Mga Panikasog nga Nagapasanyog sang Maayo nga mga Talaksan sa Moral
Mga Panikasog nga Nagapasanyog sang Maayo nga mga Talaksan sa Moral
Sang talipuspusan sang 2001, ang mga nagapamati sa pungsudnon nga pagwaragwag sang Radyo Mozambique nakabati sini nga pahibalo:
“Ang presidente sang Republika nagduaw sa mga pasilidad sang sanga sang mga Saksi ni Jehova sa Maputo. Ginpalig-on niya ining relihioso nga kongregasyon nga dugangan pa ang ila mga panikasog sa pagpasanyog sing maayo nga mga talaksan sa moral sa mga pamilya kag sa ila mga programa sang pagtudlo sa mga hamtong sa pagbasa kag sa pagsulat. Mga 10,000 ka tawo ang nakabenepisyo na sa sini nga mga programa. Suno kay Presidente Chissano, ang mga programa kaangay sini dapat dayawon, bangod mapuslanon gid ini nga bulig sa katilingban sa paglubad sa mga problema sa edukasyon nga ginaatubang sini nga pungsod.”
Ang pahibalo nagpadayon paagi sa ginrekord nga bahin sang pamulongpulong sang presidente: “Makapalig-on gid para sa amon nga makita nga interesado ang madamo nga tawo nga makatuon sa pagbasa kag sa pagsulat. Ginapakita sini sa amon nga ang ordinaryo nga mga banwahanon magabulig sa amon agod mabuhinan sing daku ang kadamuon sang mga indi makahibalo magbasa kag magsulat. Gani, luyag ko gid palig-unon ang mga Saksi ni Jehova nga dugangan pa ang ila mga programa sang pagtudlo sa pagbasa kag sa pagsulat, sa bisan ano man nga lenguahe. Ang importante gid amo nga ang mga tawo makahibalo magbasa kag magsulat kag makakomunikar sila sing mas mahapos kag sa ulihi makapakigbahin sing daku sa programa sang pagpanudlo.”
Ang mga Saksi ni Jehova sa Mozambique nagahiwat sing mga klase nga nagatudlo sa pagbasa kag sa pagsulat sa 850 ka duog sa bug-os nga pungsod agod nga ang mga tawo makabasa sang Pulong sang Dios. Dugang pa, nagadumala sila sing mga 50,000 ka wala sing bayad nga pagtuon sa Biblia kada semana. Ini tanan bahin sang bug-os kalibutan nga programa sang pagpanudlo sa Biblia nga nagalab-ot na karon sa 235 ka pungsod. (Mateo 24:14) Mahimo man ikaw makabenepisyo sa sini nga programa. Palihug indi magpangalag-ag sa pagkontak sa mga Saksi ni Jehova sa inyo duog.
