“Kari sa Akon, . . . kag Paumpawan Ko Kamo”

Ang mga Pamatan-on nga Kaangay sang Nagaparepresko nga mga Tulo sang Tun-og

WALA sing duhaduha nga ginlakip ni Jesucristo ang iya pamatan-on nga mga sumulunod sang magsiling sia: “Kari sa akon, . . . kag paumpawan ko kamo.” (Mateo 11:28) Sang gindala sang mga tawo ang ila magagmay nga kabataan sa iya, gintinguhaan sang iya mga disipulo nga punggan sila. Apang si Jesus nagsiling: “Pabay-i ninyo ang mga bata nga magpalapit sa akon; indi sila pagpunggi.” “Ginkugos [pa gani ni Jesus] ang mga bata kag ginpakamaayo sila.” (Marcos 10:14-16) Wala duhaduha nga ginpakahamili ni Jesus ang mga bata.

Ang Biblia nagasugid tuhoy sa mga lamharon nga lalaki kag babayi, subong man sa mga pamatan-on kag kabataan, nga nagpahamtang sing maayo nga mga halimbawa sa pag-alagad sa Dios. Gintagna sa tulun-an sang Salmo ang “hubon sang mga pamatan-on” nga subong sang makaparepresko nga mga tulo sang tun-og. Nagasiling man ini tuhoy sa “mga pamatan-on nga lalaki” kag “mga ulay” nga nagadayaw sang ngalan ni Jehova.—Salmo 110:3; 148:12, 13.

Isa ka Duog Diin ang mga Pamatan-on Nagauswag

Ang pagpaanggid sa mga pamatan-on sa mga tulo sang tun-og nagakaigo, kay ang tun-og ginaangot sa kabuganaan kag pagpakamaayo. (Genesis 27:28) Ang mga tulo sang tun-og malum-ok kag nagaparepresko. Sa sining tion sang presensia ni Cristo, kinabubut-on kag malangkagon nga ginagamit sang madamo gid nga pamatan-on nga Cristiano ang ila kaugalingon. Kaangay sang nagaparepresko nga mga tulo sang tun-og, madamo nga pamatan-on nga lalaki kag babayi ang malipayon nga nagaalagad sa Dios kag nagabulig sa ila mga masigkasumilimba.—Salmo 71:17.

Ang Cristianong mga pamatan-on indi lamang makarepresko sa iban; sila mismo narepreskuhan sa ila pag-alagad. Ang organisasyon sang Dios isa ka duog diin mahimo sila mag-uswag. Bangod nagahupot sing mataas nga talaksan sa moral, natigayon sang mga pamatan-on nga lalaki kag babayi ang isa ka suod nga kaangtanan sa Dios. (Salmo 119:9) Sa sulod sang kongregasyon, nagapakigbahin man sila sa maayo nga mga hilikuton kag nakakita sing maayo nga mga abyan—mga butang nga nagaamot sa makaalayaw kag makahulugan nga kabuhi.

‘Isa ka Pag-ayo kag Kaumpawan’

Nabatyagan bala sang Cristianong mga pamatan-on nga kaangay sila sa “mga tulo sang tun-og”? Kilalaha si Tania, isa ka pamatan-on nga aktibo nga nagapakigbahin sa mga hilikuton sang kongregasyon kag malipayon nga nagahinguyang sing kapin sa 70 ka oras kada bulan sa ministeryo. Ano ang iya nabatyagan? “Narepreskuhan ako kag napalig-on,” siling niya. “Ang pagkilala kay Jehova kag ang mangin bahin sang iya dutan-on nga organisasyon isa gid ka ‘pag-ayo kag kaumpawan’ sa akon.”—Hulubaton 3:8.

Si Ariel, isa pa ka pamatan-on nga bug-os tion nga ministro, nagapasalamat sa espirituwal nga pagkaon nga nabaton niya sa  kongregasyon. “Kon magtambong ako sa Cristianong mga miting, mga kombension, kag mga asambleya kag makakaon ako sa espirituwal nga latok ni Jehova, nagapapagsik gid ini sa akon sa espirituwal,” siling niya. “Kag nagapalig-on gid sa akon nga mahibaluan nga sa bug-os nga kalibutan, may mga masigkamanugpangabudlay ako.” Nagalaragway sa pinakatuburan sang kaumpawan, nagsiling sia: “Makapaumpaw gid nga mangin abyan si Jehova, ilabi na kon mabatian ko ukon makita ang grabe nga mga epekto sining kalibutan sa mga tawo.”—Santiago 2:23.

Sa edad nga 20 anyos, si Abishai nangin isa ka bug-os tion nga ebanghelisador kag ministeryal nga alagad sa kongregasyon. Ginalaragway niya ang iya eksperiensia sa sining mga pulong: “Napapagsik ako bangod nahibaluan ko kon paano atubangon ang madamo nga problema sang mga pamatan-on karon. Ang kamatuoran gikan sa Biblia nakabulig sa akon nga isentro ang igtalupangod sa dapat ko himuon agod maalagad si Jehova sing bug-os kalag.”

Sang bag-o pa lang magtin-edyer si Antoine, madali sia maakig. Isa ka bes ginlampusan niya sing siya ang iya kabutho, kag ginbuno niya sing lapis ang isa pa. Indi gid makaparepresko si Antoine! Apang ang mga instruksion gikan sa Biblia nagpabag-o sang iya batasan. Sa karon nga 19 anyos na sia kag isa ka ministeryal nga alagad kag bug-os tion nga ministro sa kongregasyon, sia nagsiling: “Nagapasalamat ako kay Jehova nga gintugutan niya ako nga makatigayon sing ihibalo tuhoy sa iya kag ginbuligan ako nga makita ang kinahanglanon nga magpakita sing pagpugong sa kaugalingon kag bag-uhon ang akon dalanon. Bangod sini, nalikawan ko ang madamo nga problema.”

Natalupangdan sang iban ang makaparepresko nga panimuot sang mga pamatan-on nga Cristiano. Si Matteo isa ka pamatan-on nga Saksi sa Italya. Namat-od ang iya manunudlo nga ang bisan sin-o sa klase nga magpamuyayaw pagamultahan. Pagligad sang pila ka tion nangabay ang mga kabataan nga dulaon ini nga pagsulundan bangod, siling nila, “imposible nga indi magpamuyayaw.” “Apang,” paathag ni Matteo, “nagsiling ang manunudlo nga indi ini matuod, kag gingamit niya ako, nga isa sang mga Saksi ni Jehova, subong halimbawa, kag gindayaw niya ako sa atubangan sang bug-os nga klase tungod sang akon matinlo nga mga hambal.”

Sa isa ka magamo nga hulot-klasehan sa Thailand, gintawag sang manunudlo ang 11-anyos nga si Racha nga magtindog sa atubangan sang klase kag gindayaw sia sa iya batasan, nga nagasiling: “Ngaa indi ninyo sia pag-ilugon? Maukod sia sa iya pagtuon kag mabuot.” Dayon ginsilingan niya ang mga estudyante: “Sa banta ko dapat kamo mangin isa sang mga Saksi ni Jehova, kaangay ni Racha, agod mangin maayo ang inyo paggawi.”

Makalilipay nga makita ang linibo ka Cristianong pamatan-on nga nagakilala sing dugang pa kay Jehova kag nagahimo sang iya kabubut-on. Ginapakita sining maayo nga mga pamatan-on ang kaalam nga masami makita sa may edad na nga mga tawo. Ang Dios makabulig sa ila agod mangin madinalag-on ang ila kabuhi karon kag hatagan sila sing makalilipay nga palaabuton sa nagapakari nga bag-ong kalibutan. (1 Timoteo 4:8) Sa kigas sa espirituwal nga kahimtangan sining sistema sang mga butang karon, nga puno sang di-kontento kag nalugaw-an nga mga pamatan-on, tuhay gid ang makaparepresko nga Cristianong mga pamatan-on!