Nalipay Sila nga Nakatuon Sila sa Pagbasa!

SA PILA ka bahin sang Solomon Islands, mga 80 porsiento sang mga Saksi ni Jehova na karon ang indi anay makahibalo magbasa ukon magsulat. Indi lamang ini naglimite sang ila pagpakigbahin sa semanal nga mga miting sa kongregasyon kundi nangin mabudlay man para sa ila ang pagtudlo sing mga kamatuoran sang Ginharian sa iban. Posible gid bala nga makatuon sa pagbasa kag pagsulat ang mga hamtong nga wala pa gid gani anay makauyat sing lapis?

Ang brosyur nga Apply Yourself to Reading and Writing, nga ginbalhag sang mga Saksi ni Jehova, madugay na ginagamit sa mga klase nga nagatudlo sa pagbasa kag pagsulat sa halos tanan nga kongregasyon sang mga Saksi ni Jehova sa Solomon Islands. Ang masunod nga mga eksperiensia nagapakita kon paano ang ginatos nabuligan nga pauswagon ang ila ikasarang paagi sa sini nga programa. Sing mas importante pa, paagi sa pagtuon sa pagbasa, nabuligan sila nga makapanaksi sing mas maayo nahanungod sa ila pagtuo.​​—⁠1 Pedro 3:⁠15.

Ang isa ka misyonera nga nadestino sa isa ka kongregasyon nga may sobra sa isa ka gatos ka manugbantala sang Ginharian nakatalupangod nga sa ila semanal nga pagtinuon sa Ang Lalantawan, diutay lamang ang may yara kopya sing magasin kag mas diutay pa gid ang nagakomento. Ang rason? Indi sila makahibalo magbasa. Sang ginpahibalo sa kongregasyon ang paghiwat sing mga klase nga magatudlo sa pagbasa kag pagsulat, ang misyonera malipayon nga nagboluntaryo nga mangin manunudlo. Sang primero, diutay lamang nga mga estudyante ang nagkaladto, apang sang ulihi sobra sa 40 ka tawo nga nanuhaytuhay sing edad ang nagkaladto.

Ano ang nangin resulta? Ang misyonera nagasaysay: “Sang bag-o lang magsugod ang klase, nagkadto ako sa tiendahan sang alas seis sang aga agod magbakal sing pagkaon para sa mga misyonero. Didto nakita ko ang pila sa mga estudyante, bisan ang mga bata pa, nga nagabaligya sing lubi kag utan. Ngaa? Bangod luyag nila makasupot  sing kuwarta agod makabakal sing lapis kag kuwaderno para magamit sa ila klase! Dugang pa, ang pagtambong sa klase nagpahulag sa ila nga magkuha sing personal nga kopya sang magasin nga Lalantawan.” Nagdugang sia: “Sa karon, sa tion sang pagtuon sang kongregasyon sa Lalantawan, ang mga bata kag mga tigulang lunsay nagapakigbahin, kag mapagsik ang amon pagtinuon.” Ining misyonera nalipay gid sang ang apat ka miembro sang klase nagpamangkot kon mahimo sila makapakigbahin sa pagbantala nga hilikuton bangod, suno sa ila, ‘wala na sila mahadlok.’

Ang kapuslanan nga nakuha sang mga estudyante sa sining mga klase kapin pa sangsa pagtuon lamang sa pagbasa kag pagsulat. Halimbawa, sa sulod sang madamong mga tinuig, ang di-tumuluo nga asawa sang isa ka Saksi nangin problema sang kongregasyon. Nagapanghaboy sia sing bato sa mga tawo sa diutay lamang nga rason kag nagapanghampak pa gani sia sing kahoy sa iban nga mga babayi. Kon magtambong sia kon kaisa sa Cristianong mga miting upod sa iya bana, tuman gid ang iya pagpangimon amo nga ang iya bana nagasuksok na lang sing de-kolor nga antipara agod indi niya paghambalon nga nagatulok ang iya bana sa iban nga mga babayi.

Sang bag-o pa lang mag-umpisa ang klase, ining babayi matawhay nga nagpamangkot: “Mahimo bala ako makabuylog sa klase?” Ginsabat sia sing huo. Sugod sadto wala gid sia magpalya sa pagtambong sa klase ukon sa mga miting sa kongregasyon. Gin-ukuran niya ang iya mga leksion sa pagbasa kag naghimo sing dalayawon nga pag-uswag, nga nagpahalipay gid sa iya. Ang masunod niya nga pangabay amo: “Mahimo bala ako magtuon sa Biblia?” Malipayon nga gin-umpisahan sang iya bana ang pagtuon sa iya, kag padayon nga nagauswag sia sa iya ikasarang sa pagbasa kag pagsulat kag sa iya ihibalo sa Biblia.

Para sa isa ka 50 anyos nga wala gid makaagi uyat sing lapis, bisan ang pag-uyat sing lapis kag pagsulat sing mga letra sang alpabeto tuman gid kabudlay. Ang iban nagakalap-ukan sa ila mga tudlo bangod sang ila hugot nga pag-uyat sa lapis kag madukot nga pagsulat sadtong nagaumpisa pa lang sila sa pagtuon. Pagkatapos sang senemana nga pagpangabudlay nga matun-an ang pag-uyat kag pagkontrol sing lapis, ang pila ka mga estudyante masinadyahon nga nagsiling: “Mamag-an na ako magsulat!” Ang pag-uswag sang ila mga estudyante nagapahalipay man sa mga nagatudlo. Ang isa ka manunudlo nagsiling: “Ang pagtudlo sa klase makalilipay gid, kag ang tudok nga apresasyon sang mga estudyante sa sini nga kahimusan halin kay Jehova masami nila ginapabutyag paagi sa pagpamalakpak pagkatapos sang klase.”

Upod sa mga misyonero, ining makahibalo na magbasa kag magsulat nga mga Saksi nagakasadya. Ngaa? Bangod magamit na nila ang ila ikasarang sa pagbasa kag pagsulat sa pagpadungog kay Jehova.

[Retrato sa pahina 8, 9]

Ang mga bata kag tigulang lunsay nagaapresyar sa mga klase sa pagbasa kag pagsulat