Mga Pamangkot Gikan sa mga Bumalasa

Dapat gid bala tumanon pirme ang mga panumpa sa Dios?

Sa Biblia, ang panumpa isa ka serioso nga saad sa Dios nga himuon ang isa ka buhat, nga magdulot sing halad, magsugod sa paghimo sing isa ka pinasahi nga butang ukon katungdanan, ukon maglihi gikan sa pila ka butang nga wala man gid ginadilian. Ang Biblia may mga rekord sang mga panumpa nga may kondisyon kag nagadalahig ini sing panaad nga himuon ang isa ka butang kon maghimo anay sing isa ka butang ang Dios. Halimbawa, si Ana nga iloy ni manalagna Samuel ‘nanumpa kag nagsiling: “O Jehova sang mga kasuldadusan, kon . . . indi mo pagkalimtan ang imo ulipon nga babayi kag hatagan mo gid ang imo ulipon nga babayi sing anak nga lalaki, ihatag ko sia kay Jehova sa tanan nga adlaw sang iya kabuhi, kag wala sing labaha nga magaagi sa iya ulo.” ’ (1 Samuel 1:11) Ginalaragway man sang Biblia ang mga panumpa subong boluntaryo. Dapat gid bala tumanon ang mga panumpa sa Dios?

“Kon nanumpa ka sing isa ka panumpa sa Dios,” siling ni Hari Solomon sang dumaan nga Israel, “indi ka magpangalag-ag sa pagtuman sini.” Nagsiling pa sia: “Ang ginapanumpa mo, tumana. Mas maayo pa nga indi ka magpanumpa sangsa manumpa ka kag indi pagtumanon.” (Manugwali 5:​4, 5) Ang Kasuguan nga ginhatag sa Israel paagi kay Moises nagasiling: “Kon manumpa ka sing isa ka panumpa kay Jehova nga imo Dios, indi ka magpalantang sa pagtuman sini, bangod pat-od nga sukton ini sa imo ni Jehova nga imo Dios, kag ini gid mangin sala sa imo.” (Deuteronomio 23:21) Maathag nga ang pagpanumpa sa Dios isa ka serioso nga butang. Dapat ini himuon nga may nagakaigo nga motibo, kag ang nagahimo sini dapat wala nagaduhaduha sa iya ikasarang sa pagtuman sa bisan ano nga ginpanumpa niya. Kay kon indi, maayo pa nga wala na lang sia magpanumpa. Apang kon nakapanumpa na, dapat gid bala tumanon ang tanan nga panumpa?

Kamusta kon ang isa ka panumpa nagakinahanglan sa isa nga himuon ang isa ka butang nga nahibaluan niya sa ulihi nga indi gali nahisuno sa kabubut-on sang Dios? Pananglitan isa ini ka panumpa nga sa pila ka paagi nagaangot sang imoralidad sa matuod nga pagsimba? (Deuteronomio 23:18) Maathag nga indi dapat pagtumanon ini nga panumpa. Dugang pa, sa idalom sang Mosaikong Kasuguan, ang isa ka panumpa nga ginhimo sang isa ka babayi mahimo anulahon sang iya amay ukon sang iya bana.​—⁠Numeros 30:3-15.

Binagbinaga man ang kahimtangan sang isa ka indibiduwal nga nanumpa sa Dios nga magpabilin nga di-minyo apang nagaduhaduha na karon. Ang iya panumpa nagbutang sa iya sa kahimtangan nga kon tumanon niya ini basi malapas niya ang mga talaksan sang Dios tuhoy sa moralidad. Dapat bala niya gihapon panikasugan nga tumanon ang iya panumpa? Indi bala mas maayo nga amligan niya ang iya kaugalingon batok sa paghimo sing imoralidad paagi sa indi pagtuman sang iya panumpa kag sa baylo magpakiluoy sa Dios kag magpangayo sang Iya kapatawaran? Sia lamang ang makadesisyon sa sini. Wala sing iban nga tawo ang makadesisyon para sa iya.

Kamusta naman kon ang isa nagpanumpa kag narealisar niya sang ulihi nga ginhimo niya ini sing padasudaso? Dapat bala niya gihapon tinguhaan nga tumanon ini nga panumpa? Indi mahapos para kay Jefte nga tumanon ang iya panumpa sa Dios, apang ginhimo gid niya ini. (Hukom 11:30-​40) Ang indi pagtuman sang isa ka tawo sa iya panumpa ‘makapaakig’ sa Dios kag makaguba sang iya hinimuan.  (Manugwali 5:⁠6) Ang pagpakadiutay sa pagtuman sing isa ka panumpa mahimo magresulta sa di-kahamuot sang Dios.

Si Jesucristo nagsiling: “Ang inyo pulong nga Huo magakahulugan sing Huo, ang inyo Indi, Indi; kay ang bisan ano nga labi pa sa sini nagagikan sa isa nga malauton.” (Mateo 5:37) Dapat kabalak-an sang isa ka Cristiano indi lamang ang pagtuman sa iya mga panumpa sa Dios kundi ang pagkamasaligan man niya sa tanan niya nga ginasiling​—⁠sa Dios kag sa mga tawo. Ano kon naghimo sia sing kasugtanan sa isa ka tawo nga daw maayo sa umpisa apang sang mausisa na daw kabuangan gali? Indi niya dapat pagpakadiutayon ini nga butang. Apang bangod sang maayo nga paghambalanay, mahimo nga hilwayon sia sang isa sa salabton.​—⁠Salmo 15:⁠4; Hulubaton 6:​2, 3.

May kaangtanan sa mga panumpa kag sa iban pa nga mga butang, ano gid ang dapat naton nga kabalak-an? Tinguhaan gid naton pirme nga huptan ang maayo nga kaangtanan kay Jehova nga Dios.

[Mga retrato sa pahina 30, 31]

Wala mangalag-ag si Ana sa pagtuman sang iya panumpa

[Mga retrato sa pahina 30, 31]

Bisan pa mabudlay, gintuman ni Jefte ang iya panumpa