Dapat Bala ang mga Cristiano Mangin Maimon?

KAIMON​​—⁠isa bala ini ka kinaiya nga dapat palambuon sang mga Cristiano? Subong mga Cristiano, ginapalig-on kita nga “sundon ang gugma,” kag ginasilingan kita nga ang “gugma indi maimon.” (1 Corinto 13:⁠4; 14:⁠1) Sa pihak nga bahin, ginasilingan man kita nga “si Jehova . . . isa ka maimon nga Dios” kag ginsugo kita nga “mangin mga manug-ilog sang Dios.” (Exodo 34:14; Efeso 5:⁠1) Ngaa daw may pagsumpakilay?

Ini bangod kay ang Hebreo kag Griego nga mga tinaga sa Biblia nga ginbadbad “kaimon” may madamo nga kahulugan. Mahimo nga may positibo ukon negatibo ini nga kahulugan, depende sa kon paano ginagamit ang mga tinaga. Halimbawa, ang Hebreo nga tinaga nga ginbadbad “kaimon” mahimo magakahulugan sing “pagpakalig-on sa eksklusibo nga debosyon; indi pagtugot sing kaagaw; kakugi; kainit; kaimon [matarong ukon malain]; kahisa.” May kaanggid man sini nga kahulugan ang katumbas nga Griegong tinaga. Ini nga mga tinaga mahimo mapatuhoy sa sayop, di-nagakaigo nga emosyon sa isa ka ginakabig nga karibal ukon sa isa nga ginapatihan nga yara sa bentaha. (Hulubaton 14:30) Mahimo man ini mapatuhoy sa isa ka positibo nga pagpabutyag sang hatag-Dios nga kinaiya​—⁠ang handum nga amligan ang isa ka hinigugma gikan sa kahalitan.​—⁠2 Corinto 11:2.

Ang Superlatibo nga Halimbawa

Nagpahamtang si Jehova sing superlatibo nga halimbawa sa pagpakita sing nagakaigo nga kaimon. Ang iya motibo putli kag matinlo, ginapahulag sang handum nga ipahilayo ang iya katawhan gikan sa espirituwal kag moral nga kalainan. Tuhoy sa iya dumaan nga katawhan, nga ginapatuhuyan sing malaragwayon subong ang Sion, sia nagsiling: “Nagakaimon ako sa Sion sa dakung kaimon, kag nagakaimon ako sa iya sa dakung kasingkal.” (Zacarias 8:2) Subong nga ang isa ka mahigugmaon nga amay alisto sa pag-amlig sa iya kabataan gikan sa kahalitan, alisto man si Jehova nga amligan ang iya mga alagad gikan sa pisikal kag espirituwal nga katalagman.

Agod maamligan ang iya katawhan, gin-aman ni Jehova ang iya Pulong, ang Biblia. Nagaunod ini sing madamo nga pagpalig-on agod makalakat sila sing maalamon, kag puno ini sing mga halimbawa sang mga nakahimo sini. Sa Isaias 48:​17, aton mabasa: “Ako, si Jehova, amo ang imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga dapat mo laktan.” Daw ano ka makapaumpaw mahibaluan nga ang iya kaimon nagapahulag sa iya agod atipanon kag bantayan kita! Kon indi sia maimon sa sining husto nga paagi, mahimo magaantos kita sang tanan nga sahi sang kahalitan bangod indi kita eksperiensiado. Ang pagpakita ni Jehova sang kaimon indi gid makagod.

Busa, ano ang kinatuhayan sang diosnon nga kaimon kag sang di-nagakaigo nga kaimon? Agod mahibaluan, binagbinagon naton ang halimbawa ni Miriam kag ni Finehas. Talupangda kon ano ang nagpahulag sa ila.

Si Miriam kag si Finehas

Si Miriam magulang nga babayi nanday Moises kag Aaron, ang mga lider sang mga Israelinhon sa tion sang Exodo. Samtang yara ang mga Israelinhon sa kahanayakan, nangimon si Miriam sa iya utod nga si Moises. Ang rekord sa Biblia nagasiling: “Si Miriam kag si Aaron nagpamulong batok kay Moises bangod sang babaying Cushanon nga iya ginpangasawa . . . Kag pirme sila nagasiling: ‘Paagi lamang bala kay Moises nga nagpamulong  si Jehova? Indi bala nga paagi man sa aton nga nagapamulong sia?’ ” Maathag nga si Miriam amo ang nanguna sining pagpamatok kay Moises, kay gindisiplina ni Jehova si Miriam paagi sa aro sa sulod sang isa ka semana bangod sang di-matinahuron nga paggawi, apang si Aaron wala.​—⁠Numeros 12:1-15.

Ano ang nagpahulag kay Miriam nga pamatukan si Moises? Bangod bala sang iya kabalaka sa matuod nga pagsimba kag sa handum nga amligan ang iya mga masigka-Israelinhon gikan sa kahalitan? Maathag nga indi. Daw mahimo gid nga gintugutan ni Miriam ang di-nagakaigo nga handum para sa dugang nga dungog kag awtoridad nga maglambo sa iya tagipusuon. Subong manalagna sang Israel, daku gid ang pagtahod sang katawhan sa iya, ilabi na sang mga babayi. Ginpangunahan niya sila sa musika kag ambahanon pagkatapos sang milagruso nga pagkaluwas sang Israel sa Dagat nga Mapula. Apang sa karon, mahimo nga nabalaka gid si Miriam nga mabuhinan ang iya pagkabantog bangod sang isa nga ginakabig niya nga karibal, ang asawa ni Moises. Napahulag sang makagod nga kaimon, nakigsuay sia kay Moises, ang isa nga gintangdo ni Jehova.​—⁠Exodo 15:​1, 20, 21.

Si Finehas, sa pihak nga bahin, may tuhay nga motibo sa iya mga buhat. Sang madali na lang makasulod sa Ginsaad nga Duta, samtang nagakampo ang Israel sa Kapatagan sang Moab, ginsulay sang Moabinhon kag Midianhon nga mga babayi ang madamo nga lalaki nga Israelinhon sa imoralidad kag idolatriya. Agod matinluan ang kampo kag mapaugdaw ang nagadabdab nga kaakig ni Jehova, ginsugo ang mga hukom sa Israel nga patyon ang mga lalaki nga nagluib. Bangod luyag sang imoralidad, dayag nga gindala sa kampo sang pangulo sa tribo ni Simeon nga si Zimri ang Midianhon nga babayi nga si Cozbi “sa atubangan sang tanan nga katilingban sang mga anak sang Israel.” Naghulag sing maisugon si Finehas. Ginpahulag sang kaimon, ukon kakugi, sa pagsimba kay Jehova kag sang handum nga huptan ang matinlo nga moral sang kampo, ginpatay niya ang mga makihilawason sa ila tolda. Gindayaw sia sa iya “maimon nga kaakig,” nga ‘wala gid nagatugot sing kaagaw’ kay Jehova. Ang maabtik nga buhat ni Finehas amo ang nagpauntat sang kalalat-an nga nagkutol na sing 24,000 ka kabuhi, kag ginpadyaan sia ni Jehova sing isa ka katipan para sa pagkasaserdote nga magapabilin sa iya linya tubtob sa walay latid nga tion.​—⁠Numeros 25:​4-​13; The New English Bible.

Ano ang kinatuhayan sining duha ka pagpakita sing kaimon? Si Miriam namatok sa iya utod bangod sang iya makagod nga kaimon, samtang si Finehas nagbuhat sing hustisya pasad sa diosnon nga kaimon. Kaangay ni Finehas, may mga tion nga dapat kita maghambal ukon maghimo sing pila ka buhat agod pangapinan ang ngalan ni Jehova, ang pagsimba sa iya, kag ang iya katawhan.

Wala sa Lugar nga Kaimon

Apang, posible bala nga magbatyag sing di-nagakaigo ukon wala sa lugar nga kaimon? Huo, posible ini. Amo sini ang kalabanan nga natabo sa mga Judiyo sang unang siglo. Maimon nga ginbantayan nila ang hatag-Dios nga Kasuguan kag ang ila mga tradisyon. Sa ila mga panikasog nga amligan ang Kasuguan, naghimo sila sing tuman kadamo detalyado nga mga kasuguan kag mga pagdumili nga nangin mabug-at nga lulan sa katawhan. (Mateo 23:⁠4) Bangod indi handa ukon nagapaganot sa pagbaton nga ginbuslan na sang Dios ang Mosaiko nga Kasuguan sing katunayan nga ginalandungan sini, ang wala sa lugar nga kaimon amo ang nagpahulag sa ila nga maakig gid  sa mga sumulunod ni Jesucristo. Si apostol Pablo, nga may wala man anay sa lugar nga kaimon sa Kasuguan, nagpakita nga ang mga tawo nga nagapangapin sang Kasuguan “may kakugi [kaimon] para sa Dios; apang indi suno sa sibu nga ihibalo.”​—⁠Roma 10:⁠2; Galacia 1:⁠14.

Bisan ang madamo nga Judiyo nga nangin Cristiano nabudlayan man sa pagdula sining di-nagakaigo nga kakugi para sa Kasuguan. Pagkatapos sang iya ikatlo nga paglibot subong misyonero, nagreport si Pablo sa unang-siglo nga nagadumala nga hubon tuhoy sa pagkakumberte sang mga pungsod. Sadto nga tion, linibo ka Cristianong mga Judiyo ang “may kakugi sa Kasuguan.” (Binuhatan 21:20) Amo sini ang kahimtangan walay sapayan nga pila na ka tuig ang nagligad pagkatapos namat-od ang nagadumala nga hubon nga ang Gentil nga mga Cristiano indi na magpasirkunsidar. Ang mga hulusayon nga naangot sa pagtuman sang Kasuguan gintunaan sang pinuyas sa sulod sang kongregasyon. (Binuhatan 15:​1, 2, 28, 29; Galacia 4:​9, 10; 5:​7-​12) Bangod kulang sila sing paghangop kon paano na karon ginapakig-angutan ni Jehova ang iya katawhan, nagpamilit ang Judiyong mga Cristiano sang ila kaugalingon nga mga pagtamod, nga nagamulay sa iban.​—⁠Colosas 2:​17; Hebreo 10:1.

Busa, dapat kita maglikaw sa siod nga amligan sing maimon ang aton ginapakabahandi nga mga ideya ukon mga dalanon nga wala napasad sing malig-on sa Pulong sang Dios. Mangin maayo para sa aton kon batunon naton ang bag-o nga kapawa sa Pulong sang Dios paagi sa alagyan nga ginagamit ni Jehova karon.

Mangin Maimon Para kay Jehova

Apang, ang diosnon nga kaimon may nagakaigo nga duog sa matuod nga pagsimba. Kon may huyog kita nga mabalaka sing di-nagakaigo sa aton reputasyon ukon mga kinamatarong, ang diosnon nga kaimon magaliso sang aton igtalupangod kay Jehova. Pahulagon kita sini nga mangita sing nagkalainlain nga paagi agod mabantala ang kamatuoran tuhoy sa iya, nagapangapin sang iya mga dalanon kag sang iya katawhan.

Si Akiko, nga isa ka bug-os tion nga ministro sang mga Saksi ni Jehova, gin-akigan sang isa ka tagbalay nga may sayop nga mga pagtamod sa kasuguan sang Dios tuhoy sa dugo. Mataktikanhon nga ginpangapinan ni Akiko ang Pulong sang Dios, nagsambit pa gani sing mga komplikasyon sa medisina kag mga problema nga resulta sang mga pagpatughong sing dugo. Bangod napahulag sang daku nga handum nga maghambal tuhoy kay Jehova, ginliso niya ang paghambalanay sa nahantop niya nga amo ang matuod nga rason sang pagpamatok sang babayi​—⁠ang kakulang sini sing pagtuo sa pagluntad sang isa ka Manunuga. Nangatarungan si Akiko sa tagbalay kon paano ginasuportahan sang pagpanuga ang pagpati sa isa ka Manunuga. Ang iya maisugon nga pagdepensa nagdul-ong indi lamang sa pagkadula sang wala sing sadsaran nga pagkamaynadampigan kundi sa isa man ka pagtuon sa Biblia sa puluy-an upod sa babayi. Ang naakig anay nga tagbalay isa na karon ka dumalayaw ni Jehova.

Ang nagakaigo nga kaimon, ukon kakugi para sa matuod nga pagsimba amo ang nagapahulag sa aton nga mangin alisto kag maghimulos sang mga kahigayunan nga makighambal kag pangapinan ang aton pagtuo sa trabaho, sa eskwelahan, sa balaligyaan, kag samtang nagalakbay. Halimbawa, si Midori namat-od nga magpaambit sang iya pagtuo sa iya mga kaupod sa trabaho. Ang isa niya ka  kaupod nga kuwarentahon na nagsiling nga indi sia interesado makighambal sa mga Saksi ni Jehova. Sang ulihi, sa isa nila ka paghambalanay, nagreklamo ang babayi bangod ang iya bata nga babayi may problema sa personalidad. Ginpakita ni Midori sa iya ang libro nga Questions Young People Ask​​—⁠Answers That Work,⁠ * kag nagtanyag sia nga tun-an niya ang bata sini nga babayi sa libro. Ginsugdan ang isa ka pagtuon sa Biblia, apang wala mag-upod ang nanay sa pagtuon. Namat-od si Midori nga ipakita sa iloy ang video nga Jehovah’s Witnesses​​—⁠The Organization Behind the Name. * Nagdula ini sang iya madamo nga sayop nga mga impresyon. Napahulag sang iya nakita, sia nagsiling: “Luyag ko nga mangin kaangay sang mga Saksi ni Jehova.” Nag-upod sia sa iya bata nga babayi sa pagtuon sa Biblia.

Ang nagakaigo nga kaimon may duog man sa Cristianong kongregasyon. Nagapalambo ini sing isa ka mainit nga espiritu sang gugma kag kabalaka kag nagapahulag sa aton nga pakigbatuan ang magamo nga mga impluwensia nga mahimo magahalit sang aton espirituwal nga mga kauturan, subong sang makahalalit nga kutsokutso kag apostata nga mga panghunahuna. Ang diosnon nga kaimon magapahulag sa aton nga sakdagon ang mga desisyon sang mga gulang, nga kon kaisa kinahanglan magsabdong sa mga nakasala. (1 Corinto 5:​11-​13; 1 Timoteo 5:20) Nagasulat sang iya kaimon para sa iya mga masigkatumuluo sa kongregasyon sang Corinto, si Pablo nagsiling: “Nagapangimon ako tungod sa inyo upod ang diosnon nga pagkaimon, kay ginpanaad ko kamo nga ipakasal sa isa ka bana agod nga mapresentar ko kamo subong isa ka putli nga ulay kay Cristo.” (2 Corinto 11:⁠2) Busa, pahulagon man kita sang aton kaimon nga himuon ang aton tanan nga masarangan agod amligan ang doktrinal, espirituwal, kag moral nga kaputli sang tanan sa kongregasyon.

Huo, ang napahulag sing nagakaigo nga kaimon​—⁠diosnon nga kaimon​—⁠may maayo nga impluwensia sa iban. Nagaresulta ini sa kahamuot ni Jehova kag dapat mangin isa sang mga kinaiya nga makita sa mga Cristiano karon.​—⁠Juan 2:⁠17.

[Mga nota]

[Mga retrato sa pahina 29]

Ang mga buhat ni Finehas napasad sa diosnon nga kaimon

[Mga retrato sa pahina 30]

Likawi ang siod sang wala sa lugar nga kaimon

[Mga retrato sa pahina 31]

Ang diosnon nga kaimon nagapahulag sa aton nga ipaambit ang aton pagtuo kag pakabahandion ang aton paghiliutod