Report sang mga Manugbantala sang Ginharian

Medalya sang Pagkilala Para sa Isa ka Kingdom Hall

GINTAWAG sang Ministry of Environment sa Finland ang tuig 2000 subong “Year of Landscaping.” Ang isa sang mga organisador nagsiling nga ang “katuyuan nga ginhimo ang landscaping subong tuigan nga tema amo agod pahanumdumon kita tanan sang impluwensia sang berde nga palibot sa aton matag-adlaw nga pagkabuhi kag sa aton kaayuhan.”

Sang Enero 12, 2001, isa ka sulat gikan sa Finnish Association of Landscape Industries ang nag-abot sa sanga talatapan sang mga Saksi ni Jehova sa Finland. Ang sulat nagpaathag nga ang Kingdom Hall sang mga Saksi ni Jehova sa Tikkurila ginpadyaan sing isa sa mga medalya para sa tuigan nga tema sang landscaping bangod sang talalupangdon nga desinyo sang palibot kag sang matahom nga hardin sini. Ang sulat nagdugang pa nga “ang pangkabilugan nga dagway sang palibot, sa tingadlaw kag tigtulugnaw man, manayanaya, matahom, kag mataas sing kalidad.”

Ginhatag ang medalya sa mga Saksi ni Jehova sa Rosendahl Hotel sa Tampere, Finland, sa isa ka okasyon nga gintambungan sang 400 ka propesyonal kag mga negosyante. Nagpaguwa man sing press release ang Finnish Association of Landscape Industries, nga nagasiling: “Sa nagkalainlain nga bahin sang pungsod, ang mga Kingdom Hall sang mga Saksi ni Jehova, halos tanan, matahom gid nga naplano. Ang maayo nga pag-atipan sa palibot nakakuha sa igtalupangod sang halos tanan nga nagalabay. Ang Kingdom Hall sa Tikkurila isa ka halimbawa sang tuman katahom nga hardin sa kabilugan. Ang bilding kag ang malapad nga ugsaran sini nagabuligay sa pagpaluntad sing kalinong kag pagkabalanse.”

May yara 233 ka Kingdom Hall sa Finland, madamo ang ginapalibutan sing matahom nga mga hardin. Apang, ang tunay nga nagapatahom sa sining mga duog amo nga sentro ini sang matuod nga pagsimba kag sang edukasyon sa Biblia. Para sa kapin sa anom ka milyon nga mga Saksi ni Jehova sa bug-os nga kalibutan, ang Kingdom Hall​—⁠nga nasangkapan sing maayo ukon simple lamang⁠​—⁠isa ka naluyagan gid nga duog. Amo kon ngaa maukod nga ginatatap nila ini sing maayo. Ang mga ganhaan sang mga Kingdom Hall bukas para sa tanan sa inyo kumunidad!