Palambua ang Pagkamatinumanon Samtang Nagahilapit ang Katapusan

“Ang pagkamatinumanon sang mga katawhan mangin sa [Shilo].”​​—⁠GENESIS 49:10.

1. (a) Sang una, ano pirme ang nadalahig sa pagkamatinumanon kay Jehova? (b) Ano ang gintagna ni Jacob tuhoy sa pagkamatinumanon?

ANG pagkamatinumanon kay Jehova pirme nagdalahig sing pagkamatinumanon sa iya mga tiglawas. Lakip sa sini amo ang mga anghel, mga patriarka, mga hukom, mga saserdote, mga manalagna, kag mga hari. Ang trono sang mga hari sang Israel gintawag pa gani nga trono ni Jehova. (1 Cronica 29:23) Makapasubo nga madamo sang mga manuggahom sang Israel ang naglalis sa Dios, amo kon ngaa nag-abot ang kalamidad sa ila kaugalingon kag sa ila mga sakop. Apang wala ginpabay-an ni Jehova ang mga matutom sa iya nga wala sing paglaum; ginlugpayan niya sila paagi sa isa ka saad nga magatangdo sia sing isa ka di-madinulunton nga Hari, nga malipayon nga tumanon sang mga matarong. (Isaias 9:​6, 7) Gintagna sang patriarka nga si Jacob ining palaabuton nga manuggahom sang nagatagumatayon sia: “Ang setro indi mahamulag kay Juda, ukon ang sungkod sang manuggahom gikan sa tunga sang iya mga tiil, tubtob nga mag-abot ang Shilo; kag ang pagkamatinumanon sang mga katawhan mangin sa iya.”​​—⁠Genesis 49:10.

2. Ano ang kahulugan sang “Shilo,” kag ano ang malakip sa iya harianon nga paggahom?

2 Ang “Shilo” isa ka Hebreong termino nga nagakahulugan sing “Sia nga Tag-iya Sini,” ukon “Sia nga Nagapanag-iya Sini.” Huo, mapanubli sang Shilo ang bug-os nga kinamatarong sa paggahom, nga ginasimbulo sang setro, kag ang gahom sa pagmando, nga ginalaragway sang sungkod sang kumandante. Dugang pa, ang iya harianon nga paggahom magalakip, indi lamang sa mga kaliwat ni Jacob, kundi sa tanan nga “katawhan.” Nagahisanto ini sa ginsaad ni Jehova kay Abraham: “Ang imo binhi magatag-iya sang gawang sang iya mga kaaway. Kag paagi sa imo binhi ang tanan nga pungsod sang duta pat-od nga magapakamaayo sang ila kaugalingon.” (Genesis 22:​17, 18) Ginpamatud-an ni Jehova kon sin-o ining “binhi” sang 29 C.⁠E. sang ginhaplasan niya si Jesus nga taga-Nazaret sing balaan nga espiritu.​​—⁠Lucas 3:​21-​23, 34; Galacia 3:⁠16.

 Ang Una nga Ginharian ni Jesus

3. Ano nga paggahom ang nabaton ni Jesus sang nagkayab sia sa langit?

³ Sang magkayab si Jesus sa langit, wala sia gilayon magsugod sa paggahom sa ibabaw sang mga katawhan sang kalibutan. (Salmo 110:⁠1) Apang, nakabaton sia sing isa ka “ginharian” nga may mga sakop nga matinumanon sa iya. Ginpakilala ni apostol Pablo ini nga ginharian sang nagsulat sia: “[Ang Dios] nagluwas sa aton [ginhaplasan sing espiritu nga mga Cristiano] gikan sa awtoridad sang kadudulman kag nagliton sa aton sa ginharian sang Anak sang iya gugma.” (Colosas 1:13) Ini nga pagluwas nagsugod sang Pentecostes 33 C.⁠E. sang ginbubo ang balaan nga espiritu sa matutom nga mga sumulunod ni Jesus.​​—⁠Binuhatan 2:​1-4; 1 Pedro 2:9.

4. Sa anong paagi ang una nga mga disipulo ni Jesus nagpakita sang ila pagkamatinumanon, kag paano sila ginpakilala ni Jesus subong isa ka grupo?

⁴ Subong ‘mga embahador nga salili para kay Cristo,’ matinumanon nga ginsugdan sang hinaplasan sing espiritu nga mga disipulo ang pagtipon sa iban pa nga mangin ila “mga masigkabanwahanon” sa sining espirituwal nga ginharian. (2 Corinto 5:​20; Efeso 2:​19; Binuhatan 1:⁠8) Dugang pa, dapat sila magpabilin nga ‘nahiusa sa isa ka painuino kag isa ka panghunahuna’ agod mahamut-an sila sang ila Hari nga si Jesucristo. (1 Corinto 1:10) Subong isa ka grupo, isa sila ka “matutom kag mainandamon nga ulipon,” ukon isa ka matutom nga tulugyanan nga klase.​​—⁠Mateo 24:45; Lucas 12:42.

Ginpakamaayo Bangod sang Pagtuman sa “Tulugyanan” sang Dios

5. Halin sang dumaan nga mga tion, paano gintudluan ni Jehova ang iya katawhan?

⁵ Si Jehova pirme nag-aman sing mga manunudlo para sa iya katawhan. Halimbawa, sang makabalik ang mga Judiyo gikan sa Babilonia, si Esdras kag ang pila sang kalipikado nga mga lalaki wala lamang magbasa sang Kasuguan sang Dios sa katawhan, kundi ‘ginpaathag’ nila ini nga kasuguan, nga ‘ginahatagan ini sing kahulugan kag ginapahangop’ ang Pulong sang Dios.​​—⁠Nehemias 8:⁠8.

6, 7. Paano ang ulipon nga klase nag-aman sing sibu sa tion nga espirituwal nga pagkaon paagi sa Nagadumala nga Hubon sini, kag ngaa nagakaigo ang pagpasakop sa ulipon nga klase?

 ⁶ Sang una nga siglo, sang nag-utwas ang hulusayon tuhoy sa pagpatuli sang 49 C.⁠E., mapangamuyuon nga ginbinagbinag sang nagadumala nga hubon sadtong una nga ulipon nga klase ang hulusayon kag nakahimo sila sing konklusion nga nahisanto sa Kasulatan. Sang ginpahibalo nila ang ila desisyon paagi sa sulat, gintuman sang mga kongregasyon ang desisyon kag ginpakamaayo sila sang Dios sing bugana. (Binuhatan 15:​6-​15, 22-​29; 16:​4, 5) Sa moderno man nga mga tion, ginpaathag sang matutom nga ulipon paagi sa Nagadumala nga Hubon sini ang importante nga mga hulusayon subong sang Cristianong neutralidad, pagkabalaan sang dugo, kag paggamit sing droga kag tabako. (Isaias 2:⁠4; Binuhatan 21:25; 2 Corinto 7:⁠1) Ginpakamaayo ni Jehova ang iya katawhan bangod sang ila pagkamatinumanon sa iya Pulong kag sa matutom nga ulipon.

⁷ Paagi sa pagpasakop sa ulipon nga klase, ginapakita man sang katawhan sang Dios ang ila pagpasakop sa Agalon nga si Jesucristo. Ini nga pagpasakop may dugang pa nga kahulugan sa modernong mga tion bangod sang nagsangkad nga awtoridad ni Jesus, subong sang gintagna ni Jacob sang nagatagumatayon sia.

Ang Shilo Nangin ang May Kinamatarong nga Manuggahom sang Duta

8. Paano kag san-o nagsangkad ang awtoridad ni Cristo?

⁸ Gintagna ni Jacob nga ang Shilo ‘tumanon sang mga katawhan.’ Maathag nga si Cristo magagahom indi lamang sa espirituwal nga Israel. Ano ang ilakip sini? Ang Bugna 11:15 nagasabat: “Ang ginharian sang kalibutan nangin ginharian sang aton Ginuo kag sang iya Cristo, kag magagahom sia subong hari sa walay katubtuban.” Ginapahayag sang Biblia nga nabaton ni Jesus ini nga awtoridad sa katapusan sang matagnaon nga “pito ka panahon”​​—⁠“ang gintalana nga mga tion sang mga pungsod”⁠​—⁠sang 1914.⁠ * (Daniel 4:​16, 17; Lucas 21:24) Nagsugod sadto nga tuig ang di-kitaon nga “presensia” ni Cristo subong Mesianikong Hari, subong man ang iya tion sa ‘pagpanglutos sa tunga sang iya mga kaaway.’​​—⁠Mateo 24:⁠3; Salmo 110:2.

9. Ano ang ginhimo ni Jesus sang mabaton niya ang iya Ginharian, kag ano ang indi direkta nga epekto sini sa katawhan, ilabi na sa iya mga disipulo?

⁹ Ang una nga ginhimo ni Jesus sang mabaton niya ang harianon nga gahom amo ang pagtagbong sa isa ka persona nga kilala gid sa pagkamalalison​​—⁠si Satanas⁠​—⁠upod sa iya mga demonyo “sa duta.” Sugod sadto, ining malaut nga mga espiritu nagpaluntad sing walay tupong nga kalamidad sa katawhan, luwas pa sa pagtuga sing isa ka kahimtangan nga nagahimo sang pagkamatinumanon kay Jehova nga isa ka hangkat. (Bugna 12:​7-​12; 2 Timoteo 3:​1-5) Sa katunayan, ang una nga puntariya sang espirituwal nga pagpakig-away ni Satanas amo ang mga hinaplas ni Jehova, “nga nagatuman sang mga sugo sang Dios kag may hilikuton sa pagpanaksi tuhoy kay Jesus,” kag ang ila “iban nga mga karnero” nga mga kaupod.​​—⁠Bugna 12:17; Juan 10:⁠16.

10. Katumanan sang ano nga mga tagna sang Biblia ang nagagarantiya nga mapaslawan ang pagpakig-away ni Satanas batok sa matuod nga mga Cristiano?

¹⁰ Apang, pat-od nga mapaslawan si Satanas  bangod “adlaw sang Ginuo” karon, kag wala sing makapugong kay Jesus sa “pagtapos sang iya pagdaug.” (Bugna 1:​10; 6:⁠2) Halimbawa, siguraduhon niya ang hingapusan nga pagpat-in sa 144,000 ka espirituwal nga mga Israelinhon. Amligan man niya ang “isa ka dakung kadam-an, nga wala sing tawo nga makaisip, gikan sa tanan nga pungsod kag tribo kag katawhan kag hambal.” (Bugna 7:​1-4, 9, 14-​16) Apang, indi subong sang ila hinaplas nga mga kaupod, sila mangin matinumanon nga mga sakop ni Jesus sa duta. (Daniel 7:​13, 14) Ang ila mismo presensia sa kalibutan isa na ka matuod nga ebidensia nga ang Shilo amo gid ang Manuggahom sa “ginharian sang kalibutan.”​​—⁠Bugna 11:15.

Karon Na ang Tion sa ‘Pagtuman sa Maayong Balita’

11, 12. (a) Sin-o lamang ang maluwas sa katapusan sang sistema sang mga butang karon? (b) Ano nga mga kinaiya ang nagatubo sa mga naimpluwensiahan sang “espiritu sang kalibutan”?

¹¹ Ang tanan nga nagahandum sing kabuhi nga walay katapusan dapat mangin matinumanon, kay ang Biblia maathag nga nagasiling nga “ang mga wala nagakilala sa Dios kag ang mga wala nagatuman sa maayong balita tuhoy sa aton Ginuong Jesus” indi makalampuwas sa adlaw sang pagtimalos sang Dios. (2 Tesalonica 1:⁠8) Apang, mabudlay tumanon ang maayong balita bangod sang malaut nga palibot karon kag sang espiritu sang pagrebelde batok sa mga kasuguan kag mga prinsipio sang Biblia.

¹² Ginalaragway sang Biblia ining pagkamabinatuon sa Dios subong “espiritu sang kalibutan.” (1 Corinto 2:12) Ginapaathag ang epekto sini sa katawhan, si apostol Pablo nagsulat sa unang-siglo nga mga Cristiano sa Efeso, nga nagasiling: “Kamo anay naglakat suno sa sistema sang mga butang sining kalibutan, suno sa manugdumala sang awtoridad sang hangin, ang espiritu nga nagapanghikot karon sa mga anak sang pagkamalalison. Huo, sa tunga nila naggawi anay kita tanan suno sa kailigbon sang aton unod, ginahimo ang mga butang nga ginahandum sang unod kag sang hunahuna, kag kinaugali nga mga anak kita sang kasingkal subong sang iban.”​​—⁠Efeso 2:​2, 3.

13. Paano mapamatukan sing madinalag-on sang mga Cristiano ang espiritu sang kalibutan, kag ano ang mapuslanon nga mga resulta sini?

¹³ Makalilipay nga ang taga-Efeso nga mga Cristiano wala magpabilin nga mga ulipon sadtong espiritu sang pagkamalalison. Sa baylo, sila nangin matinumanon nga mga anak sang Dios paagi sa pagpasakop sa iya espiritu kag gani naani nila ang bugana kag mapuslanon nga mga bunga sini. (Galacia 5:​22, 23) Sa karon man, ang espiritu sang Dios​​—⁠ang labing gamhanan nga puwersa sa uniberso⁠​—⁠nagabulig sa minilyon nga mangin matinumanon kay Jehova, upod ang resulta nga mahimo nila matigayon ang “bug-os nga kapat-uran sang paglaum tubtob sa katapusan.”​​—⁠Hebreo 6:​11; Zacarias 4:6.

14. Paano ginpaalisto ni Jesus ang tanan nga Cristiano nga nagakabuhi sa katapusan nga mga adlaw sa espesipiko nga mga butang nga magatilaw sang ila pagkamatinumanon?

¹⁴ Dumduma man nga ginasakdag kita sang Shilo, nga upod sa iya Amay indi magatugot sa bisan sin-o nga kaaway​​—⁠demonyo man ukon tawo⁠—nga tilawan ang aton pagkamatinumanon sing labaw pa sa masarangan naton. (1 Corinto 10:13) Sa katunayan, agod buligan kita sa aton espirituwal nga pagpakig-away, ginlaragway ni Jesus ang pila ka espesipiko nga mga problema nga atubangon naton sa sining katapusan nga mga adlaw. Ginhimo niya ini paagi sa pito ka sulat, nga ginhatag niya kay apostol Juan sa isa ka palanan-awon. (Bugna 1:​10, 11) Sa pagkamatuod, nag-unod ini sing importante nga laygay para sa mga Cristiano sadto, apang naaplikar gid ini sa “adlaw sang Ginuo,” halin sang 1914. Busa, nagakaigo gid nga hatagan naton sing igtalupangod ining mga mensahe!⁠ *

Likawi ang Indi Pagsapak, Imoralidad, Materyalismo

15. Ngaa dapat kita magbantay batok sa problema nga nag-apektar sa kongregasyon sa Efeso, kag paano naton mahimo ini? (2 Pedro 1:​5-8)

¹⁵ Una nga ginsulatan ni Jesus ang kongregasyon sa Efeso. Sa tapos hatagan sing komendasyon ang kongregasyon sa pagbatas sini, si Jesus nagsiling: “Apang, may masaway ako batok sa imo, nga ginbiyaan mo ang imo una nga gugma.” (Bugna 2:​1-4) Sa karon man, nadula sang pila ka makugi anay nga mga Cristiano ang ila mainit nga gugma sa Dios. Mahimo ini makapaluya sang relasyon sang isa sa Dios kag dapat atipanon sa gilayon. Paano mapainit liwat ini nga gugma? Paagi sa regular  nga pagtuon sa Biblia, pagtambong sa mga miting, pangamuyo, kag pagpamalandong. (1 Juan 5:3) Matuod, nagakinahanglan ini sing “hanuot nga panikasog,” apang takus gid ini. (2 Pedro 1:​5-8) Kon sa tapos mausisa sing bunayag ang imo kaugalingon, masapwan mo nga nagbugnaw ang imo gugma, tadlunga gilayon ini nga kahimtangan, bilang pagtuman sa laygay ni Jesus: “Dumduma nian kon gikan diin ka napukan, kag maghinulsol ka kag buhata ang mga buluhaton anay.”​​—⁠Bugna 2:5.

16. Anong makatalagam sa espirituwal nga mga impluwensia ang nagluntad sa mga kongregasyon sa Pergamo kag Tiatira, kag ngaa nagakaigo man karon ang ginsiling anay ni Jesus sa ila?

¹⁶ Ang mga Cristiano sa Pergamo kag Tiatira ginhatagan sing komendasyon sa ila integridad, pagbatas, kag kakugi. (Bugna 2:​12, 13, 18, 19) Apang, naimpluwensiahan sila sang pila nga nagpakita sing malaut nga espiritu ni Balaam kag ni Jezebel, nga paagi sa seksuwal nga imoralidad kag pagsimba kay Baal nangin makapalain nga mga impluwensia sa dumaan nga Israel. (Numeros 31:16; 1 Hari 16:​30, 31; Bugna 2:​14, 16, 20-​23) Apang kamusta naman sa aton tion​​—⁠“sa adlaw sang Ginuo”? May yara man bala sining malaut nga mga impluwensia? Huo, kay sa tunga sang katawhan sang Dios, imoralidad ang una nga kabangdanan sang pag-disfellowship. Busa, importante gid nga likawan naton ang pagpakig-upod sa tanan nga indibiduwal​​—⁠sa sulod kag sa guwa sang kongregasyon⁠​—⁠nga isa ka makapalain nga impluwensia sa moral! (1 Corinto 5:​9-​11; 15:33) Likawan man sang mga nagahandum nga mangin matinumanon nga mga sakop sang Shilo ang kwestionable nga kalingawan subong man ang naimprinta nga pornograpiya kag ang makita sa Internet.​​—⁠Amos 5:​15; Mateo 5:​28, 29.

17. Ano ang pagtamod kag panimuot sang mga taga-Sardis kag mga taga-Laodicea kon ipaanggid sa pagtamod ni Jesus sa ila espirituwal nga kahimtangan?

¹⁷ Luwas sa pila lamang ka indibiduwal, ang kongregasyon sa Sardis wala gid makabaton sing komendasyon. May “ngalan” ini, ukon dagway nga buhi, apang tudok gid ang iya espirituwal nga indi pagsapak amo nga para kay Jesus “patay” ini. Rutina lamang ang iya pagtuman sa maayong balita. Daw ano nga pagpakamalaut! (Bugna 3:​1-3) Amo man ang kahimtangan sang kongregasyon sa Laodicea. Nagpahambog ini sang iya materyal nga manggad, nga nagasiling, “Manggaranon ako,” apang para kay Cristo “kailo [ini] kag makaluluoy kag imol kag bulag kag hubo.”​​—⁠Bugna 3:​14-​17.

18. Paano naton malikawan ang mangin maalabaab sa espirituwal sa mga mata sang Dios?

¹⁸ Sa karon man, ang matutom anay nga mga Cristiano nangin subong man sini ka malalison. Ayhan bangod sang impluwensia sang espiritu sang kalibutan, wala na nila ginabatyag ang pagkahilingagawon sang tion, amo kon ngaa  nag-alabaab sila sa espirituwal kon tuhoy sa pagtuon sa Biblia, pangamuyo, Cristianong mga miting, kag ministeryo. (2 Pedro 3:​3, 4, 11, 12) Importante gid nga tumanon nila si Cristo paagi sa pagpamuhunan sa espirituwal nga mga manggad​​—⁠huo, ‘magbakal gikan kay Cristo sing bulawan nga inulay sang kalayo’! (Bugna 3:18) Ining matuod nga manggad nagalakip sing ‘pagkamanggaranon sa maayong mga buhat, kaalwan, kahanda sa pagpaambit.’ Paagi sa pagpamuhunan sa sining hamili gid nga mga butang, “mahalungon nga nagatipon [kita] para sa [aton] kaugalingon sing maayo nga sadsaran para sa palaabuton, agod makapanguyapot [kita] sing hugot sa matuod nga kabuhi.”​​—⁠1 Timoteo 6:​17-​19.

Ginhatagan sing Komendasyon sa Ila Pagkamatinumanon

19. Ano nga mga komendasyon kag mga laygay ang ginhatag ni Jesus sa mga Cristiano sa Smirna kag sa Filadelfia?

¹⁹ Ang kongregasyon sa Smirna kag sa Filadelfia talalupangdon gid nga mga halimbawa sa pagkamatinumanon, kay wala sila ginsabdong ni Jesus sa iya sulat sa ila. Sa mga taga-Smirna, sia nagsiling: “Nahibaluan ko ang imo mga kapipit-an kag kaimulon​​—⁠apang manggaranon ka.” (Bugna 2:⁠9) Tuhay gid sila sa mga taga-Laodicea nga nagpahambog sang ila kalibutanon nga manggad apang ang matuod imol sila! Sa pagkamatuod, wala nalipay ang Yawa kon makita niya ang bisan sin-o nga nagapakita sing katutom kag pagkamatinumanon kay Cristo. Busa, si Jesus nagpaandam: “Dili pagkahadluki ang mga butang nga dali na lang nimo antuson. Yari karon! Ang Yawa padayon nga magasulod sang iban sa inyo sa bilangguan agod nga matilawan kamo sing bug-os, kag may kapipit-an kamo sa sulod sang napulo ka adla. Pamatud-an mo nga matutom ka tubtob sa kamatayon, kag ihatag ko sa imo ang korona sang kabuhi.” (Bugna 2:10) Ginhatagan man ni Jesus sing komendasyon ang mga taga-Filadelfia, nga nagasiling: “Nagtuman ka sang akon pulong kag wala magpanghiwala sang akon ngalan. Magakari ako sing madali. Hupti ang yara sa imo, agod nga wala sing isa nga makakuha sang imo korona.”​​—⁠Bugna 3:​8, 11.

20. Paano gintuman sang minilyon karon ang pulong ni Jesus, kag walay sapayan sang anong mga kahimtangan?

²⁰ Sa “adlaw sang Ginuo,” sugod sang 1914, ang matutom nga nagkalabilin kag ang ila mga kaupod nga iban pa nga mga karnero, nga karon may kadamuon nga minilyon, nagtuman man sa pulong ni Jesus paagi sa ila makugi nga pagpakigbahin sa ministeryo kag paghupot sang ila integridad. Subong sang natabo sa ila mga kauturan sang una nga siglo, ang iban sa ila nag-antos bangod sang ila pagkamatinumanon kay Cristo, kag ginlupot sila sa mga bilangguan kag mga kampo konsentrasyon. Ang iban nagtuman sang pulong ni Jesus paagi sa paghupot sing ‘simple nga mata,’ walay sapayan nga napalibutan sila sang manggad kag kakagod. (Mateo 6:​22, 23) Huo, sa bisan ano man nga palibot kag kahimtangan, ang matuod nga mga Cristiano, paagi sa ila pagkamatinumanon, padayon nga nagapahalipay sa tagipusuon ni Jehova.​​—⁠Hulubaton 27:11.

21. (a) Anong espirituwal nga obligasyon ang padayon nga tumanon sang ulipon nga klase? (b) Paano naton mapakita nga luyag gid naton tumanon ang Shilo?

²¹ Samtang nagahilapit kita sa dakung kapipit-an, “ang matutom kag mainandamon nga ulipon” desidido gihapon nga indi pag-ikompromiso ang ila pagkamatinumanon sa Agalon nga si Cristo. Nagalakip ini sang paghanda sing sibu sa tion nga espirituwal nga pagkaon para sa panimalay sang Dios. Gani padayon nga pasalamatan naton ang dalayawon nga teokratikong organisasyon ni Jehova kag ang ginaaman sini. Sa sining paagi, ginapakita naton ang aton pagpasakop sa Shilo, nga magapadya sa tanan niya nga matinumanon nga sakop sing kabuhi nga walay katapusan.​​—⁠Mateo 24:45-​47; 25:40; Juan 5:​22-​24.

[Mga nota]

Madumduman Mo Bala?

• Ano ang mangin papel ni Jesus sa gintagna ni Jacob sang nagatagumatayon sia?

• Paano naton ginakilala si Jesus subong ang Shilo, kag ano nga espiritu ang dapat naton likawan?

• Anong nagakaigo nga laygay para sa aton adlaw ang ginaunod sang mga sulat sa pito ka kongregasyon sa Bugna?

• Sa anong mga paagi mailog naton ang mga taga-Smirna kag taga-Filadelfia nga mga kongregasyon sang dumaan nga tion?

[Mga Pamangkot sa Pagtinuon]

[Mga retrato sa pahina 18]

Ginapakamaayo ni Jehova ang iya katawhan bangod sang ila pagtuman sa matutom nga “tulugyanan”

[Retrato sa pahina 19]

Mabudlay tumanon ang Dios bangod sang impluwensia ni Satanas

[Mga retrato sa pahina 21]

Ang malig-on nga relasyon kay Jehova magabulig sa aton nga mangin matinumanon sa iya