Neutral nga mga Cristiano sa Katapusan nga mga Adlaw
Neutral nga mga Cristiano sa Katapusan nga mga Adlaw
“Indi sila bahin sang kalibutan, subong nga ako indi bahin sang kalibutan.”—JUAN 17:16.
1, 2. Ano ang ginsiling ni Jesus tuhoy sa kaangtanan sang iya mga sumulunod sa kalibutan, kag ano nga mga pamangkot ang ginapautwas sang iya ginsiling?
SANG katapusan nga gab-i sang iya kabuhi subong isa ka himpit nga tawo, ginbungat ni Jesus ang isa ka malawig nga pangamuyo samtang nagapamati ang iya mga disipulo. Sa iya pangamuyo, may ginsiling sia nga nagalaragway sang kabuhi sang tanan nga matuod nga mga Cristiano. Nagapatuhoy sa iya mga sumulunod, sia nagsiling: “Ginhatag ko sa ila ang imo pulong, apang ang kalibutan nagdumot sa ila, bangod indi sila bahin sang kalibutan, subong nga ako indi bahin sang kalibutan. Nagapangabay ako sa imo, indi agod kuhaon sila gikan sa kalibutan, kundi agod bantayan sila bangod sa isa nga malauton. Indi sila bahin sang kalibutan, subong nga ako indi bahin sang kalibutan.”—Juan 17:14-16.
2 Makaduha nga nagsiling si Jesus nga ang iya mga sumulunod indi dapat mangin bahin sang kalibutan. Dugang pa, ini nga pagpain gikan sa kalibutan magadul-ong sa mga kapipit-an—dumtan sila sang kalibutan. Apang, indi dapat mahadlok ang mga Cristiano; bantayan sila ni Jehova. (Hulubaton 18:10; Mateo 24:9, 13) Bangod sang ginsiling ni Jesus, nagakaigo nga mamangkot kita: ‘Ngaa ang matuod nga mga Cristiano indi bahin sang kalibutan? Ano ang buot silingon sang mangin indi bahin sang kalibutan? Kon ang mga Cristiano ginadumtan sang kalibutan, paano nila ginatamod ang kalibutan? Paano nila ginatamod ilabi na ang mga gobierno sang kalibutan?’ Importante ang Makasulatanhon nga mga sabat sa sining mga pamangkot bangod apektado kita tanan sini.
“Naghalin Kita sa Dios”
3. (a) Ano ang nagapain sa aton gikan sa kalibutan? (b) Ano ang pamatuod nga ang kalibutan “yara sa gahom sang isa nga malauton”?
3 Ang aton suod nga kaangtanan kay Jehova amo ang isa ka rason kon ngaa indi kita bahin sang kalibutan. Si apostol Juan nagsulat: “Nahibaluan naton nga naghalin kita sa Dios, apang ang bug-os nga kalibutan yara sa gahom sang isa nga malauton.” (1 Juan 5:19) Maathag nga matuod ang ginsiling ni Juan tuhoy sa kalibutan. Ang mga inaway, krimen, kapintas, pagpamigos, pagkadibunayag, kag imoralidad nga lapnag gid karon nagapamatuod sa impluwensia ni Satanas, indi sang Dios. (Juan 12:31; 2 Corinto 4:4; Efeso 6:12) Kon ang isa ka indibiduwal mangin isa sang mga Saksi ni Jehova, indi niya paghimuon ukon pagkunsintihon ining malain nga mga buhat, kag nagahimo ini sa iya nga indi bahin sang kalibutan.—Roma 12:2; 13:12-14; 1 Corinto 6:9-11; 1 Juan 3:10-12.
4. Sa anong mga paagi ginapakita naton nga iya kita ni Jehova?
4 Si Juan nagsiling nga, tuhay sa kalibutan, ang mga Cristiano ‘naghalin sa Dios.’ Ang tanan nga nagdedikar sang ila kaugalingon kay Jehova iya ni Jehova. Si apostol Pablo nagsiling: “Kon kita nagakabuhi, nagakabuhi kita kay Jehova, kag kon kita mapatay, mapatay kita kay Jehova. Busa kon kita nagakabuhi kag kon kita mapatay, kita iya ni Jehova.” (Roma 14:8; Salmo 116:15) Bangod iya kita ni Jehova, nagahatag kita sa iya sing eksklusibo nga debosyon. (Exodo 20:4-6) Busa, wala ginadedikar sang matuod nga Cristiano ang iya kabuhi sa sekular nga mga ambisyon. Kag samtang ginatahod niya ang pungsudnon nga mga emblema, wala niya ini ginasimba, paagi sa buhat ukon sa iya tagipusuon. Wala gid niya ginasimba ang mga bituon sa isport ukon ang iban pa moderno nga mga idolo. Sa pagkamatuod, ginatahod niya ang kinamatarong sang iban sa paghimo sang luyag nila, apang ang Manunuga lamang ang ginasimba niya. (Mateo 4:10; Bugna 19:10) Nagahimo man ini sa iya nga napain gikan sa kalibutan.
“Ang Akon Ginharian Indi Bahin Sining Kalibutan”
5, 6. Paano ang pagpasakop sa Ginharian sang Dios nagahimo sa aton nga napain gikan sa kalibutan?
5 Ang mga Cristiano mga sumulunod ni Cristo Jesus kag mga sakop sang Ginharian sang Dios, nga nagahimo man sa ila nga indi bahin sang kalibutan. Sang ginakasaba si Jesus sa atubangan ni Poncio Pilato, sia nagsiling: “Ang akon ginharian indi bahin sining kalibutan. Kon ang akon ginharian bahin sining kalibutan, ang akon mga alagad nakig-away kuntani agod indi ako matugyan sa mga Judiyo. Apang, ang matuod, ang akon ginharian wala maghalin sa sini.” (Juan 18:36) Ang Ginharian amo ang paagi nga gamiton sa pagpakabalaan sang ngalan ni Jehova, sa pagbindikar sang iya pagkasoberano, kag sa paghimo sang iya kabubut-on sa duta subong sang sa langit. (Mateo 6:9, 10) Sa iya bug-os nga ministeryo, ginbantala ni Jesus ang maayong balita sang Ginharian, kag nagsiling sia nga ibantala ini sang iya mga sumulunod tubtob sa katapusan sang sistema sang mga butang. (Mateo 4:23; 24:14) Sang 1914 natuman ang matagnaon nga mga pulong sang Bugna 11:15: “Ang ginharian sang kalibutan nangin ginharian sang aton Ginuo kag sang iya Cristo, kag magagahom sia subong hari sa walay katubtuban.” Sa indi na lang madugay, ining langitnon nga Ginharian amo ang lamang nga magagahom sa katawhan. (Daniel 2:44) Sa pila ka adlaw, bisan gani ang sekular nga mga manuggahom mapilitan sa pagkilala sa awtoridad sini.—Salmo 2:6-12.
6 Ginatandaan ini tanan, ang matuod nga mga Cristiano karon mga sakop sang Ginharian sang Dios, kag ginasunod nila ang laygay ni Jesus nga ‘padayon nga pangitaon ang ginharian kag ang pagkamatarong sang Dios.’ (Mateo 6:33) Wala ini nagahimo sa ila nga di-matutom sa pungsod nga ginapuy-an nila, apang nagahimo ini sa ila nga napain sa espirituwal gikan sa kalibutan. Ang panguna nga hilikuton sang mga Cristiano karon, subong sang sa nahauna nga siglo, amo ang paghatag sing ‘maid-id nga pagpanaksi tuhoy sa ginharian sang Dios.’ (Binuhatan 28:23) Wala sing tawhanon nga gobierno ang may kinamatarong nga balabagan ining hinatag sang Dios nga hilikuton.
7. Ngaa neutral ang matuod nga mga Cristiano, kag paano nila ginpakita ini?
7 Nahisanto sa katunayan nga sila iya ni Jehova kag mga sumulunod ni Jesus kag mga sakop sang Ginharian sang Dios, ang mga Saksi ni Jehova nagapabilin nga neutral sa mga inaway sa sulod sang pungsod kag sa tunga sang mga pungsod sang ika-20 kag ika-21 nga siglo. Ginpili nila nga indi magdampig, indi mag-uyat sing armas batok kay bisan sin-o, kag indi magpalapnag sing propaganda para sa bisan anong kalibutanon nga tulumuron. Sa isa ka talalupangdon nga pagpasundayag sing pagtuo walay sapayan sang daku gid nga pagpamatok, ginsunod nila ang mga prinsipio nga ginpabutyag sa Nazi nga mga manuggahom sang Alemanya sang 1934: “Indi kami interesado sa politika, kundi dedikado gid kami sa ginharian sang Dios sa idalom ni Cristo nga iya Hari. Indi namon pagsakiton ukon paghalitan ang bisan sin-o. Malipay kami nga magkabuhi nga may kalinong kag maghimo sing maayo sa tanan nga tawo kon may kahigayunan kami.”
Mga Embahador kag mga Mensahero Para kay Cristo
8, 9. Sa anong paagi ang mga Saksi ni Jehova karon mga embahador kag mga mensahero, kag paano ini nagaapektar sa ila kaangtanan sa mga pungsod?
8 Ginlaragway ni Pablo ang iya mismo kaugalingon kag ang iya kaupod nga hinaplas nga mga Cristiano subong ‘mga embahador nga salili para kay Cristo, nga daw subong bala nga ang Dios nagapakiluoy paagi sa ila.’ (2 Corinto 5:20; Efeso 6:20) Sugod sang 1914, ang hinaplasan sang espiritu nga mga Cristiano nagakaigo nga matawag subong mga embahador para sa Ginharian sang Dios, kag sila “mga anak” sini. (Mateo 13:38; Filipos 3:20; Bugna 5:9, 10) Dugang pa, nagkuha si Jehova gikan sa mga pungsod sing “isa ka dakung kadam-an” sang “iban nga mga karnero,” ang mga Cristiano nga may dutan-on nga paglaum, agod buligan ang hinaplas nga mga anak sa ila hilikuton subong mga embahador. (Bugna 7:9; Juan 10:16) Ining “iban nga mga karnero” sarang matawag nga “mga mensahero” sang Ginharian sang Dios.
9 Ang isa ka embahador kag ang iya talapuanan wala nagapasilabot sa mga palakat sang pungsod diin nagaalagad sila. Sing kaanggid, ang mga Cristiano nagapabilin nga neutral sa politika sang mga pungsod sang kalibutan. Wala sila nagadampig ukon nagapamatok sa bisan anong pungsudnon, rasyal, sosyal, ukon ekonomiko nga grupo. (Binuhatan 10:34, 35) Sa baylo, ‘nagabuhat sila sing maayo sa tanan.’ (Galacia 6:10) Ang neutralidad sang mga Saksi ni Jehova nagakahulugan nga wala sing bisan sin-o ang may rason nga sikwayon ang ila mensahe paagi sa pagsiling nga dampig sila sa isa ka bunghay sang nabahinbahin nga rasa, pungsod, ukon tribo.
Ginapakilala sang Gugma
10. Para sa isa ka Cristiano, daw ano ka importante ang gugma?
10 Dugang pa sa nasambit na, ang mga Cristiano neutral sa mga palakat sang kalibutan bangod sang ila kaangtanan sa iban nga mga Cristiano. Si Jesus nagsiling sa iya mga sumulunod: “Sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Ang utudnon nga gugma importante sa pagka-Cristiano. (1 Juan 3:14) Naangot sa iya kaangtanan kay Jehova kag kay Jesus, ang kaangtanan sang isa ka Cristiano sa iban nga mga Cristiano suod gid. Ang iya gugma wala lamang nalimitehan sa lokal nga kongregasyon. Ginalakip sini ang “bug-os nga katilingban sang [iya] mga utod sa kalibutan.”—1 Pedro 5:9.
11. Paano ang paggawi sang mga Saksi ni Jehova naimpluwensiahan sang ila gugma sa isa kag isa?
11 Sa karon, ginapakita sang mga Saksi ni Jehova ang ila utudnon nga gugma paagi sa pagtuman sang mga pulong sang Isaias 2:4: “Salsalon nila ang ila mga espada nga mga punta sang arado kag ang ila mga bangkaw nga mga galab nga inughagbas. Ang pungsod indi magabayaw sing espada batok sa pungsod, kag indi na sila magtuon sing inaway.” Bangod ginatudluan sila ni Jehova, ang matuod nga mga Cristiano may pagpakighidait sa Dios kag sa isa kag isa. (Isaias 54:13) Bangod ginahigugma nila ang Dios kag ang ila mga utod, indi mahimo nga mag-uyat sila sing mga armas batok sa ila mga masigka-Cristiano—ukon kay bisan sin-o—sa iban nga mga pungsod. Ang ila paghidait kag paghiusa isa ka kinahanglanon nga bahin sang ila pagsimba, isa ka pamatuod nga may espiritu gid sila sang Dios. (Salmo 133:1; Miqueas 2:12; Mateo 22:37-39; Colosas 3:14) ‘Ginapangita nila ang paghidait kag ginasunod ini,’ kay nahibaluan nila nga “ang mga mata ni Jehova nagatulok sa mga matarong.”—Salmo 34:14, 15.
Kon Paano Ginatamod sang mga Cristiano ang Kalibutan
12. Ano nga panimuot ni Jehova sa katawhan sa kalibutan ang ginailog sang mga Saksi ni Jehova, kag paano?
12 Ginpahayag na ni Jehova ang iya malaglagon nga paghukom sa sining kalibutan, apang wala pa niya mahukman ang tanan nga indibiduwal sa kalibutan. Himuon niya ini paagi kay Jesus sa Iya gintalana nga tion. (Salmo 67:3, 4; Mateo 25:31-46; 2 Pedro 3:10) Samtang wala pa ini, nagapakita sia sing daku nga gugma sa katawhan. Ginhatag pa gani niya ang iya bugtong nga Anak agod nga makatigayon ang tanan sing kahigayunan nga mabaton ang kabuhi nga walay katapusan. (Juan 3:16) Subong mga Cristiano, ginailog naton ang gugma sang Dios paagi sa pagsugid sa iban sang mga kahimusan sang Dios para sa kaluwasan, bisan pa ang aton mga panikasog pirme ginasikway.
13. Paano naton dapat tamdon ang sekular nga mga manuggahom?
13 Paano naton dapat tamdon ang sekular nga mga manuggahom sa kalibutan? Ginsabat ni Pablo ini nga pamangkot sang nagsulat sia: “Ang tagsa ka kalag magpasakop sa superyor nga mga awtoridad, kay wala sing awtoridad nga indi paagi sa Dios; ang nagaluntad nga mga awtoridad ginabutang sang Dios sa ila relatibo nga mga posisyon.” (Roma 13:1, 2) Ang mga tawo nagauyat sing “relatibo” nga mga posisyon sang awtoridad (mas daku man ukon mas diutay kon ipaanggid sa isa kag isa, apang pirme nga kubos kay Jehova) bangod ginatugutan sila sang Labing Gamhanan. Ang isa ka Cristiano nagapasakop sa sekular nga awtoridad bangod isa ini ka bahin sang iya pagkamatinumanon kay Jehova. Apang, ano kon magsumpakilay ang mga ginapatuman sang Dios kag sang tawhanon nga gobierno?
Ang Kasuguan sang Dios kag ang Kasuguan ni Cesar
14, 15. (a) Sa anong paagi nalikawan ni Daniel ang pagsumpakilay may kaangtanan sa pagkamatinumanon? (b) Ano ang ginhimo sang tatlo ka Hebreo sang ang pagsumpakilay may kaangtanan sa pagkamatinumanon indi malikawan?
14 Si Daniel kag ang iya tatlo ka kaupod nagahatag sing isa ka maayong huwaran kon paano balansehon ang pagpasakop sa gobierno sang tawo kag sa awtoridad sang Dios. Sang mabihag ang apat ka pamatan-on nga mga Hebreo sa Babilonia, gintuman nila ang kasuguan sadto nga pungsod kag napilian sila dayon nga hatagan sing pinasahi nga paghanas. Bangod narealisar ni Daniel nga ang paghanas mahimo gid nga magaresulta sa pagsumpakil sa Kasuguan ni Jehova, ginpakighambal niya ini sa nagadumala nga opisyal. Subong resulta, ginhimo ang pinasahi nga mga kahimusan bilang pagtahod sa konsiensia sang apat ka Hebreo. (Daniel 1:8-17) Ginasunod sang mga Saksi ni Jehova ang huwaran ni Daniel kon mataktikanhon nga ginapaathag nila sa mga opisyales ang ila panindugan agod malikawan ang dugang pa nga mga problema.
15 Apang, sang ulihi, ang isa ka pagsumpakilay may kaangtanan sa pagpasakop indi malikawan. Ang hari sang Babilonia nagpatindog sing isa ka daku nga idolo sa kapatagan sang Dura kag ginmanduan niya ang mataas nga mga opisyales, lakip ang mga administrador sang sakop nga mga distrito, nga magtipon para sa inagurasyon sini. Sini nga tion, ang tatlo ka abyan ni Daniel natangdo nga mga administrador sang sakop nga distrito sang Babilonia, gani naaplikar sa ila ang mando. Sa isa ka bahin sini nga okasyon, ang tanan nga nagtipon dapat magyaub sa imahen. Apang nahibaluan sang mga Hebreo nga batok ini sa sugo sang Dios. (Deuteronomio 5:8-10) Gani sang nagyaub ang tanan, nagpabilin sila nga nagatindog. Bangod sang paglalis sa mando sang hari, gin-atubang nila ang posibilidad sang makahaladlok nga kamatayon, kag naluwas lamang ang ila kabuhi paagi sa isa ka milagro; apang ginpili nila nga atubangon ang posibilidad nga mapatay sa baylo nga lalison si Jehova.—Daniel 2:49–3:29.
16, 17. Ano ang ginhimo sang mga apostoles sang ginmanduan sila nga mag-untat sa pagbantala, kag ngaa?
16 Sang nahauna nga siglo, ang mga apostoles ni Jesucristo ginpaatubang sa Judiyong mga lider sa Jerusalem kag ginmanduan nga mag-untat sa pagbantala sa ngalan ni Jesus. Ano ang ila ginhimo? Ginsugo sila ni Jesus nga maghimo sing mga disipulo sa tanan nga pungsod, lakip ang Judea. Ginsugo man niya sila nga mangin mga saksi niya sa Jerusalem subong man sa tanan nga bahin sang kalibutan. (Mateo 28:19, 20; Binuhatan 1:8) Nahibaluan sang mga apostoles nga ang mga sugo ni Jesus amo ang kabubut-on sang Dios para sa ila. (Juan 5:30; 8:28) Gani, nagsiling sila: “Dapat namon tumanon ang Dios subong manuggahom sa baylo sang mga tawo.”—Binuhatan 4:19, 20; 5:29.
17 Indi rebelde ang mga apostoles. (Hulubaton 24:21) Apang, sang gindumilian sila sang tawhanon nga mga manuggahom nga himuon ang kabubut-on sang Dios, nagsiling sila, ‘Dapat namon tumanon ang Dios, indi ang tawo.’ Si Jesus nagsiling nga dapat naton ‘ibayad kay Cesar ang mga butang ni Cesar, apang ang mga butang sang Dios sa Dios.’ (Marcos 12:17) Kon ginalalis naton ang isa ka sugo sang Dios bangod ginasugo kita sang tawo nga himuon ini, ginahatag naton sa tawo ang iya sang Dios. Sa baylo, ginabayad naton ang tanan nga butang nga dapat naton bayaran kay Cesar, apang ginakilala naton ang supremo nga awtoridad ni Jehova. Sia ang Bug-os Uniberso nga Soberano, ang Manunuga, ang Ginahalinan gid sang awtoridad.—Bugna 4:11.
Magatindog Kita sing Malig-on
18, 19. Anong huwaran nga tindog ang ginhimo sang madamo sang aton kauturan, kag paano naton masunod ang ila huwaran?
18 Sa karon, ginakilala sang kalabanan nga sekular nga mga gobierno ang neutral nga tindog sang mga Saksi ni Jehova, kag ginapasalamatan naton ini. Apang sa iban nga mga pungsod, mabaskog nga ginapamatukan ang mga Saksi. Sa bug-os nga ika-20 nga siglo kag tubtob sa karon, ang pila sang aton kauturan nga mga lalaki kag mga babayi nagapanikasog sing lakas, nagapakig-away sa espirituwal nga kahulugan sing “maayong pagpakig-away sang pagtuo.”—1 Timoteo 6:12.
19 Paano kita makatindog sing malig-on kaangay nila? Una, tandaan naton nga dapat kita mag-atubang sing pagpamatok. Indi kita dapat mahadlok ukon makibot pa gani kon pamatukan kita. Ginpaandaman ni Pablo si Timoteo: “Ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Timoteo 3:12; 1 Pedro 4:12) Sa isa ka kalibutan nga naimpluwensiahan gid ni Satanas, paano posible nga indi kita pagpamatukan? (Bugna 12:17) Tubtob matutom kita, may yara gid pirme pila nga ‘nagakatingala kag padayon nga nagapasipala sa aton.’—1 Pedro 4:4.
20. Anong makapalig-on nga mga kamatuoran ang ginapahanumdom sa aton?
20 Ikaduha, kumbinsido kita nga sakdagon kita ni Jehova kag sang iya mga anghel. Subong sang ginsiling ni Eliseo sadto anay, “ang nagaupod sa aton mas madamo pa sa mga nagaupod sa ila.” (2 Hari 6:16; Salmo 34:7) Mahimo nga bangod sang iya maayong katuyuan, ginatugutan ni Jehova nga magpadayon sa sulod sang pila ka tion ang pag-ipit sang mga manugpamatok. Apang, hatagan niya kita pirme sing kusog nga kinahanglan naton agod makabatas kita. (Isaias 41:9, 10) Ang iban ginpatay, apang wala ini nagapahadlok sa aton. Si Jesus nagsiling: “Dili kamo mahadlok sa mga nagapatay sang lawas apang indi makapatay sang kalag; kundi kahadlukan ninyo ang makalaglag sang kalag kag lawas sa Gehenna.” (Mateo 10:16-23, 28) “Temporaryo nga mga pumuluyo” lamang kita sa sining sistema sang mga butang. Ginagamit naton ang aton tion diri agod “makapanguyapot . . . sing hugot sa matuod nga kabuhi,” ang kabuhi nga walay katapusan sa bag-ong kalibutan sang Dios. (1 Pedro 2:11; 1 Timoteo 6:19) Wala sing tawo nga makapugong sa aton nga matigayon ini nga padya basta nagapabilin kita nga matutom sa Dios.
21. Ano ang dapat naton tandaan pirme?
21 Busa, tandaan naton ang aton hamili nga kaangtanan kay Jehova nga Dios. Kabay nga apresyahon naton pirme ang mga kaayuhan nga ginaagom naton subong mga sumulunod ni Cristo kag mga sakop sang Ginharian. Higugmaon naton sing bug-os tagipusuon ang aton kauturan, kag kabay nga magkalipay kita pirme sa gugma nga ginapakita nila sa aton. Labaw sa tanan, pamatian naton ang mga pulong sang salmista: “Maglaum ka kay Jehova; magpakaisog ka kag pabakura ang imo tagipusuon. Huo, maglaum ka kay Jehova.” (Salmo 27:14; Isaias 54:17) Nian, kaangay sang di-maisip nga mga Cristiano nga nauna sa aton, magatindog kita sing malig-on nga may sigurado nga paglaum—matutom kag neutral nga mga Cristiano nga indi bahin sang kalibutan.
Mapaathag Mo Bala?
• Paano ang aton kaangtanan kay Jehova nagahimo sa aton nga napain gikan sa sining kalibutan?
• Subong mga sakop sang Ginharian sang Dios, paano naton ginahuptan ang neutral nga tindog sa sining kalibutan?
• Sa anong mga paagi ang aton gugma sa aton kauturan nagahimo sa aton nga neutral kag napain gikan sa kalibutan?
[Mga Pamangkot sa Pagtinuon]
[Retrato sa pahina 15]
Paano ang aton pagpasakop sa Ginharian sang Dios nagaapektar sa aton kaangtanan sa kalibutan?
[Retrato sa pahina 16]
Isa ka Hutu kag isa ka Tutsi nga malipayon nga nagapangabudlay nga magkaupod
[Retrato sa pahina 17]
Judiyo kag Arabo nga Cristiano nga mga utod
[Retrato sa pahina 17]
Ang mga Cristiano nga taga-Serbia, Bosnia, kag Croatia malipayon nga nagaupdanay
[Retrato sa pahina 18]
Ano ang husto nga himuon kon suguon kita sang mga manuggahom nga lapason ang sugo sang Dios?
