Kinahanglan Naton Tanan ang Komendasyon

MAAYO nga adlaw yadto para sa magamay nga bata nga babayi. Bisan pa kinahanglan nga sawayon sia sa iban nga mga tion, sa sini nga adlaw, tuman sa iya kabuot. Apang, sadto nga gab-⁠i, pagkatapos nga ginpatulog ang magamay nga bata nga babayi, nabatian sang iya iloy ang iya paghibi. Sang ginpamangkot kon ngaa, nagahibubun-ot sia nga nagsiling: “Indi bala ako mabuot karon nga adlaw?”

Nagbatyag gid ang iloy sa sadtong pamangkot. Maabtik nga ginasaway niya pirme ang iya bata nga babayi. Apang karon, bisan pa natalupangdan niya ang pagtinguha gid sang iya bata nga magbuot, wala gid makabungat ang iloy sing bisan isa lang ka tinaga sang pagdayaw.

Indi lamang ang magamay nga mga bata nga babayi ang nagakinahanglan sing komendasyon kag pasalig. Tanan kita nagakinahanglan sini​—⁠kaangay sang pagkinahanglan man naton sang laygay kag pagtadlong.

Ano ang aton ginabatyag kon makabaton kita sing tinagipusuon nga komendasyon? Wala bala ini nagapahalipay kag nagapapagsik sa aton? Mahimo nagabatyag kita nga may nakatalupangod sa aton, nga may isa nga nagaulikid. Nagapasalig ini sa aton nga takus ang aton nahimo, kag nagapahulag ini sa aton nga manikasog pa gid sa palaabuton. Indi katingalahan nga ang sinsero nga komendasyon masami nga nagapasuod sa aton sa tawo nga nagahinguyang sing tion sa paghambal sing pila ka makapalig-on nga butang.​—⁠Hulubaton 15:23.

Nahangpan ni Jesucristo nga kinahanglan ang paghatag sing komendasyon. Sa parabola tuhoy sa mga talanton, ang agalon (nagapatuhoy kay Jesus mismo) mainit nga naghatag sing komendasyon sa duha ka matutom nga ulipon, nga nagasiling: “Maayo gid, ulipon nga maayo kag matutom!” Daw ano ka makalilipay! Bisan pa nga may tuhay sila nga mga ikasarang kag hinimuan, nakatigayon sila sing pareho nga komendasyon.​—⁠Mateo 25:19-​23.

Busa dumdumon naton ang iloy sadtong magamay nga bata nga babayi. Indi na naton paghulaton nga maghibi pa ang iban antes naton hatagan sing komendasyon. Sa baylo, mangita kita sing mga kahigayunan agod makahatag sing komendasyon. Sa pagkamatuod, may maayo gid kita nga rason nga maghatag sing sinsero nga komendasyon sa tanan nga kahigayunan.