Magpadayon sa Pag-alagad sing Abaga sa Abaga

“Ihatag ko sa mga katawhan ang pagbag-o padulong sa isa ka putli nga hambal, agod sila tanan magtawag sa ngalan ni Jehova, agod maalagad sia sing abaga sa abaga.”​—⁠SOFONIAS 3:9.

1. Paano natuman ang Sofonias 3:9?

MGA 6,000 ka lenguahe ang ginapamulong karon sa bug-os nga duta. Luwas sa sini, may yara nagkalainlain nga mga dialekto, ukon mga hambal nga ginapamulong sa isa lamang ka duog. Apang, bisan pa nagahambal ang mga tawo sing mga lenguahe nga subong sa pagkatuhay sang Arabe kag Zulu, nakahimo ang Dios sing tumalagsahon gid nga butang. Ginpaposible niya nga matun-an kag mapamulong sang mga tawo bisan diin ang isa lamang ka putli nga hambal. Katumanan ini sang saad nga ginhatag paagi kay manalagna Sofonias: “Ihatag ko [Jehova nga Dios] sa mga katawhan ang pagbag-o padulong sa isa ka putli nga hambal [sing literal, “isa ka matinlo nga bibig”], agod sila tanan magtawag sa ngalan ni Jehova, agod maalagad sia sing abaga sa abaga.”​—⁠Sofonias 3:9.

2. Ano ang “putli nga hambal,” kag ano ang ginapaposible sini?

² Ang “putli nga hambal” amo ang kamatuoran sang Dios nga masapwan sa iya Pulong, ang Biblia. Ini amo ang kamatuoran ilabi na tuhoy sa Ginharian sang Dios, nga magapakabalaan sang ngalan ni Jehova, magabindikar sang iya pagkasoberano, kag magapakamaayo sa katawhan. (Mateo 6:​9, 10) Subong amo lamang ang matinlo nga hambal sa duta sa espirituwal nga paagi, ang putli nga hambal ginapamulong sang katawhan sa tanan nga mga kapungsuran kag mga rasa. Nagapaposible ini sa ila nga maalagad si Jehova sing “abaga sa abaga.” Sa amo ginaalagad nila sia sing nahiusa, ukon “sing hilisugot.”​—⁠The New English Bible.

 Indi Duog Para sa Pagpakita sing Pagpasulabi

3. Ano ang nagapaposible sa aton nga maalagad si Jehova nga may paghiusa?

³ Subong mga Cristiano, nagapasalamat kita sa kooperasyon nga nagaluntad sa tunga naton walay sapayan sang nanuhaytuhay nga mga hambal. Bisan pa ginabantala naton ang maayong balita sang Ginharian sa madamo nga mga lenguahe sang tawo, nagaalagad kita sa Dios nga may paghiusa. (Salmo 133:⁠1) Posible ini bangod, bisan diin man kita nagapuyo sa duta, nagapamulong kita sing isa ka putli nga hambal sa kadayawan ni Jehova.

4. Ngaa dapat wala sing pagpasulabi sa tunga sang katawhan sang Dios?

⁴ Dapat nga wala sing pagpasulabi sa tunga sang katawhan sang Dios. Maathag nga ginpakita ini ni apostol Pedro sang nagbantala sia sa puluy-an sang Gentil nga senturyon nga si Cornelio sang 36 C.⁠E. kag napahulag sia sa pagsiling: “Pat-od nga nahantop ko nga ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.” (Binuhatan 10:​34, 35) Sanglit matuod ini, ang Cristianong kongregasyon indi duog para sa pagpasulabi, paggrupogrupo, ukon paboritismo.

5. Ngaa indi husto nga mag-organisar sing magagmay nga mga grupo sa kongregasyon?

⁵ Tuhoy sa pagduaw niya sa Kingdom Hall, ang isa ka kolehiyala nagsiling: “Sa masami, ang mga simbahan nagaganyat sa mga katapo sang isa ka rasa ukon minoridad nga grupo. . . . Ang mga Saksi ni Jehova nagapungko sing ululupod kag indi sing grupogrupo.” Apang, ang iban nga mga katapo sang kongregasyon sa dumaan nga Corinto nagatuga sing pagbinahinbahin. Bangod sang pagtuga sing pagbinahinbahin, ginpamatukan nila ang pagpanghikot sang balaan nga espiritu sang Dios, kay nagapauswag ini sang paghiusa kag paghidait. (Galacia 5:22) Kon ginapauswag naton ang pagorganisar sing magagmay nga mga grupo sa kongregasyon, ginapamatukan naton ang mga pagtuytoy sang espiritu. Busa, tandaan naton ang ginsiling ni apostol Pablo sa mga taga-Corinto: “Ginapakiluoy ko sa inyo, mga kauturan, paagi sa ngalan sang aton Ginuong Jesucristo nga dapat kamo tanan maghambal nga may paghilisugot, kag dapat nga walay pagbinahinbahin sa  tunga ninyo, kundi maghiusa kamo sa isa ka painuino kag isa ka panghunahuna.” (1 Corinto 1:10) Ginpadaku man ni Pablo ang paghiusa sa iya sulat sa mga taga-Efeso.​—⁠Efeso 4:1-6, 16.

6, 7. Ano ang ginlaygay ni Santiago may kaangtanan sa paboritismo, kag paano maaplikar ang iya mga pulong?

⁶ Ang indi pagpakita sing pagpasulabi ginapatuman sa mga Cristiano halin sang una. (Roma 2:11) Bangod ang iban sa unang-siglo nga kongregasyon nagpakita sing paboritismo sa mga manggaranon, si disipulo Santiago nagsulat: “Mga kauturan ko, wala kamo nagapanguyapot sa pagtuo sang aton Ginuong Jesucristo, ang aton himaya, nga may mga buhat sang paboritismo, kamo bala? Kay, kon ang isa ka tawo nga may mga singsing nga bulawan sa iya mga tudlo kag may matahom nga panapton magsulod sa inyo pagtinipon, apang ang isa ka imol nga tawo nga may mahigko nga panapton magasulod man, apang ginatan-aw ninyo nga may pabor ang isa nga nagasuksok sing matahom nga panapton kag nagasiling: ‘Maglingkod ka diri sa isa ka maayo nga duog,’ kag nagasiling ka sa isa nga imol: ‘Magpabilin ka nga nagatindog,’ ukon: ‘Maglingkod ka didto sa akon tiilan,’ may pagpasulabi kamo sa tunga ninyo kag nangin mga hukom kamo nga nagahatag sing malaut nga mga desisyon, indi bala?”​—⁠Santiago 2:1-4.

⁷ Kon ang manggaranon nga mga di-tumuluo nga may mga singsing nga bulawan kag matahom nga mga panapton magtambong sa isa ka Cristianong miting kag subong man ang imol nga mga di-tumuluo nga may mahigko nga panapton, ang mga manggaranon ginapakitaan sing pinasahi nga igtalupangod. Ginahatagan sila sing mga pulungkuan sa “maayo nga duog,” samtang ang mga imol ginapatindog ukon ginapalingkod sa tiilan sang isa. Apang ang Dios walay pasulabi nga nag-aman sang halad nga gawad ni Jesus para sa mga manggaranon kag mga imol. (Job 34:19; 2 Corinto 5:14) Gani agod mapahamut-an naton si Jehova kag maalagad sia sing abaga sa abaga, indi kita dapat magpakita sing paboritismo ukon ‘magdayaw sa mga personalidad para sa aton kaugalingon nga kaayuhan.’​—⁠Judas 4, 16.

Indi Magkumod

8. Ano ang natabo bangod sang pagkumod sang mga Israelinhon?

⁸ Agod mahuptan ang aton paghiusa kag padayon nga mapahamut-an ang Dios, dapat naton pamatian ang laygay ni Pablo: “Padayon nga himua ninyo ang tanan nga butang nga walay pagkumod.” (Filipos 2:​14, 15) Ang di-matutom nga mga Israelinhon nga ginhilway gikan sa pagkaulipon sa Egipto nagkumod batok kay Moises kag kay Aaron kag busa kay Jehova nga Dios pa gani. Bangod sini, ang tanan nga kalalakin-an nga nagaedad sing 20 anyos paibabaw, luwas sa matutom nga sanday Josue kag Caleb kag sa mga Levinhon, wala makasulod sa Ginsaad nga Duta kundi napatay sila sa tion sang 40-ka-tuig nga paglakbay sang Israel sa kahanayakan. (Numeros 14:​2, 3, 26-​30; 1 Corinto 10:10) Daku gid ang ila ginbayad bangod sang pagkumod nila!

9. Ano ang naagihan ni Miriam bangod sang iya pagkumod?

⁹ Ginapakita sini kon ano ang mahimo matabo sa isa ka bug-os nga pungsod nga nagakumod. Kamusta naman ang indibiduwal nga mga palakumod? Ti, ang utod nga babayi ni Moises, nga si Miriam, upod sang iya utod nga si Aaron, nagkumod: “Paagi lamang bala kay Moises nga nagpamulong si Jehova? Indi bala nga paagi man sa aton nga nagapamulong sia?” Ang rekord nagdugang: “Nagapamati si Jehova.” (Numeros 12:​1, 2) Ang resulta? Si Miriam, nga mahimo gid amo ang nanguna sa sini nga pagyamo, ginpaubos sang Dios. Paano? Ginpahanabo sang Dios nga magmasakit sia sing aro kag gani napilitan sia nga magpabilin sa guwa sang kampo sa sulod sang pito ka adlaw tubtob matinluan sia.​—⁠Numeros 12:9-15.

10, 11. Sa ano mahimo magresulta ang pagkumod kon indi pagtapnaon? Iilustrar.

¹⁰ Ang pagkumod indi lamang pagyamo sa pila  ka sala. Ang mga palakumod nagakabalaka sing tuman sa ila mga balatyagon ukon posisyon, nga ginapatalupangod ang ila kaugalingon sa baylo nga ang Dios. Kon indi matapna, magatuga ini sing pagbinahinbahin sa tunga sang espirituwal nga mga kauturan kag magabalabag sa ila mga panikasog nga mag-alagad kay Jehova sing abaga sa abaga. Amo sini bangod ang mga palakumod pirme nagapautwas sang ila mga reklamo, nga nagalaum gid nga ang iban magasimpatiya sa ila.

¹¹ Halimbawa, mahimo mulayon sang isa kon paano ginahatag sang isa ka gulang ang iya mga bahin sa kongregasyon ukon ginahimo ang iya mga katungdanan. Kon magpamati kita sa nagareklamo, mahimo magasugod kita sa paghunahuna sing subong man sa iya. Antes matanom sa aton hunahuna ang binhi sang pagkadikontento, mahimo nga wala kita maugot sa ginahimo sang gulang, apang sa karon naugot na kita. Sa ulihi, ang gulang wala na sing ginahimo nga husto sa panulok naton, kag mahimo man kita magasugod sa pagyamo batok sa iya. Ini nga sahi sang paggawi indi nagakaigo sa kongregasyon sang katawhan ni Jehova.

12. Ano ang mahimo nga epekto sang pagkumod sa aton kaangtanan sa Dios?

¹² Ang pagkumod tuhoy sa mga lalaki nga ang katungdanan nila amo ang pagbantay sa panong sang Dios mahimo magdul-ong sa pasipala. Ining pagkumod ukon mapasipalahon nga pagpakamalaut sa ila makahalit sang aton kaangtanan kay Jehova. (Exodo 22:28) Ang di-mahinulsulon nga mga manugpasipala indi makapanubli sang Ginharian sang Dios. (1 Corinto 5:11; 6:10) Si disipulo Judas nagsulat tuhoy sa mga palakumod nga “nagapakawalay pulos sang pagkaginuo kag nagapamulong sing may pag-abuso tuhoy sa mga mahimayaon,” ukon responsable nga mga lalaki sa kongregasyon. (Judas 8) Yadtong mga palakumod wala ginkahamut-an sang Dios, kag maalamon nga ginalikawan naton ang ila malaut nga dalanon.

13. Ngaa indi tanan nga mga reklamo malain?

¹³ Apang, indi tanan nga mga reklamo di-kalahamut-an sa Dios. Wala niya ginpabungulan ang “singgit sang pagyamo” tuhoy sa Sodoma kag Gomorra kundi ginlaglag niya yadtong malauton nga mga siudad. (Genesis 18:​20, 21; 19:​24, 25) Sa Jerusalem, wala madugay pagkatapos sang Pentecostes sang 33 C.⁠E., “nag-utwas ang pagkumod sa bahin sang nagapamulong-sing-Griego nga mga Judiyo batok sa nagapamulong-sing-Hebreo nga mga Judiyo, bangod ang ila balo nga mga babayi napabayaan sa adlaw-adlaw nga pagpanagtag.” Gani, gintadlong sang “napulog-duha” ang kahimtangan paagi sa pagtangdo sing “pito ka lalaki nga may maayo nga kadungganan” nga amo ang magdumala sang “kinahanglanon nga hilikuton” sa pagpanagtag sing pagkaon. (Binuhatan 6:​1-6) Ang mga gulang karon indi dapat ‘magpabungol’ sa makatarunganon nga mga reklamo. (Hulubaton 21:13) Kag sa baylo nga mulayon ang mga masigkatumuluo, ang mga gulang dapat mangin makapalig-on kag makapabakod.​—⁠1 Corinto 8:1.

14. Agod indi magkumod, ano nga kinaiya ang ilabi na nga kinahanglanon?

¹⁴ Tanan kita indi dapat magkumod, kay ang espiritu sang pagreklamo makahalalit sa espirituwal. Ini nga panimuot magatublag sang aton paghiusa. Sa baylo, pirme naton tugutan ang balaan nga espiritu nga magpatubas sing gugma sa aton. (Galacia 5:22) Ang pagsunod sa ‘harianon nga kasuguan sang gugma’ magabulig sa aton nga padayon nga mag-alagad kay Jehova sing abaga sa abaga.​—⁠Santiago 2:⁠8; 1 Corinto 13:​4-8; 1 Pedro 4:8.

Magbantay Batok sa Pasipala

15. Paano mo ipatuhay ang kutsokutso sa pasipala?

¹⁵ Sanglit ang pagkumod mahimo magdul-ong sa makahalalit nga kutsokutso, dapat kita maghalong sa aton ginahambal. Ang kutsokutso isa ka walay pulos nga hambal tuhoy sa mga tawo kag sa ila ginahimo. Apang, ang pasipala isa ka butig nga report sa tuyo nga gub-on ang reputasyon sang isa ka tawo. Ini nga hambal malain kag di-diosnon. Busa ang Dios nagsiling sa mga Israelinhon: “Indi ka maglibot sa tunga sang imo katawhan agod magpasipala.”​—⁠Levitico 19:16.

16. Ano ang ginsiling ni Pablo tuhoy sa pila ka palakutsokutso, kag paano kita dapat maapektuhan sini nga laygay?

¹⁶ Sanglit ang walay pulos nga hambal mahimo magdul-ong sa pasipala, maisog nga ginsabdong ni Pablo ang pila ka palakutsokutso. Sa tapos masambit ang balo nga mga babayi nga nagakaigo nga buligan sang kongregasyon, ginsambit niya ang balo nga mga babayi nga “wala sing ginahimo, nagapamalaybalay; huo, indi lamang nga wala sing ginahimo, kundi mga palakutsokutso man kag mga mahilabtanon sa ginahimo sang iban nga mga tawo, nagahambal sing mga butang nga indi dapat.” (1 Timoteo 5:11-15) Kon makita  sang isa ka Cristianong babayi nga may kaluyahon sia sa sahi sang hambal nga mahimo magdul-ong sa pasipala, dapat niya pamatian ang laygay ni Pablo nga mangin “serioso, indi mapasipalahon.” (1 Timoteo 3:11) Sa pagkamatuod, ang Cristianong mga lalaki dapat man magbantay batok sa makahalalit nga kutsokutso.​—⁠Hulubaton 10:19.

Mag-untat sa Paghukom!

17, 18. (a) Ano ang ginsiling ni Jesus tuhoy sa paghukom sa aton utod? (b) Paano naton maaplikar ang pinamulong ni Jesus tuhoy sa paghukom?

¹⁷ Bisan pa wala kita sing ginapasipalahan, mahimo nga dapat gid kita manikasog nga indi mangin mahinukmanon. Ginpakamalaut ni Jesus ini nga panimuot sang nagsiling sia: “Mag-untat na kamo sa paghukom agod indi kamo paghukman; kay sa paghukom nga inyo ginahukom, hukman kamo; kay sa talaksan nga ginataksan ninyo, takson nila kamo. Nian, ngaa ginatan-aw mo ang dagami sa mata sang imo utod, apang wala mo ginasapak ang balayanon sa imo kaugalingon nga mata? Ukon paano mo masiling sa imo utod, ‘Tuguti ako sa pagkuha sang dagami gikan sa imo mata’; samtang, yari karon! may balayanon ang imo kaugalingon nga mata? Salimpapaw! Kuhaa anay ang balayanon gikan sa imo kaugalingon nga mata, kag nian makita mo sing maathag kon paano kuhaon ang dagami gikan sa mata sang imo utod.”​—⁠Mateo 7:1-5.

¹⁸ Indi kita dapat mangahas sa pagboluntaryo nga kuhaon ang “dagami” sa mata sang aton utod agod buligan sia samtang ang aton mismo ikasarang sa paghimo sing nagakaigo nga paghukom ginabalabagan sang malaragwayon nga “balayanon.” Sa katunayan, kon nahangpan gid naton kon daw ano ka maluluy-on ang Dios, indi kita mahuyog nga hukman ang aton espirituwal nga mga kauturan. Imposible nga mahangpan naton sila subong sa paghangop sang aton langitnon nga Amay. Indi katingalahan nga ginpaandaman kita ni Jesus nga ‘mag-untat sa paghukom agod indi kita paghukman’! Ang bunayag nga pagtulutimbang sa aton mga pagkadihimpit dapat magpugong sa aton sa paghimo sing mga paghukom nga mahimo kabigon sang Dios nga di-matarong.

Mahuyang Apang Dungganon

19. Paano naton dapat tamdon ang mga masigkatumuluo?

¹⁹ Kon determinado kita nga mag-alagad sa Dios sing abaga sa abaga upod sa aton mga masigkatumuluo, indi lamang naton dapat likawan nga hukman ang iban. Magapanguna kita sa pagpakita sa ila sing dungog. (Roma 12:10) Sa katunayan, pangitaon naton ang ila kaayuhan, indi ang aton, kag malipayon nga magahimo sing kubos nga mga hilikuton para sa ila. (Juan 13:12-17; 1 Corinto  10:24) Paano naton mahuptan ining dalayawon nga panimuot? Paagi sa pagdumdom nga ang tagsa ka tumuluo hamili kay Jehova kag kinahanglan naton ang isa kag isa, subong nga kinahanglan sang tagsa ka bahin sang tawhanon nga lawas ang iban nga bahin.​—⁠1 Corinto 12:14-27.

20, 21. Ano ang kahulugan para sa aton sang ginasiling sang 2 Timoteo 2:​20, 21?

²⁰ Matuod nga ang mga Cristiano mahuyang nga mga suludlan nga human sa daga nga gintulinan sing matahom nga bahandi sang ministeryo. (2 Corinto 4:⁠7) Agod matuman naton ining sagrado nga hilikuton sa kadayawan ni Jehova, dapat naton huptan ang dungganon nga tindog sa atubangan niya kag sang iya Anak. Paagi lamang sa pagpabilin nga putli sa moral kag espirituwal nga makapabilin kita nga isa ka dungganon nga suludlan para gamiton sang Dios. May kaangtanan sini, si Pablo nagsulat: “Sa isa ka daku nga balay may mga suludlan nga indi lamang bulawan kag pilak kundi kahoy kag daga man, kag ang pila para sa isa ka dungganon nga katuyuan apang ang iban para sa isa ka di-dungganon nga katuyuan. Busa, kon ang isa magpahilayo sa mga naulihi, mangin suludlan sia para sa isa ka dungganon nga katuyuan, ginpakabalaan, mapuslanon sa nagapanag-iya sa iya, ginhanda para sa tagsa ka maayo nga buhat.”​—⁠2 Timoteo 2:​20, 21.

²¹ Ang mga indibiduwal nga wala nagagawi suno sa ginapatuman sang Dios ‘mga suludlan nga di-dungganon.’ Apang, paagi sa paglakat sa diosnon nga dalanon, kita mangin ‘mga suludlan para sa dungganon nga katuyuan, ginpakabalaan, ukon ginpain, para sa pag-alagad kay Jehova kag ginhanda para sa tagsa ka maayo nga buhat.’ Gani nagakaigo nga pamangkuton naton ang aton kaugalingon: ‘Ako bala isa ka “dungganon nga suludlan”? Maayo bala ako nga impluwensia sa mga masigkatumuluo? Isa bala ako ka katapo sang kongregasyon nga nagapangabudlay sing abaga sa abaga upod sa mga masigkasumilimba?’

Padayon sa Pag-alagad sing Abaga sa Abaga

22. Sa ano mahimo mapaanggid ang Cristianong kongregasyon?

²² Ang Cristianong kongregasyon daw isa ka pamilya nga kahimusan. May yara mahigugmaon, mabinuligon, kag makalilipay nga kahimtangan sa isa ka pamilya kon ang tanan nga mga katapo sini nagasimba kay Jehova. Ang isa ka pamilya mahimo nga ginatapuan sang pila ka indibiduwal nga may lainlain nga mga personalidad, apang ang tanan may dungganon nga duog. Amo man sini sa kongregasyon. Bisan pa kita tanan nagakalainlain​—⁠kag di-himpit⁠​—⁠ginbuyok kita sang Dios sa iya paagi kay Cristo. (Juan 6:44; 14:⁠6) Si Jehova kag si Jesus nagahigugma sa aton, kag kaangay sang isa ka nahiusa nga pamilya, kinahanglan gid naton nga pakitaan sing gugma ang isa kag isa.​—⁠1 Juan 4:7-11.

23. Ano ang dapat naton tandaan kag determinado nga himuon?

²³ Ang daw pamilya nga Cristianong kongregasyon isa man ka duog diin nagakaigo kita nga magpaabot nga makakita sing pagkamainunungon. Si apostol Pablo nagsulat: “Luyag ko nga sa tagsa ka duog ang mga lalaki magpadayon sa pagpangamuyo, nga ginabayaw ang mainunungon nga mga kamot, nga wala sing kaakig kag mga binais.” (1 Timoteo 2:⁠8) Sa amo gin-angot ni Pablo ang pagkamainunungon sa dayag nga pangamuyo “sa tagsa ka duog” diin nagatipon ang mga Cristiano. Ang matutom nga mga lalaki lamang ang dapat magtiglawas sa kongregasyon sa dayag nga pangamuyo. Sa pagkamatuod, ang Dios nagapaabot sa aton tanan nga mangin mainunungon sa iya kag sa isa kag isa. (Manugwali 12:​13, 14) Busa mangin determinado kita nga magbuligay sing nahiusa, kaangay sang mga bahin sang tawhanon nga lawas. Kabay nga mag-alagad man kita sing nahiusa subong bahin sang pamilya sang mga sumilimba ni Jehova. Labaw sa tanan, tandaan naton nga kinahanglan naton ang isa kag isa kag maagom naton ang kahamuot kag mga pagpakamaayo sang Dios kon padayon kita nga mag-alagad kay Jehova sing abaga sa abaga.

Paano Mo Sabton?

• Ano ang nagapaposible para sa katawhan ni Jehova nga alagaron sia sing abaga sa abaga?

• Ngaa ang mga Cristiano nagalikaw sa pagpasulabi?

• Ano ang masiling mo nga malain sa pagkumod?

• Ngaa dapat naton padunggan ang mga masigkatumuluo?

[Mga Pamangkot sa Pagtinuon]

[Retrato sa pahina 15]

Nahantop ni Pedro nga ang “Dios wala sing ginapasulabi”

[Retrato sa pahina 16]

Nakahibalo ka bala kon ngaa ginpaubos sang Dios si Miriam?

[Retrato sa pahina 18]

Ang mainunungon nga mga Cristiano malipayon nga nagaalagad kay Jehova sing abaga sa abaga