Ang mga Pamatan-on nga Nagahigugma sang Kamatuoran

“PAANO tinluan sang isa ka pamatan-on ang iya banas?” pamangkot sang isa ka Hebreo nga salmista kapin na sa 2,400 ka tuig ang nagligad. (Salmo 119:⁠9) Nagakaigo gihapon karon ini nga pamangkot bangod ang mga pamatan-on nagaatubang sing madamong problema sa kalibutan. Bangod sang pagkasalamwanan sa sekso, madamong pamatan-on ang nadayag sa AIDS, kag mga katunga sang nagabalatian sini ang nagaedad sing 15 tubtob 24. Ang abuso sa droga ginabangdan man sang madamong problema, nga nagapatay sa mga pamatan-on. Ang malaw-ay nga musika; masingki kag imoral nga mga pelikula, mga programa sa TV, kag mga video; kag pornograpiya sa Internet may malain nga impluwensia sa mga pamatan-on. Busa, ang pamangkot sang salmista ginakabalak-an gid sang madamong ginikanan kag pamatan-on karon.

Amo sini ang sabat sang salmista sa iya mismo pamangkot: “Paagi sa pagpabilin nga nagabantay suno sa imo pulong.” Sa pagkamatuod, ang Pulong sang Dios, ang Biblia, may maayo nga panuytoy para sa mga pamatan-on, kag paagi sa pagsunod sini, madamong pamatan-on ang nangin madinalag-on sa kabuhi. (Salmo 119:105) Usisaon naton ang pila ka halimbawa sang mga pamatan-on nga nagahigugma sa Dios kag nagapanikasog nga magpabilin nga malig-on sa espirituwal sa nagapangita-sing-kalipayan kag materyalistiko nga kalibutan.

Ginaapresyar Nila ang Panuytoy sang Ila mga Ginikanan

Si Jacob Emmanuel isa ka bug-os tion nga payunir nga ministro sa sulod sang pila ka tuig antes sia mag-alagad sa sanga talatapan sang mga Saksi ni Jehova sa Mexico. Madumduman niya sing mainapresyahon kon paano naglambo ang iya gugma sa pag-alagad sa Dios: “Ang akon mga ginikanan daku gid nga impluwensia, walay sapayan nga ang pila ka eksperiensiado nga espirituwal nga mga kauturan nga nangin abyan ko nakabulig man sing daku. Ginpahulag nila ako nga higugmaon ang pagbantala nga hilikuton. Mapinalanggaon nga gintuytuyan nila ako sa husto nga banas; wala gid ako magbatyag nga ginaipit nila.”

Si David, nga tinuig na sa bug-os tion nga ministeryo, nagahinumdom sang daku gid nga epekto nga ang iya mga ginikanan nag-alagad subong mga espesyal payunir sang magagmay pa sila sang iya utod nga lalaki. Sang mapatay ang iya amay, ang iya iloy nagpadayon sa pag-espesyal payunir. Wala labot sa pagbantala sing maayong balita, gin-atipan man niya sila. “Wala gid nila ako ginpilit nga magpayunir,” siling ni David, “apang naluyagan gid namon ang pagpayunir subong isa ka pamilya amo nga ang pag-inupdanay kag ang impluwensia sini nagtiklod sa akon nga himuon man ini.” Tuhoy sa importansia sang maayo nga panuytoy kag pag-atipan sang mga ginikanan, si David nagsiling: “Kada gab-i, ginabasahan kami sang akon iloy sing mga sugilanon gikan sa libro nga Gikan sa Paraiso nga Nadula Tubtub sa Paraiso nga Naangkon-uli.⁠ * Ang iya paagi sa pagsaysay sini sa amon nakabulig gid agod maluyagan namon ang espirituwal nga pagkaon.”

Apresasyon sa mga Miting

Ang iban nga mga pamatan-on nabudlayan nga apresyahon ang Cristianong mga miting. Nagatambong sila bangod  ginapaupod sila sang ila mga ginikanan. Apang, kon padayon sila nga magatambong sa mga miting, sa ulihi maluyagan na nila ang mga miting. Binagbinaga si Alfredo, nga nagsulod sa bug-os tion nga pag-alagad sang 11 anyos sia. Ginabaton niya nga sang mga singko anyos sia, nagalikaw sia sa pagkadto sa mga miting bangod ginatuyo sia apang ang iya mga ginikanan indi magpasugot nga magtulog sia sa tion sang mga miting. Naghinumdom sia: “Samtang nagadaku ako, amat-amat nga nangin interesado ako sa mga miting, ilabi na sang makahibalo na ako sa pagbasa kag sa pagsulat bangod makakomento na ako sa akon kaugalingon nga mga tinaga.”

Si Cintia, 17-anyos nga dalagita kag regular payunir, nagasaysay kon paano ang maayo nga pag-inupdanay nakabulig gid sing daku agod mapalambo niya ang gugma sa pag-alagad sa Dios. Sia nagsiling: “Ang maayo nga relasyon sa mga kauturan kag ang regular nga pagtambong sa mga miting nagbulig sa akon agod indi mahidlaw sa akon kalibutanon nga mga abyan kag sa mga buhat nga popular sa mga pamatan-on, subong sang pagkadto sa mga diskohan. Paagi sa pagpamati sa mga komento kag sa mga eksperiensia sa mga miting, naglambo ang akon handum nga ihatag kay Jehova ang tanan nga ginapanag-iyahan ko, kag sa banta ko ang pinakamaayo nga butang nga ginapanag-iyahan ko amo ang akon pagkapamatan-on. Gani namat-od ako nga gamiton ini sa pag-alagad sa iya.”

Apang, ginbaton niya: “May tion sadto, antes ako magpabawtismo, nga mahapos para sa akon nga magpalya sa mga miting, ginabalibad ang homework ukon iban pa nga mga hilikuton sa eskwelahan. Wala ako makatambong sa pila ka miting, kag naapektuhan sini ang akon espirituwalidad. Nakig-abyan ako sa isa ka pamatan-on nga lalaki nga wala nagatuon sa Biblia. Sa bulig ni Jehova, natadlong ko ini.”

Personal nga Desisyon

Sang ginpamangkot si Pablo, isa pa ka pamatan-on nga nagaalagad kay Jehova sing bug-os tion, kon ano ang ginakabig niya nga labing importante gid nga butang nga nagapalambo sing gugma sa kamatuoran sang Pulong sang Dios, sia nagsiling: “Sa banta ko duha ka butang: regular nga personal nga pagtuon kag kakugi sa pagbantala nga hilikuton. Nagapasalamat ako sa akon mga ginikanan tungod gintudluan nila ako sing kamatuoran tuhoy kay Jehova, kag sa banta ko amo ini ang pinakamaayo nga butang nga ginhatag nila sa akon. Apang, dapat makumbinsi ako mismo kon ngaa ginahigugma ko si Jehova. Bangod sini, kinahanglan nga mahibaluan ang ‘kasangkaron kag kadalumon’ sang kamatuoran sang Biblia. Paagi lamang sini nga maluyagan gid naton ang Pulong ni Jehova, nga ‘nagapadabdab sang kalayo’ sa aton agod ipamulong ini sa iban. Ini nga kakugi sa pagbantala nga hilikuton magahupot nga buhi sang aton apresasyon sa kamatuoran.”​—⁠Efeso 3:18; Jeremias 20:9.

Si Jacob Emmanuel, nga ginsambit kaina, nakadumdom man sang importansia sang pagdesisyon sing personal nga alagaron si Jehova. Nagsiling sia nga ang iya mga ginikanan wala gid mag-ipit sa iya nga magpabawtismo sia. “Nagapati ako nga labing maayo gid ini bangod nakita ko ang maayong mga resulta. Halimbawa, ang akon anay kaupod pirme nga pila ka pamatan-on nagdesisyon nga magpabawtismo sing dungan. Bisan pa maayo ini, nakita ko nga ginhimo ini sang iban bangod sang emosyon, kag wala madugay pagkatapos sadto, ang ila kakugi sa mga hilikuton sang Ginharian nag-ugdaw. Sa bahin ko wala ako gin-ipit sang akon mga  ginikanan nga magdesisyon nga magdedikar kay Jehova. Personal ko ini nga desisyon.”

Ang Papel sang Kongregasyon

Ang iban nga mga pamatan-on mismo ang nakatuon sang kamatuoran sang Pulong sang Dios, nga wala sing bulig sang ila mga ginikanan. Sa sini nga mga kahimtangan, indi gid mahapos nga tun-an ang paghimo sing maayo kag magpadayon sa sini.

Ginhinumdom ni Noé kon daw ano gid ka daku ang nabulig sang kamatuoran sa iya. Sugod sa pagkabata, madali sia maakig kag magsingki. Sang magtuon sia sa Biblia sa edad nga 14, ang iya panimuot nagbag-o, kag tungod sini ang iya mga ginikanan, nga indi sadto interesado sa Biblia, nagpasalamat gid. Samtang nagauswag si Noé sa espirituwal, luyag niya nga gamiton sing labi pa ang iya kabuhi sa pag-alagad sa Dios. Yara na sia karon sa bug-os tion nga ministeryo.

Si Alejandro nangin interesado man sa Cristianong kamatuoran sang bata pa sia, walay sapayan nga ang iya mga ginikanan indi interesado sa sini. Ginpabutyag niya ang iya apresasyon sa kamatuoran nga nagasiling: “Ginpadaku ako sa isa ka tradisyonal nga Katoliko nga puluy-an. Apang, nangin interesado ako sa ateismo sang Komunista bangod wala masabat sang simbahan ang mga pamangkot nga nagtublag sa akon sugod sa pagkabata. Ginbuligan ako sang organisasyon ni Jehova sa pagkuha sing ihibalo tuhoy sa Dios. Literal sini nga ginluwas ang akon kabuhi kay kon wala ako magtuon sa Biblia, ayhan nadalahig ako sa imoralidad, alkoholismo, ukon droga. Mahimo pa gani nga nag-entra ako sa rebolusyunaryo nga grupo, nga magadul-ong sa masakit nga mga resulta.”

Paano mapadayon sang isa ka pamatan-on ang pagpangita sing kamatuoran kag makapanguyapot sa sini bisan wala ginasuportahan sang iya mga ginikanan? Maathag nga ang mga gulang kag ang iban pa sa kongregasyon makabulig gid sing daku. Si Noé naghinumdom: “Wala gid ako magbatyag nga nagaisahanon, kay si Jehova pirme nga suod gid sa akon. Subong man, ginasuportahan ako sang madamong mahigugmaon nga mga kauturan nga nangin akon espirituwal nga mga amay, mga iloy, kag mga utod.” Nagaalagad na sia karon sa Bethel kag ginagamit niya ang iya tion sa pag-alagad sa Dios. Subong man, si Alejandro nagsaysay: “Ang akon ginapasalamatan gid pirme amo ang bentaha nga yara ako sa isa ka kongregasyon nga may isa ka hubon sang mga gulang nga nagapakita sing mahigugmaon nga interes sa akon subong isa ka tawo. Nagapasalamat gid ako sa sini bangod sang nagtuon ako sa Biblia, sa edad nga 16, naapektuhan man ako sang mga kagumon nga kinaandan sa mga pamatan-on. Wala gid ako ginpabay-an sang mga pamilya sa kongregasyon. May yara pirme nagasapopo sa akon kag nagapaambit sa akon indi lamang sang iya puluy-an kag pagkaon kundi sang iya man pagpalangga.” Si Alejandro bug-os tion nga nagaalagad sa kapin na sa 13 ka tuig.

Nagahunahuna ang iban nga ang relihion para lamang sa mga tigulang. Apang, natun-an sang madamong pamatan-on ang kamatuoran sang Biblia sang bata pa sila kag ginhigugma nila si Jehova kag nagpabilin nga matutom sa iya. Maaplikar sa sining mga pamatan-on ang pinamulong ni David nga narekord sa Salmo 110:⁠3: “Ang imo katawhan magahalad sang ila kaugalingon sing kinabubut-on sa adlaw sang imo puwersa militar. Sa himaya sang pagkabalaan, gikan sa pamanagbanag sang kaagahon, kaupod mo ang mga pamatan-on kaangay sang mga tulo sang tun-og.”

Kinahanglan gid ang daku nga panikasog kag determinasyon para matun-an sang mga pamatan-on ang kamatuoran kag magpabilin nga matutom sa sini. Daw ano nga kalipay nga makita nga madamo ang nagapabilin nga suod gid sa organisasyon ni Jehova, nagatambong sing regular sa mga miting, kag nagatuon sing maukod sa Biblia. Sa paghimo sini, napalambo nila ang matuod nga gugma sa Pulong sang Dios kag sa pag-alagad sa iya!​—⁠Salmo 119:​15, 16.

[Nota]