“Magsunod Kamo sa Akon sing Padayon”

“Sa sining dalanon gintawag kamo, bangod bisan si Cristo nag-antos tungod sa inyo, nga nagabilin sa inyo sing huwaran agod nga pagsundon ninyo sing maayo ang iya mga tikang.”​—⁠1 PEDRO 2:21.

1, 2. Ngaa ang himpit nga halimbawa ni Jesus subong isa ka manunudlo indi tuman kataas agod mailog naton?

SI Jesucristo amo ang labing daku nga Manunudlo nga nagkabuhi sa duta. Dugang pa, sia himpit, nga wala gid makasala sa bug-os niya nga pagkabuhi subong isa ka tawo. (1 Pedro 2:22) Apang, nagakahulugan bala ini nga ang halimbawa ni Jesus subong isa ka manunudlo tuman kataas amo nga indi naton mailog subong di-himpit nga mga tawo? Indi gid.

² Subong nakita naton sa nagligad nga artikulo, ang sadsaran sa panudlo ni Jesus amo ang gugma. Kag ang gugma isa ka butang nga mahimo naton tanan mapalambo. Ang Pulong sang Dios masami nagapalig-on sa aton nga magtubo kag mag-uswag sa aton gugma sa iban. (Filipos 1:⁠9; Colosas 3:14) Wala gid magsugo si Jehova sa iya mga tinuga sang indi nila mahimo. Sa katunayan, sanglit ang “Dios gugma” kag ginhimo niya kita sa iya larawan, masiling gid nga gindesinyo niya kita agod magpakita sing gugma. (1 Juan 4:⁠8; Genesis 1:27) Gani kon mabasa naton ang ginsiling ni apostol Pedro sa aton tema nga teksto, mahimo naton ini nga may pagsalig. Masunod gid naton ang mga tikang ni Cristo. Sa katunayan, matuman naton ang sugo ni Jesus: “Magsunod [kamo] sa akon sing padayon.” (Lucas 9:23) Binagbinagon naton kon paano naton mailog ang gugma nga ginpakita ni Cristo, una sa mga kamatuoran nga gintudlo niya, pagkatapos sa mga tawo nga gintudluan niya.

Pagpalambo sing Gugma sa mga Kamatuoran nga Aton Natun-an

3. Ngaa nabudlayan ang iban sa pagtuon, apang ano nga laygay ang masapwan sa Hulubaton 2:1-5?

³ Agod mahigugma ang mga kamatuoran nga ginatudlo naton sa iban, dapat tun-an naton nga higugmaon ining mga kamatuoran. Sa kalibutan sa karon, ini nga sahi sang gugma indi pirme mahapos mapalambo. Ang kulang nga edukasyon kag malain nga pamatasan nga napalambo sa pagkabata amo ang kabangdanan kon ngaa madamo ang indi mahuyugon sa pagtuon.  Apang, kinahanglan gid kita magtuon kay Jehova. Ang Hulubaton 2:1-5 nagasiling: “Anak ko, kon batunon mo ang akon mga pulong kag pakabahandion ang akon mga sugo sa imo, agod talupangdon sang imo igdulungog ang kaalam, agod nga ihuyog mo ang imo tagipusuon sa paghantop; dugang pa, kon magtuaw ka para sa paghangop kag magbayaw sang imo tingog para sa paghantop, kon padayon mo ini nga pangitaon subong sang pilak kag padayon mo ini nga usisaon subong sang bahandi nga natago, kon amo mahangpan mo ang kahadlok kay Jehova, kag masapwan mo ang ihibalo mismo tuhoy sa Dios.”

4. Ano ang buot silingon sang “ihuyog” ang tagipusuon, kag ano nga pagtamod ang makabulig sa aton nga mahimo ini?

⁴ Talupangda nga sa bersikulo 1 tubtob 4, sulit-sulit nga ginalaygayan kita nga manikasog indi lamang nga “batunon” kag “pakabahandion” kundi ‘padayon man nga magpangita’ kag ‘padayon nga magpangusisa.’ Apang, ano ang magapahulag sa aton nga himuon ini tanan? Bueno, talupangda ang dinalan “ihuyog mo ang imo tagipusuon sa paghantop.” Ang isa ka reperensia nagsiling nga ini nga laygay “indi lamang isa ka pangabay nga talupangdon; isa ini ka pagkinahanglan sing isa ka panimuot: ang malangkagon nga pagbaton sa mga panudlo.” Kag ano ang makabulig sa aton nga batunon kag malangkagon nga tun-an ang ginatudlo ni Jehova sa aton? Ang aton pagtamod. Dapat naton tamdon ang “ihibalo mismo tuhoy sa Dios” subong “pilak” kag subong “bahandi nga natago.”

5, 6. (a) Ano ang mahimo nga matabo sa ulihi, kag paano naton ini matapna? (b) Ngaa padayon naton nga dugangan ang mga bahandi sang ihibalo nga nakita naton sa Biblia?

⁵ Indi mabudlay tigayunon ini nga pagtamod. Halimbawa, mahimo nga lakip sa ‘ihibalo tuhoy sa Dios’ nga natun-an mo amo ang kamatuoran nga katuyuan ni Jehova nga ang matutom nga katawhan magapuyo sing dayon sa Paraiso sa duta. (Salmo 37:​28, 29) Sang una mo matun-an ang kamatuoran, pat-od gid nga ginkabig mo ini nga isa ka matuod nga bahandi, ang ihibalo nga nagpuno sa imo hunahuna kag tagipusuon sing paglaum kag kalipay. Kamusta na karon? Sa paglipas sang tion, nag-ugdaw bala ukon naglubad ang imo apresasyon sa imo bahandi? Kon amo, tilawi nga himuon ang duha ka butang. Una, ipasag-uli ang imo apresasyon, nga amo, ang pagdumdom pirme kon ngaa ginapabaloran mo ang tagsa ka kamatuoran nga gintudlo ni Jehova sa imo, bisan ang mga natun-an mo sang madamong tinuig na nga nakalipas.

⁶ Ikaduha, padayon nga dugangi ang imo bahandi. Ti, kon natabuan nga nakakutkot ka sing malahalon nga hiyas, ibulsa mo lang bala ini kag dayon maglakat nga daw wala sing natabo? Ukon magakutkot ka pa gid agod tan-awon kon may yara pa? Ang Pulong sang Dios puno sing mga hiyas kag sing hamili nga mga bahin sang kamatuoran.  Bisan pila na ang imo nakita, madamo ka pa sing mahimo makita. (Roma 11:33) Kon makatuon ka sing isa ka bag-o nga bahin sang kamatuoran, pamangkuta ang imo kaugalingon: ‘Ngaa isa ini ka bahandi? Nagapahantop bala ini sa akon sing dugang pa sa personalidad ni Jehova ukon sa iya mga katuyuan? Nagahatag bala ini sing praktikal nga giya nga makabulig sa akon nga masunod ang tikang ni Jesus?’ Ang pagpamalandong sa sining mga pamangkot makabulig sa imo nga mapabakod ang imo gugma sa mga kamatuoran nga gintudlo ni Jehova sa imo.

Pagpakita sing Gugma sa mga Kamatuoran nga Ginatudlo Naton

7, 8. Ano ang pila ka paagi nga mapakita naton sa iban nga ginahigugma naton ang mga kamatuoran nga natun-an naton gikan sa Biblia? Maghatag sing halimbawa.

⁷ Samtang ginatudluan naton ang iban, paano naton mapakita nga ginahigugma naton ang mga kamatuoran nga natun-an naton gikan sa Pulong sang Dios? Paagi sa pagsunod sa halimbawa ni Jesus, nagasandig kita sing daku sa Biblia sa aton pagbantala kag pagpanudlo. Sining karon lang, ang katawhan sang Dios sa bug-os nga kalibutan ginapalig-on nga gamiton sing labi pa ang Biblia sa ila publiko nga ministeryo. Samtang ginaaplikar mo ini nga panugda, mangita sing mga paagi agod mahibaluan sang tagbalay nga ginapabaloran mo ang ginapaambit mo gikan sa Biblia.​—⁠Mateo 13:52.

⁸ Halimbawa, sa tapos sang pagsalakay sang mga terorista sa New York City sang nagligad nga tuig, ginbasa sang isa ka Cristianong utod nga babayi ang Salmo 46:​1, 11 sa mga tawo nga masugilanon niya sa ministeryo. Una, ginakamusta niya anay sila sang ila kahimtangan sa tapos sang trahedya. Ginapamatian niya ang ila sabat, ginapasalamatan ini, kag nagasiling: “Mahimo ko bala mabasa sa imo ang isa ka kasulatan nga naglugpay gid sa akon sa sining mabudlay nga tion?” Pila lamang ang nangindi, kag nagdul-ong ini sa madamong maayo gid nga mga paghambalanay. Sa pagpakighambal sa mga pamatan-on, ini man nga utod masami nga nagasiling: “Kalim-an ka tuig na ako nga nagatudlo sing Biblia, kag nakahibalo ka bala kon ngaa? Wala pa ako makasumalang sing isa ka problema nga wala malubad sa bulig sini nga libro.” Sa paggamit sing sinsero kag mapagsik nga paagi, ginapakita naton sa mga tawo nga ginapabaloran kag ginahigugma naton ang natun-an naton gikan sa Pulong sang Dios.​—⁠Salmo 119:​97, 105.

9, 10. Ngaa importante nga maggamit sing Biblia kon nagasabat sa mga pamangkot tuhoy sa aton pagtuluuhan?

 ⁹ Kon mamangkot ang mga tawo tuhoy sa aton pagtuluuhan, isa ini ka maayong kahigayunan agod mapakita naton nga ginahigugma naton ang Pulong sang Dios. Paagi sa pagsunod sa halimbawa ni Jesus, wala lamang naton ginapasad ang aton sabat sa aton kaugalingon nga mga ideya. (Hulubaton 3:​5, 6) Sa baylo, ginagamit naton ang Biblia sa pagsabat. Nahangawa ka bala nga basi may mamangkot sa imo kag indi mo masabat? Binagbinaga ang duha ka positibo nga tikang nga sarang mo mahimo.

¹⁰ Himua ang masarangan mo agod mangin handa. Si apostol Pedro nagsulat: “Pakabalaana si Cristo subong Ginuo sa inyo mga tagipusuon, nga handa pirme sa pagpangapin sa atubangan sang tanan nga nagapangayo sa inyo sing pangatarungan tuhoy sa paglaum nga yara sa inyo, apang ginahimo ini nga may kalmado nga buot kag daku nga pagtahod.” (1 Pedro 3:15) Handa ka bala nga pangapinan ang imo pagtuluuhan? Halimbawa, kon may mamangkot sa imo kon ngaa wala ka nagapakigbahin sa di-makasulatanhon nga kustombre ukon kinabatasan, indi lamang mangin kontento sa pagsiling: “Supak ini sa akon relihion.” Ini nga sabat mahimo magpahangop nga iban ang ginapadesisyon mo para sa imo kag busa miembro ka sang isa ka kulto. Mas maayo nga magsiling, “Ginadumili ini sang Pulong sang Dios, ang Biblia,” ukon, “Indi ini magapahamuot sa akon Dios.” Nian maghatag sing rasonable nga paathag kon ngaa.​—⁠Roma 12:1.

11. Anong mga reperensia ang makabulig sa imo nga mangin handa sa pagsabat sa mga pamangkot tuhoy sa mga kamatuoran sa Pulong sang Dios?

¹¹ Kon daw indi ka handa, ngaa indi mo tun-an ang libro nga Reasoning From the Scriptures?⁠ * Pilia ang pila ka tema nga mahimo mag-utwas, kag sauluha ang pila ka Makasulatanhon nga mga punto. Dalha pirme ang imo Reasoning nga libro kag Biblia. Indi mag-alang-alang sa paggamit sini, kag sugiri ang nagapamangkot nga may reperensia ikaw nga makabulig sa imo agod makita ang sabat sang Biblia sa mga pamangkot.

12. Ano ang isabat naton kon indi naton nahibaluan ang sabat sa isa ka pamangkot sa Biblia?

¹² Indi magpalibog sing di-kinahanglanon. Wala sing di-himpit nga tawo nga may tanan nga sabat. Gani kon indi mo masabat ang pamangkot sa Biblia, makasabat ka pirme sing subong sini: “Salamat sa imo makawiwili nga pamangkot. Ang matuod, indi ko nahibaluan ang sabat, apang pat-od gid nga masabat ini sang Biblia. Luyag ko magpanalawsaw sa Biblia, gani tun-an ko ang imo pamangkot kag magabalik ako sa imo agod masabat ini.” Ining bunayag kag maugdang nga sabat magahatag sing dalan para sa dugang pa nga mga paghambalanay.​—⁠Hulubaton 11:2.

Gugma sa mga Tawo nga Ginatudluan Naton

13. Ngaa dapat naton huptan ang positibo nga panimuot sa mga ginabantalaan naton?

¹³ Ginhigugma ni Jesus ang mga tawo nga gintudluan niya. Paano naton sia mailog sa sini nga bahin? Indi kita dapat mangin di-sensitibo sa mga tawo sa palibot naton. Matuod, “ang inaway sang dakung adlaw sang Dios nga Labing Gamhanan” tuman na kalapit, kag madamo sa binilyon ka tawo ang laglagon. (Bugna 16:14; Jeremias 25:33) Apang, wala kita makahibalo kon sin-o ang mabuhi  kag kon sin-o ang mapatay. Ini nga paghukom mahanabo sa palaabuton kag pagahimuon sang isa nga gintangdo ni Jehova, si Jesucristo. Tubtob wala pa ang paghukom, ginatamod naton ang tagsa ka indibiduwal subong posible nga mangin alagad ni Jehova.​—⁠Mateo 19:24-26; 25:31-33; Binuhatan 17:31.

14. (a) Paano naton matilawan ang aton kaugalingon kon bala may empatiya kita sa mga tawo? (b) Sa anong praktikal nga mga paagi makapakita kita sing empatiya kag personal nga interes sa iban?

¹⁴ Kon amo, kaangay ni Jesus, ginatinguhaan naton nga magpakita sing empatiya sa mga tawo. Mahimo naton pamangkuton ang aton kaugalingon: ‘Naluoy bala ako sa mga tawo nga ginlimbungan sang tuso nga mga kabutigan kag mga daya sang relihion, politika, kag komersio sining kalibutan? Kon daw wala sila nagasapak sa aton mensahe, ginatinguhaan bala naton nga mahangpan ang ila ginabatyag? Ginabaton ko bala nga ako, ukon ang iban pa nga nagaalagad karon kay Jehova sing matutom, amo man anay ang ginbatyag? Ginpasibu ko bala sing nagakaigo ang akon paagi sang pagbantala? Ukon ginakabig ko bala sila nga indi na gid magbag-o?’ (Bugna 12:9) Kon mabatyagan sang mga tawo ang aton matuod nga empatiya, labi sila nga magapamati sa aton mensahe. (1 Pedro 3:8) Ang empatiya magapahulag man sa aton nga magpakita sing daku pa nga interes sa mga tawo nga masugilanon naton sa aton ministeryo. Mahimo naton isulat ang ila mga pamangkot kag mga kabalaka. Kon magbalik kita, mapakita naton sa ila nga ginapamensaran naton ang ila ginsiling sang nagligad nga pagduaw naton. Sugiri sila nga kon may kinahanglan gid sila sa karon, makahatag kita sing praktikal nga bulig.

15. Ngaa dapat naton talupangdon ang maayo nga kinaiya sa mga tawo, kag paano naton ini mahimo?

¹⁵ Kaangay ni Jesus, ginatalupangod naton ang maayo nga kinaiya sa mga tawo. Ayhan ang isa ka nagasolo nga ginikanan dalayawon nga nagapanikasog sa pagpadaku sa iya mga kabataan. Ang isa ka bana nagahimakas sa pagsuporta sa iya pamilya. Ang isa ka tigulang nagapakita sing interes sa espirituwal nga mga butang. Nakita bala naton ini nga mga kinaiya sa mga tawo nga masugilanon naton kag ginahatagan sila sing nagakaigo nga komendasyon? Paagi sa paghimo sini, ginapatalupangod naton nga may pareho kita nga interes kag mahimo sini buksan ang dalan agod makapanaksi kita tuhoy sa Ginharian.​—⁠Binuhatan 26:​2, 3.

Ang Pagkamapainubuson Kinahanglanon sa Pagpakita sing Gugma

16. Ngaa importante nga magpabilin nga kalmado kag matinahuron sa mga ginabantalaan naton?

¹⁶ Ang gugma sa mga tawo nga ginatudluan naton magapahulag sa aton nga sundon ang maalamon nga laygay sang Biblia: “Ang ihibalo nagapabugalon, apang ang gugma nagapalig-on.” (1 Corinto 8:1) Si Jesus may daku nga ihibalo, apang indi gid sia bugalon. Gani samtang ginapaambit mo ang imo pagtuluuhan, likawi ang pagpakigbais ukon pagkabugalon. Ang aton tulumuron amo ang paglab-ot sa tagipusuon kag pagganyat sa mga tawo sa mga kamatuoran nga ginahigugma gid naton. (Colosas 4:6) Dumduma nga sang ginlaygayan ni Pedro ang mga Cristiano nga maghanda sa pagpangapin, ginlakip niya ang pahanumdom nga dapat naton ini himuon “nga may kalmado nga buot kag daku nga pagtahod.” (1 Pedro 3:15) Kon kita kalmado kag matinahuron, mahimo maganyat naton ang mga tawo sa Dios nga aton ginaalagad.

17, 18. (a) Ano dapat ang reaksion naton sa mamulayon nga mga panimuot tuhoy sa aton mga kalipikasyon subong mga ministro? (b) Ngaa ang ihibalo sa dumaan nga mga lenguahe sa Biblia indi kinahanglan sa mga estudyante sang Biblia?

¹⁷ Indi kinahanglan nga padayawon naton ang mga tawo sa aton ihibalo ukon edukasyon. Kon may mga tawo sa inyo teritoryo nga indi mamati kay bisan sin-o nga wala makatapos sa kolehiyo, indi magluya ang imo buot. Wala ginsapak ni Jesus ang pamatok nga wala sia makaeskwela sa kilala nga rabiniko nga mga eskwelahan sang panahon niya; ukon nagpadala sia sa popular nga opinyon paagi sa pagtinguha nga padayawon ang mga tawo sa iya madamo nga tinun-an.​—⁠Juan 7:15.

¹⁸ Ang pagkamapainubuson kag gugma mas importante sa Cristianong mga ministro sangsa sekular nga edukasyon. Ang Daku nga Edukador, si Jehova, amo ang nagahimo sa aton nga kalipikado sa ministeryo. (2 Corinto 3:​5, 6) Kag bisan ano man ang isiling sang mga klero sang Cristiandad, indi kinahanglan nga tun-an naton ang dumaan nga mga lenguahe sa Biblia agod mangin mga manunudlo sang Pulong sang Dios. Si Jehova nag-inspirar nga isulat ang Biblia sa maathag kag espesipiko nga mga tinaga agod mahangpan sang halos tanan ang hamili nga mga kamatuoran sini. Ining mga kamatuoran  nagapabilin nga amo gihapon bisan pa nga ginbadbad ini sa ginatos ka lenguahe. Gani ang ihibalo sa dumaan nga mga lenguahe, walay sapayan nga mapuslanon kon kaisa, indi kinahanglan. Dugang pa, bangod sang pagpabugal sang isa nga madamo sia sing nahibaluan nga lenguahe, mahimo mawasi niya ang kinahanglanon nga kinaiya sang matuod nga mga Cristiano​—⁠ang madali tudluan.​—⁠1 Timoteo 6:4.

19. Sa anong kahulugan ang aton Cristianong ministeryo isa ka pag-alagad?

¹⁹ Walay duhaduha nga ang aton Cristianong ministeryo isa ka hilikuton nga nagakinahanglan sing pagpaubos. Pirme kita nadayag sa pagpamatok, indi pagsapak, kag sa paghingabot pa gani. (Juan 15:20) Apang, paagi sa matutom nga paghimo naton sang aton ministeryo, ginahimo naton ang isa ka importante nga pag-alagad. Kon padayon kita nga nagaalagad sing mapainubuson sa iban sa sining hilikuton, ginailog naton ang gugma nga ginpakita ni Jesucristo sa mga tawo. Binagbinaga lamang: Kon kinahanglan naton nga magbantala sa isa ka libo ka tawo nga wala nagasapak ukon nagapamatok agod makita ang isa ka tulad-karnero nga indibiduwal, indi bala ini takus sa panikasog? Pat-od gid! Gani paagi sa pagpadayon sa hilikuton, nga wala gid nagauntat, nagaalagad kita sing matutom sa mga tulad-karnero nga dapat makita pa naton. Pat-uron gid ni Jehova kag ni Jesus nga madamo pa nga hamili nga mga indibiduwal ang makita kag mabuligan sa wala pa mag-abot ang katapusan.​—⁠Hageo 2:7.

20. Ano ang pila ka paagi nga makatudlo kita paagi sa halimbawa?

²⁰ Ang pagtudlo paagi sa halimbawa isa pa ka paagi sa pagpakita sang aton kahanda nga mag-alagad sa iban. Halimbawa, luyag naton tudluan ang mga tawo nga ang pag-alagad kay Jehova, ang “malipayon nga Dios,” amo ang labing maayo kag labing makalilipay nga pagkabuhi. (1 Timoteo 1:11) Samtang ginapanilagan nila ang aton paggawi kag ang aton pagpakig-angot sa aton mga kaingod, mga kabutho, kag mga katrabaho, makita bala nila nga malipayon kita kag kontento? Sing kaanggid, ginatudluan naton ang mga estudyante sang Biblia nga ang Cristianong kongregasyon isa ka duog nga may gugma sa tunga sang wala balatyagon kag mapintas nga kalibutan. Makita bala gilayon sang aton mga estudyante nga ginahigugma naton ang tanan sa kongregasyon kag nagapangabudlay kita sing lakas agod mahuptan ang paghidait sa isa kag isa?​—⁠1 Pedro 4:8.

21, 22. (a) Ang pag-usisa sa kaugalingon bahin sa aton ministeryo makadul-ong sa paghimulos naton sa anong mga kahigayunan? (b) Ano ang binagbinagon sa mga artikulo sa masunod nga guwa sang Ang Lalantawan?

²¹ Ang kahanda sa aton ministeryo mahimo, kon kaisa, magapahulag sa aton nga usisaon liwat ang aton kaugalingon. Paagi sa bunayag nga pag-usisa sa kaugalingon, nakita sang madamo nga mahimo nila mapasangkad ang ila pag-alagad paagi sa pagsulod sa bug-os tion nga ministeryo ukon paagi sa pagsaylo kag sa pag-alagad sa mga lugar nga mas daku ang kinahanglanon. Ang iban namat-od sa pagtuon sing iban nga lenguahe agod makaalagad sa nagadamo nga dumuluong sa ila teritoryo. Kon ini nga mga pililian bukas sa imo, binagbinaga ini sing maayo kag sing mapangamuyuon. Ang pag-alagad nagahatag sing daku nga kalipay, kaayawan, kag kalinong sa hunahuna.​—⁠Manugwali 5:12.

²² Sa tanan nga paagi, padayon naton nga ilugon si Jesucristo paagi sa pagpabakod sang aton gugma sa mga kamatuoran nga ginatudlo naton kag sa mga tawo nga ginatudluan naton. Ang pagpalambo kag pagpakita sing gugma sa sining duha ka bahin magabulig sa aton sa pagtukod sing maayo nga sadsaran agod mangin tulad-Cristo nga mga manunudlo. Apang, paano naton mapabakod ini nga sadsaran? Sa masunod nga guwa sang Ang Lalantawan, binagbinagon sang isa ka serye sang mga artikulo ang pila ka espesipiko nga mga paagi sa pagtudlo nga gingamit ni Jesus.

[Nota]

Paano Mo Sabton?

• Ano ang nagapasalig sa aton nga ang halimbawa ni Jesus subong isa ka manunudlo indi tuman kataas agod mailog naton?

• Paano naton mapakita nga ginahigugma naton ang mga kamatuoran nga natun-an naton gikan sa Biblia?

• Ngaa importante nga magpabilin nga mapainubuson samtang nagatubo kita sa ihibalo?

• Ano ang pila ka paagi nga mapakita naton ang gugma sa mga tawo nga ginapanikasugan naton nga tudluan?

[Mga Pamangkot sa Pagtinuon]

[Mga retrato sa pahina 16]

Himua ang imo masarangan agod mangin handa

[Kapsion sa pahina 16, 17]

Kon ginapakabahandi mo ang ‘ihibalo tuhoy sa Dios,’ magamit mo sing epektibo ang Biblia

[Retrato sa pahina 18]

Ginapakita naton ang gugma sa mga tawo paagi sa pagpaambit sing maayong balita sa ila