Sugilanon sang Kabuhi

“Wala ako sing Bag-uhon!”

PANUGIRON NI GLADYS ALLEN

Ginapamangkot ako kon kaisa, “Kon suliton mo ang imo kabuhi, ano ang imo bag-uhon?” Maminatud-on ako nga makasabat, “Wala ako sing bag-uhon!” Ipaathag ko kon ngaa nasiling ko ini.

SANG tig-ilinit sang 1929, sang dos anyos ako, isa ka dalayawon nga butang ang natabo sa akon amay nga si Matthew Allen. Nakatigayon sia sing pulyeto nga Millions Now Living Will Never Die!, nga ginbalhag sang International Bible Students, subong amo ang pagtawag anay sa mga Saksi ni Jehova. Pagkatapos mabasa sing malangkagon ang pila ka pahina, nagtuaw si Tatay, “Amo ini ang pinakamaayo nga impormasyon nga akon nabasa!”

Wala magdugay pagkatapos sadto, nakatigayon si Tatay sing iban pa nga mga publikasyon sang mga Estudyante sang Biblia. Ginsugid niya gilayon ang iya natun-an sa tanan niya nga kaingod. Apang, wala sing kongregasyon sang mga Saksi ni Jehova sa amon banwa. Bangod nakita ni Tatay nga kinahanglanon namon ang regular nga Cristianong pagpakig-upod, ginsaylo niya ang amon pamilya sa Orangeville, Ontario, Canada, sang 1935 bangod may isa ka kongregasyon didto.

Sadto, wala pa ginapalig-on ang mga bata nga magtambong sa mga miting sa kongregasyon; sa masami yara lamang sila sa guwa sang duog tilipunan kag nagahinampang tubtob matapos ang miting. Indi ini naluyagan ni Tatay. Naghunahuna sia, “Kon maayo ang mga miting para sa akon, maayo man ini para sa akon kabataan.” Gani bisan bag-uhan pa lamang, ginsilingan ni Tatay ang akon mga magulang nga sanday Bob, Ella kag Ruby, kag ako nga mag-upod sa mga hamtong sa mga miting, kag amo ina ang ginhimo namon. Wala magdugay, ang kabataan sang iban nga mga Saksi nagtambong man. Ang pagtambong kag pagkomento sa mga miting nangin importante gid nga bahin sang amon kabuhi.

 Ginhigugma ni Tatay ang Biblia, kag kanami gid sa iya magdrama sang mga sugilanon sa Biblia. Bangod sini, napatudok niya sa amon lamharon nga mga tagipusuon ang importante nga mga leksion nga tubtob karon nalipay gid ako gihapon sa pagdumdom. Ang isa sa nadumduman ko amo nga ginapakamaayo ni Jehova ang mga matinumanon sa iya.

Gintudluan man kami ni Tatay kon paano gamiton ang Biblia sa pagpangapin sang amon pagtuo. Masami namon ginahimo ini nga isa ka hampang. Magasiling si Tatay, “Nagapati ako nga kon mapatay ako magakadto ako sa langit. Karon pamatud-i nga indi ako mapalangit.” Nian, pangitaon namon ni Ruby sa concordance ang mga kasulatan nga makapamatuod nga butig sa sina nga panudlo. Pagkatapos namon mabasa ang mga kasulatan nga amon nakita, masiling naman si Tatay, “Maayo ina, apang indi ako gihapon kumbinsido.” Sa amo mangita naman kami liwat sing mga teksto sa concordance. Masami ini nagalawig sing inoras tubtob makumbinsi na si Tatay sa amon mga sabat. Subong resulta, nasangkapan kami ni Ruby sing maayo sa pagpaathag sang amon pagtuluuhan kag sa pagpangapin sang amon pagtuo.

Paglandas sa Kahadlok sa Tawo

Walay sapayan sang maayo nga paghanas sa amon puluy-an kag sa mga miting sa kongregasyon, ginabaton ko nga kon kaisa mabudlay mangin isa ka Cristiano. Kaangay sang kalabanan nga pamatan-on, indi ko luyag mangin tuhay sa iban, ilabi na sa akon mga kaklase. Ang temprano nga pagtilaw sa akon pagtuo amo ang ginatawag nga mga information march.

Ang tulumuron sini amo nga ang isa ka grupo sang mga kauturan magalakat sing hinayhinay sa mayor nga mga dalan sang banwa nga may dala nga mga plakard kag mga islogan. Nagakilalahay ang tanan nga tawo bangod mga 3,000 lamang ang populasyon sang amon banwa. Sa isa ka information march, ako ang pinakaulihi sa linya nga nagadala sing plakard nga “Ang Relihion Isa ka Siod kag Isa ka Pagpangdaya.” Nakita ako sang pila sang akon mga kabutho, kag naglinya man sila dayon sa akon likuran, nga nagakanta “God Save the King.” (pungsudnon nga ambahanon sang Canada). Paano ko ini nalandas? Nangamuyo ako sing hugot para sa kabakod agod makapadayon. Sang natapos ang martsa, nagkadto ako sa Kingdom Hall agod iuli ang plakard kag magpauli. Apang, ang nagadumala nagsiling sa akon nga malapit na lang magsugod ang isa pa ka martsa kag nagakinahanglan sila sang isa pa ka tawo nga magdala sang isa ka plakard. Sa amo nagguwa ako liwat, kag nangamuyo sing hugot pa gid. Apang, sa sini nga tion, kinapoy na ang akon mga kaklase kag nagpalauli na. Ang akon mga pangamuyo para sa kabakod nangin mga pangamuyo sang pagpasalamat!​​—⁠Hulubaton 3:5.

Ang bug-os tion nga mga ministro ginaabiabi pirme sa amon puluy-an. Masinadyahon sila nga grupo kag makalilipay nga abiabihon. Sa akon madumduman, pirme ginasiling sang amon mga ginikanan nga ang bug-os tion nga ministeryo amo gid ang pinakamaayo nga karera para sa amon.

Bangod sang ila pagpalig-on, sang 1945, nagsugod ako sa akon karera sa bug-os tion nga ministeryo. Gin-updan ko sang ulihi ang akon utod nga babayi nga si Ella, sa iya pagpayunir sa London, Ontario. Didto ko naeksperiensiahan ang isa ka bahin sang pag-alagad nga abi ko anay indi ko mahimo. Ang mga kauturan masami nagatanyag sing mga kopya sang Ang Lalantawan kag Consolation (Magmata! sa karon) sa mga kustomer sa mga lamesa sang mga ilimnan.  Maayo lang kay ginahimo ini kon Sabado sang hapon, sa amo makapangamuyo pa ako sa bug-os nga semana para sa kaisog agod mahimo ini! Indi mahapos ini nga hilikuton para sa akon, apang makapaladya gid ini.

Sa pihak nga bahin, natun-an ko man kon paano itanyag ang pinasahi nga mga guwa sang Consolation tuhoy sa paghingabot sa aton mga kauturan sa mga kampo konsentrasyon sang Nazi, ilabi na ang pagpakigsugilanon sa importante nga mga negosyante sa Canada, lakip ang mga presidente sang dalagku nga mga korporasyon. Sa nagligad nga mga tinuig, nasapwan ko nga si Jehova nagasakdag gid sa aton basta magsandig lamang kita sa iya para sa kabakod. Subong sang pirme ginasiling ni Tatay, ginapakamaayo ni Jehova ang mga matinumanon sa Iya.

Pagbaton sa Imbitasyon nga Mag-alagad sa Quebec

Sang Hulyo 4, 1940, gindumili ang hilikuton sang mga Saksi ni Jehova sa Canada. Sang ulihi, ginkuha ang pagdumili, apang ginhingabot kami gihapon sa Romano Katoliko nga probinsia sang Quebec. Ang isa ka pinasahi nga kampanya nga naggamit sing tract nga Quebec’s Burning Hate for God and Christ and Freedom Is the Shame of All Canada nga may matigdas nga pinamulong ginhimo agod ipatalupangod ang indi maayo nga pagtratar sa aton mga kauturan didto. Si Nathan H. Knorr, isa ka katapo sang Nagadumala nga Hubon sang mga Saksi ni Jehova, nakigsugilanon sa ginatos ka payunir sa siudad sang Montreal agod ipaathag kon ano ang mangin epekto sang amon pagahimuon. Ginsilingan kami ni Utod Knorr nga kon makigbahin kami sa kampanya, mahimo maaresto kami kag mabilanggo. Amo gid sina ang natabo! Sa pagligad sang tion, naaresto ako sing 15 ka beses. Kon magguwa kami sa pag-alagad sa latagon, ginapat-od na nga daan namon nga may dala kami nga sipilyo kag husay engkaso magpalipas kami sing gab-i sa bilangguan.

Sang primero, masami kami nagapanghikot kon gab-i agod indi matalupangdan. Masami ako nagadala sing ekstra nga suplay sang mga tract sa isa ka bag nga ginauribay ko sa akon liog kag ginatakpan ko sang akon dyaket. Nagabulto ang bag nga puno sing mga tract, amo nga daw nagabusong ako kon tulukon. Nangin bentaha ini para sa akon kon nagasakay sa nagaginutok nga tren pakadto sa teritoryo. Madamo nga beses nga ang isa ka mabuot nga lalaki nagtindog agod papungkuon ang “nagabusong” nga babayi.

Sa pagligad sang panahon, nagapanagtag na kami sa adlaw. Nagabilin kami sing tract sa tatlo ukon apat ka ganhaan, kag dayon nagasaylo kami sa iban nga teritoryo. Sa masami, nagamadinalag-on ini. Apang, kon mahibaluan sang kura paroko nga yara kami sa sina nga lugar, paabuton gid namon ang problema. Sang isa ka bes, ginsugyot sang isa ka pari ang guban sang 50 ukon 60 ka adulto kag kabataan nga habuyon kami sing kamatis kag itlog. Nagdangop kami sa balay sang isa ka Cristianong utod nga babayi, diin dapat kami magpalipas sing gab-i nga nagatulog sa salog.

Kinahanglanon gid ang mga payunir agod magbantala sa mga tawo nga nagahambal sing Pranses sa Quebec, gani sang Disiembre 1958, nagtuon kami sang akon utod nga babayi nga si Ruby sing Pranses nga hambal. Pagkatapos sina gin-asayn kami sa madamo nga duog sa probinsia nga Pranses ang hambal. May pinasahi kami nga eksperiensia sa kada asaynment. Sa isa ka duog, nagpamalaybalay kami sing otso oras kada adlaw sa sulod sang duha ka tuig nga wala gid sing bisan isa nga nag-atubang sa amon! Nagapalapit lamang ang mga tawo sa ila ganhaan agod maglingling, nian ginatakop dayon ang venetian blinds. Apang wala kami mangampo. Karon, may duha na ka nagauswag nga kongregasyon sa sini nga banwa.

Ginsakdag ni Jehova sa Tanan nga Paagi

Nangin espesyal payunir kami sang 1965. Sa isa ka asaynment namon bilang espesyal payunir, nahangpan namon ang bug-os nga kahulugan sang ginsiling ni Pablo sa 1 Timoteo 6:8: “Kon may pagkaon kag panapton, mangin kontento na kita sa sining mga butang.” Kinahanglan badyeton namon sing maayo ang amon kuwarta para sa amon galastuhan. Sa amo ginapain namon ang kuwarta para sa heater, arkila, koryente, kag pagkaon. Pagkatapos namon mapartida ang kuwarta, 25 sentimos na lamang ang mabilin sa amon sa sulod sang isa ka bulan.

Bangod limitado lamang ang amon pundo, ginapaandar namon ang heater sa pila lamang ka oras sa gab-i. Sa amo ang temperatura sa amon kuwarto wala gid nagataas sa 15 degrees Celsius kag masami nga mas matugnaw pa. Ti, sang isa  ka adlaw nagduaw sa amon ang anak nga lalaki sang isa ka estudyante ni Ruby sa Biblia. Mahimo ginsugiran niya ang iya iloy nga tuman ka tugnaw sa amon, kay pagkatapos sadto ginapadalhan kami sang iya iloy sing napulo ka dolyar kada bulan agod ibakal sing langis para mapaandar namon ang heater sa tanan nga tion. Wala kami magbatyag nga ginadingutan sa bisan ano nga paagi. Indi kami manggaranon, apang natigayon namon pirme ang amon mga kinahanglanon. Para sa amon ang mabilin nga sobra isa ka pagpakamaayo. Daw ano gid ka matuod ang ginsiling sa Salmo 37:25: “Wala ako makakita nga ang bisan sin-o nga matarong ginpabayaan, ukon ang iya kaliwat nga nagapakilimos sing tinapay”!

Walay sapayan sang mga pagpamatok nga amon gin-atubang, nalipay ako nga makita ang madamo nga tawo nga akon gindumalahan sang mga pagtuon sa Biblia nga nakatuon sing kamatuoran. Ang iban nagpili man sa bug-os tion nga ministeryo subong karera, nga naghatag sa akon sing pinasahi nga kalipay.

Madinalag-on nga Gin-atubang ang Bag-o nga mga Pagtilaw

Ang Cornwall, Ontario, amo ang amon nangin bag-o nga asaynment sang 1970. Mga isa ka tuig pagkatapos sang amon pag-abot sa Cornwall, nagbalatian si Nanay. Nagtaliwan na si Tatay sang 1957, kag nagbulosbulos kami sang akon duha ka utod nga babayi sa pag-atipan kay Nanay tubtob napatay sia sang 1972. Ang mga kaupod namon nga espesyal payunir, sanday Ella Lisitza kag Ann Kowalenko nangin makapalig-on nga impluwensia kag mahigugmaon nga suporta sini nga tion. Gintatap nila ang amon mga estudyante sa Biblia kag iban pa nga katungdanan samtang wala kami. Matuod gid ang pinamulong sa Hulubaton 18:24: “May abyan nga mahirop pa sangsa isa ka utod”!

Ang kabuhi puno gid sing mabudlay nga mga pagtilaw. Paagi sa mahigugmaon nga bulig ni Jehova, naatubang ko ini tanan. Malipayon ako gihapon nga nagaalagad sing bug-os tion. Si Bob, nga napatay sang 1993, naghinguyang sing kapin sa 20 ka tuig sa payunir nga hilikuton, lakip ang 10 ka hamili nga tuig sang pagpayunir upod sa iya asawa nga si Doll. Ang akon magulang nga babayi nga si Ella, nga nagtaliwan sang Oktubre 1998, nagpayunir sing kapin sa 30 ka tuig kag nagpakita gid pirme sang espiritu sang isa ka payunir. Sang 1991, ang akon magulang nga babayi nga si Ruby, nasayasat nga may kanser. Apang, gingamit niya ang iya limitado nga kusog sa pagbantala sing maayong balita. Masinadyahon gihapon sia tubtob napatay sia sang aga sang Septiembre 26, 1999. Bisan  wala na ang akon mga utod nga babayi, may yara ako espirituwal nga pamilya sang mga kauturan agod buligan ako nga magpabilin nga masinadyahon.

Kon balikan ko ang akon kabuhi, ano ang akon bag-uhon? Wala ako makapamana, apang ginbugayan ako sing mahigugmaon nga mga ginikanan, isa ka utod nga lalaki, kag mga utod nga babayi nga nag-una sang kamatuoran sa ila kabuhi. Ginakalangkagan ko nga makita sila liwat sa dili madugay sa pagkabanhaw. Mabakod gid ang akon paglaum amo nga mabatyagan ko na ang hakos sang akon amay kag makita ang luha sang akon iloy samtang nagahaksanay kami sing hugot. Sanday Ella, Ruby, kag Bob magatumbo sa kalipay.

Samtang wala pa ina, determinado gid ako nga padayon nga gamiton ang tanan ko nga nabilin nga kapagros kag kusog agod dayawon kag padunggan si Jehova. Ang bug-os tion nga payunir nga pag-alagad isa ka dalayawon kag makapaladya nga kabuhi. Kasubong ini sang ginsiling sang salmista tuhoy sa mga nagalakat sa mga dalanon ni Jehova: “Mangin malipayon ka kag mangin maayo ang imo kahimtangan.”​​—⁠Salmo 128:​1, 2.

[Mga retrato sa pahina 26]

Ginhigugma ni Tatay ang Biblia. Gintudluan niya kami kon paano gamiton ini sa pagpangapin sa amon pagtuo

[Retrato sa pahina 28]

Wala pa tuo: Si Ruby, ako, si Bob, si Ella, si Nanay, kag si Tatay sang 1947

[Retrato sa pahina 28]

Sa una nga raya, wala pa tuo: Ako, si Ruby, kag si Ella sa isa ka Distrito nga Kombension, 1998