Iluga ang Daku nga Manunudlo

“Busa lakat kamo kag maghimo sing mga disipulo sa mga tawo . . . , nagatudlo sa ila nga tumanon ang tanan nga butang nga ginsugo ko sa inyo.”​—⁠MATEO 28:​19, 20.

1, 2. (a) Sa isa ka kahulugan, paano kita tanan mga manunudlo? (b) Kon tuhoy sa pagpanudlo, ano ang pinasahi nga responsabilidad sang matuod nga mga Cristiano?

IKAW bala isa ka manunudlo? Sa isa ka kahulugan, kita tanan mga manunudlo. Sa kada tion nga ginahatagan mo sing direksion ang isa ka nagtalang nga nagalakbay, ginatudluan mo ang kaupod nga manugpangabudlay kon paano himuon ang isa ka hilikuton ukon kon paano ihigot sang bata ang iya sapatos, nagatudlo ikaw. Ini nga mga paagi sa pagbulig sa iban nagahatag sing kalipay, indi bala?

² Kon tuhoy sa pagpanudlo, ang matuod nga mga Cristiano may pinasahi nga responsabilidad. Ginsugo kita nga “maghimo sing mga disipulo sa mga tawo . . . , nagatudlo sa ila.” (Mateo 28:​19, 20) Sa sulod sang kongregasyon, may tion man nga nagatudlo kita. Ang kalipikado nga mga lalaki ginatangdo nga mag-alagad subong “mga manugbantay kag mga manunudlo,” sa tuyo nga palig-unon ang kongregasyon. (Efeso 4:11-13) Sa ila adlaw-adlaw nga Cristianong mga hilikuton, ang hamtong nga mga babayi dapat mangin “mga manunudlo sing maayo” sa batan-on nga mga babayi. (Tito 2:​3-5) Kita tanan ginalaygayan nga palig-unon ang mga masigkatumuluo, kag ginasunod naton ini nga laygay paagi sa paggamit sing Biblia sa pagpalig-on sa iban. (1 Tesalonica 5:11) Isa gid ka pribilehiyo nga mangin manunudlo sang Pulong sang Dios kag mapaambit ang espirituwal nga mga prinsipio nga may dayon nga mga benepisyo!

3. Paano naton mapauswag ang aton pagkaepektibo subong mga manunudlo?

³ Apang, paano naton mapauswag ang aton pagkaepektibo subong mga manunudlo? Una, paagi sa pag-ilog sa Daku nga Manunudlo, si Jesus. ‘Apang paano naton mailog si Jesus?’ pamangkot sang iban. ‘Sia himpit.’ Matuod, indi kita mahimo mangin himpit nga mga manunudlo. Walay sapayan sini, bisan ano man ang aton mga ikasarang, mahimo naton ang aton bug-os nga masarangan agod mailog ang pagpanudlo ni Jesus. Binagbinagon naton kon paano naton magamit ang apat sa iya mga paagi​—⁠simple, epektibo nga mga pamangkot, lohiko nga pangatarungan, kag nagakaigo nga mga ilustrasyon.

Magtudlo sing Simple

4, 5. (a) Ngaa ang panguna nga kinaiya sang kamatuoran sang Biblia amo nga ini simple? (b) Agod makatudlo sing simple, ngaa importante nga bantayan naton ang aton bokabularyo?

⁴ Ang sadsaran nga mga kamatuoran sang Pulong sang Dios indi masibod. Sa pangamuyo, si Jesus nagsiling: “Nagadayaw ako sing dayag sa imo, Amay, . . . bangod gintago mo ini nga mga butang gikan sa mga maalam kag sa mga may kinaalam kag ginpahayag ini sa mga lapsag.” (Mateo 11:25) Ginpahayag ni Jehova ang iya mga katuyuan sa mga tawo nga sinsero kag mapainubuson sing tagipusuon. (1 Corinto 1:26-28) Gani, ang panguna nga kinaiya sang kamatuoran sang Biblia amo nga ini simple.

⁵ Kon magdumala ka sing pagtuon sing Biblia sa puluy-an ukon magduaw liwat sa mga interesado, paano ikaw makatudlo sing simple? Ti, ano ang natun-an mo gikan sa Daku nga Manunudlo? Agod pat-uron nga nahangpan sia sang iya mga tagpalamati, nga ang madamo sa ila “wala sing tinun-an kag kinaandan lamang,” si Jesus naggamit sing simple nga hambal nga mahangpan nila. (Binuhatan 4:13) Kon amo, agod makatudlo sing simple, ang una nga kinahanglanon amo ang pagbantay sang aton bokabularyo. Indi kinahanglan nga maggamit kita sing madalom nga mga tinaga  ukon mga dinalan agod ang kamatuoran sang Pulong sang Dios mangin makapakumbinsi sa iban. Ining “pagpasobra sa pulong” nagapahadlok, ilabi na sa mga may diutay lamang sing tinun-an ukon ikasarang. (1 Corinto 2:​1, 2) Ginapakita sang halimbawa ni Jesus nga sarang mapaalinton sang ginpili sing maayo nga simple nga mga tinaga ang kamatuoran sing epektibo gid.

6. Paano naton malikawan nga patam-an ang estudyante sang Biblia sing tuman kadamo nga impormasyon?

⁶ Agod makatudlo sing simple, dapat man kita maghalong nga wala naton ginapatam-an ang isa ka estudyante sang Biblia sing tuman kadamo nga impormasyon. Si Jesus mapatugsilingon sa mga limitasyon sang iya mga disipulo. (Juan 16:12) Dapat man naton binagbinagon ang mga limitasyon sang estudyante. Halimbawa, kon nagadumala sing pagtuon sa libro nga Ang Ihibalo nga Nagadul-ong sa Kabuhi nga Walay Katapusan, indi kinahanglan nga ipaathag naton ang tanan nga detalye.⁠ * Indi man kinahanglan nga hambalan sing padali ang impormasyon, subong bala nga ang pagtuptop sing isa ka gintalana nga kadamuon sang materyal amo ang pinakaimportante. Sa baylo, maalamon nga tugutan naton ang mga kinahanglanon kag mga ikasarang sang estudyante nga amo ang magapat-od sa kadasigon sang pagtuon. Ang aton tulumuron amo ang pagbulig sa estudyante nga mangin disipulo ni Cristo kag sumilimba ni Jehova. Dapat kita maghinguyang sing tion agod buligan ang interesado nga mahangpan sing maathag ang iya ginatun-an. Sa amo, ang kamatuoran magatandog sa iya tagipusuon kag magapahulag sa iya.​—⁠Roma 12:2.

7. Anong mga panugda ang makabulig sa aton nga magtudlo sing simple kon nagahatag sing mga pamulongpulong sa kongregasyon?

⁷ Kon nagahatag kita sing mga pamulongpulong sa kongregasyon, ilabi na kon may mga bag-uhan sa tumalambong, paano kita makahambal nga “mahapos mahangpan”? (1 Corinto 14:⁠9) Binagbinaga ang tatlo ka mapuslanon nga mga panugda. Una, ipaathag ang indi pamilyar nga mga tinaga nga gamiton mo. Ang aton paghangop sa Pulong sang Dios naghatag sa aton sing pinasahi nga bokabularyo. Kon maggamit kita sing mga ekspresyon subong sang “matutom kag mainandamon nga ulipon,” “iban nga mga karnero,” kag “Babilonia nga Daku,” mahimo dapat naton ipaathag ang kahulugan sini sa simple nga hambal. Ikaduha, likawi ang paggamit sing madamo nga tinaga. Ang tuman kadamo nga tinaga, nga ginahambal sing masibod, mahimo makadula sa interes sang tumalambong. Mangin maathag ini kon kuhaon mo ang di-kinahanglanon nga mga tinaga kag mga dinalan. Ikatlo, indi pagtinguhai nga tuptupan ang tuman kadamo nga materyal. Bangod sang aton pagpanalawsaw, mahimo may yara kita madamong makawiwili nga mga detalye. Apang labing maayo nga tingubon ini sa pila ka pangunang mga punto, ginagamit lamang ang impormasyon nga nagasakdag sa mga punto kag mapaathag sa gintalana nga tion.

Epektibo nga Paggamit sing mga Pamangkot

8, 9. Paano kita makapili sing pamangkot nga nahisanto sa interes sang tagbalay? Maghatag sing mga halimbawa.

⁸ Dumduma nga si Jesus lantip gid sa paggamit sing mga pamangkot agod palig-unon ang iya mga disipulo nga ipabutyag ang ila ginahunahuna kag agod pukawon kag hanason sila nga maghunahuna. Paagi sa iya mga pamangkot, mainayuhon nga nalab-ot kag natandog ni Jesus ang ila tagipusuon. (Mateo 16:​13, 15; Juan 11:26) Kaangay ni Jesus, paano naton epektibo nga magamit ang mga pamangkot?

⁹ Kon nagabantala sa mga pamalay, magamit naton ang mga pamangkot sa pagpukaw sing interes, nga nagadul-ong sa paghambal naton tuhoy sa Ginharian sang Dios. Paano kita makapili sing pamangkot nga nahisanto sa interes sang tagbalay? Mangin mapanilagon. Sa pagsampot sa isa ka balay, manghulonghulong. May mga hampanganan bala sa ugsaran, nga nagapakita nga may mga kabataan sa puluy-an? Kon amo, mahimo kita mamangkot,  ‘Napaligban mo na bala kon ano ang kahimtangan sa kalibutan kon magdaku na ang imo mga kabataan?’ (Salmo 37:​10, 11) May madamo bala nga kandado sa atubang nga ganhaan, ukon may yara bala de-koryente nga alarma? Makapamangkot kita: ‘Sa banta mo, magaabot bala ang tion nga magabatyag kita nga wala sing peligro sa aton puluy-an kag sa dalan?’ (Miqueas 4:​3, 4) May alagyan bala para sa wheelchair? Mahimo kita mamangkot: ‘May tion pa ayhan nga ang tanan nga nagakabuhi may maayo nga panglawas?’ (Isaias 33:24) Madamo nga panugda ang mabasa sa libro nga Reasoning From the Scriptures.⁠ *

10. Paano naton magamit ang mga pamangkot agod ‘masag-ub’ ang panghunahuna kag opinyon sang isa ka estudyante sa Biblia, apang ano ang indi naton pagkalimtan?

¹⁰ Paano naton epektibo nga magamit ang mga pamangkot kon nagadumala sing mga pagtuon sa Biblia? Indi subong ni Jesus, indi naton mabasa ang tagipusuon. Apang, ang mataktika kag mahantupon nga mga pamangkot makabulig sa aton agod ‘masag-ub’ ang panghunahuna kag opinyon sang estudyante. (Hulubaton 20:⁠5) Halimbawa, ibutang ta nga nagatuon kita sa kapitulo “Kon Ngaa ang Diosnon nga Pagkabuhi Nagadala Sing Kalipay,” sa Ihibalo nga libro. Ginabinagbinag sini ang pagtamod sang Dios sa pagkadibunayag, pakighilawas, kag iban pa nga mga butang. Mahimo masabat sing husto sang estudyante ang naimprinta nga mga pamangkot, apang nagaugyon bala sia sa iya ginatun-an? Mahimo kita mamangkot: ‘Daw rasonable bala sa imo ang pagtamod ni Jehova sa sining mga butang?’ ‘Paano mo iaplikar ining mga prinsipio sang Biblia sa imo kabuhi?’ Apang, indi pagkalimti nga dapat ikaw mangin matinahuron, ginapakitaan sing pagtahod ang estudyante. Indi naton luyag nga mahuy-an ang estudyante sang Biblia sa aton mga pamangkot.​—⁠Hulubaton 12:18.

11. Sa anong mga paagi epektibo nga magamit sang mga nagapamulongpulong publiko ang mga pamangkot?

1¹ Ang mga nagapamulongpulong publiko epektibo man nga makagamit sing mga pamangkot. Ang retoriko nga mga pamangkot​—⁠ang mga pamangkot nga wala naton ginapaabot nga sabton sing mabaskog sang aton mga tagpalamati⁠​—⁠makabulig sa tumalambong nga maghunahuna kag mangatarungan. Si Jesus naggamit sing subong sini nga mga pamangkot kon kaisa. (Mateo 11:​7-9) Dugang pa, sa tapos sang introduksion, ang humalambal mahimo maggamit sing mga pamangkot agod ibalay ang panguna nga mga punto nga binagbinagon. Mahimo sia makasiling: “Sa aton karon paghambalanay, binagbinagon naton ang mga sabat sa masunod nga mga pamangkot . . .” Nian, sa konklusion, masambit niya ining mga pamangkot agod repasuhon ang panguna nga mga punto.

12. Maghatag sing halimbawa agod ipakita kon paano magamit sang Cristianong mga gulang ang mga pamangkot agod buligan ang masigkatumuluo nga malugpayan sang Pulong sang Dios.

¹² Sa ila pagbantay nga hilikuton, magamit sang Cristianong mga gulang ang mga pamangkot agod buligan ang “kalag nga ginapung-awan” nga malugpayan sang Pulong ni Jehova. (1 Tesalonica 5:14) Halimbawa, agod buligan ang isa nga ginaluyahan sing buot, mahimo ipatalupangod sang isa ka gulang ang Salmo 34:18. Ini nagasiling: “Si Jehova malapit sa mga buong sing tagipusuon; kag ginaluwas niya ang mga nadugmok sa espiritu.” Agod pat-uron nga nahangpan sang isa nga ginaluyahan sing buot nga naaplikar ini sa iya, ang gulang mahimo mamangkot: ‘Kay sin-o malapit si Jehova? Nagabatyag ka bala kon kaisa nga “buong sing tagipusuon” kag “nadugmok sa espiritu”? Kon, subong ginasiling sang Biblia, si Jehova malapit sa ila, wala bala ini nagakahulugan nga malapit sia sa imo?’ Ining mapinalanggaon nga pagpasalig makapasag-uli sa kapagsik sang isa nga ginaluyahan sing buot.​—⁠Isaias 57:15.

Lohiko nga Pangatarungan

13, 14. (a) Paano kita mangatarungan sa isa nga nagasiling nga wala sia nagapati sa Dios nga indi niya makita? (b) Ngaa indi kita dapat magpaabot nga ang tanan makumbinsi?

¹³ Sa aton ministeryo, luyag naton malab-ot  ang tagipusuon paagi sa maayo kag makabuluyok nga pangatarungan. (Binuhatan 19:⁠8; 28:​23, 24) Nagakahulugan bala ini nga dapat kita magtuon sa paggamit sing masibod nga lohiko agod kumbinsihon ang iban sa kamatuoran sang Pulong sang Dios? Indi gid. Ang maayo nga pangatarungan indi kinahanglan nga mangin masibod. Ang lohiko nga mga argumento nga ginapresentar sing simple masami nga labing epektibo. Binagbinaga ang isa ka halimbawa.

¹⁴ Ano ang isabat naton kon may magsiling nga wala sia nagapati sa Dios nga indi niya makita? Magamit naton ang pangatarungan pasad sa kinaugali nga kasuguan sang kabangdanan kag epekto. Kon makita naton ang epekto, ginabaton naton nga may yara kabangdanan. Mahimo kita makasiling: ‘Kon didto ka sa isa ka naligwin nga lugar kag makakita ka sing natukod nga balay nga may madamo sing pagkaon (epekto), mahimo magapati ka gilayon nga may isa (kabangdanan) nga nagtukod sina nga balay kag nagpuno sing pagkaon sa platera sini. Gani, kon makakita man kita sing desinyo sa kinaugali kag sing bugana nga pagkaon sa “platera” sang duta (epekto), indi bala makatarunganon patihan nga may Isa (kabangdanan) nga naghimo sini?’ Maathag nga ginasiling sang Biblia ini nga kamatuoran: “Sa pagkamatuod, ang tagsa ka balay may nagtukod, apang sia nga nagtukod sing tanan nga butang amo ang Dios.” (Hebreo 3:⁠4) Apang, bisan daw ano man kaayo ang aton pangatarungan, indi tanan makumbinsi. Ang Biblia nagapahanumdom sa aton nga yadto lamang ang mga “husto nga napahamtang” ang mangin mga tumuluo.​—⁠Binuhatan 13:48; 2 Tesalonica 3:2.

15. Ano nga pangatarungan ang magamit naton agod ipatalupangod ang mga kinaiya kag mga paagi ni Jehova sa paghimo sing mga butang, kag ano ang duha ka halimbawa nga nagapakita kon paano naton magamit ini nga pangatarungan?

¹⁵ Sa aton pagpanudlo, sa ministeryo man sa latagon ukon sa kongregasyon, magamit naton ang lohiko nga pangatarungan agod ipatalupangod ang mga kinaiya kag mga paagi ni Jehova sa paghimo sing mga butang. Epektibo ilabi na amo ang ‘daw ano pa ka labaw’ nga pangatarungan nga gingamit kon kaisa ni Jesus. (Lucas 11:13; 12:24) Ini nga sahi sang pangatarungan may mas madalom nga epekto kon may duha ka butang nga ginapatuhay. Agod ibuyagyag ang pagkadirasonable sang doktrina nga kalayuhon nga impierno, mahimo kita makasiling: ‘Wala sing mahigugmaon nga amay ang magasilot sa iya anak paagi sa pagbutang sa kamot sang iya anak sa kalayo. Daw ano pa ka makangilil-ad ang ideya tuhoy sa kalayuhon nga impierno para sa aton mahigugmaon nga langitnon nga Amay!’ (Jeremias 7:31) Sa pagtudlo nga si Jehova nagaulikid sa iya mga alagad subong mga indibiduwal, makasiling kita: ‘Kon kilala ni Jehova sa ngalan ang tagsa sa binilyon ka bituon, daw ano pa nga magaulikid sia sa mga tawo nga nagahigugma sa iya kag ginbakal sa hamili nga dugo sang iya Anak!’ (Isaias 40:26; Binuhatan 20:28) Ining makapakumbinsi nga pangatarungan magabulig sa aton nga malab-ot ang tagipusuon sang iban.

Nagakaigo nga mga Ilustrasyon

16. Ngaa ang mga ilustrasyon mapuslanon sa pagpanudlo?

¹⁶ Ang epektibo nga mga ilustrasyon daw panimpla nga nagapanamit sang aton pagpanudlo sa iban. Ngaa ang mga ilustrasyon mapuslanon sa pagpanudlo? Ang isa ka edukador nagsiling: “Ang paghunahuna sa isa ka butang nga wala gid sing ideya kon ano ini amo ang isa sang labing mabudlay nga mahimo sang tawo.” Ang mga ilustrasyon nagapatudok sing makahulugan nga mga laragway sa aton hunahuna, kag nagabulig sa aton nga mahangpan sing maayo ang bag-ong mga ideya. Si Jesus tumalagsahon sa paggamit niya sing mga ilustrasyon. (Marcos 4:​33, 34) Binagbinagon naton kon paano naton magamit ini nga paagi sang pagpanudlo.

17. Ano ang apat ka butang nga kinahanglan agod ang ilustrasyon mangin epektibo?

¹⁷ Ano ang kinahanglan agod ang ilustrasyon mangin epektibo? Una, dapat nga bagay ini sa aton tumalambong, nga ginagamit ang mga sirkunstansia nga madali mahangpan sang aton mga tagpalamati. Madumduman naton nga si Jesus naggamit sing madamo nga ilustrasyon gikan sa adlaw-adlaw nga pagkabuhi sang iya mga tagpalamati. Ikaduha, ang ilustrasyon dapat pareho sa punto nga ginapadaku. Kon ang pagpaanggid indi nagakaigo, ang ilustrasyon mahimo lamang magpagumon sa aton mga tagpalamati. Ikatlo, ang ilustrasyon wala sing madamong di-kinahanglanon nga mga detalye. Dumduma nga si Jesus naghatag sing kinahanglanon nga mga detalye apang wala niya ginlakip ang mga di-kinahanglanon. Ikap-at, kon nagagamit sing ilustrasyon, dapat naton pat-uron nga maathag ang aplikasyon. Kay kon indi, indi mahangpan sang iban kon paano iaplikar ang punto sa ilustrasyon.

18. Paano kita makahunahuna sing nagakaigo nga mga ilustrasyon?

 ¹⁸ Paano kita makahunahuna sing nagakaigo nga mga ilustrasyon? Indi kinahanglan nga maghunahuna kita sing malawig kag detalyado nga mga sugilanon. Ang malip-ot nga mga ilustrasyon epektibo gid. Tinguhai lamang nga maghunahuna sing mga halimbawa sa punto nga ginahambalan. Halimbawa, ginahambalan naton ang pagpatawad sang Dios, kag luyag naton iilustrar ang punto sa Binuhatan 3:​19, diin nagasiling nga ‘ginapanas,’ ukon ginadula, ni Jehova ang aton mga kasaypanan. Maathag na ini, apang anong matuod nga halimbawa ang mahimo naton magamit agod iilustrar ang punto​—⁠isa ka inugpanas? isa ka espongha? Mahimo kita makasiling: ‘Kon ginapatawad ni Jehova ang aton mga sala, ginapanas niya ini subong daw nagagamit sing espongha (ukon inugpanas).’ Mahangpan gid naton ang punto sining simple nga ilustrasyon.

19, 20. (a) Diin kita makakita sing maayo nga mga ilustrasyon? (b) Ano ang pila ka halimbawa sang epektibo nga mga ilustrasyon nga ginbalhag na sa aton mga literatura? (Tan-awa man ang kahon.)

¹⁹ Diin ka makakita sing nagakaigo nga mga ilustrasyon, lakip na ang matuod nga mga halimbawa? Pangitaa ini sa imo mismo kabuhi ukon sa lainlain nga ginhalinan kag inagihan sang mga masigkatumuluo. Ang mga ilustrasyon mahimo makuha sa madamong iban pa nga mga ginhalinan, lakip na ang buhi kag di-buhi nga mga butang, mga pagkabutang sa balay, ukon bag-o nga hitabo nga nahibaluan sang komunidad. Ang isa ka epektibo nga paagi sa pagpangita sing maayong mga ilustrasyon amo ang pagkaalisto, nga ‘ginapanilagan sing maayo’ ang adlaw-adlaw nga mga kahimtangan sa palibot naton. (Binuhatan 17:​22, 23) Ang isa ka reperensia tuhoy sa pagpamulongpulong publiko nagapaathag: “Ang humalambal nga nagapanilag sa pagkabuhi sang tawo kag sa lainlain nga ginahimo sini, nagapakighambal sa tanan nga sahi sang tawo, nagausisa sing maayo sa mga butang kag nagapamangkot tubtob mahangpan niya ini, makatipon sing madamo nga materyal nga magamit subong ilustrasyon kag makabulig sa iya sing daku kon kinahanglan.”

²⁰ May iban pa nga bugana nga makuhaan sing epektibo nga mga ilustrasyon​—⁠Ang Lalantawan, Magmata!, kag iban pa nga mga literatura nga ginabalhag sang mga Saksi ni Jehova. Madamo ka sing matun-an paagi sa pagpanilag kon paano ginagamit sini nga mga publikasyon ang mga ilustrasyon.⁠ * Halimbawa, binagbinaga ang ilustrasyon nga gingamit sa parapo 11 sang kapitulo 17 sang Ihibalo nga libro. Ginapaanggid sini ang nanuhaytuhay nga personalidad sa kongregasyon sa lainlain nga mga salakyan nga nagalakbay sa dalanon upod sa imo. Ngaa epektibo ini? Talupangda nga napasad ini sa adlaw-adlaw nga mga sirkunstansia, kaanggid gid ini sa punto nga ginapadaku, kag ang aplikasyon maathag. Mahimo naton gamiton ang nabalhag na nga mga ilustrasyon sa aton pagpanudlo, ayhan ginapahisanto ini sa mga kinahanglanon sang isa ka estudyante sa Biblia ukon ginapasibu ini agod magamit sa pamulongpulong.

21. Ano ang mga padya sang isa ka epektibo nga manunudlo sang Pulong sang Dios?

²¹ Madamo gid ang padya sang isa ka epektibo nga manunudlo. Kon kita nagapanudlo, nagapaambit kita sa iban; ginagamit naton ang pila sang aton mga kinaiya agod buligan sila. Ini nga paghatag nagapahalipay, kay ang Biblia nagasiling: “May kapin nga kalipay sa paghatag sangsa pagbaton.” (Binuhatan 20:35) Para sa mga manunudlo sang Pulong sang Dios, makalilipay gid mahibaluan nga ginapaambit naton ang butang nga may matuod kag dayon nga kabilihanan​—⁠ang kamatuoran tuhoy kay Jehova. May yara man kita kaayawan sa pagkahibalo nga ginailog naton ang Daku nga Manunudlo, si Jesucristo.

[Mga nota]

Madumduman Mo Bala?

• Paano kita makatudlo sing simple kon nagadumala sing pagtuon sing Biblia sa puluy-an? kon nagahatag sing pamulongpulong sa kongregasyon?

• Paano naton epektibo nga magamit ang mga pamangkot kon nagabantala sa mga pamalay?

• Paano naton magamit ang lohiko nga pangatarungan agod ipatalupangod ang mga kinaiya kag mga paagi ni Jehova sa paghimo sing mga butang?

• Diin kita makakita sing nagakaigo nga mga ilustrasyon?

[Mga Pamangkot sa Pagtinuon]

 [Kahon/Retrato sa pahina 23]

Nadumduman Mo Bala Ini nga mga Ilustrasyon?

Ang masunod amo ang pila lamang ka epektibo nga mga ilustrasyon. Ngaa indi mo tan-awon ang reperensia kag talupangdon kon paano ang ilustrasyon nakabulig sa pagpadaku sa punto nga ginabinagbinag?

• Kaangay sang mga naga-trapeze kag sang isa ka paris nga naga-ice skating, ang mga nagapanikasog nga makatukod sing maayo nga pag-asawahay nagadepende gid sa pagpangita sing isa ka maayo nga kaparis.​—⁠Ang Lalantawan, Mayo 15, 2001, pahina 16.

• Ang pagpabutyag sang imo balatyagon kaangay sang paghaboy sing bola. Maitsa mo ini sing mahinay ukon mahaboy ini sing makusog amo nga makahalit ini.​—⁠Magmata!, Enero 8, 2001, pahina 10.

• Ang pagtuon sa pagpabutyag sing gugma kaangay sa pagtuon sing bag-o nga lenguahe.​—⁠Ang Lalantawan, Pebrero 15, 1999, pahina 18, 22-3.

• Ang napanubli nga sala mapaanggid sa matabo kon ang file sang kompyuter masudlan sing virus.​—⁠Is There a Creator Who Cares About You?, pahina 156.

• Ang espiritismo mapuslanon sa mga demonyo subong nga ang paon mapuslanon sa mga mangangayam. Nagaganyat ini sa mga dalakpon.​—⁠Ang Ihibalo nga Nagadul-ong sa Kabuhi nga Walay Katapusan, pahina 111.

• Ang pagluwas ni Jesus sa mga kaliwat ni Adan mapaanggid sa isa ka manggaranon nga nagbayad sa utang sang kompanya (nga gin-utang sang di-bunayag nga manedyer) kag nagbukas liwat sang pabrika, sa amo nakabulig sa madamo nga empleyado.​—⁠Ang Lalantawan, Pebrero 15, 1991, pahina 13.

• Subong nga ang mga mahuyugon sa taliambong magapanikasog gid nga mapasag-uli ang halos naguba na nga obra-maestra, si Jehova magapatawad man sang aton mga di-kahimpitan, magatan-aw sang aton maayo nga kinaiya, kag sa ulihi magapasag-uli sa aton sa himpit nga kahimtangan nga nadula ni Adan.​—⁠Ang Lalantawan, Pebrero 15, 1990, pahina 22.

[Mga retrato sa pahina 20]

Ang matuod nga mga Cristiano mga manunudlo sang Pulong sang Dios

[Retrato sa pahina 21]

Magamit sang mga gulang ang mga pamangkot agod buligan ang mga masigkatumuluo nga makatigayon sing lugpay gikan sa Pulong sang Dios