Lugpay Gikan sa Sibu nga Ihibalo sa Dios

PARA sa iban nga mga tawo, ang ginasiling sang Biblia tuhoy sa gugma kag kaluoy sang Dios nagapautwas sing makatulublag nga mga pamangkot. Nagapamangkot sila: Kon luyag sang Dios nga dulaon ang kalainan, kag makahibalo sia kag may ikasarang kon paano ini dulaon, ngaa madamo gihapon ang kalainan? Para sa ila ang problema amo ang paglubad sa tatlo ka daw nagasumpakilay nga mga ideya: (1) Ang Dios labing gamhanan; (2) ang Dios mahigugmaon kag maayo; kag (3) ang mga kalamidad padayon nga nagakatabo. Nagarason sila nga bangod ang katapusan nga ideya matuod gid, nian ang bisan diin man sa duha indi matuod. Para sa ila, mahimo nga indi mapauntat sang Dios ang kalainan ukon indi sia interesado.

Mga pila ka adlaw paglipas sang pagkarumpag sang World Trade Center sa New York, ang isa ka prominente nga lider sang relihion sa Estados Unidos nagsiling: “Ginatos ka beses na ako ginpamangkot sa bug-os ko nga kabuhi kon ngaa ginapahanugutan sang Dios ang trahedya kag pag-antos. Ginabaton ko nga indi ko gid nahibaluan ang sabat, kay bisan ako mismo indi makahangop kon ngaa.”

Bilang reaksion sa sining komento, ang isa ka propesor sa teolohiya nagsulat nga nagadayaw gid sia sa “maayo nga teolohiya” nga ginwali sining relihiosong lider. Ginrekomendar man niya ang pagtamod sang isa ka iskolar nga nagsulat: “Ang pagkadimahangpan sang pag-antos bahin sang pagkadimahangpan sang Dios.” Apang imposible gid bala mahangpan kon ngaa ginapahanugutan sang Dios ang kalainan?

Ang Ginhalinan sang Kalainan

Tuhay sa mahimo ginasiling sang mga lider sang relihion, wala ginalaragway sang Biblia ang pagpahanugot sang Dios sa kalainan subong butang nga di-mahangpan. Ang importante gid nga punto agod mahangpan ang pamangkot tuhoy sa kalainan amo ang pagkilala nga wala gintuga ni Jehova ang malauton nga kalibutan. Gintuga niya ang unang mag-asawa nga himpit kag walay sala. Gintan-aw ni Jehova ang iya gintuga kag nakita ini nga “tama gid kaayo.” (Genesis 1:​26, 31) Katuyuan niya nga pasangkaron ni Adan kag ni Eva ang Paraiso sang Eden sa bug-os nga duta kag puy-an ini sang malipayon nga mga tawo sa idalom sang pangamlig sang iya mahigugmaon nga pagkasoberano.​—⁠Isaias 45:18.

Nagsugod ang kalainan sang nagtubo sa isa ka espiritu nga tinuga ang handum nga simbahon, bisan pa nga sia anay matutom sa Dios. (Santiago 1:​14, 15) Nadayag ang iya pagrebelde sa duta sang ginhaylo niya ang unang mag-asawa nga magbuylog sa iya sa pagpamatok sa Dios. Sa baylo nga sundon ang maathag nga instruksion sang Dios nga indi pagkaunon ukon pagtandugon ang bunga sang kahoy sang ihibalo sang maayo kag malain, ginkuha kag ginkaon ini ni Adan kag ni Eva. (Genesis 3:​1-6) Sa paghimo sini, wala lamang nila ginlapas ang Dios kundi ginpakita man nga luyag nila mangin hilway sa iya.

Isa ka Hulusayon sa Moral ang Ginpautwas

Ini nga pagrebelde sa Eden nagpautwas sing isa ka hulusayon sa moral, isa ka hangkat nga may  bug-os uniberso nga importansia. Ginduhaduhaan sang tawhanon nga mga rebelde kon bala ginhimo ni Jehova sing nagakaigo ang paggahom niya sa iya mga tinuga. May kinamatarong bala ang Manunuga nga ipatuman sa katawhan ang bug-os nga pagkamatinumanon? Mangin mas maayo bala ang kahimtangan sang mga tawo kon magpanghikot sila sing hilway?

Gin-atubang ni Jehova ini nga hangkat sa iya paggahom sa isa ka paagi nga nagapakita sang iya himpit nga pagkatimbang sa gugma, hustisya, kaalam, kag gahom. Mahimo kuntani nga gingamit niya ang iya gahom agod dugmukon gilayon ang pagrebelde. Daw makatarunganon kuntani ini, kay may kinamatarong sia nga himuon ini. Apang sa paghimo sini, ang moral nga mga pamangkot nga ginpautwas wala kuntani masabat. Sa pihak nga bahin, mahimo kuntani nga wala na lang ginsapak sang Dios ang sala. Para sa iban sa karon, daw mahigugmaon ini. Apang, indi man sini masabat ang pangangkon ni Satanas nga magaayuhan ang mga tawo kon sila mismo ang magagahom sa ila kaugalingon. Dugang pa, indi bala ini magpalig-on sa iban pa nga magtalikod sa dalanon ni Jehova? Ang resulta mahimo nga amo ang walay katapusan nga pag-antos.

Sa iya kaalam, gintugutan ni Jehova ang mga tawo nga mangin hilway sa iya sa pila ka tion. Bisan pa nagkahulugan ini nga magapabilin sing temporaryo ang kalainan, ang mga tawo may kahigayunan nga ipakita kon bala magamhan nila sing madinalag-on ang ila kaugalingon nga hilway sa Dios, kag magkabuhi suno sa ila kaugalingon nga mga talaksan sa kon ano ang husto kag sayop. Ano ang nangin resulta? Ang maragtas sang tawo puno sing inaway, inhustisya, pagpigos, kag pag-antos. Ang ulihi nga kapaslawan sang pagrebelde batok kay Jehova magalubad sing permanente sa hulusayon nga ginpautwas sa Eden.

Sa amo man nga tion, ginpakita sang Dios ang iya gugma paagi sa pag-aman sa iya Anak, si Jesucristo, nga naghatag sang iya tawhanon nga kabuhi subong halad gawad. Bangod sini, ang matinumanon nga katawhan nahilway gikan sa pagpakamalaut sang sala kag kamatayon nga resulta sang paglapas ni Adan. Ginbuksan sang gawad ang dalan padulong sa kabuhi nga walay  katapusan para sa tanan nga nagatuo kay Jesus.​—⁠Juan 3:16.

Si Jehova makalulugpay nga nagpasalig sa aton nga ang pag-antos sang tawo umalagi lamang. “Sa diutay pa nga tion, kag ang malauton wala na,” sulat sang salmista. “Talupangdon mo sing makugihon ang iya duog, kag wala na sia didto. Apang ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait.”​—⁠Salmo 37:​10, 11.

Isa ka Palaabuton nga May Seguridad kag Kalipay

Ginapakita sang katumanan sang mga tagna sang Biblia nga malapit na ang tion nga dulaon sang Dios ang balatian, kasubo, kag kamatayon. Talupangda ang makalilipay gid nga mahanabo sa ulihi nga ginhatag kay apostol Juan sa palanan-awon. Sia nagsulat: “Nakita ko ang isa ka bag-ong langit kag isa ka bag-ong duta; kay ang nahaunang langit kag ang nahaunang duta nagtaliwan na, kag wala na ang dagat. . . . Kag ang Dios gid magaupod sa [mga tawo]. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” Sa isa ka pinamulong nga nagapadaku sang pagkamasaligan sining mga saad, si Juan ginsingganan: “Isulat ini, kay ining mga pulong matutom kag matuod.”​—⁠Bugna 21:1-5.

Kamusta ang binilyon ka inosente nga mga tawo nga napatay kutob sang pagrebelde sa Eden? Si Jehova nagsaad nga banhawon niya ang mga tawo nga nagakatulog karon sa kamatayon. Si apostol Pablo nagsiling: “May paglaum ako sa Dios . . . nga may pagkabanhaw sang mga matarong kag mga di-matarong.” (Binuhatan 24:15) May paglaum sila nga magkabuhi sa kalibutan diin “magapuyo ang pagkamatarong.”​—⁠2 Pedro 3:13.

Subong nga ginapahanugutan sang isa ka mahigugmaon nga amay nga operahan ang iya anak kon nahibaluan niya nga magahatag ini sing dayon nga mga benepisyo, ginapahanugutan man ni Jehova ang mga tawo nga makaeksperiensia sing temporaryo nga kalainan sa duta. Apang, ang walay katapusan nga mga pagpakamaayo nagahulat sa tanan nga nagapanikasog sa paghimo sang kabubut-on sang Dios. Si Pablo nagpaathag: “Ang tinuga ginpasakop sa pagkawalay pulos, indi sa iya kaugalingon nga kabubut-on kundi paagi sa iya nga nagpasakop sini, pasad sa paglaum nga ang tinuga man mismo hilwayon gikan sa pagkaulipon sa pagkamadinulunton kag magaagom sing mahimayaon nga kahilwayan sang mga anak sang Dios.”​—⁠Roma 8:​20, 21.

Balita gid ini​—⁠indi ang sahi sang balita nga makita naton sa telebisyon ukon mabasa sa pamantalaan kundi maayong balita. Amo ini ang labing maayo nga balita gikan sa “Dios sang bug-os nga paglugpay,” nga nagaulikid gid sa aton.​—⁠2 Corinto 1:3.

[Mga retrato sa pahina 6]

Ginpakita sang tion nga indi magamhan sing madinalag-on sang mga tawo ang ila kaugalingon nga hilway sa Dios

[Credit Lines]

Somalian family: UN PHOTO 159849/M. GRANT; atom bomb: USAF photo; concentration camp: U.⁠S. National Archives photo