Mga Duog sang Pagsimba—Kinahanglan Bala Naton Ini?

‘Ang linibo ka peregrino nga nagasuksok sang masili kag dekolor nga mga bayo nga naghalin sa nagkalainlain nga bahin sang pungsod, ang mga grupo sang mga Indian nga nagasaot sang antes-Katsila nga panahon kuno nga mga saot suno sa tunog sang mga tambor, kag ang mga nagapenitensia nga nagalakat sing paluhod kag nagaagi sa tunga sang kadam-an pakadto sa altar amo ang nagpuno sang luwang sang basilica kag sang mga dalan sa palibot sini.’

AMO sini ang paglaragway sang pamantalaan nga El Economista sa tuman kadaku nga kadam-an sang Disiembre 2001. Sadtong tion mga tatlo ka milyon ka tawo ang nagduaw sa basilica sa Mexico City agod ipakita ang ila pagtuo sa Birhen sang Guadalupe. Madamo man ang nagkadto sa iban nga relihioso nga mga edipisyo, subong sang St. Peter’s Basilica sa Roma.

Ang relihioso nga mga tinukod may pinasahi nga bahin sa tagipusuon sang madamo nga luyag magsimba sa Dios. “Para sa akon, ang simbahan isa ka duog nga puwede ako mangin suod sa Dios,” siling ni Maria nga taga-Brazil. “Isa ini ka balaan nga duog. Nagapati ako nga ang pagkadto sa simbahan nagatinlo sang kalag kag isa ka sala kon indi ako magkadto sa Misa kag magkumpisar kada Domingo.” Si Consuelo nga taga-Mexico nagsiling: “Ang simbahan nagatandog gid sang akon balatyagon; ginapakabahandi ko gid ini. Samtang didto ako, pamatyag ko daw yara ako sa langit.”

Samtang ginatamod sang pila nga importante gid ang mga simbahan, ang iban naman nagaduhaduha kon bala kinahanglan pa ini sa pagsimba. Nagahambal tuhoy sa diutay nga tumalambong sa simbahan, si Peter Sibert, isa ka Katoliko nga pari sa Inglaterra, nagsiling: “Ginapili sang [mga tawo] ang mga bahin sang relihion nga luyag nila. Madamo nga tigulang nga mga tawo ang Katoliko kag nagakabuhi sila suno sa ila pagtuo​—⁠apang ang mga lamharon wala nagabatyag nga may salabton.” Ang Daily Telegraph sang London sang Nobiembre 20, 1998, nagsiling: “Sugod sang 1979 mga 1,500 ka  simbahan ang nagsira sa Inglaterra kon ipaanggid sa 495 ka simbahan nga ginbuksan kag 150 nga ginkay-o.”

Sang 1997, ang pamantalaan nga Süddeutsche Zeitung sang Munich, Alemanya, nagreport: “Ginhimo nga mga sinehan kag mga apartment ang mga simbahan: Wala na nagasimba ang mga tumuluo, ang mga duog sang pagsimba gingamit sa iban nga katuyuan. . . . Ang nangin kinaandan nga buhat sa Netherlands ukon sa Inglaterra ginahimo na sa Alemanya.” Ini nagdugang: “Masapwan sang isa ang mga 30 ukon 40 ka talalupangdon nga baligyaanay sang mga simbahan sa Alemanya sang nagligad lang nga pila ka tuig.”

Kinahanglan gid bala ang relihioso nga mga bilding sa pagsimba sa Dios? May sulundan bala sa Kasulatan ang mga basilica kag ang sobra sing dekorasyon nga mga simbahan? Ano nga sahi sang mga bilding ang naangot sa pagsimba sa matuod kag buhi nga Dios? Ano ang matun-an naton gikan sa sini tuhoy sa pagkinahanglan sing mga duog sang pagsimba kag sa dapat matabo didto?