Padayon nga Buhata ang mga Butang nga Imo Natun-an

“Ang mga butang nga inyo natun-an kag nabaton kag nabatian kag nakita may kaangtanan sa akon, buhata ini; kag ang Dios sang paghidait mangin kaupod ninyo.”—FILIPOS 4:9.

1, 2. Sa kabug-usan, may impluwensia bala ang Biblia sa kabuhi sang mga tawo nga nagakabig sang ila kaugalingon nga relihioso? Ipaathag.

“NAGADUGANG ang Impluwensia Sang Relihion, Apang Nagabuhin ang Impluwensia Sang Moralidad.” Ining ulong dinalan sa pamantalaan nga Emerging Trends nagsumaryo sang mga resulta sang surbe sa bug-os nga pungsod sang Estados Unidos. Maathag nga nagadamo ang mga tawo nga nagasimba kag nagasiling nga ang relihion importante nga bahin sang ila kabuhi. Apang, ang report nagsiling: “Walay sapayan sining talalupangdon nga kadamuon, madamo nga Amerikano ang maathag nga nagapangduhaduha tuhoy sa epekto sang relihion sa kabuhi sang tagsa ka indibiduwal kag sa katilingban subong kabug-usan.”

² Ini nga kahimtangan wala lamang nagakahanabo sa isa ka pungsod. Sa bug-os nga kalibutan, madamo nga tawo ang nagasiling nga ginabaton nila ang Biblia kag relihioso sila, apang wala nagatugot nga maimpluwensiahan sang Kasulatan ang ila kabuhi. (2 Timoteo 3:5) “Ginatahod gihapon naton ang Biblia,” siling sang pangulo sang isa ka grupo sang nagsurbe, “apang kon tuhoy sa paghinguyang sing tion agod basahon ini, tun-an ini kag iaplikar ini—butang na ini nga nagligad.”

3. (a) Paano naapektuhan sang Biblia ang matuod nga mga Cristiano? (b) Paano ginaaplikar sang mga sumulunod ni Jesus ang laygay ni Pablo nga narekord sa Filipos 4:9?

 ³ Apang, para sa matuod nga mga Cristiano, tuhay ang kahimtangan. Nagbag-o ang ila panghunahuna kag pagginawi bangod sang pag-aplikar sa laygay gikan sa Pulong sang Dios. Kag ang bag-o nga personalidad nga ila ginapakita natalupangdan dayon sang iban. (Colosas 3:​5-​10) Para sa mga sumulunod ni Jesus, ang Biblia indi isa ka libro nga ginapayab-ukan lang sa bulutangan. Sa kabaliskaran, ginhambalan ni apostol Pablo ang mga Cristiano sa Filipos: “Ang mga butang nga inyo natun-an kag nabaton kag nabatian kag nakita may kaangtanan sa akon, buhata ini; kag ang Dios sang paghidait mangin kaupod ninyo.” (Filipos 4:9) Wala lamang ginabaton sang mga Cristiano ang kamatuoran sang Pulong sang Dios. Nagapanghikot sila suno sa ila natun-an, kag padayon nga nagaaplikar sa laygay sang Biblia—sa pamilya, sa trabaho, sa kongregasyon, kag sa iban pa nga bahin sang pagkabuhi.

4. Ngaa isa ka hangkat ang pag-aplikar sang mga kasuguan sang Dios?

⁴ Ang pag-aplikar sang mga kasuguan kag mga prinsipio sang Dios indi mahapos. Nagapuyo kita sa isa ka kalibutan nga yara sa gahom ni Satanas nga Yawa, nga gintawag sang Biblia nga “dios sining sistema sang mga butang.” (2 Corinto 4:4; 1 Juan 5:​19) Busa, importante nga magbantay batok sa bisan ano nga butang nga makabalabag sa aton sa paghupot sing integridad kay Jehova nga Dios. Paano kita mangin manughupot sang integridad?

Manguyapot sa “Sulundan sang Makapapagros nga mga Pulong”

5. Ano ang ginapahangop sang pinamulong ni Jesus: “Padayon nga magsunod sa akon”?

⁵ Ang isa ka bahin sang pagbuhat sang aton natun-an amo ang mainunungon nga pagsakdag sa matuod nga pagsimba, walay sapayan sang pagpamatok sang mga di-tumuluo. Kinahanglan ang pagpanikasog agod makabatas. “Kon ang bisan sin-o luyag magsunod sa akon,” siling ni Jesus, “isikway niya ang iya kaugalingon kag pas-anon ang iya usok sang pag-antos kag padayon nga magsunod sa akon.” (Mateo 16:24) Wala magsiling si Jesus nga sundon naton sia sa sulod lamang sang isa ka semana, isa ka bulan, ukon isa ka tuig. Sa baylo, sia nagsiling: “Padayon nga magsunod sa akon.” Ginapakita sang iya mga pinamulong nga ang aton pagkadisipulo indi lamang isa ka tion sa aton kabuhi ukon umalagi nga debosyon nga yara subong kag madula buwas. Ang pagsakdag sing mainunungon sa matuod nga pagsimba nagakahulugan nga dapat kita padayon nga magbatas sa dalanon nga aton ginpili, bisan ano man ang matabo. Paano naton ini mahimo?

6. Ano ang sulundan sang makapapagros nga mga pulong nga natun-an sang unang-siglo nga mga Cristiano gikan kay Pablo?

⁶ Ginpalig-on ni Pablo ang iya masigkamanugpangabudlay nga si Timoteo: “Padayon ka nga manguyapot sa sulundan sang makapapagros nga mga pulong nga nabatian mo sa akon nga may pagtuo kag gugma nga may kaangtanan kay Cristo Jesus.” (2 Timoteo 1:13) Ano ang buot silingon ni Pablo? Ang Griegong tinaga nga gingamit diri nga “sulundan” literal nga nagapatuhoy sa sketch sang isa ka dibuhista. Bisan pa indi detalyado, ini nga drowing may maathag na nga mga linya kag korte agod makita sang mahinantupon nga tumalan-aw ang kabug-usan nga laragway. Sing kaanggid, ang sulundan sang kamatuoran nga gintudlo ni Pablo kay Timoteo kag sa iban wala gindesinyo nga maghatag sing espesipiko nga sabat sa tanan nga mahunahuna nga pamangkot. Apang, ining kabug-usan nga panudlo nagahatag sing bastante nga panuytoy—isa ka balayan, kon sa aton pa—agod ang bunayag sing tagipusuon nga mga tawo makahantop kon ano ang ginapatuman sa ila ni Jehova. Agod mapahamut-an ang Dios, siempre, kinahanglan nila nga magpabilin sa sinang sulundan sang kamatuoran paagi sa pagbuhat sang ila natun-an.

7. Paano makapabilin ang mga Cristiano sa sulundan sang makapapagros nga mga pulong?

⁷ Sang unang siglo, ang mga indibiduwal subong nanday Himeneo, Alejandro, kag Fileto nagpasanyog sang mga ideya nga wala nahisanto sa “sulundan sang makapapagros nga mga pulong.” (1 Timoteo 1:​18-​20; 2 Timoteo 2:​16, 17) Paano malikawan sang unang mga Cristiano nga mapatalang sang mga apostata? Paagi sa pagtuon sing mahalungon sa inspirado nga mga sinulatan kag pag-aplikar sini sa ila kabuhi. Yadtong nagalakat suno sa halimbawa nanday Pablo kag sang iban nga mga matutom nakakilala kag nagsikway sang bisan ano nga butang nga wala nahisanto sa sulundan sang kamatuoran nga gintudlo sa ila. (Filipos 3:​17; Hebreo 5:​14) Sa baylo nga “may balatian  sa hunahuna may kaangtanan sa mga pagpamangkot kag mga binais tuhoy sa mga tinaga,” nagpadayon sila sa husto nga dalanon sang diosnon nga debosyon. (1 Timoteo 6:​3-6) Amo man sini ang aton ginahimo kon padayon naton nga ginabuhat ang mga kamatuoran nga aton natun-an. Daw ano ka makapalig-on sa pagtuo nga makita nga ang minilyon nga nagaalagad kay Jehova sa bug-os nga duta padayon nga nagapanguyapot sing malig-on sa sulundan sang kamatuoran gikan sa Biblia nga gintudlo sa ila.—1 Tesalonica 1:​2-5.

Sikwaya ang “Butig nga mga Sugilanon”

8. (a) Paano ginatinguhaan ni Satanas nga gub-on ang aton pagtuo karon? (b) Ano nga paandam ni Pablo ang masapwan sa 2 Timoteo 4:​3, 4?

⁸ Ginatinguhaan ni Satanas nga gub-on ang aton integridad paagi sa pagsab-ug sing mga pangduhaduha tuhoy sa gintudlo sa aton. Sa karon, subong sang unang siglo, ginatinguhaan nga gub-on sang mga apostata kag sang iban ang pagtuo sang mga inosente. (Galacia 2:4; 5:​7, 8) Kon kaisa ginagamit nila ang media sa pagpalapnag sing ginpatiko nga impormasyon ukon kabutigan pa gani tuhoy sa mga pamaagi kag mga motibo sang katawhan ni Jehova. Nagpaandam si Pablo nga ang pila magatalikod gikan sa kamatuoran. “Magaabot ang isa ka hut-ong sang tion,” sulat niya, “nga indi nila pagbatason ang makapapagros nga panudlo, kundi, nahisanto sa ila kaugalingon nga mga handum, magatipon sila sing mga manunudlo para sa ila kaugalingon agod pakalamon ang ila mga dulunggan; kag italikod nila ang ila mga dulunggan gikan sa kamatuoran, samtang magaliso sila sa butig nga mga sugilanon.”—2 Timoteo 4:3, 4.

9. Ano ayhan ang ginahunahuna ni Pablo sang ginpatuhuyan niya ang “butig nga mga sugilanon”?

⁹ Sa baylo nga magpabilin sa sulundan sang makapapagros nga mga pulong, ang iban naganyat sang “butig nga mga sugilanon.” Ano ining butig nga mga sugilanon? Mahimo nga ginahunahuna ni Pablo ang matahom nga mga leyenda, subong sang masapwan sa apokripal nga tulun-an sang Tobit. * Ang butig nga mga sugilanon mahimo magalakip man sang makatalandog kag haumhaum nga mga huringhuring. Subong man, ang pila—“nahisanto sa ila kaugalingon nga handum”—mahimo nga nalimbungan sang mga nagasakdag sang matinuguton nga pagtamod sa mga talaksan sang Dios ukon sang mga mamulayon sa sadtong nagapanguna sa kongregasyon. (3 Juan 9, 10; Judas 4) Ano man nga mga kasandaran ang nadalahig, maathag nga ginpakamaayo sang iban ang kabutigan sangsa mga kamatuoran sang Pulong sang Dios. Wala magdugay nag-untat sila sa pagbuhat sang mga butang nga ila natun-an, kag nagresulta ini sa ila kapahamakan sa espirituwal.—2 Pedro 3:​15, 16.

10. Ano ang pila ka butig nga mga sugilanon karon, kag paano ginpadaku ni Juan nga dapat maghalong?

¹⁰ Malikawan naton karon ang pagganyat sang butig nga mga sugilanon kon usisaon naton kag pilion ang aton ginapamatian kag ginabasa. Halimbawa, pirme ginapadaku sang media  ang imoralidad. Ginapauswag sang madamo nga tawo ang agnostisismo ukon ang ateismo. Ang nagapangusisa sang mga sinulatan sa Biblia nga mga kritiko nagayubit sa pangangkon sang Biblia nga gin-inspirar ini sang Dios. Kag padayon nga nagapalapnag sang pagpangduhaduha ang modernong adlaw nga mga apostata agod maguba ang pagtuo sang mga Cristiano. Tuhoy sa kaanggid nga katalagman nga ginbutang sang butig nga mga manalagna sang unang siglo, si apostol Juan nagpaandam: “Mga hinigugma, dili ninyo pagtuuhi ang tagsa ka inspirado nga mga hambal, kundi tilawi ang inspirado nga mga hambal agod makita kon bala naghalin ini sa Dios, bangod madamong butig nga mga manalagna ang naglakat na sa kalibutan.” (1 Juan 4:1) Busa kinahanglan maghalong kita.

11. Ano ang isa ka paagi nga matilawan kag mahibaluan kon bala yara pa kita sa pagtuo?

¹¹ Tuhoy sa sini, si Pablo nagsulat: “Padayon ninyo nga tilawan kon yara kamo sa pagtuo.” (2 Corinto 13:5) Ginapalig-on kita sang apostol nga padayon nga tilawan ang aton kaugalingon agod mapat-od kon bala ginasakdag pa gihapon naton ang bug-os nga Cristianong panudlo. Kon nahuyog kita sa pagpamati sa mga nagareklamo, kinahanglan nga analisahon naton ang aton kaugalingon sing mapangamuyuon. (Salmo 139:23, 24) May huyog bala kita nga pangitaan sing sayop ang katawhan ni Jehova? Kon amo, ngaa? Nasaklaw bala kita sa mga pulong ukon mga buhat sang isa? Kon amo, ginatamod bala naton sing balanse ang mga butang? Ang bisan ano nga kapipit-an nga aton ginaatubang sa sini nga sistema sang mga butang temporaryo lamang. (2 Corinto 4:17) Bisan pa kon makaeksperiensia kita sing pila ka pagtilaw sa kongregasyon, ngaa abi mag-untat kita sa pag-alagad sa Dios? Kon naakig kita sa isa ka butang, indi bala nga mas maayo nga himuon naton ang aton masarangan agod matadlong ang mga butang kag nian itugyan ini sa mga kamot ni Jehova?—Salmo 4:4; Hulubaton 3:​5, 6; Efeso 4:​26.

12. Paano nagpahamtang ang mga taga-Berea sing isa ka maayo nga halimbawa para sa aton?

¹² Sa baylo nga mangin mamulayon, huptan naton ang isa ka maayo nga pagtamod sa espirituwal tuhoy sa mga impormasyon nga nabaton naton gikan sa personal nga pagtuon kag sa mga miting sa kongregasyon. (1 Corinto 2:14, 15) Kag sa baylo nga duhaduhaan ang Pulong sang Dios, daw ano ka maalamon kon sundon naton ang panimuot sang mga taga-Berea sang unang siglo nga nag-usisa sing maayo sang Kasulatan! (Binuhatan 17:10, 11) Nian, iaplikar naton ang aton natun-an, nagasikway sang butig nga mga sugilanon kag nagapabilin sa kamatuoran.

13. Paano naton mahimo mapalapnag ang butig nga mga sugilanon sing di-hungod?

¹³ May isa pa ka sahi sang butig nga sugilanon nga dapat naton bantayan. Madamo ang makakulunyag nga mga sugilanon nga ginapalagaw, masami paagi sa E-mail. Maalamon nga mangin mainandamon tuhoy sa sining mga sugilanon, ilabi na kon wala kita makahibalo sang orihinal nga ginhalinan sini nga mga impormasyon. Bisan pa kon ang isa ka eksperiensia ukon sugilanon ginpadala sang isa ka masaligan nga Cristiano, mahimo nga ginpadala man lang ini sa iya. Amo kon ngaa importante nga mangin mainandamon tuhoy sa pagsulit ukon pagpadala sing wala mapat-od nga mga sugilanon. Pat-od nga indi naton luyag suliton  ang “di-diosnon nga mga mito,” ukon “butig nga mga sugilanon nga nagasupak sa kon ano ang balaan.” (1 Timoteo 4:7; New International Version) Bangod may obligasyon man kita nga maghambal sing maminatud-on sa isa kag isa, nagapanghikot kita sing maalamon paagi sa paglikaw sa bisan ano nga butang nga mahimo tunaan nga mapalapnag naton bisan sing di-hungod ang di-matuod nga mga impormasyon.—Efeso 4:​25.

Mga Benepisyo sa Pagbuhat sing Kamatuoran

14. Ano nga mga benepisyo ang matigayon sa pag-aplikar sang mga butang nga natun-an naton gikan sa Pulong sang Dios?

¹⁴ Ang pag-aplikar sang aton natun-an gikan sa personal nga pagtuon sa Biblia kag Cristianong mga miting magadala sing madamong benepisyo. Halimbawa, mahimo masapwan naton nga nag-uswag ang aton kaangtanan sa aton mga masigkatumuluo. (Galacia 6:10) Ang aton panimuot mahimo magaayo pa kon iaplikar naton ang mga prinsipio sa Biblia. (Salmo 19:8) Dugang pa, paagi sa pagbuhat sang aton natun-an, ‘ginapunihan naton ang panudlo sang Dios’ kag mahimo nga maganyat naton ang iban sa matuod nga pagsimba.—Tito 2:​6-​10.

15. (a) Paano nakatipon sing kaisog ang isa ka lamharon sa pagpanaksi sa eskwelahan? (b) Ano ang imo natun-an sa sining eksperiensia?

¹⁵ Lakip sa mga Saksi ni Jehova amo ang madamo nga pamatan-on nga nagaaplikar sang ila natun-an gikan sa personal nga pagtuon sa Biblia kag sa Cristianong mga publikasyon, subong man sang regular nga pagtambong sa mga miting sa kongregasyon. Ang ila maayong pagginawi isa ka epektibo nga panaksi sa mga manunudlo kag sa ila mga kabutho sa eskwelahan. (1 Pedro 2:​12) Binagbinaga si Leslie, 13 anyos nga taga-Estados Unidos. Ginbaton niya nga nabudlayan sia sa paghambal sa mga kabutho tuhoy sa iya pagtuo, apang isa ka adlaw nagbag-o ini. “Ang klase nagahinun-anon kon paano ang mga tawo nagatinguha sa pagbaligya sing mga butang. Isa ka bata nga babayi ang nagbayaw kag ginhimo nga halimbawa ang mga Saksi ni Jehova.” Subong isa ka Saksi, ano ang reaksion ni Leslie? “Ginpangapinan ko ang akon pagtuo,” siling niya, “nga napat-od ko nga nagpakibot sa tanan, bangod hipuson gid ako sa eskwelahan.” Kag ang resulta sang kaisog ni Leslie? “Nakapahamtang ako sang isa ka brosyur kag isa ka tract sa sini nga estudyante bangod may iban pa sia nga pamangkot,” siling ni Leslie. Daw ano ang kalipay ni Jehova kon ang mga lamharon nga nagabuhat sang ila natun-an magtipon sing kaisog sa pagpanaksi sa eskwelahan!​—Hulubaton 27:11; Hebreo 6:​10.

16. Paano nakabenepisyo ang isa ka lamharon nga Saksi sa Teokratikong Eskwelahan Para sa Ministeryo?

¹⁶ Ang isa pa ka halimbawa amo ang iya ni Elizabeth. Sugod sa edad nga pito ka tuig tubtob makatapos sia sa elementarya, ginaagda sining bata nga babayi ang iya mga manunudlo sa Kingdom Hall kon may asaynment sia sa Teokratikong Eskwelahan Para sa Ministeryo. Kon indi makatambong ang isa ka manunudlo, nagapabilin si Elizabeth pagkatapos sang klase kag ginapresentar niya ini sa manunudlo. Sa iya katapusan nga tuig sa hayskul, nagsulat si Elizabeth sing napulo ka pahina nga report tuhoy sa mga benepisyo sang Teokratikong Eskwelahan Para sa Ministeryo kag naghimo sing presentasyon sa isa ka panel sang apat ka manunudlo. Gin-agda man sia nga maghatag sing isa ka modelo nga bahin sa Teokratikong Eskwelahan Para sa Ministeryo, diin ginpili niya ang topiko nga “Ngaa Gintugutan Sang Dios ang Kalautan?” Nakabenepisyo si Elizabeth gikan sa edukasyunal nga programa nga ginahimo sang mga Saksi ni Jehova sa Teokratikong Eskwelahan Para sa Ministeryo. Isa lamang sia sang madamo nga lamharon nga Cristiano nga nagadala sing kadayawan kay Jehova paagi sa pagbuhat sang mga butang nga ila natun-an gikan sa iya Pulong.

17, 18. (a) Ano ang ginalaygay sang Biblia tuhoy sa pagkabunayag? (b) Paano naapektuhan ang isa ka tawo sang bunayag nga paggawi sang isa ka Saksi ni Jehova?

 ¹⁷ Ang Biblia nagalaygay sa mga Cristiano nga maggawi sing bunayag sa tanan nga butang. (Hebreo 13:18) Ang pagkadibunayag makaguba sang aton kaangtanan sa iban kag, labing importante, kay Jehova mismo. (Hulubaton 12:22) Ang aton masaligan nga paggawi nagapamatuod nga ginabuhat naton ang aton natun-an, kag bangod sini madamo ang labi pa nga nagatahod sa mga Saksi ni Jehova.

¹⁸ Binagbinaga ang eksperiensia sang isa ka soldado nga si Phillip. Nadula niya ang isa ka blangko kag napirmahan na nga tseke kag wala niya matalupangdan ini tubtob ginbalik ini sa iya paagi sa koreo. Ang tseke nakita sang isa ka Saksi ni Jehova, kag ang ginlakip nga sulat nagsiling nga bangod sang relihioso nga mga pagtuluuhan sang nakakita, ginabalik niya ini. Nakibot si Phillip. “Makakuha kuntani sila sa akon sing $9,000!” siling niya. Nasubuan sia sadto sang ginkawat ang iya kalo sa simbahan. Mahimo nga ang iya kakilala amo ang nagkuha sang iya kalo, samtang ang isa ka estranghero nag-uli sang isa ka tseke nga nagabalor sing linibo ka dolyar! Sa pagkamatuod, ang bunayag nga mga Cristiano nagapadungog kay Jehova nga Dios!

Padayon nga Buhata ang Imo Natun-an

19, 20. Paano kita makabenepisyo sa pagpanghikot suno sa Makasulatanhon nga mga butang nga aton natun-an?

¹⁹ Ang mga nagabuhat sang ila natun-an gikan sa Pulong sang Dios nagaani sing madamo nga benepisyo. Si disipulo Santiago nagsulat: “Sia nga nagatan-aw sa himpit nga kasuguan nga natungod sa kahilwayan kag nagapadayon sa sini, ini nga tawo, bangod sia nangin, indi malipaton nga manugpamati, kundi manugtuman sang hilikuton, mangin malipayon sa paghimo niya sini.” (Santiago 1:25) Huo, kon manghikot kita suno sa Makasulatanhon nga mga butang nga aton natun-an, matigayon naton ang matuod nga kalipay kag labi pa nga malandas naton ang mga pag-ipit sa kabuhi. Labaw sa tanan, matigayon naton ang pagpakamaayo ni Jehova kag ang paglaum nga kabuhi nga dayon!—Hulubaton 10:22; 1 Timoteo 6:6.

²⁰ Busa, padayuna gid ang pagtuon sing maukod sa Pulong sang Dios. Regular nga magtipon upod sa mga sumilimba ni Jehova, kag mamati sing maayo sa materyal nga ginapresentar sa Cristianong mga miting. Iaplikar ang imo natun-an, padayon nga buhata ini, kag ‘ang Dios sang paghidait mangin kaupod nimo.’—Filipos 4:9.

[Nota]

Madumduman Mo Bala?

• Ano ang “sulundan sang makapapagros nga mga pulong,” kag paano kita makapabilin sa sini?

• Anong “butig nga mga sugilanon” ang dapat naton isikway?

• Ano ang matigayon nga mga benepisyo sang mga nagabuhat sang ila natun-an sa Pulong sang Dios?

[Mga Pamangkot sa Pagtinuon]

[Retrato sa pahina 17]

Paano nalikawan sang unang mga Cristiano nga mapatalang sang mga apostata?

[Mga retrato sa pahina 18]

Ang mga binhi sang pangduhaduha sarang masab-ug sang media, paagi sa Internet, kag sang modernong adlaw nga mga apostata

[Retrato sa pahina 19]

Indi maalamon nga ipalapnag ang wala mapat-od nga mga report

[Mga retrato sa pahina 20]

Sa trabaho, sa eskwelahan, kag bisan diin, ginaaplikar sang mga Saksi ni Jehova ang ila nabasahan sa Pulong sang Dios