Mga Sumalakdag sang Matuod nga Pagsimba—Sadto kag Karon

NADUMDUMAN mo bala ang ngalan sang tawo nga naghibi tungod sa dumaan nga siudad sang Jerusalem? ‘Si Jesus,’ mahimo isiling mo​—⁠kag, sa pagkamatuod, si Jesus gid man. (Lucas 19:​28, 41) Apang, mga siglo antes si Jesus nagkabuhi sa duta, ang isa pa ka matutom nga alagad sang Dios naghibi man tungod sa Jerusalem. Ang iya ngalan amo si Nehemias.​—⁠Nehemias 1:​3, 4.

Ano ang nagpasubo gid kay Nehemias amo nga naghibi sia tungod sa Jerusalem? Ano ang iya ginhimo para sa kaayuhan sang siudad kag sang mga pumuluyo sini? Kag ano ang aton matun-an gikan sa iya halimbawa? Agod masabat ini, repasuhon naton ang pila ka hitabo sang panahon niya.

Isa ka Tawo nga May Balatyagon kag Binuhatan

Si Nehemias gintangdo nga gobernador sang Jerusalem, apang antes sini, isa sia ka opisyal nga may mataas nga ranggo sa palasyo sang Persia sa siudad sang Shushan. Apang, ang iya masulhay nga kabuhi wala magbuhin sang iya kabalaka para sa kaayuhan sang iya Judiyong mga kauturan sa malayo nga Jerusalem. Sa katunayan, ang iya una nga ginhimo sang ang delegasyon sang mga Judiyo gikan sa Jerusalem nagduaw sa Shushan amo ang ‘pagpamangkot sa ila tuhoy sa mga Judiyo, sa mga nakapalagyo, sa mga nagkalabilin gikan sa pagkabihag, kag tuhoy man sa Jerusalem.’ (Nehemias 1:⁠2) Sang ang mga dumuluaw nagsabat nga ang mga pumuluyo sang Jerusalem yara sa “malain gid nga kahimtangan” kag nga ang pader sang siudad “narumpag,” si Nehemias “naglingkod kag naghibi kag naglalaw sing pila ka adlaw.” Pagkatapos sadto ginpabutyag niya ang iya kasubo paagi sa tinagipusuon nga pagpangamuyo kay Jehova. (Nehemias 1:​3-​11) Ngaa nasubuan gid si Nehemias? Bangod ang Jerusalem amo ang sentro sang pagsimba kay Jehova sa duta, kag ginpatumbayaan ini. (1 Hari 11:36) Dugang pa, ang guba nga kahimtangan sang siudad nagapakita sang indi maayo nga espirituwal nga kahimtangan sang mga pumuluyo sini.​—⁠Nehemias 1:​6, 7.

 Ang kabalaka ni Nehemias sa Jerusalem kag ang iya kaawa sa mga Judiyo nga nagapuyo didto amo ang nagpahulag sa iya nga gamiton ang iya kaugalingon. Sang gintugutan sia sang hari sang Persia nga magbakasyon sa iya trabaho, gilayon nga ginplano ni Nehemias ang malawig nga paglakbay pa-Jerusalem. (Nehemias 2:​5, 6) Luyag niya gamiton ang iya kusog, tion, kag kalantip sa pagsakdag sa kinahanglanon nga pagkay-o nga hilikuton. Sa sulod sang pila lamang ka adlaw sang iya pag-abot, may plano na sia para sa pagkay-o sa bug-os nga pader sang Jerusalem.​—⁠Nehemias 2:​11-​18.

Ginbahinbahin ni Nehemias ang daku nga hilikuton sang pagkay-o sa madamo nga pamilya, nga ang tanan nagbuligay.⁠ * Kapin sa 40 ka grupo ang gintangdo nga magkay-o sing isa ka “gintakus nga bahin” kada isa. Ang resulta? Bangod madamo gid ang mga manugpangabudlay​—⁠pati na ang mga ginikanan nga ginaupdan sang ila mga kabataan​—⁠nga naggamit sang ila tion kag kusog, ang daw indi masarangan nga trabaho nangin posible. (Nehemias 3:​11, 12, 19, 20) Sa sulod sang duha ka masako nga bulan, nakay-o ang bug-os nga pader! Si Nehemias nagsulat nga bisan ang mga nagpamatok sa pagkay-o nga hilikuton napilitan sa pagbaton nga “ining hilikuton ginhimo bangod sa amon Dios.”​—⁠Nehemias 6:​15, 16.

Isa ka Halimbawa nga Dapat Dumdumon

Indi lamang ang iya tion kag kalantip sa pag-organisar ang ginbulig ni Nehemias. Gingamit man niya ang iya materyal nga pagkabutang sa pagsakdag sa matuod nga pagsimba. Gingamit niya ang iya mismo kuwarta agod gawaron ang iya Judiyong mga kauturan gikan sa pagkaulipon. Nagpahulam sia sing kuwarta nga wala sing saka. Wala gid niya ‘ginpabug-atan’ ang mga Judiyo paagi sa pagpangayo sing sustento subong gobernador, nga may kinamatarong sia kuntani. Sa baylo, bukas pirme ang iya balay sa pagpakaon sa “isa ka gatos kag kalim-an ka tawo, kag sa mga nagkari sa amon gikan sa mga pungsod sa palibot namon.” Kada adlaw nag-aman sia sing “isa ka baka, anom ka karnero nga pinili kag mga pispis” para sa iya mga bisita. Dugang pa, makaisa sa napulo ka adlaw ginhatagan niya sila sang “tanan nga sari sang alak sing bugana”​—⁠ang tanan gingastuhan niya.​—⁠Nehemias 5:​8, 10, 14-​18.

Daw ano ka talalupangdon nga huwaran sang kaalwan ang ginpahamtang ni Nehemias para sa tanan nga alagad sang Dios sadto kag karon! Ining maisog nga alagad sang Dios handa kag kinabubut-on nga naggamit sang iya materyal nga pagkabutang sa pagsakdag sa mga manugpangabudlay agod mapauswag ang matuod nga pagsimba. Nagakaigo nga nakapangabay sia kay Jehova: “Dumduma . . . O Dios ko, sa kaayuhan, ang tanan nga ginhimo ko para sa sini nga katawhan.” (Nehemias 5:19) Pat-od gid nga himuon ina ni Jehova.​—⁠Hebreo 6:10.

Ang Huwaran ni Nehemias Ginasunod Karon

Makalilipay makita nga ang katawhan ni Jehova karon nagapakita man sing pagkamahigugmaon, kahanda sa pagpanghikot, kag masinakripisyuhon nga panimuot para sa matuod nga pagsimba. Kon mabalitaan naton nga ang mga masigkatumuluo nagaantos sing mga kabudlayan, nabalaka gid kita sa ila kaayuhan. (Roma 12:15) Kaangay ni Nehemias, nagadangop kita kay Jehova paagi sa pangamuyo bilang pagsuportar sa aton nasit-an nga mga utod sa pagtuo, nga nagapangabay sa iya: “Palihug, pamatii ang pangamuyo sang imo alagad kag ang pangamuyo sang imo mga alagad nga nagakalipay sa pagkahadlok sa imo ngalan.”​—⁠Nehemias 1:​11; Colosas 4:2.

Apang, ang aton kabalaka sa espirituwal kag pisikal nga kaayuhan sang aton Cristianong mga kauturan kag sa pagpauswag sang matuod nga pagsimba wala lamang nagaapektar sa aton balatyagon. Nagapahulag man ini sa aton sa pagpanghikot. Ang mga  tawo nga ginapahanugutan sang ila kahimtangan ginpahulag sang gugma nga bayaan ang kasulhayan sa ila puluy-an kag, kaangay ni Nehemias, nagsaylo sa iban nga mga duog agod buligan ang mga nagakinahanglan. Wala malingkang sang medyo di-komportable nga kahimtangan sang kabuhi nga mahimo atubangon sining mga boluntaryo sa iban nga bahin sang kalibutan, ginasakdag nila ang pag-uswag sang matuod nga pagsimba didto, nga nagaalagad upod sa ila Cristianong mga kauturan. Dalayawon gid ang masinakripisyuhon nga panimuot nga ila ginapakita.

Nagahimo sang Aton Bahin Malapit sa Puluy-an

Halangpunon nga ang kalabanan sa aton indi makasaylo sa iban nga duog. Ginasakdag naton ang matuod nga pagsimba malapit sa aton puluy-an. Ginapakita man ina sa tulun-an ni Nehemias. Talupangda ang detalye nga gindugang ni Nehemias tuhoy sa pila ka matutom nga pamilya nga nagpakigbahin sa pagkay-o nga hilikuton. Sia nagsulat: “Si Jedaya nga anak nga lalaki ni Harumaf nagkay-o sa atubangan sang iya balay . . . Si Benjamin kag si Hasub nagkay-o sa atubangan sang ila balay. Pagkatapos nila si Azarias nga anak nga lalaki ni Maasias nga anak nga lalaki ni Ananias nagkay-o malapit sa iya balay.” (Nehemias 3:​10, 23, 28-30) Yadtong mga lalaki kag ang ila pamilya nakabulig sing daku sa pagpauswag sang matuod nga pagsimba paagi sa paghimo sang ila bahin sa pagkay-o nga hilikuton malapit sa ila puluy-an.

Sa karon, madamo sa aton ang nagasakdag sa matuod nga pagsimba sa aton mismo komunidad  sa nanuhaytuhay nga paagi. Nagapakigbahin kita sa pagpatindog sing mga Kingdom Hall, sa pagbulig sa mga biktima sang kalamidad kag, sing labing importante, sa pagbantala sing Ginharian nga hilikuton. Dugang pa, makapakigbahin man kita sing personal ukon indi sa konstruksion ukon sa pagbulig sa mga biktima sang kalamidad nga hilikuton, tinagipusuon nga handum naton tanan nga sakdagon ang matuod nga pagsimba paagi sa aton materyal nga pagkabutang, subong sang maalwan nga ginhimo ni Nehemias sang panahon niya.​—⁠Tan-awa ang kahon “Mga Kinaiya Sang Boluntaryo nga Paghatag.”

Ang pagpangita sing kinahanglanon nga mga pundo agod gastuhan ang nagasangkad nga mga hilikuton sa pag-imprinta, pagbulig sa mga biktima sang kalamidad, kag madamo pa nga iban nga mga serbisyo nga ginahimo sa bug-os nga kalibutan daw indi masarangan kon kaisa. Apang, dumduma nga ang pagkay-o sa daku nga pader sang Jerusalem daw indi man masarangan. (Nehemias 4:10) Apang, bangod ginbahinbahin ang hilikuton sa madamo nga pamilya nga handa magbulig, natapos ang hilikuton. Sa karon man, ang pagpangita sing madamo nga paagi sa pagtuman sang aton bug-os kalibutan nga mga hilikuton mangin posible kon ang tagsatagsa sa aton padayon nga maghimo sang isa ka bahin sang hilikuton.

Ang kahon nga “Mga Paagi nga Ginpili Sang iban sa Paghatag” nagapakita sing pila ka paagi nga mahimo masakdag sa pinansial ang hilikuton sang Ginharian. Sang nagligad nga tuig, madamo sang katawhan sang Dios ang naghatag sing suporta sa sining paagi, kag ang  Nagadumala nga Hubon sang mga Saksi ni Jehova luyag magpabutyag sang ila tudok nga pagpasalamat sa tanan nga ginpahulag sang ila tagipusuon sa pagpakigbahin sa sining boluntaryo nga paghatag. Labaw sa tanan, ginapasalamatan naton si Jehova tungod sa iya bugana nga pagpakamaayo sa bug-os tagipusuon nga mga panikasog sang iya katawhan sa pagpauswag sing matuod nga pagsimba sa bug-os nga kalibutan. Huo, kon ginapamalandungan naton kon paano si Jehova nagatuytoy sa aton sa sulod sang mga tuig, mapahulag kita sa pagtuaw sang mga pinamulong ni Nehemias, nga mapinasalamaton nga nagsiling: ‘Ang kamot sang akon Dios, daw ano ini ka maayo sa akon.’​—⁠Nehemias 2:18.

[Nota]

[Kahon/Mga retrato sa pahina 28, 29]

Mga Paagi nga Ginpili Sang Iban sa Paghatag

MGA AMOT SA BUG-OS KALIBUTAN NGA HILIKUTON

Madamo ang nagapain, ukon nagabadyet, sing kantidad nga ginahulog nila sa mga kahon-alamutan nga may ngalan “Contributions for the Worldwide Work​​—⁠Matthew 24:14.”

Kada bulan, ginapadala sang mga kongregasyon ini nga kantidad sa bug-os kalibutan nga ulong-talatapan sang mga Saksi ni Jehova sa Brooklyn, New York, ukon sa lokal nga sanga talatapan. Ang boluntaryo nga mga amot nga kuwarta mahimo man mapadala sing direkta sa Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, ukon sa sanga talatapan nga nagapangalagad sa inyo pungsod. Ang mga alahas ukon iban pa nga mga bahandi mahimo man maamot. Ang isa ka malip-ot nga sulat nga nagasiling nga ini isa ka kinabubut-on nga dulot dapat ilakip sa sining mga amot.

KAHIMUSAN SA PAGDONAR NGA MAY KONDISYON

Mahimo idonar ang kuwarta upod ang pinasahi nga kondisyon nga kon kinahanglan ini sang nagdonar, ang donasyon iuli sa iya. Para sa dugang nga impormasyon, makig-angot palihug sa Treasurer’s Office sa direksion nga yara sa ibabaw.

GINPLANO NGA PAGHATAG

Dugang sa direkta nga mga dulot nga kuwarta kag pagdonar sing kuwarta nga may kondisyon, may iban pa nga paagi sa paghatag nga makabulig sa pag-alagad sa Ginharian sa bug-os nga kalibutan. Ini nagalakip sa:

Pasiguro: Ang Watch Tower Society mahimo hingadlan subong benepisyaryo sang isa ka pasiguro sa kabuhi nga polisa ukon sang isa ka plano sang pagretiro ukon pension.

Mga Deposito sa Bangko: Ang mga deposito sa bangko, mga sertipiko sang deposito, ukon indibiduwal nga deposito sa pagretiro mahimo ipatago subong butang nga ginpiyar ukon ibayad sa tion sang kamatayon sa Watch Tower Society, nahisuno sa mga kinahanglanon sang lokal nga bangko.

Stocks kag Bonds: Mahimo idonar ang stocks kag bonds sa Watch Tower Society ayhan subong isa ka direkta nga regalo.

Real Estate: Ang mahimo mabaligya nga real estate mahimo idonar sa Watch Tower Society paagi sa paghimo sing direkta nga regalo ukon paagi sa pagtigana sini sa donor, nga padayon nga makaistar sa sini tubtob buhi sia. Makig-angot sa sanga talatapan sa inyo pungsod antes himuan sing kasulatan ang bisan ano nga real estate.

Tuigan nga Bayad nga Regalo: Ang gift annuity ukon tuigan nga bayad nga regalo isa ka kahimusan diin ginasaylo sang isa ang kuwarta ukon mga stock kag bond sa Watch Tower Society. Bilang kabaylo, ang donor ukon ang isa nga gintangdo sang donor, nagabaton sing espesipiko nga tuigan nga bayad kada tuig tubtob buhi sia. Ang donor nagabaton sing income-tax deduction sa tuig nga nagsugod ang tuigan nga bayad nga regalo.

Testamento kag mga Butang nga Ginpiyar: Ang propiedad ukon kuwarta mahimo ipapanubli sa Watch Tower Society paagi sa legal nga testamento, ukon ang Watch Tower Society mahimo mahingadlan subong benepisyaryo sang isa ka kasugtanan tuhoy sa mga butang nga ginpiyar. Ang pagpiyar sang isa ka butang sa isa ka relihioso nga organisasyon subong amo ang benepisyaryo mahimo nga may yara mga bentaha sa buhis.

Subong ginapahangop sang termino nga “ginplano nga paghatag,” ini nga mga sahi sang pagdonar kinaandan nga nagakinahanglan sang pagplano sa bahin sang nagadonar. Agod buligan ang mga indibiduwal nga luyag magbulig sa bug-os kalibutan nga hilikuton sang mga Saksi ni Jehova paagi sa pila ka porma sang ginplano nga paghatag, ang brosyur nga Charitable Planning to Benefit Kingdom Service Worldwide ginhanda sa Ingles kag Espanyol. Ginsulat ang brosyur bilang sabat sa madamo nga pamangkot nga nabaton tuhoy sa mga regalo, testamento, kag mga butang nga ginpiyar. Nagaunod man ini sang dugang mapuslanon nga impormasyon tuhoy sa estate, pinansial, kag pagplano sa buhis. Nagahatag ini sing impormasyon sa mga indibiduwal tuhoy sa madamo nga paagi sang paghatag sing regalo karon ukon pagbilin sing palanublion sa tion sang kamatayon. Ini nga brosyur sarang matigayon paagi sa pagpangabay sing isa ka kopya sing direkta gikan sa Sanga Talatapan sang mga Saksi ni Jehova.

Sa tapos mabasa ang brosyur kag makapakig-angot sa Sanga Talatapan sang mga Saksi ni Jehova, madamo ang nakabulig sa mga Saksi ni Jehova sa bug-os nga kalibutan kag sa amo man nga tion, sa paghimo sini natigayon ang daku nga mga benepisyo nga ginatugot sang kahimusan sa buhis. Ang Sanga Talatapan sang mga Saksi ni Jehova dapat pahibaluon kag hatagan sing kopya sang bisan anong importante nga dokumento tuhoy sining mga kahimusan. Kon interesado ka sa bisan diin sini nga kahimusan sang ginplano nga paghatag, dapat ikaw magpakig-angot sa Sanga Talatapan sang mga Saksi ni Jehova, paagi sa pagsulat ukon paagi sa telepono, sa direksion nga ginlista sa ubos ukon sa talatapan sang mga Saksi ni Jehova sa inyo pungsod.

Sanga Talatapan Sang mga Saksi ni Jehova

Watch Tower

186 Roosevelt Avenue

San Francisco Del Monte

1105 Quezon City

Telepono: 411- 6090

[Kahon sa pahina 30]

Mga Kinaiya Sang Boluntaryo nga Paghatag

Sa iya sulat sa mga taga-Corinto, ginsambit ni apostol Pablo ang tatlo ka talalupangdon nga kinaiya sang boluntaryo nga paghatag. (1) Sang nagsulat tuhoy sa koleksion sang kuwarta, si Pablo nagsugo: “Sa kada una nga adlaw sang semana magpain ang kada isa sa inyo sa iya kaugalingon nga balay.” (1 Corinto 16:2a) Sa amo, ang paghatag dapat planuhon sing abanse, kag dapat ini himuon sing sistematiko. (2) Nagsulat man si Pablo nga ang tagsatagsa dapat maghatag “suno sa iya kinitaan.” (1 Corinto 16:2b, New International Version) Buot silingon, ang isa ka indibiduwal nga luyag maghatag sing boluntaryo makahimo sini sing nagakaigo. Bisan pa diutay lamang ang kinitaan sang isa ka Cristiano, ang diutay nga kantidad nga iya maamot ginapabaloran ni Jehova. (Lucas 21:1-4) (3) Si Pablo nagsulat pa: “Maghimo ang kada isa suno sa ginpamat-od niya sa iya tagipusuon, indi nga may aligutgot ukon sa pagpilit, kay ang Dios nagahigugma sa manughatag nga malipayon.” (2 Corinto 9:⁠7) Ang sinsero nga mga Cristiano nagahatag sing tinagipusuon​—⁠sing malipayon.

[Mga retrato sa pahina 26]

Si Nehemias isa ka tawo nga may balatyagon kag binuhatan

[Mga retrato sa pahina 30]

Ang boluntaryo nga mga amot nagasakdag sa pag-imprinta nga mga hilikuton, pagbulig sa mga biktima sang kalamidad, pagpatindog sing mga Kingdom Hall, kag sa iban pa nga mapuslanon nga mga serbisyo sa bug-os nga kalibutan