulundan kag katarungan.”​​—⁠7/1, pahina 20.

• Sa anong duha ka hilikuton dapat magtakdong ang isa ka Cristianong babayi?

Ang isa nagadalahig sa mga sitwasyon sa puluy-an. Ang iya pagtakdong nagapabanaag sang iya pagkilala nga ang iya bana amo ang may katungdanan sa pagpanguna sa pangamuyo kag pagtudlo sang Biblia. Ang isa pa nagadalahig sa mga hilikuton sa kongregasyon, diin mapakita niya nga iya ginakilala nga ang bawtismado nga mga lalaki amo ang awtorisado sang Kasulatan nga magtudlo kag magpanguna. (1 Corinto 11:​3-​10)​​—⁠7/15, pahina 26-7.

• Ngaa ginakilala sang mga Cristiano nga indi lamang ehersisyo ang yoga kundi makatalagam pa gani?

Ang tulumuron sang yoga subong isa ka disiplina amo ang pagdul-ong sa isa ka tawo sa paghiusa sa labaw-sa-tawo nga espiritu. Supak sa panuytoy sang Dios, ang yoga nagalakip sang pagpauntat sa natural nga pagpanghikot sang hunahuna. (Roma 12:​1, 2) Ang yoga makapadayag sa isa sa mga katalagman sang espiritismo kag okulto. (Deuteronomio 18:​10, 11)​​—⁠8/1, pahina 20-2.