‘Magpinatawaray sa Isa kag Isa’

NAGAPATI ka bala nga ginpatawad sang Dios ang imo mga sala? Sa Estados Unidos, halos kalabanan nga adulto ang nagapati sini. Si Dr. Loren Toussaint, ang nanguna sa ginhiwat nga pagtuon sa University of Michigan Institute for Social Research, nagreport nga sa 1,423 ka ginpamangkot nga Amerikano, mga 80 porsiento sang mga adulto nga kapin sa 45 anyos ang nagsiling nga ginpatawad sila sang Dios.

Apang, makawiwili nga 57 porsiento lamang sadtong ginpamangkot ang nagsiling nga ginpatawad nila ang iban. Ini nga estadistika nagapahanumdom sa aton sang pinamulong ni Jesus sa Sermon sa Bukid: “Kon patawaron ninyo ang mga tawo sang ila mga paglapas, ang inyo langitnon nga Amay magapatawad man sang inyo paglapas; apang kon indi ninyo pagpatawaron ang mga tawo sang ila mga paglapas, ang inyo Amay indi man magpatawad sang inyo mga paglapas.” (Mateo 6:​14, 15) Huo, nasandig ang pagpatawad sa aton sang Dios, sing bahin, sa kahanda naton nga magpatawad sa iban.

Ginpahanumdom ni apostol Pablo ang mga Cristiano sa Colosas tuhoy sini nga prinsipio. Ginpalig-on niya sila: “Padayon kamo nga magpinaumuray sa isa kag isa kag hilway nga magpinatawaray sa isa kag isa kon ang isa may inugsumbong batok sa isa. Subong nga si Jehova hilway nga nagapatawad sa inyo, amo man ang himuon ninyo.” (Colosas 3:13) Matuod, indi ini pirme mahapos himuon. Halimbawa, kon ikaw ang ginahambalan sing wala pasunaid ukon indi malulo nga mga pinamulong, mahimo mabudlay nga pabay-an na lang ini.

Apang, madamo ang mga benepisyo sa pagpatawad. Si Dr. David R. Williams, nga isa ka sosyologo, nagsiling tuhoy sa iya pagpanalawsaw: “Nasapwan namon ang mabakod nga kaangtanan sa ulot sang pagpatawad sa iban kag maayong panghunahuna sa tunga sang medyo may edad na kag mas gulanggulang nga mga Amerikano.” Nahisanto ini sa mga pinamulong sang maalam nga si Hari Solomon, nga nagsulat mga 3,000 ka tuig na ang nagligad: “Ang malinong nga tagipusuon amo ang kabuhi sang undanon nga organismo.” (Hulubaton 14:30) Bangod ang mapinatawaron nga espiritu nagapauswag sing maayong kaangtanan sa Dios kag sa aton isigkatawo, may malig-on kita nga rason nga handa nga magpinatawaray sa isa kag isa sing tinagipusuon.​​—⁠Mateo 18:35.